ᓴᖅᑭᑲᐅᑎᒋᔭᕆᐊᓕᒃ
ᐃᖃᓗᐃᑦ, ᓄᓇᕗᑦ (ᔭᓄᐊᕆ 16, 2024) −ᖃᐅᔨᓴᖅᑎᓂᒃ ᖃᐅᔨᓴᖅᑕᐅᓂᑯ ᓴᖅᑭᑕᐅᓂᐊᖅᑐᖅ ᐃᖃᓗᖕᓂ ᖃᐅᔨᓇᓱᒡᓗᑎᒃ ᑭᓈᓗᖃᕐᕕᖕᒥ ᖃᐅᔨᓴᕐᓂᐅᔪᒥ ᐃᑲᔫᑎᒋᓗᒍ ᖃᐅᔨᔾᔪᑕᐅᔪᓐᓇᕐᓗᓂ ᓯᐊᒻᒪᒃᐸᓪᓕᐊᙱᓪᓗᓂᓗ ᐳᕙᒡᓗᖕᓇᖅ ᓄᓇᕗᒻᒥ.
ᐅᑭᐅᓄᑦ ᑕᓪᓕᒪᓄᑦ ᖃᐅᔨᓴᕐᓂᖅ ᑐᕌᒐᖃᖅᐳᖅ ᐱᕙᓪᓕᐊᑎᑦᑎᔪᒪᓪᓗᑎᒃ ᐱᐅᓯᒋᐊᖅᑎᑦᑎᔪᒪᓪᓗᑎᒡᓗ ᐳᕙᒡᓗᓕᕐᓇᖅᑐᖅ ᑭᓈᓗᖃᕐᕕᖕᒥ ᖃᐅᔨᓴᖅᑕᐅᔪᒥ ᐃᖃᓗᖕᓂ ᓄᓇᓕᐸᐅᔭᕐᒥ ᖃᐅᔨᔪᒪᓪᓗᑎᒃ ᕿᓚᒻᒥᐅᓂᖅᓴᒃᑯᑦ ᖃᐅᔨᔪᓐᓇᖅᓯᓗᑎᒃ ᐳᕙᒡᓗᒃᑐᓂ ᖁᐱᕐᕈᐊᕐᔪᐃᑦ ᑭᓈᓗᖃᕐᕕᖕᒥ ᕿᓚᒻᒥᐅᓂᖅᓴᒃᑯᑦ ᐃᓄᖕᓄᑦ ᖃᓄᐃᙱᑦᑎᐊᕐᓂᕐᒧᑦ ᓄᖅᑲᖅᑎᑦᑎᔾᔪᑎᑦ ᑲᒪᒋᔭᐅᔪᓐᓇᖁᓪᓗᒋᑦ ᐋᓐᓂᐊᖅᑖᕆᔭᐅᔪᑦ ᒥᒃᖠᒋᐊᖅᑎᓪᓗᒍᓗ ᓯᐊᒻᒪᒃᐸᓪᓕᐊᓂᕆᔭᖓ.
ᐅᓇ ᖃᐅᔨᓴᕈᓯᖅ ᓴᖅᑭᔾᔪᑕᐅᔪᓐᓇᖅᐳᖅ ᐳᕙᒡᓗᖕᓇᒧᑦ ᐱᓕᕆᔾᔪᓯᕐᓂᒃ ᓄᓇᕗᒻᒥ, ᐊᖏᕈᑎᒋᓗᒋᑦ ᐊᑑᑎᖃᕐᓂᕆᔭᖏᑦ ᐳᕙᒡᓗᒃᑐᑦ ᖃᐅᔨᔭᐅᔪᑦ ᐱᓕᕆᔾᔪᓯᒃᑯᑦ ᓲᕐᓗ ᐅᕕᓂᖓᑕ ᐃᑭᐊᖓᒍᑦ ᑲᐱᔭᐅᕌᕐᔪᒡᓗᑎᒃ ᖃᐅᔨᓴᖅᑕᐅᓗᑎᒃ, ᐅᕆᐊᕐᓂᒃᑯᑦ ᖃᐅᔨᓴᖅᑕᐅᓗᑎᒃ, ᐊᒻᒪ ᓴᒡᕕᒃᑯᑦ ᐊᔾᔨᓕᐅᖅᑕᐅᓗᑎᒃ. ᑖᒃᑯᐊ ᐱᓕᕆᔾᔪᓰᑦ ᓇᓗᓇᐃᖅᓯᔾᔪᑕᐅᖏᓐᓇᖅᑎᓪᓗᒋᑦ ᐳᕙᒡᓗᖕᓇᓂ, ᓄᑖᖅ ᖃᐅᔨᓴᕈᓯᖅ ᑐᕌᒐᖃᖅᐳᖅ ᐋᖅᑭᒃᓯᔾᔪᑕᐅᔪᒪᓪᓗᓂ ᖃᐅᔨᓵᓕᔪᓐᓇᕐᓗᑎᒃ ᓱᓕ ᐱᑕᖃᖅᐸᒌᖅᑐᓂᒃ ᖃᓄᐃᓕᐅᕈᑕᐅᔪᒪᔪᓂᒃ.
