(ᐄᑉᕈ 25, 2023, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᒐᕙᒪᒃᑯᑦ (GN) ᑐᓂᓯᓯᒪᓕᖅᑐᑦ ᐅᓐᓂᕐᓗᕝᕕᒃᑰᑎᑦᓯᒍᑎᒃᓴᒥᓂᒃ ᓄᓇᕗᑦ ᐃᖅᑲᖅᑐᐃᕕᖓᑕ ᐃᓱᒪᓕᐅᕈᑎᒋᓚᐅᖅᑕᖓᓂᒃ ᐃᓄᒃᑐᑦ ᐃᓕᓐᓂᐊᕐᓂᖅ ᐊᔾᔨᐅᖏᑎᑕᐅᓂᕐᒧᑦ ᐱᕋᔮᖑᓯᒪᓂᖓᓄᑦ ᐃᖅᑲᖅᑐᐃᕕᒃᑰᖁᔨᒍᑎᖏᓐᓂᒃ. ᓄᓇᕗᑦ ᑐᙵᕕᒃᑯᑦ ᑎᒥᖓ (ᑐᙵᕕᒃ) ᐊᒻᒪᓗ ᒪᕐᕉᒃ ᐃᓚᒌᑦ ᐃᓄᐃᑦ ᑐᓂᓯᓚᐅᖅᑐᑦ ᐃᖅᑲᖅᑐᐃᕕᒃᑰᑎᑦᓯᒍᒪᒍᑎᒥᓂᒃ ᐊᔾᔨᐅᙱᑎᑕᐅᓂᕐᒧᑦ ᐱᕋᔮᖑᓯᒪᓂᕐᒧᑦ ᐊᑐᖃᑦᑕᖅᑕᖓᓂᒃ ᐃᓄᐃᑦ ᐃᓕᓐᓂᐊᖅᑏᑦ ᓄᓇᕗᒻᒥ ᐃᓕᓐᓂᐊᑎᑦᓯᒍᑕᐅᕙᑦᑐᓂᒃ.
ᑐᙵᕕᒃᑯᑦ ᖁᕕᐊᒋᔭᖃᙱᑦᑐᑦ ᓄᓇᕗᑦ ᒐᕙᒪᒃᑯᑦ ᐱᓇᓱᐊᒡᒑᖃᕐᓂᖏᓐᓂᒃ ᑐᓂᓯᓯᒪᓂᖏᓐᓂᓪᓗ ᒐᕙᒪᒃᑯᑎᒍᑦ ᐃᑲᔫᑎᒃᓴᓂᒃ ᐅᓇᑕᕈᑎᒃᓴᒥᓂᒃ ᓄᓇᕗᑦ ᐃᓄᓐᓂᒃ ᐃᖅᑲᖅᑐᐃᕕᖕᒥ. ᒫᑦᓯ 2, 2023−ᒥ, ᐃᖅᑲᖅᑐᐃᕕᒃ ᐃᓱᒪᓕᐅᓚᐅᖅᑐᖅ ᐃᖅᑲᖅᑐᐃᕕᖕᒥ ᓈᓚᑦᑕᐅᒋᐊᖃᕆᐊᖓ ᐊᒻᒪᓗ ᐃᖅᑲᑐᖅᑕᐅᒍᑕᐅᓕᕐᓗᓂ ᑭᖑᕙᕆᐊᖅᑎᑕᐅᙱᓯᐊᕐᓗᓂ, ᐊᒻᒪᓗ ᑎᓕᓯᓪᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ ᑐᓂᓯᖁᓪᓗᒋᑦ ᑲᒪᒋᔭᐅᒻᒪᐃᑦᑐᑐᖃᕐᒥᒃ ᓴᐳᓐᓂᐊᕈᑎᒥᓂᒃ ᑎᑎᕋᖅᓯᒪᔪᒥᒃ.
