ᓴᒃᑯᑕᐅᑲᐅᑎᒋᔭᕆᐊᓕᒃ
(ᒫᑦᓯ 30, 2026 – ᓅᒃ, ᑲᓛᖡᑦ ᓄᓈᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐱᔭᕇᓚᐅᖅᑐᑦ ᑲᑎᒪᓂᕐᒥᓂᒃ ᐃᑉᐸᒃᓴᖅ, ᓅᒃ, ᑲᓛᖡᑦ ᓄᓈᓐᓂ, ᐊᒥᓱᓂᒃ ᐅᓪᓗᓂᒃ ᐅᖃᐅᓯᖃᓚᐅᖅᑐᑎᑦ ᐱᔾᔪᑎᖃᓗᐊᖅᑐᓂᒃ ᐃᓄᐃᑦ ᓯᕗᓪᓕᐅᑎᖁᔭᕐᒥᓂᒃ. ᑖᒃᑯᐊ ᐅᖃᐅᓯᐅᓚᐅᕐᒥᔪᑦ ᐃᒡᓗᓕᕆᓂᖅ, ᐃᓕᓐᓂᐊᕐᓂᓕᕆᓂᖅ, ᐊᐅᓚᑦᓯᔨᓂᖅ, ᐊᒻᒪᓗ ᓴᙵᑦᑎᕆᔭᐅᓂᖏᑦ ᐱᓕᕆᖃᑎᒌᓐᓂᖏᑕ ᐃᓄᐃᑦ ᐃᖅᑲᓇᐃᔭᖃᑎᒌᑦᑐᑦ ᐃᓄᐃᑦ ᓄᓈᓐᓂ.
“ᖁᔭᓕᕗᖓ ᑲᑎᒪᔨᐅᖃᑕᐅᔪᑦ ᑲᑎᓚᐅᕐᒪᑕ ᐃᓱᒪᓕᐅᕆᐊᖅᑐᖅᑐᑎᑦ ᐋᖅᑮᔾᔪᑎᓂᒃ ᓯᕗᓂᒃᓴᕆᔭᖏᖕᓂᒃ ᐃᓄᖁᑎᑦᑕ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐹᓪ ᐃᕐᖓᐅᑦ. “ᑎᓕᔭᐅᔾᔪᑎᒋᓯᒪᔭᕗᑦ ᑐᙵᕕᓕᒃ ᐃᓄᐃᑦ ᐃᓕᒌᓐᓂᖏᓐᓂᒃ, ᐊᒻᒪᓗ ᑕᒪᒃᑯᐊ ᑲᑎᒪᓂᐅᔪᑦ ᐊᔾᔨᖃᖅᑐᑦ ᑲᑐᑎᔭᑦᑎᓐᓂᒃ ᑲᒪᒋᔭᕆᐊᓕᑦᑎᓐᓂᒃ ᑭᒡᒐᖅᑐᖅᑐᒋᑦ ᐃᓄᐃᑦ.”
ᐃᓄᐃᑦ ᓄᓈᑦ
ᓅᒃ−ᒦᑦᑎᓪᓗᒋᑦ, ᑲᑎᒪᔩᑦ ᑲᑎᒪᖃᑎᖃᓚᐅᖅᑐᑦ ᓯᕗᓕᖅᑎᓂᒃ ᓄᓇᕐᔪᐊᑉ ᐅᑭᐅᖅᑕᖅᑐᖓᓂᕐᒥᐅᑦ ᑲᑎᒪᔨᖏᓐᓂᒃ, ᓂᕈᐊᖅᑕᐅᓯᒪᔪᓂᒃ ᑲᓛᖡᑦ ᓄᓈᓐᓂ ᓇᒻᒥᓂᖅᓱᕐᓂᕐᒧᑦ ᐊᒻᒪᓗ ᓄᓇᓕᕐᔪᐊᖑᖃᑎᒌᑦᑐᑦ ᒥᓂᔅᑕᖓᓂᒃ ᑲᒪᒋᔭᖃᖅᑐᒥᒃ, ᐊᒻᒪᓗ ᑭᒡᒐᖅᑐᐃᔨᕐᔪᐊᖓ ᑲᓛᖡᑦ ᓄᓈᑦ ᑲᓇᑕᒥ. ᐅᖃᐅᓯᖃᓗᐊᓚᐅᖅᑐᑦ ᑲᑐᔾᔭᐅᔪᓂᒃ ᐃᓄᐃᑦ ᓯᕗᓪᓕᐅᑎᖁᔭᕐᒥᓂᒃ, ᐃᖅᑲᓇᐃᔭᖃᑎᒌᑦᑐᑎᑦ ᐃᓄᐃᑦ ᓄᓈᓐᓂ, ᐊᒻᒪᓗ ᖃᐅᔨᒪᓇᑦᑎᐊᖅᑎᑦᑎᓪᓗᑎᑦ ᐃᓄᐃᑦ ᓂᐱᖃᐃᓐᓇᕈᒪᓪᓗᑎᑦ ᐃᓱᒪᓕᐊᖑᔪᓂᒃ ᐊᕕᑦᑐᖅᓯᒪᔪᓂ ᐊᒻᒪᓗ ᓄᓇᓕᕐᔪᐊᖑᔪᓂᒃ.