ᖃᐅᔨᓴᕐᓂᖅ ᐊᐅᓚᑕᐅᔪᖅ ᖃᐅᔨᓴᖅᑎᓂᒃ ᐋᑐᕚᒥ ᐋᓐᓂᐊᕕᐊᓗᖕᒥᙶᖅᑐᓂᒃ, ᓯᓚᑦᑐᖅᓴᕐᕕᒡᔪᐊᖅ ᐋᑐᕚᒥ, ᓯᓚᑦᑐᖅᓴᕐᕕᒡᔪᐊᖅ ᐳᕆᑎᔅ ᑲᓚᒻᐱᐊᒥ ᐱᓕᕆᖃᑎᖏᓪᓗ ᓄᓇᕗᑦ ᑐᙵᕕᒃᑯᓐᓂᙶᖅᑐᑦ. (NTI), ᑐᑭᒧᐊᒃᑎᑕᐅᓪᓗᓂ ᑕᐃᒪ ᑐᑭᒧᐊᒃᑎᑦᑎᔨᐅᓪᓗᑎᒃ ᑲᑎᒪᔨᕋᓛᓄᑦ. ᑕᐃᒪ ᐳᕙᒡᓗᖕᓇᖅ ᐱᒋᐊᖅᑎᑕᐅᓂᑰᕗᖅ 2011-ᒥ ᐋᑐᕚᒥ ᐋᓐᓂᐊᕕᐊᓗᖕᒥ ᖃᐅᔨᓴᖅᑎᒃᑯᓐᓂ, ᓄᓇᕗᑦ ᑐᙵᕕᒃᑯᑦ ᐊᒻᒪ ᓄᓇᕗᑦ ᒐᕙᒪᒃᑯᓐᓂ ᐋᓐᐊᓂᖃᕐᓇᙱᑦᑐᓕᕆᔨᒃᑯᑦ ᖃᐅᔨᓴᖁᓪᓗᒋᑦ ᐱᐅᓯᒋᐊᖅᑎᑦᑎᓗᑎᒃ ᓄᖅᑲᖅᑎᑦᑎᔾᔪᑎᓂᒃ, ᖃᐅᔨᓵᓕᓂᕐᒥᒃ ᐊᒻᒪ ᐳᕙᒡᓗᒃᑐᓂᒃ ᓄᓇᕗᒻᒥ ᖃᓄᐃᑦᑐᓐᓃᖅᑎᑦᑎᓂᕐᒥᒃ.
ᖃᐅᔨᓴᕈᓯᖅ ᑮᓇᐅᔭᖃᖅᑎᑕᐅᔪᖅ $3 ᒥᓕᐊᓂᒃ ᐊᐃᑦᑑᑎᓂᒃ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᖃᐅᔨᓴᕐᕕᐊᓗᖕᒥ, ᐊᒻᒪᓗ $500,000−ᓂᒃ ᐃᑲᔫᓯᐊᓚᐅᕆᓪᓗᑎᒃ ᑐᙵᕕᒃᑯᓐᓂ. ᑲᑐᔾᔨᖃᑎᒌᒍᑕᐅᔪᖅ ᐱᓕᕆᖃᑎᒌᓂᒃ ᐱᒋᐊᖅᑎᑦᑎᓯᒪᔪᓂᒃ, ᐊᒻᒪᓗ ᐋᑐᕚᒥ ᓯᓚᑦᑐᖅᓴᕐᕕᒡᔪᐊᕐᒥ, ᐃᖃᓗᖕᓂ ᓄᓇᓕᐸᐅᔭᕐᒥ ᐊᒻᒪ ᐅᖂᑕᖅ ᑲᑐᔾᔨᖃᑎᒌᓂᒃ, ᐱᕕᒡᔪᐊᖑᖕᒪᑦ ᖃᐅᔨᓴᕐᓂᕆᔭᐅᔪᒧᑦ ᐱᓕᕆᐊᖑᑦᑎᐊᕈᓐᓇᕈᑕᐅᖕᒪᑦ.