ᐅᓐᓂᕐᓘᑎᖏᑦ ᐃᓱᒪᓕᐅᕈᑎᒧᑦ, ᓄᓇᕗᑦ ᒐᕙᒪᒃᑯᑦ ᐅᖃᐅᓯᖃᕆᐊᒃᑲᓂᖅᑐᑦ ᑖᑦᓱᒥᖓᑦᓴᐃᓐᓇᖅ ᐅᓗᕆᐊᓇᖅᑐᒥᒃ ᐋᓐᓂᓇᖅᑐᒥᓪᓗ ᐊᐃᕙᔾᔪᑎᒥᓂᒃ ᐃᖅᑲᖅᑐᐃᕕᖕᒥᒃ ᑕᐃᒪᐃᒋᐊᖃᕐᒪᑦ ᕿᐱᓘᑕᐅᓚᐅᖅᑐᒥᒃ. GN ᐊᐃᕙᔾᔪᑎᖓ:
- ᐃᓄᐃᑦ ᐊᔾᔨᐅᖏᑦᑐᑦ ᐱᔪᓐᓇᐅᑎᖏᑦ ᑲᓇᑕᒥ ᒪᓕᒐᕐᔪᐊᖅ ᐱᔪᓐᓇᐅᑎᓄᑦ ᐃᓱᒪᖅᓲᑎᓄᓪᓗ (ᒪᓕᕐᔪᐊᖅ) ᓴᐳᔾᔨᓯᒪᓂᕐᒧᑦ ᐃᓄᓐᓂᒃ ᐊᔾᔨᐅᙱᑎᑕᐅᓂᕐᒧᑦ ᐱᕋᔭᑕᐅᓯᒪᓂᕐᒥᒃ ᓵᖓᑦᓯᒍᑕᐅᔪᒥᒃ ᐃᓄᒃᑐᑦ ᐃᓚᒋᔭᐅᓂᖓᓂᒃ ᐃᓄᐃᑦ ᐃᓕᖅᑯᓯᒃᑯᑦ ᖃᐅᔨᒪᔮᖑᓂᖏᓐᓂᒃ;
- ᐱᖁᔭᕐᔪᐊᖅ ᑖᒃᑯᓃᖓᑐᐊᖅ ᓴᐳᔾᔨᓯᒪᔪᖅ ᖃᓪᓗᓈᑎᑐᑦ ᐅᐃᕖᑎᑐᓪᓗ ᐅᖃᕈᓐᓇᖅᑐᓂᒃ ᐃᓕᓐᓂᐊᖅᑎᓂᒃ ᐊᔾᔨᐅᖏᑎᑦᓯᓂᕐᒧᑦ−ᐱᕋᔮᖃᖅᓯᒪᓂᕐᒥᒃ; ᐊᒻᒪᓗ
- ᓄᓇᕗᑦ ᒪᓕᒐᓕᐅᕐᕕᖓ ᓴᖅᑮᒍᓐᓇᖅᑐᖅ ᑭᓱᑐᐃᓐᓇᕐᓄᑦ ᒪᓕᒐᕐᓂᒃ ᒪᓕᒐᓕᐅᕈᒪᓐᓂᕈᑎᒃ ᐃᓄᒃᑐᑦ ᐃᓕᓐᓂᐊᓂᕐᒧᑦ, ᐊᓪᓛᑦ ᐅᓗᕆᐊᓇᕋᓗᖅᑲᑦ ᐃᓄᓐᓄᑦ.
