ᑐᓴᕋᑦᓴᓕᕆᔩᑦ

ᐱᓕᕆᖃᑎᒌᖕᓂᖅ ᐃᑲᔪᖅᑐᐃᓂᖕᒧᑦ ᐃᓄᒃᑐᑦ ᐃᓕᓐᓂᐊᕐᓂᖅ ᓄᓇᕗᒻᒥᑦ

ᐃᖃᓗᐃᑦ – ᒫᔾᔨ 9, 2021
ᐃᓄᐃᑦ ᐊᑲᐅᓛᕐᒦᑦᑐᑦ ᐅᑎᑦᑎᑦᑎᓂᖕᒥᑦ, ᐊᑐᒃᑲᓐᓂᓕᕐᓂᖕᒥᑦ, ᓴᙱᒃᑎᒋᐊᖅᑎᑦᑎᓂᖕᒥᑦ ᐱᓯᒪᒃᓰᓐᓇᕐᓂᖕᒥᓪᓗ ᐅᖃᐅᓯᖕᒥᓂᒃ.

ᑲᓇᑕᐅᑉ ᒐᕙᒪᒃᑯᖏᑦ, ᓄᓇᕗᑦ ᒐᕙᒪᒃᑯᖏᑦ, ᓄᓇᕗᑦ ᑐᙵᕕᒃᑯᓪᓗ ᑐᙵᓱᒃᑎᑦᑎᕗᑦ ᐊᑎᓕᐅᕐᑕᐅᓂᖓᓂ ᑐᑭᓯᐊᒪᓂᖕᒧᑦ ᑎᑎᖅᑲᒥᑦ ᐃᑲᔪᖅᑐᐃᓂᐊᕐᓗᑎᒃ ᓴᙱᒃᑎᒋᐊᒃᑲᓐᓂᕐᓗᒍᓗ ᐃᓄᒃᑐᑦ ᐅᖃᐅᓯᖅ ᐃᓕᓐᓂᐊᕐᑎᑦᑎᓂᕐᓗ ᓄᓇᕗᒻᒥᑦ ᐅᓪᓗᒥ. ᑲᓇᑕᐅᑉ ᒐᕙᒪᒃᑯᖏᑦ ᐅᖃᒃᑲᓐᓂᓚᐅᕐᑐᑦ ᐊᖏᕐᓯᒪᓂᖏᓐᓂᑦ ᑐᖅᑯᐃᓂᐊᕐᓗᑎᒃ $42 ᒥᓕᐊᓐᓂᒃ ᐊᕐᕌᒍᓄᑦ ᑕᓪᓕᒪᓄᑦ ᐃᑲᔪᖅᑐᕐᓗᓂᔾᔪᒃ ᐅᓇ ᐊᖏᕈᑎ. ᐊᒻᒪᒃᑲᓐᓂᕐᑕᐅᖅ ᐆᒧᖓ ᐃᑲᔫᑎᕐᔪᐊᒧᑦ ᐅᓇ ᑮᓇᐅᔭᓕᐅᕐᓂᐊᕐᑐᖅ, ᑮᓇᐅᔭᒃᑲᓐᓃᑦ ᒫᓂᐸᓗᒃ $12.3 ᒥᓕᐊᓐ ᐆᒧᖓ ᐱᒋᐊᖅᑕᐅᔪᒧᑦ ᓄᓇᕗᑦ ᐊᑐᓕᕆᐊᓕᖕᓄᑦ ᑲᑎᒪᔨᖏᓐᓂᒑᕐᑐᑦ ᑎᑎᕋᖅᓯᒪᔪᒥᑦ 23 ᑮᓇᐅᔭᖁᑎᖏᓐᓂᑦ, ᐃᑲᔪᖅᑐᐃᓂᐊᕐᑐᖅ ᑕᒪᐃᓐᓂᒃ ᒐᕙᒪᒃᑯᑦ ᐱᓇᔪᖕᓂᖏᓐᓂᑦ ᑭᒡᒐᖅᑐᖅᑎᑖᕋᓱᒃᑎᓪᓗᒋᑦ ᐃᓄᖕᓂᑦ ᐃᖅᑲᓇᐃᔭᖅᑎᓂ ᓄᓇᕗᒻᒥᑦ.