“ᑲᓇᑕᑉ ᐅᑭᐅᖅᑕᖅᑐᖓ ᓄᓇᓕᕐᔪᐊᖑᖃᑎᒋᔭᓂ ᐱᓕᕆᖃᑎᖃᕐᓂᖏᖕᓄᑦ ᐊᑐᐊᒐᖅ ᓇᓗᓇᐃᖅᓯᓯᒪᕗᖅ ᐅᑭᐅᖅᑕᖅᑐᖅ ᐱᓕᕆᐊᖃᕐᕕᐅᒍᒪᔪᕐᔪᐊᖑᓕᕐᓂᖓᓂᒃ. ᑲᑎᒪᔩᑦ ᐅᖃᐅᓯᖃᓚᐅᖅᑐᑦ ᐱᔪᓐᓇᐅᑎᖃᒻᒪᕆᓐᓂᖏᓐᓂᒃ ᐊᒻᒪᓗ ᐊᐅᓚᑦᑎᔾᔪᓯᖃᕐᓂᖏᓐᓂᒃ ᐃᓄᐃᑦ ᓇᖕᒥᓂᖅ ᐃᓱᒪᓕᐅᖃᖃᑦᑕᕐᓗᑎᑦ, ᐊᐅᓚᑦᑎᓗᑎᑦ ᓄᓇᑦᑎᓐᓂ ᓄᓇᒦᙶᖅᑐᖁᑎᑦᑎᓐᓂ ᐊᒻᒪᓗ ᓇᒻᒥᓂᖅ ᐱᓇᓱᐊᕐᓗᑕ ᐱᕙᓪᓕᐊᔪᓕᕆᓂᕐᒥᒃ, ᐃᓅᓯᓕᕆᓂᕐᒥᒃ ᐊᒻᒪᓗ ᐃᓕᖅᑯᓯᓕᕆᓂᕐᒥᒃ ᐱᕙᓪᓕᐊᓂᖃᖅᑎᓪᓗᑕ,’ ᐅᖃᖅᑐᓂ ᐊᖓᔪᖅᑳᖅ ᑐᖏᓕᐊ, ᐋᑕᒥ ᐃᑦᑐᐊᑦᓯᐊᖅ.