ᐄᑉᕈ 14, 2023-ᒥ, GN ᑐᓂᓯᓚᐅᖅᑐᑦ ᑎᑎᕋᖅᓯᒪᔭᒥᓂᒃ ᓴᐳᓐᓂᐊᓂᕐᒧᑦ, ᓴᖅᑮᒍᑎᒋᒃᑲᓂᖅᑕᖓ ᐊᖏᔪᒻᒪᕆᐅᔪᒥᒃ ᑖᑦᓱᒥᖓᑦᓴᐃᓐᓇᖅ ᓱᕋᒍᑕᐅᒍᓐᓇᖅᑐᒥᒃ ᐊᐃᕙᔾᔪᑎᓂᒃ ᑖᒃᑯᓇᓃᑦᑐᓂ ᐊᐅᓚᔾᔭᐃᒍᑎᒋᓯᒪᔭᖏᓐᓂ ᓄᖅᑲᑎᑦᓯᓂᕐᒧᑦ, ᐃᓚᒋᔭᐅᓪᓗᑎᒃ ᖃᓄᐃᓕᖓᓂᖏᓐᓄᑦ ᐃᓄᐃᑦ ᐃᓕᓐᓂᐊᖅᑏᑦ ᓴᐳᔾᔭᐅᓯᒪᙱᓐᓂᖏᓐᓂᒃ ᐱᖁᔭᕐᔪᐊᒥ ᓴᐳᔾᔭᐅᓯᒪᙱᓐᓂᖓᓄᑦ ᐃᓄᒃᑐᑦ ᐅᖃᐅᓯᖅ ᐅᕝᕙᓘᓐᓃᑦ ᐅᖃᐅᓯᖅ ᐃᓕᓴᐃᒍᑎᒃᓴᖅ.
“ᑐᙵᕕᒃᑯᑦ ᐱᓇᓱᐊᖏᓐᓇᖅᑐᑦ ᐊᖏᕈᑎᒋᓯᒪᔭᑦᑎᒍᑦ ᓴᐳᔾᔨᓂᕐᒥᒃ ᐃᓄᓐᓂᒃ ᐊᒻᒪᓗ ᐱᓇᓱᐊᕐᓂᕐᒥᒃ ᓇᐅᒃᑯᑐᐃᓐᓇᖅ ᐊᖅᑯᑎᒋᔪᓐᓇᑕᑦᑎᒍᑦ ᐃᓱᓕᖁᓪᓗᒍ ᐊᔾᔨᐅᙱᑎᑕᐅᓂᕐᒧᑦ ᐱᕋᔭᑕᐅᓯᒪᓂᖏᑦ ᐃᓄᐃᑦ ᐃᓕᓐᓂᐊᖅᑏᑦ ᓄᓇᕗᒻᒥ ᐃᓕᓐᓂᐊᓂᕐᒧᑦ ᐊᐅᓚᓂᖓᒍᑦ. ᐊᓯᖅᑯᕝᕕᖃᙱᑐᒃᑰᖅᑎᑕᐅᓂᖅ ᐃᓕᓐᓂᐊᕐᓗᓂ ᑭᓯᐊᓂ ᖃᓪᓗᓈᑎᑐᑦ ᐅᐃᕖᑎᑐᓪᓘᓐᓃᑦ ᐊᒻᒪᓗ ᐃᓱᒪᖅᓱᕈᓐᓇᙱᑎᑕᐅᓂᖅ ᐃᓄᐃᑦ ᐅᖃᐅᓯᖓᓂᒃ ᐃᓕᓴᐃᓂᕐᒧᑦ ᑭᖑᓂᐊᒍᑦ ᐃᓕᓐᓂᐊᕐᓂᓖᑦ 3 ᐅᓗᕆᐊᓇᖅᑐᒦᒍᑕᐅᔪᖅ ᓯᕗᓂᒃᓴᖓᓄᑦ ᓱᕈᓯᖁᑎᑦᑎᓐᓄᑦ, ᐃᓕᖅᑯᓯᑦᑎᓐᓄᑦ ᐊᒻᒪᓗ ᐅᖃᐅᓯᑦᑎᓐᓄᑦ, ᓇᖕᒥᓂᕆᔭᑦᑎᓐᓂᒃ ᐃᓄᐃᑦ ᓄᓇᖓᓐᓂ”. ᐅᖃᓚᐅᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.