ᓄᓇᕗᑦ ᒐᕙᒪᒃᑯᖏᑦ ᐅᐃᒍᓐᓂᐊᕐᑕᖏᑦ ᐃᓄᒃᑐᑦ ᐃᓕᓴᐃᔨᓄᑦ ᐱᓕᒻᒪᒃᓴᐅᑎᑦ ᓄᓇᕗᒻᒥ ᓯᓚᑦᑐᖅᓴᕐᕕᐅᑉ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᒐᒃᓴᖏᓐᓂᑦ ᓄᓇᓕᖕᓂᑦ ᓄᓇᕗᒻᒥᑦ ᐱᒋᐊᕐᓗᓂ 2021–22−ᒥᑦ.

ᐊᖏᖃᑎᒌᒍᑎ ᓂᕆᐅᒋᔭᐅᔪᖅ:
• ᐊᑐᒃᑲᓐᓂᕈᓐᓇᕐᓯᒋᐊᕐᓗᑎᒃ ᐃᓄᒃᑐᑦ ᐃᓕᓐᓂᐊᕐᑎᑦᑎᓂᖕᒥᑦ ᓄᓇᕗᒻᒥᑦ;
• ᐊᒥᓱᕈᕆᐊᕐᓗᒋᑦ ᐊᒥᓲᖏᓐᓇᕐᑎᓪᓗᒋᓪᓗ ᐃᓄᒃᑑᕈᓐᓇᑦᑎᐊᕐᑐᑦ ᐃᓕᓴᐃᔨᑦ ᓄᓇᕗᒻᒥᑦ;
• ᐃᓄᒋᐊᒃᓯᒋᐊᕐᓗᒋᑦ ᐃᓄᒃᑐᑦ ᐅᖃᕈᓐᓇᑦᑎᐊᕐᑐᑦ ᓄᓇᕗᒻᒥᑦ;
• ᐃᑲᔪᕈᑎᒃᓴᓕᐅᕐᓗᑎᒃ ᐃᓕᓴᐃᔨᓄᑦ;
• ᐱᕙᓪᓕᐊᑎᑕᐅᓗᓂ ᐃᓄᒃᑐᑦ ᐊᑐᒃᑲᓐᓂᕐᓂᖕᒥᑦ ᐊᒻᒪᓗ ᐃᓄᐃᑦ ᐱᔪᓐᓇᐅᑎᖏᑦ ᐅᖃᐅᓯᓕᕆᔪᑦ ᐃᓕᓐᓂᐊᕐᓂᓕᕆᔪᓪᓗ; ᐊᒻᒪᓗ
• ᐃᑲᔪᖅᑐᕐᓗᒋᑦ ᐅᖃᕆᐅᖅᐅᑎᑦᑎᔨᑦ ᐱᒋᐊᕐᑕᐅᓯᒪᔪᑦ ᐃᓱᒪᓕᐅᕈᑎᓪᓗ ᐃᓄᒃᑐᑦ ᐃᓕᓐᓂᐊᕐᑎᑦᑎᓂᖕᒧᑦ ᐃᓕᓴᐃᔨᓄᓪᓗ.

ᐱᓕᕆᖃᑎᒌᑦ ᐅᕙᓂ ᐊᖏᖃᑎᒌᒍᑎᒥᑦ ᐱᓕᕆᓂᐊᕐᐳᑦ ᐅᑯᓄᖓ ᑐᕌᒐᕆᔭᐅᔪᓂᑦ ᐱᓕᕆᖃᑎᒌᖕᓂᒃᑯᑦ ᓴᖅᑭᔮᖅᑎᑦᑎᔪᑦ ᐃᓄᐃᑦ ᓯᕗᓪᓕᐅᔾᔭᒃᓴᖏᓐᓂᑦ ᐃᒃᐱᒍᓱᑦᑎᐊᕐᓂᒃᑯᑦ, ᐅᒃᑯᐃᖓᔪᒃᑯᑦ ᓴᖅᑭᔮᕐᑐᒃᑯᓪᓗ.