ᑕᐅᒪ ᐳᕙᒡᓗᒃᑐᓂᒃ ᖃᐅᔨᓴᖅᑎᒃᑯᑦ ᐱᓕᕆᑎᑦᑎᓛᖅᐳᑦ ᐃᓄᖕᓂᒃ ᐃᖃᓗᖕᓂ ᔭᓄᐊᕆ 16-ᒥ 18-ᒧᑦ, 2024-ᒥ. ᖃᐅᔨᒪᓇᓱᖃᑕᐅᖃᑦᑕᓛᖅᐳᓯ ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖏᓪᓗ ᐃᓄᖕᓄᑦ ᑐᓴᒐᒃᓴᓕᕆᔨᒃᑯᑦ ᒪᒃᐱᖅᑐᒐᖏᓐᓂᒃ ᑐᑭᓯᓇᖅᑐᓂᒃ ᑕᑯᔪᒪᒍᔅᓯ.
ᑐᑭᓯᓇᕐᓂᖅᓴᓂᒃ ᑐᓴᕈᒪᒍᕕᑦ ᐳᕙᒡᓗᖕᓇᐅᑉ ᒥᒃᓵᓄᑦ, ᖃᐅᔨᓴᖅᑕᐅᖏᓐᓇᖅᑐᓂᒡᓗ, ᐊᒻᒪ ᑕᐃᒪ ᐳᕙᒡᓗᖕᓇᒧᑦ ᐃᔾᔪᐊᖅᑕᐅᓯᒪᔪᑦ, ᐅᕗᙵᕐᓗᓯ ᑕᑯᒋᐊᕈᓐᓇᖅᐳᓯ https://taimatb.tunngavik.com.
ᐅᖃᖅᑕᐅᔪᑦ:
“ᐳᕙᒡᓗᒃᑐᑦ ᖃᓄᐃᓕᖓᖕᒪᖔᑕ ᖃᐅᔨᓴᑦᑎᐊᕈᓐᓇᕈᑦᑕ ᑭᓈᓗᖃᕐᕕᖕᓂ ᓄᓇᕗᒻᒥ, ᐃᑲᔫᑎᒋᔪᓐᓇᕋᔭᕋᑦᑎᒍᑦ ᑐᕌᒐᖃᓕᕐᓗᑕ ᖃᐅᔨᓴᕆᐊᖃᖅᐸᒃᑕᑦᑎᓐᓄᑦ ᐱᓕᕆᐊᖑᔭᕆᐊᖃᓪᓚᕆᒃᑎᓪᓗᒋᑦ. ᑭᓈᓗᖃᕐᕕᖕᒥ ᖃᐅᔨᓴᕐᓂᖅ ᐱᒻᒪᕆᐅᓗᓂ ᐱᓕᕆᐊᖑᔪᓐᓇᕐᒪᑦ ᐃᑲᔫᑎᒋᓗᑎᒍᑦ ᐱᑕᖃᕈᓐᓃᖅᑎᓪᓗᒍ ᐳᕙᒡᓗᖕᓇᖅ ᓄᓇᕗᒻᒥ, ᑖᓐᓇᓗ ᖃᐅᔨᓴᕈᓯᖅ ᑐᕌᒐᕆᔭᑦᑎᓐᓄᑦ ᖃᒡᓕᕚᓪᓕᕈᑕᐅᔪᓐᓇᖅᖢᓂ.”
