(ᓯᑎᐱᕆ 8, 2016 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᑐᒡᓕᐊ-ᐊᖓᔪᖅᑳᑉ ᔭᐃᒻᔅ ᐃᑦᑐᓗᒃ ᐅᓪᓗᒥ ᓴᖅᑭᑎᑦᓯᔪᖅ ᑖᒃᑯᓂᖓ 2014/15 ᐃᓄᐃᑦ ᐃᓕᖅᑯᓯᖏᑦ ᐊᒻᒪ ᐃᓅᖃᑎᒌᖕᓂᖏᓐᓄᑦ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓂᒃ ᑕᐃᔭᐅᔪᑦ ᐃᓄᐃᑦ ᐃᓅᓯᖏᑦ ᐊᒻᒪ ᐃᓕᖅᑯᓯᒥᑎᒍ ᓇᖕᒥᓂᖅ-ᒪᑭᒪᓂᖏᑦ.
ᑖᒃᑯᐊ 2014/15 ᐅᓂᒃᑳᑦ ᐱᑕᖃᖅᑎᑦᓯᔪᑦ ᖃᓄᐃᓕᖓᓂᖏᓐᓂᒃ ᐃᓅᓯᐅᔪᑦ ᐊᒻᒪ ᖃᖔᓗᓂ ᐃᓗᓕᖏᑦ ᐋᑎᑯ 32 ᐊᒻᒪ, ᓇᓗᓇᐃᔭᐃᓪᓗᑎᒃ ᓱᖕᒪᑦ ᓴᖅᑭᑎᑕᐅᓚᐅᕐᓂᖏᓐᓂᒃ ᐊᖏᖃᑎᒌᒐᓱᐊᕈᑕᐅᑎᓪᓗᒍ ᓄᓇᕗᒥ ᐊᖏᕈᑏᑦ. ᑖᒃᑯᐊ ᐅᓂᒃᑳᑦ ᐊᑐᓕᖁᔨᔪᑦ ᐋᖅᑭᒃᑕᐅᖁᔨᓪᓗᑎᒃ ᐊᐅᓚᔾᔪᑎᒃᓴᓂᒃ ᓴᖅᑭᔮᖅᑎᑦᓯᒍᑕᐅᓂᐊᖅᑐᓂᒃ ᑐᑭᓯᐅᒪᖃᑎᒌᑦᓯᐊᕐᓂᖅᓴᐅᓗᑎᒃ ᐅᕝᕙᓘᓐᓃᑦ ᐱᖃᑎᒌᒡᓗᑎᒃ ᐱᓕᕆᐊᒃᓴᖏᑦ ᐊᒻᒪ ᑲᒪᒋᒋᐊᖃᖅᑕᖏᑦ ᑕᒡᕙᓂ ᐊᑐᓕᖅᑎᑕᐅᓂᖓᓂᒃ ᐋᑎᑯ 32, ᐊᒻᒪ ᐋᖅᑭᒃᓯᓗᓂ ᐊᑐᓕᖅᑎᑕᐅᕙᓪᓕᐊᔪᑦ ᓇᐅᑦᑎᖅᑐᖅᑕᐅᔾᔪᑎᒃᓴᖏᓐᓂᒃ.
“ᐊᖏᖃᑎᒌᒐᓱᐊᕐᓂᖃᖅᑎᓪᓗᒋᑦ, ᐃᓄᐃᑦ ᐃᓄᐃᑦ ᓇᓗᓇᐃᖅᓯᒋᐊᖃᓚᐅᕐᒪᑕ ᖃᓄᑎᒋ ᓇᖕᒥᓂᖅ-ᒪᑭᒪᔾᔪᑎᒃᓴᓂᒃ ᐱᔾᔪᑎᒋᓪᓗᒋᑦ ᐱᕙᓪᓕᐊᑎᑕᐅᓂᖏᑦ ᐃᓅᓰᑦ ᐊᒻᒪ ᐃᓕᖅᑯᓯᕐᓅᖓᔪᑦ ᐊᑐᐊᒐᐃᑦ ᐊᒻᒪ ᐃᑲᔫᑕᐅᔪᑦ ᐱᓕᕆᐊᑦ ᓄᓇᕗᒥ. ᐱᔾᔪᑎᒋᓪᓗᒋᑦ ᑕᒪᒃᑯᐊ ᐊᑐᐊᒐᑦ ᐊᒻᒪ ᐱᓕᕆᐊᑦ ᐃᓚᐅᑎᑕᐅᓚᐅᓐᖏᓐᓂᖏᑦ ᑖᒃᑯᓇᓂ ᐊᖏᕈᑎᓂ, ᐃᓄᐃᑦ ᓴᖅᑭᑎᑦᓯᓕᓚᐅᖅᑐᑦ ᐋᑎᑯ 32-ᒥᑦ ᑕᐃᒪᓐᓇ ᒪᓕᒐᑎᒎᖁᓪᓗᒍ, ᑐᓐᖓᕕᒃᑯᑦ ᓴᐳᒻᒥᔭᐅᔾᔪᑎᖃᖁᓪᓗᒍ ᐃᓚᐅᔪᓐᓇᖁᓪᓗᑕ ᐋᖅᑭᒃᓱᖅᑕᐅᓂᖏᓐᓂ ᐊᒻᒪ ᓴᖅᑭᐅᒪᑎᑕᐅᓂᖏᓐᓂᒃ ᒐᕙᒪᒃᑯᑦ ᐃᓅᓯᓕᕆᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖏᑦ ᐊᒻᒪ ᐱᔨᑦᓯᕋᐅᑎᖏᑦ” ᐅᖃᖅᑐᖅ ᐃᑦᑐᓗᒃ.
ᑖᒃᑯᐊ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᓴᖅᑭᖃᑦᑕᕆᐊᖃᖅᑎᑕᐅᖕᒪᑕ ᐋᑎᑯ 32.3.4 ᓄᓇᕗᒥ ᐊᖏᕈᑎᓂ. ᓇᓗᓇᐃᖅᑕᐅᓯᒪᖕᒪᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐋᑎᑯ 32, ᑖᒃᑯᐊ ᐅᓂᒃᑳᑦ ᓴᖅᑭᑎᑕᐅᓂᐊᑐᑦ ᓄᓇᕗᑦ ᒪᓕᒐᓕᐅᕐᕕᐊᓂ ᐊᒻᒪ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ.