ᑕᒪᓐᓇ ᑲᑐᔾᔨᖃᑎᒌᖕᓂᐅᔪᑦ ᐃᓚᒋᔭᐅᔪᖅ ᓯᕗᓪᓕᖅᐹᓂᑦ ᐊᖏᕈᑎᓂᑦ ᐊᑐᓕᖅᑎᑕᐅᔪᖅ ᐃᓚᒍᑕᖕᒥᑦ 9 ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐱᖁᔭᒥᑦ, ᐊᖏᖅᑕᐅᓚᐅᕐᓯᒪᔪᖅ ᔫᓂ 2019. ᐱᖁᔭᖅ ᐃᑲᔪᖅᑐᐃᓇᓱᐊᕐᑐᖅ ᐱᓇᔪᖕᓂᖏᓐᓂᑦ ᓄᓇᖃᖅᑳᖅᓯᒪᔪᑦ ᐃᓄᖏᓐᓂᑦ ᐅᑎᕐᑎᑦᑎᓗᑎᒃ, ᐊᑐᒃᑲᓐᓂᕆᐊᓕᕐᓗᑎᒃ, ᐱᓯᒪᒃᓰᓐᓇᓕᕐᓗᑎᒃ ᓴᙱᒃᑎᑎᓪᓗᓂᔾᔪᒃᓗ ᐅᖃᐅᓯᖅᑎᑦ.

ᐅᖃᐅᓯᐅᓯᒪᔪᑦ

“ᐅᖃᐅᓯᖅ ᐃᓗᑦᑎᓐᓃᒻᒪᕆᐊᓗᒃᐳᒃ ᑭᓇᐅᓂᑦᑎᓐᓂᑦ. ᓇᓗᓇᐃᕈᑎᒋᓪᓗᑎᒍᓪᓗᑦᑕᐅᖅ ᐃᓚᒋᔭᐅᓂᑦᑎᓐᓂ ᐊᖏᓂᕐᓴᒧᑦ ᓄᓇᓕᖕᓄᑦ. ᐱᒃᑯᓕᒻᒪᕆᒃᐳᖓ ᐆᒥᖓ ᐱᕈᖅᓴᐃᕙᓪᓕᐊᓂᖕᒥᑦ ᐃᓄᒃᑐᑦ ᐅᖃᐅᓯᒃᑯᑦ ᖃᓄᐃᓕᐅᕈᑎᒃᓴᓂᑦ ᐃᓕᓐᓂᐊᕈᑎᒃᓴᓂᓪᓗ ᓄᓇᕗᒻᒥᑦ. ᐱᔾᔪᑎᒋᓪᓗᒍ ᐋᕿᒋᐊᕈᑎᖃᕐᓂᖕᒥᑦ, ᑲᑐᔾᔨᓪᓗᑕ ᐃᒃᐱᒍᓱᑦᑎᐊᕐᓂᒃᑯᑦ, ᐅᒃᑯᐃᖓᓂᒃᑯᑦ ᓴᖅᑭᔮᕐᓂᒃᑯᓪᓗ ᓴᙱᒃᑎᓐᓇᓱᒃᖢᑎᒍᑦ ᐊᑐᕐᑕᐅᓂᖓ ᐃᓄᒃᑐᑦ ᓄᓇᕗᒻᒥᑦ. ᐱᓕᕆᐊᖑᓇᓱᐊᖅᑐᒃᑯᑦ ᐅᑯᑎᑐᑦ, ᐃᓕᓴᐃᔨᑦ ᐱᖃᕐᑎᑦᑎᐊᕋᓱᒃᐸᕗᑦ, ᐊᔪᙱᓪᓗᑎᒃ, ᐱᓕᒻᒪᒃᓴᑎᓪᓗᒋᓪᓗ ᐃᓕᓐᓂᐊᕐᑎᑦᑎᓂᐊᕐᓗᑎᒃ ᐃᓄᒃᑐᑦ ᓴᙱᒃᑎᒋᐊᕐᓗᒋᓪᓗ ᓄᓇᕗᒻᒥᐅᑦ ᐱᒃᑯᒍᓱᖕᓂᑦ ᐅᖃᐅᓯᖏᓐᓂᑦ ᓯᕗᓕᖏᓐᓂᖔᕐᑐᓂᑦ.”
−ᒪᓕᒐᓕᐅᕐᑎ ᓯᑏᕙᓐ ᖑᐃᐴᑦ, ᒥᓂᔅᑕ ᑲᓇᑕᒥ ᐱᖅᑯᓯᓕᕆᔩᑦ, ᑲᓇᑕᐅᑉ ᒐᕙᒪᒃᑯᖏᑦ