ᓘᒃᑖᖅ ᒑᓐᓵᓘ ᐋᓪᕙᕆᐊᔅ
ᖃᐅᔨᓴᖅᑎᓂᒃ ᓯᕗᓕᖅᑎᒋᔭᐅᔪᖅ ᑕᐃᒪ ᐳᕙᒡᓗᖕᓇᒧᑦ
ᐳᕙᒡᓗᒃᑐᓄᑦ ᖃᐅᔨᒪᔨᑕᖅ ᓄᓇᕗᑦ ᒐᕙᒪᒃᑯᓐᓄᑦ
ᓘᒃᑖᖅ ᐊᒻᒪ ᖃᐅᔨᓴᖅᑎ ᐋᑐᕚᒥ ᐋᓐᓂᐊᕕᐊᓗᖕᒥ
ᖃᐅᔨᓴᖅᑎᑉ ᐃᑲᔪᖅᑎᐊ, ᓯᓚᑦᑐᖅᓴᕐᕕᒡᔪᐊᖅ ᐋᑐᕚᒥ
“ᓇᓕᒧᒌᙱᓗᐊᖅᑎᓪᓗᒋᑦ ᖃᔅᓯᐅᓂᖏᑦ ᐳᕙᒡᓗᒃᑐᑦ ᖃᐅᔨᔭᐅᔪᑦ ᐃᓄᖕᓂ, ᐱᕐᔪᐊᖑᖕᒪᑦ ᐱᓕᕆᔾᔪᑎᓕᒫᑦ ᐱᓕᕆᐊᕆᔪᓐᓇᕐᓗᒋᑦ ᓄᖅᑲᖅᑎᓪᓗᒋᑦ ᓯᐊᒻᒪᒃᐸᓪᓕᐊᓂᖓ ᐱᑕᖃᕈᓐᓃᖅᑎᓪᓗᒍᓗ ᐳᕙᒡᓗᖕᓇᖅ ᓄᓇᕗᒻᒥ. ᑐᙵᕕᒃᑯᑦ, ᐱᓕᕆᖃᑎᖃᖅᖢᑎᒃ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ, ᐱᐊᓂᒃᓯᑦᑎᐊᓚᐅᖅᐳᑦ ᓄᓇᓕᖕᓂᓕᒫᖅ ᐳᕙᒡᓗᖕᒪᖔᑕ ᖃᐅᔨᓴᖅᓯᓪᓗᑎᒃ ᐸᖕᓂᖅᑑᕐᓂᒥᐅᑕᓂᒃ ᐅᑭᐊᒃᓵᖑᓚᐅᖅᑐᖅ. ᐱᓕᕆᐊᖑᕙᓪᓕᐊᔪᒪᔪᑦ ᓲᕐᓗ ᑖᔅᓱᑎᑐᓇᖅ ᐱᓕᕆᐊᖑᐃᓐᓇᕐᓂᐊᖅᐳᑦ ᐱᔭᕆᐊᓕᖕᓄᑦ, ᑭᓯᐊᓂ, ᖃᐅᔨᔪᓐᓇᕈᑦᑕ ᐋᖅᑭᑦᑎᐊᖅᓯᒪᓂᖅᓴᓂᒃ ᐊᑑᑎᖃᑦᑎᐊᕐᓂᖅᓴᓂᒡᓗ ᖃᐅᔨᓵᓕᔪᓐᓇᕐᓗᑎᒍᑦ ᐳᕙᒡᓗᖕᓇᖅ ᓄᓇᕗᒻᒥ ᓄᓇᓕᖕᓂ, ᐱᕙᒌᔭᖅᓯᒪᔪᓐᓇᕐᓂᖅᓴᐅᓂᐊᕋᑦᑕ ᓯᕗᓂᒃᓴᑦᑎᓐᓂ ᓯᐊᒻᒪᒃᑐᐊᓘᓇᔭᕐᓂᖅᐸᑦ, ᐱᑕᖃᕈᓐᓃᖅᑎᓪᓗᒍ ᐳᕙᒡᓗᖕᓇᖅ ᐃᓅᖃᑎᒌᓂᒃ ᐃᓄᖕᓂᑦ.”