“ᖁᕕᐊᓇᙱᑦᑐᖅ ᐅᓪᓗᒥ ᑭᒃᑯᑐᐃᓐᓇᕐᓄᑦ ᒐᕙᒪᕗᑦ ᐊᐅᓚᑦᓯᓪᓗᓂ ᐱᓕᕆᐊᖃᕐᒪᑦ ᓵᙵᑦᓯᒍᑎᒥᓂᒃ ᒪᑭᒪᓂᖏᓐᓂᒃ ᓇᓗᖅᑯᑎᒐᑎᒃ, ᐅᖃᐅᓯᕐᒥᒃ, ᐃᓕᖅᑯᓯᕐᒥᒃ, ᐊᒻᒪᓗ ᑭᒃᑰᓂᖏᓐᓂᒃ ᐅᓄᕐᓂᖅᓴᐅᔪᑦ ᓂᕈᐊᖅᑏᑦ, ᐃᓚᒋᔭᐅᓪᓗᑎᒃ ᐊᑦᑐᑕᐅᑦᓴᐅᑎᒋᔪᓐᓇᖅᑐᖁᑎᕗᑦ − ᐃᓄᐃᑦ ᓱᕈᓰᑦ. ᓴᖅᑭᕈᑕᐅᓚᐅᙱᑦᑐᖅ ᓄᓇᕗᑦ ᒐᕙᒪᖓᓄᑦ ᐊᒻᒪᓗ ᓄᓇᕗᑦ ᐱᙳᖅᑎᑕᐅᒍᑎᒋᓚᐅᙱᑕᖓ. ᑐᐊᕕᕐᓇᖅᑐᒥᒃ ᓱᕈᓯᖁᑎᑦᑕ ᑲᔪᓯᐊᑦᓯᐊᓂᖅᓴᐅᔾᔪᑎᒃᓴᖓᓂᒃ ᑲᔪᓯᑎᑦᓯᓯᒪᒋᐊᖃᖅᑐᒍᑦ ᐃᓕᓐᓂᐊᕕᖕᒥ, ᐊᒻᒪᓗ ᑲᔪᓯᑦᓯᐊᓂᐊᖅᑐᑦ ᐃᓕᓐᓂᐊᕐᕕᒃ ᐊᐅᓚᓂᖓ ᐃᑲᔪᖅᓱᐃᑉᐸᑦ ᐅᖃᐅᓯᑦᑎᓐᓂᒃ ᐃᓕᖅᑯᓯᑦᑎᓂᓪᓗ,” ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓᑕ−ᑐᒡᓕᐊ, ᐹᓪ ᐃᕐᖓᐅᑦ.
ᓄᓇᕗᑦ ᒐᕙᒪᒃᑯᑦ ᐅᓐᓂᓗᕝᕕᒃᑰᕈᑎᖓ ᑕᑯᔭᒃᓴᖅ ᐅᕙᓂ: NTI v. GN – Notice of Appeal Application to Strike (tunngavik.com) ᐊᒻᒪᓗ ᐊᑕᖏᖅᑐᖅ ᑎᑎᕋᖅᓯᒪᔪᖅ ᓴᐳᓐᓂᐊᕈᑎᖓᓄᑦ ᐅᕙᓃᒻᒥᔪᖅ: GN-Statement-of-Defence-April-14-2023.pdf (tunngavik.com). ᐅᖃᓕᒫᕈᓐᓇᖅᑕᑎᑦ ᐃᖅᑲᖅᑐᐃᔨ ᕙᐃᓵᒃ ᐃᓱᒪᓕᐅᕈᑎᒋᓚᐅᖅᑕᖓ ᕿᐱᓗᓐᓂᕐᒧᑦ ᓄᓇᕗᑦ ᒐᕙᒪᒃᑯᑦ ᐊᐅᓚᔾᔭᐃᒍᑎᖓ ᓄᖅᑲᑎᑦᓯᓂᕐᒧᑦ ᐊᑕᖏᖅᑐᖅ ᑲᓲᒪᔾᔪᑎᖓ: 08-21-463-CVC 2023-03-02.pdf (tunngavik.com)
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐊᕙᓐ ᑲᑉᓗᑦᓯᐊᒃ
ᑐᓴᐅᒪᔾᔪᑎᓕᕆᔨᒃᑯᓐᓂ ᑐᑭᒧᐊᒃᑎᑦᑎᔨ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