“ᐅᓪᓗᒥ ᑐᓴᖅᑎᑦᑎᓂᐅᖅᑲᐅᔪᖅ ᑭᒡᒐᖅᑐᐃᕗᖅ ᐱᒻᒪᕆᐊᓗᖕᒥᑦ ᓯᕗᒧᑦ ᐱᐅᕐᓱᐊᕐᓯᓂᖕᒥᑦ ᓴᙱᒃᑎᒋᐊᕆᓂᖕᒥᓪᓗ ᐃᓄᒃᑐᑦ ᓄᓇᕗᒻᒥᑦ. ᑕᒪᓐᓇ ᓇᓗᓇᐃᕐᓯᔾᔪᑎᑦ ᑭᓱᓂᑦ ᐱᓕᕆᐊᓂᒃᓯᔪᓐᓇᕐᓂᑦᑎᓐᓂᑦ ᐱᓕᕆᖃᑎᒌᖕᓂᒃᑯᑦ, ᑲᑐᔾᔨᓂᒃᑯᑦ, ᐱᐅᕐᓱᐊᕐᓂᐊᕐᓗᒍ ᐃᓄᐃᑦ ᐅᖃᐅᓯᖓᑦ ᐃᓕᖅᑯᓯᖓᓗ, ᐅᓪᓗᒥ ᑭᖑᕚᒃᓴᕆᔭᓄᓪᓗ. ᑕᒪᓐᓇ ᑐᓴᖅᑎᑦᑎᓂᖅ ᓯᕗᒧᐊᒃᐹᓪᓕᕈᑕᐅᕗᖅ ᑎᑭᑕᐅᓇᓱᒃᑐᓂᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐱᖁᔭᖓᓂᑦ—ᓯᕗᓪᓕᖅᐹᒻᒪᕆᐊᓗᒃ ᑲᑐᔾᔨᓂᒃᑯᑦ ᑲᒪᒋᔭᑦᑎᓐᓂᑦ ᐃᑲᔪᖅᑎᒌᖕᓂᐊᕐᓗᑕ ᓄᓇᖃᖅᑳᖅᓯᒪᔪᓂᑦ ᐃᓄᖕᓂᑦ ᓴᐳᔾᔨᑎᓪᓗᒋᑦ ᐅᖃᐅᓯᖏᓐᓂᑦ. ᐊᒻᒪᓗᑦᑕᐅᖅ, ᑕᒪᓐᓇ ᐃᑲᔪᖅᓱᐃᒃᑲᓐᓂᕐᓂᐊᕐᑐᖅ ᑐᕌᒐᕆᔭᐅᔪᓂᑦ ᐋᖅᑭᒃᑕᐅᓯᒪᔪᑦ ᐅᑭᐅᖅᑕᖅᑐᓕᒫᒧᑦ ᐊᑐᐊᒐᓄᑦ ᑐᙵᕕᐊᓂᑦ ᓴᐳᔾᔨᓂᖕᒥᑦ ᐱᕈᖅᓴᐃᓂᖕᒥᓪᓗ ᓴᙱᔪᓂᑦ, ᖃᓄᐃᙱᑦᑎᐊᕐᑐᓂᑦ ᐃᓚᒌᓂᑦ ᓄᓇᓕᖕᓂᓪᓗ.”
-ᒪᓕᒐᓕᐅᕐᑎ ᑖᓂᐊᓕ ᕚᓐᑐᓪ, ᒥᓂᔅᑕ ᐅᑭᐅᖅᑕᖅᑐᓂᐅᓄᑦ, ᑲᓇᑕᐅᑉ ᒐᕙᒪᒃᑯᖏᑦ