ᐊᓗᑭ ᑰᑦᑎᖅ
ᐊᖓᔪᖅᑳᖅ, ᓄᓇᕗᑦ ᑐᙵᕕᒃᑯᓐᓄᑦ
“ᐅᓇ ᖃᐅᔨᓴᕈᓯᖅ ᐅᔾᔨᕐᓇᖅᑐᒻᒪᕆᐅᓪᓗᓂ ᐊᓪᓗᕆᐊᕐᓂᐅᕗᖅ ᐱᒋᐊᖅᑎᑦᑎᔾᔪᑎᑦᑎᓄᑦ ᐊᒻᒪ ᖃᓄᐃᙱᑦᑎᐊᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᐅᕈᑕᐅᔪᒪᔪᓄᑦ, ᖃᐅᔨᑎᑦᑎᓗᑎᒃ
ᐱᓕᕆᐊᕆᔭᑦᑎᓐᓄᑦ ᐊᑦᑕᕐᓇᖅᑐᒧᐊᖅᑎᑦᑕᐃᓕᓗᒋᑦ ᓄᓇᕗᒥᐅᑦ ᖃᓄᐃᙱᑦᑎᐊᕈᓯᖏᑦ. ᓂᕆᐅᒃᐳᒍᑦ ᖃᐅᓕᔨᓴᖅᑕᐅᔪᓂᒃ ᓴᖅᑭᑦᑐᑦ ᑐᕌᕐᓂᐊᕐᓂᖏᓐᓂᒃ ᐱᓕᕆᐊᖑᒃᑲᓐᓂᖅᐸᒡᓗᑎᒃ ᐳᕙᒡᓗᖕᓇᒧᑦ ᐊᑲᐅᓂᖅᓴᒃᑰᕆᐊᖅᑎᑦᑎᓇᓱᖕᓃᑦ ᐱᐅᓯᒋᐊᖅᑎᓪᓗᒍᓗ ᐱᓕᕆᐊᕗᑦ ᐳᕙᒡᓗᖕᓇᖅ ᐱᑕᖃᕈᓐᓃᖅᑎᓪᓗᒍ ᓄᓇᕗᒻᒥ.” ᒪᓕᒐᓕᐅᖅᑎ ᔮᓐ ᒪᐃᓐ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᑦ ᓄᓇᕗᑦ ᒐᕙᒪᖓᑦ
“ᐳᕙᒡᓗᖕᓇᖅ ᓄᓇᕗᒥᐅᓄᑦ ᐃᓄᖕᓄᑦ ᐋᓐᓂᐊᓕᕈᑕᐅᓂᖅᐹᖑᔪᓐᓇᕐᒪᑦ. ᓄᓇᕗᒥᐅᑕᐅᒍᕕᑦ, ᐳᕙᒡᓗᓕᖃᑕᐅᔪᓐᓇᑦᑎᐊᖅᐳᑎᑦ. ᐅᓇ ᖃᐅᔨᓴᕈᓯᖅ ᐱᒻᒪᕆᐅᓪᓗᓂ ᐱᐅᓯᐅᔪᓐᓇᖅᐳᖅ ᖃᐅᔨᓴᕈᑎᒋᔪᓐᓇᕋᑦᑎᒍᑦ ᐳᕙᒡᓗᖕᓇᖅ ᓯᐊᒻᒪᒃᐸᓪᓕᐊᑎᓪᓗᒍ; ᐊᒻᒪ ᐃᖃᓗᖕᓂ ᓄᓇᓕᐸᐅᔭᕐᒥ ᐊᓕᐊᓇᐃᒍᓱᒃᐳᑦ ᐱᓕᕆᔨᐅᖃᑕᐅᓂᖏᓐᓄᑦ ᑖᒃᑯᓇᓂ ᑭᓈᓗᖃᕐᕕᖕᓂ ᖃᐅᔨᓴᖅᑎᓪᓗᒋᑦ.”