“ᐱᒃᑯᒋᔭᒃᑲ ᑲᑐᔾᔨᖃᑎᒌᖕᓂᐅᔪᑦ ᒐᕙᒪᑦᑎᓐᓂᑦ, ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐅᕘᓇ ᓄᓇᕗᒻᒥᑦ ᑲᑐᔾᔨᖃᑎᒌᖕᓂᖅ ᐅᖃᐅᓯᖕᒧᑦ ᐃᓕᓐᓂᐊᕐᓂᖕᒧᓪᓗ. ᑲᑐᔾᔨᓪᓗᑎᒃ ᑕᐅᑐᙳᐊᒐᖃᖕᓂᒃᑯᑦ ᐱᓕᕆᖃᑎᒌᖕᓂᒃᑯᓪᓗ ᓴᙱᒃᑎᓐᓂᐊᕐᐸᕗᑦ ᐊᑐᒃᑲᓐᓂᓕᕐᓂᐊᕐᐸᕗᓪᓗ ᐃᓄᒃᑐᑦ ᓄᓇᕗᒻᒥᑦ. ᓂᕆᐅᒃᐳᖓ ᐱᒋᐊᖅᑕᐅᒃᑲᓐᓂᒐᒃᓴᓂ ᓄᓇᕗᒻᒥ ᑲᑐᔾᔨᖃᑎᒌᖕᓂᖅ ᐅᖃᐅᓯᖕᒧᑦ ᐃᓕᓐᓂᐊᕐᓂᖕᒧᓪᓗ ᐊᑯᓂᐅᔪᒥ ᑲᔪᓯᑦᑎᐊᖁᓪᓗᒋᑦ ᐅᖃᐅᓯᖅᐳᑦ.”
-ᒪᓕᒐᓕᐅᕐᑎ ᒫᒡᒍᓚ ᓇᑲᓱᒃ, ᒥᓂᔅᑕ ᐃᓕᖅᑯᓯᓕᕆᔨᒃᑯᓐᓄᑦ, ᓄᓇᕗᑦ ᒐᕙᒪᒃᑯᖏᑦ

“ᑲᑐᔾᔨᖃᑎᒌᖕᓂᑎᒍᑦ ᐱᖓᓱᐃᓕᖓᓪᓗᑕ ᐱᓇᔪᖕᓂᑦᑎᒍᑦ, ᓴᖅᑭᑦᑎᓂᐊᕐᐳᒍᑦ ᓄᑖᓂᑦ ᐅᖃᐅᓯᓕᕆᒃᑲᐅᔪᓂᑦ ᐃᓕᓐᓂᐊᕐᕕᑦᑎᓐᓄᑦ ᓄᓇᓕᑦᑎᓐᓄᓪᓗ, ᐃᓚᒋᐊᕐᓗᑎᒍᓪᓗ ᐃᓕᓴᐃᔨᑦ ᐃᓕᓐᓂᐊᕐᑎᑕᐅᖁᓗᒋᑦ ᓄᑕᖅᑲᕗᑦ ᐃᓄᒃᑐᑦ. ᐱᒃᑯᒍᓱᒃᐳᖓ ᐅᓇ ᐊᖏᕈᑎ ᐱᕈᖅᓴᐃᓇᓱᐊᕐᓂᕗᓪᓗ ᑕᒪᒃᑯᐊ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᖅ ᐊᒥᓱᕈᕈᓐᓇᓛᕐᒪᑕ ᓄᓇᕗᑦ ᑐᕌᒐᕆᔭᖓᓄᑦ ᒪᕐᕈᐃᓕᖓᔪᑎᒍᑦ ᐅᖃᐅᓯᒃᑯᑦ ᐃᓕᓐᓂᐊᕐᓂᓕᕆᓂᖅ.”
−ᒪᓕᒐᓕᐅᖅᑎ ᑕᐃᕕᑎ ᔪᐊᓇᓯ, ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐊᒻᒪᓗ ᒥᓂᔅᑕ ᑲᒪᒋᔭᓕᒃ ᓄᓇᕗᒻᒥ ᓯᓚᑦᑐᖅᓴᕐᕕᒃ, ᓄᓇᕗᑦ ᒐᕙᒪᒃᑯᖏᑦ

“ᑕᒪᓐᓇ ᑐᓴᒐᒃᓴᑦᑎᐊᕙᒻᒪᕆᐊᓗᒃ ᐃᓄᖕᓄᑦ ᐃᓕᓐᓂᐊᕐᑎᓄᑦ. ᐊᒥᓱᕈᕆᐊᕆᓂᖅ ᐃᓄᒃᑑᑦ ᐅᖃᓪᓚᓲᓂ ᐃᓕᓴᐃᔨᓂ ᐊᑐᕐᓂᐊᕐᐳᖅ ᓂᕆᐅᒋᔭᑦᑎᓐᓂᑦ ᐃᓄᒃᑐᑦ ᐃᓕᓐᓂᐊᕐᑎᑦᑎᓂᖅ ᐃᓕᓐᓂᐊᕐᕕᑦᑎᓐᓂᑦ.”
−ᐊᓗᑭ ᑰᑦᑎᖅ, ᐊᖓᔪᖅᑳᖅ, ᓄᓇᕗᑦ ᑐᙵᕕᒃᑯᖅ ᑎᒥᖓ

ᓱᓕᔪᑦ

ᑮᓇᐅᔭᖅᑐᕈᑎᒃᓴᐃᑦ 2019 ᐃᓚᓕᐅᑎᓯᒪᔪᑦ ᐱᕈᖅᓴᐃᓂᖕᒧᑦ of $333.7 ᒥᓕᐊᓐ ᐊᕐᕌᒍᑦ ᑕᓪᓕᒪᑦ ᐅᖓᑖᓄᑦ, ᐊᕐᕌᒍᑕᒫᑦ ᑮᓇᐅᔭᖅᑐᕈᑎᒃᓴᖃᕐᓗᓂ $115.7 ᒥᓕᐊᓐ ᑭᖑᓂᐊᒍᑦ, ᐃᑲᔪᖅᑐᐃᓂᐊᕐᓗᑎᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᓄᓇᓕᖕᓂᑦ ᐱᓕᕆᐊᖑᔪᓄᑦ.

ᐃᓕᓐᓂᐊᕐᓂᓕᕆᓂᖅ ᓄᓇᕗᒻᒥᑦ ᐱᓕᕆᐊᖑᖃᑦᑕᕐᐳᖅ ᓄᓇᕗᑦ ᒐᕙᒃᑯᖏᓐᓂᑦ ᐃᓕᓐᓂᐊᕐᓂᓕᕆᓂᖕᒧᑦ ᐱᖁᔭᒃᑯᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᖅ, ᒪᕐᕉᖕᓂᒃ ᐅᖃᐅᓯᒃᑯᑦ ᐃᓕᓐᓂᐊᕐᑎᑦᑎᔭᕆᐊᖃᕐᓂᖅ ᐃᓄᒃᑐᑦ ᐱᓪᓗᐊᑕᕐᑕᐅᓗᓂ, ᐊᒻᒪᓗᑦᑕᐅᖅ ᐃᓄᒃᑐᑦ ᐃᓕᓴᐃᔨᑦ ᐱᓕᒻᒪᒃᓴᓂᖅ ᓄᓇᕗᒻᒥ ᓯᓚᑦᑐᖅᓴᕐᕕᒃᑯᑦ.
ᓄᓇᕗᑦ ᓯᓚᑦᑐᖅᓴᕐᕕᒃ ᑐᓂᔭᐅᓂᐊᕐᑐᑦ $34.7 ᒥᓕᐊᓐ ᐊᕐᕌᒍᑦ ᑕᓪᓕᒪᑦ ᐅᖓᑖᓄᑦ ᐃᑲᔪᖅᑐᕐᑕᐅᓂᐊᕐᓗᑎᒃ ᓄᑖᙳᕆᐊᖅᑕᐅᓂᖏᑦ ᐃᓄᒃᑐᑦ ᐃᓕᓐᓂᐊᕈᑎᒃᓴᐃᑦ ᓄᓇᕗᒻᒥ ᐃᓕᓐᓂᐊᑎᑦᓯᔭᑦᓴᓄᑦ ᐃᓕᓐᓂᐊᕐᓂᖕᒧᑦ, ᐅᐃᒍᔭᐅᓗᓂ ᐃᓕᓐᓂᐊᕐᑕᐅᕙᖕᓂᖓ ᓄᓇᕗᒻᒥ ᐃᓕᓐᓂᐊᑎᑦᓯᔭᑦᓴᓄᑦ ᐃᓕᓐᓂᐊᕐᓂᖅ ᓄᓇᓕᒃᑲᓐᓂᕐᓄᑦ ᓄᓇᕗᒻᒥᑦ, ᐃᑲᔪᖅᑎᖃᐅᕐᓗᑎᒃᓗ ᐃᓕᓐᓂᐊᕐᑎᑦ.