ᓱᓗᒧᓂ ᐊᕙ
ᒪᐃᔭ ᐃᖃᓗᖕᓄᑦ
“ᓂᕆᐅᒃᐳᒍᑦ ᐊᑐᕐᓂᐊᕈᒪᓪᓗᑎᒍᑦ ᐊᓂᒍᖅᑎᑕᐅᑦᑎᐊᖅᑐᑦ ᐳᕙᒃᑰᖅᑐᑦ ᖁᐱᕐᕈᐊᕐᔪᐃᑦ ᐊᐃᑦᑐᕐᓗᖕᓇᖅᑐᑦ ᑭᓈᓗᖃᕐᕕᖕᒥ ᖃᐅᔨᓴᖅᑕᐅᔪᓂᒃ ᓄᓇᕐᔪᐊᕐᒥ ᐳᕙᒡᓗᒃᑐᑦ, ᐱᓗᐊᖅᑐᒥᒡᓗ ᐳᕙᒡᓗᖕᓇᖅ ᑭᓈᓗᖃᕐᕕᖕᒥ ᖃᐅᔨᓴᖅᑕᐅᔪᖅ ᓄᓇᕗᒻᒥ. ᓂᕆᐅᒃᑲᓗᐊᖅᐳᒍᑦ ᐱᕙᓪᓕᐊᑎᑦᑎᔪᒪᓪᓗᑕ ᖃᐅᔨᓴᖅᑕᐅᒋᐊᓕᖕᓂᒃ ᐃᖃᓗᖕᓂ ᑭᓈᓗᖃᕐᕕᖕᒥ ᐅᖃᐅᔾᔭᐅᔪᓐᓇᕐᓗᑕ ᐳᕙᒡᓗᖕᓇᖅ ᓯᐊᒻᒪᑐᐃᓐᓇᕆᐊᖃᓕᕐᓂᖅᐸᑦ ᓄᓇᓕᖕᓂ ᓄᖅᑲᖅᑎᑕᐅᔪᓐᓇᖁᓪᓗᒍ.”
ᓘᒃᑖᖅ ᕌᐸᑦ ᑎᓚᑑᓚ ᐊᒻᒪ ᓘᒃᑖᖅ ᔨᒻ ᓴᓐ
ᐋᑐᕚᒥ ᓯᓚᑦᑐᖅᓴᕐᕕᒡᔪᐊᖅ, ᐳᕆᑎᔅ ᑲᓚᒻᐱᐊᒥ ᓯᓚᑦᑐᖅᓴᕐᕕᒡᔪᐊᖅ
“CIHR−ᑯᑦ ᐃᑲᔪᖅᑐᐃᓚᐅᖅᐳᑦ ᑕᐃᒪ ᐳᕙᒡᓗᖕᓇᖅ ᐱᒋᐊᖅᑎᓪᓗᒍ 2011-ᒥ, ᖁᕕᐊᓱᒃᐳᒍᓪᓗ ᑮᓇᐅᔭᖃᖅᑎᑦᑎᔪᓐᓇᕋᑦᑕ ᑖᔅᓱᒥᖓ ᓄᑖᖑᓪᓗᓂ ᑭᓈᓗᖃᕐᕕᖕᒥ ᖃᐅᔨᓴᕐᓂᕆᔭᐅᔪᒥᒃ. ᓇᓗᓇᐃᖅᓯᑦᑎᐊᓚᐅᖅᑎᓪᓗᑕ ᓄᕙᒡᔪᐊᕐᓇᖅ-19−ᒧᑦ ᖁᐱᕐᕈᐊᕐᔪᐃᑦ ᐊᐃᑦᑐᕐᓗᖕᓇᖅᑐᑦ ᑭᓈᓗᖃᕐᕕᖕᒥ, ᑕᐃᒪ ᐳᕙᒡᓗᖕᓇᒧᑦ ᖃᐅᔨᓴᖅᑎᒃᑯᑦ ᐊᑐᖅᐳᑦ ᑖᔅᓱᒥᖓᔅᓴᐃᓐᓇᖅ ᐱᓕᕆᔾᔪᓯᕐᒥᒃ ᖃᐅᔨᓇᓱᒃᖢᑎᒃ ᐳᕙᒡᓗᒃᑐᓂᒃ. ᐅᓇ ᐊᓪᓗᕆᐊᕈᑎᑦᑎᐊᕙᒻᒪᕆᐊᓗᒃ ᐱᑕᖃᕈᓐᓃᖅᑎᓐᓂᐊᕐᓗᒍ ᐳᕙᒡᓗᖕᓇᖅ ᐃᓄᐃᑦ ᓄᓇᖓᓐᓂᒃ.”
ᑲᑕᕆ ᒪᒃᓚᐅᑦ
ᐊᖓᔪᖅᑳᖑᑲᐃᓐᓇᖅᑐᖅ, ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᖃᐅᔨᓴᕐᕕᖕᓄᑦ
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᔭᓂᕗ ᒑᓐᑕᓐ
ᑐᑭᒧᐊᒃᑎᑦᑎᔨ ᑐᓴᒐᒃᓴᓕᕆᔨᓄᑦ
ᐋᑐᕚᒥ ᐋᓐᓂᐊᕕᐊᓗᖕᒥ ᖃᐅᔨᓴᕐᕕᒃ