ᓄᓇᕗᑦ ᑐᙵᕕᒃᑯᑦ ᑐᑭᒧᐊᒃᓯᕙᒃᐳᑦ ᐊᐅᓚᑦᑎᕙᒃᖢᑎᒃᓗ ᐃᓄᐃᑦ ᑲᒪᒋᔭᒃᓴᖏᓐᓂᑦ ᓴᖅᑭᑕᐅᓯᒪᔪᑦ ᓄᓇᕗᒻᒥ ᐊᖏᕈᑎᓂ ᑖᒃᑯᐊᓗ ᒐᕙᒪᑐᖃᒃᑯᑦ ᓄᓇᕗᒻᒥᓪᓗ ᒐᕙᒪᒃᑯᖏᑦ ᐊᑐᕋᓗᐊᕆᐊᒃᓴᖏᓐᓂᑦ ᑎᑭᓐᓇᓱᐊᖅᑕᖏᖕᓂᒃ.
ᑕᒡᕙᙵᑦ $42 ᒥᓕᐊᓐᒥᑦ, ᓄᓇᕗᑦ ᑐᙵᕕᒃᑯᑦ ᑐᓂᔭᐅᓂᐊᕐᑐᑦ $7.3 ᒥᓕᐊᓐ ᐊᕐᕌᒍᑦ ᑕᓪᓕᒪᑦ ᐅᖓᑖᓄᑦ ᑲᒪᒋᔭᖃᕐᓂᐊᕐᓗᑎᒃ ᓴᖅᑭᑕᐅᓂᖏᑦ ᐃᓱᒪᓕᐅᕆᔾᔪᑎᑦ ᐱᔭᐅᔭᕆᐊᓕᖅᒻᒪᕆᑦ ᐱᕚᓪᓕᕐᓂᐊᕐᓗᒍ ᐃᓄᒃᑐᑦ ᐃᓕᓐᓂᐊᕐᓂᖅ ᓴᖅᑭᑦᑎᕙᓪᓕᐊᓗᑎᒃᓗ, ᐃᑲᔫᑎᒃᓴᑦ ᐱᓕᕆᔾᔪᑎᓪᓗ ᐃᑲᔪᖅᑐᐃᓂᐊᕐᓗᑎᒃ ᐃᓄᖕᓂᑦ ᐃᓕᓴᐃᔨᓂᑦ ᐃᓕᓐᓂᐊᕐᓂᓕᕆᓂᖕᒦᑦᑐᓄᑦ.

ᐊᔾᔨᖏᑦᑕᐅᖅ ᐅᑯᐊ

ᐊᑐᕐᑕᐅᒃᑲᓐᓂᕐᑎᑦᑎᓂᖅ ᓴᙱᒃᑎᒋᐊᕆᓂᕐᓗ ᐃᓄᒃᑐᑦ ᓄᓇᕗᒻᒥᑦ https://www.canada.ca/en/canadian-heritage/news/2019/09/revitalizing-and-strengthening-inuktut-in-nunavut.html

ᓄᓇᕗᑦ ᒐᕙᒪᖓᑦ
www.gov.nu.ca

ᓄᓇᕗᒻᒥᑦ ᑐᙵᕕᒃᑯᑦ
https://www.tunngavik.com/

ᑲᑐᔾᔨᖃᑎᒌᖕᓂᒃᑯᑦ ᐅᖃᐅᓯᒃᓴᑦ ᒥᓂᔅᑕᓂᑦ ᖑᐃᓪᐴᑦ, ᐸᓇᑦ, ᒥᓗ ᕚᓐᑕᐅᓗ ᐱᒻᒪᕆᐅᓂᖓᓂᓄ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᑦ
https://www.canada.ca/en/canadian-heritage/news/2021/01/joint-statement-by-ministers-guilbeault-bennett-miller-and-vandal-on-the-importance-of-indigenous-languages.html

ᐅᑭᐅᖅᑕᖅᑐᓕᒫᒧᑦ ᐊᑐᐊᒐᕐᓄᑦ ᑐᙵᕕᒃ
https://www.rcaanc-cirnac.gc.ca/eng/1560523306861/1560523330587

ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓂᑦ https://www.canada.ca/en/services/culture/canadian-identity-society/languages/indigenous.html

ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ ᐱᖁᔭᖅ
https://www.parl.ca/DocumentViewer/en/42-1/bill/C-91/royal-assent

ᖃᐅᔨᒋᐊᕐᕕᒃᓴᑦ

ᑐᑭᓯᒋᐊᒃᑲᓐᓂᕈᒪᒍᕕᑦ, (ᑐᓴᒐᒃᓴᑐᐊᓂᒃ) ᐅᓇ ᖃᐅᔨᒋᐊᕐᕕᒋᓗᒍ:

Download (PDF, 84KB)