ᐃᒡᓗᓕᕆᓂᖅ
ᑲᑎᒪᓂᖃᖅᑎᓪᓗᒋᑦ, ᑲᑎᒪᔩᑦ ᕿᒥᕐᕈᓇᓚᐅᖅᑐᑦ ᐅᐸᓗᖓᐃᔭᑦᑎᐊᖅᓯᒪᔪᓂᒃ ᑮᓇᐅᔭᓂᒃ ᐊᑐᕐᓂᐊᕐᓂᕐᒧᑦ ᐸᕐᓇᐅᑎᖏᓐᓂᒃ ᑮᓇᐅᔭᖅᑐᕈᑎᒃᓴᑦ ’22 ᐊᑭᑐᓗᐊᙱᑦᑐᑦ ᐃᒡᓗᓕᐅᓂᕐᒧᑦ ᑮᓇᐅᔭᖃᖅᑎᑕᐅᓂᖏᑦ ᐃᒪᓐᓇᐅᓂᐊᕐᓗᑎᑦ $163.8 ᒥᓕᐊᓐ 2026–2027−ᒥ ᑖᒃᑯᓄᖓ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᓴᓇᓂᐊᕐᓂᕐᒧᑦ ᐃᒡᓗᓂᒃ ᐸᕐᓇᐅᑎᖏᖕᓄᑦ. ᐃᒡᓗᓕᐊᕆᔭᐅᔪᑦ ᐊᐅᓪᓛᖅᑕᐅᓛᖅᑐᑦ ᐃᒡᓗᕗᑦ ᑯᐊᐳᕇᓴᙵᓄᑦ, ᖃᐅᔨᒪᑦᑎᐊᕐᓗᑎᑦ ᐃᒡᓗᓂ ᐊᑐᖅᑐᐊᖅᑐᑦ ᐃᑲᔫᑕᐅᓂᐊᕐᒪᑕ ᐊᑐᖅᑐᐊᕐᓂᕐᒧᑦ ᐃᑲᔫᑎᓂᒃ. ᑲᑎᒪᔨᐅᔪᑦ ᐅᖃᐅᓯᖃᒻᒪᕆᓚᐅᖅᑐᑦ ᐃᒡᓗᖃᕐᓂᕐᒧᑦ ᐋᖅᑭᒍᑎᒋᔭᐅᖏᓐᓇᕆᐊᓖᑦ ᐃᓄᖕᓄᑦ−ᓯᕗᒃᑲᖅᑖᖑᓗᑎᑦ, ᒪᑭᒪᔪᓐᓇᖅᑐᒃᑯᑦ ᒐᕙᒪᑐᖃᒃᑯᓐᓂ ᐃᑲᔪᖅᑐᖅᑕᐅᔾᔪᑎᖃᕐᓗᑎᑦ ᐊᒻᒪᓗ ᐃᓄᐃᑦ ᐃᓱᒪᓕᐅᕈᓐᓇᕐᓗᑎᑦ ᑐᐊᕕᕐᓇᖅᑐᓂᒃ ᓄᓇᓕᓐᓂ ᑭᙴᒪᒋᔭᐅᔪᑦ ᑲᒪᒋᔭᐅᑦᓯᐊᖁᓪᓗᒋᑦ.
ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᓇᓕᒧᒌᑦᑎᑕᐅᓂᖏᑦ
ᓄᓇᕗᑦ ᑐᙵᕕᒃ ᑎᒥᖓ ᐊᖏᖅᓯᓯᒪᔪᑦ ᓯᕗᓪᓕᐅᔾᔭᐅᖁᔭᐅᔪᑦ ᑮᓇᐅᔭᖅᑎᒍᑦ ᐊᑐᕐᕕᐅᓗᑎᑦ ᐊᒻᒪᓗ ᑐᙵᕕᒋᔭᐅᓂᐊᖅᑐᒥᒃ ᑮᓇᐅᔭᓂᒃ ᐊᑐᕐᓂᕐᒧᑦ ᐸᕐᓇᐅᑎᒥᒃ ᐃᖅᑲᓇᐃᔮᖃᕆᐊᓯᖁᓪᓗᒋᑦ ᐋᓐᓂᐊᖅᑕᐃᓕᑎᑦᓯᓂᕐᒧᑦ. ᑎᓴᒪᑦ ᓯᕗᓪᓕᐅᔾᔭᐅᖁᔭᐅᓯᒪᔪᑦ ᐅᑯᐊᖑᕗᑦ ᓂᕿᖃᑦᓯᐊᖃᑦᑕᕐᓂᖏᑦ ᐃᓄᐃᑦ, ᐃᓄᐃᑦ ᓇᒻᒥᓂᖅᓱᕐᓂᖏᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ, ᓲᕐᓗᒃ ᒪᓕᑦᑎᖃᖃᑦᑕᕆᐊᖃᕐᓂᖏᑦ ᐃᓄᐃᑦ ᐋᓐᓂᐊᕐᕕᓕᐊᖅᑐᑦ ᐊᒻᒪᓗ ᓄᓇᓕᓐᓂ ᐋᓐᓂᐊᖅᑐᓕᕆᓂᕐᒧᑦ ᐃᖅᑲᓇᐃᔭᓲᑦ, ᐊᒻᒪᓗ ᐊᑐᕋᒃᓴᓂᒃ ᐊᑐᕈᓐᓇᕐᓗᑎᑦ ᐊᑐᐃᓐᓇᐅᒪᕕᐅᑎᑕᐅᖃᑦᑕᕐᓗᑎᑦ ᐱᓕᕆᐊᒃᓴᖏᓐᓂᒃ ᑲᒪᖁᓪᓗᒋᑦ ᐊᒻᒪᓗ ᖃᓄᐃᓕᐅᕈᑎᖃᕆᐊᖃᑦᑕᕐᓂᖅ 8 ᒥᓕᐊᓐ ᑮᓇᐅᔭᑦ ᐊᖏᖅᑕᐅᓚᐅᖅᑐᑦ ᑕᒪᒃᑯᐊ ᐱᒻᒪᕆᐅᔪᑦ ᐃᖅᑲᓇᐃᔮᑦ ᐱᒋᐊᕈᓐᒻᓇᖅᓯᖁᓪᓗᒋᑦ, ᐱᖃᓯᐅᑎᓪᓗᒍ ᓄᓇᓕᓐᓂ ᑐᙵᕕᓖᑦ ᑲᑐᔾᔨᖃᑎᒌᖏᑦ ᖃᓄᐃᑦᑕᐃᓕᒪᓂᕐᒧᑦ ᐱᓕᕆᐊᖃᓲᑦ ᐊᒻᒪᓗ ᐊᒥᓱᕈᕆᐊᖅᑕᐅᓗᑎᑦ ᐋᓐᓂᐊᖅᑐᓕᕆᓂᕐᒧᑦ ᐃᑲᔪᖅᑐᐃᔾᔪᑏᑦ ᓄᓇᕗᒻᒥᐅᑦ ᐃᓄᖏᖕᓄᑦ.
ᐃᓐᓇᒻᒪᕇᑦ ᐸᖅᑭᔭᐅᓂᖏᑦ
ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐊᒻᒪᓗ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᖃᖅᑎᓪᓗᒋᑦ ᐃᓐᓇᒻᒪᕇᑦ ᓯᕗᓪᓕᐅᔾᔭᐅᖁᔭᐅᓯᒪᔪᑦ ᑲᒪᒋᔭᐅᑦᓯᐊᕐᓗᑎᑦ. ᐊᔭᐅᕆᓗᑎᑦ ᐃᓐᓇᒻᒪᕆᑦ ᐸᖅᑭᔭᐅᓂᖏᑦ ᐱᕐᔪᐊᖑᖕᒪᑦ, ᑐᐊᕕᕐᓇᖅᑑᓪᓗᓂ ᐊᒻᒪᓗ ᐃᑉᐱᒋᔭᐅᑦᓯᐊᕆᐊᖃᖅᓱᓂ. ᓄᓇᕗᑦ ᑐᙵᕕᒃ ᑎᒥᖓ ᐅᖃᐅᓯᖃᒃᑲᓐᓂᕈᒪᒻᒪᕆᒻᒪᑕ ᑕᒪᐃᓐᓂ ᐊᖅᑯᑎᓕᒫᑦ ᐃᑲᔪᖅᑐᐃᔾᔪᑕᐅᔪᑦ ᐊᑐᐃᓐᓇᐅᒪᑎᑕᐅᔭᕆᐊᓖᑦ ᐃᓐᓇᒻᒪᕆᖕᓄᑦ ᐊᖏᕐᕋᒥᓂᒃ ᐃᑦᑐᕈᒃᑲᓐᓂᖁᓪᓗᒋᑦ ᓂᖏᐅᕈᒃᑲᓐᓂᖁᓪᓗᒋᓪᓘᓐᓃᑦ. ᑕᒪᓐᓇ ᐱᖃᓯᐅᔾᔨᔪᖅ ᑕᒪᒃᑮᓐᓂᒃ ᐊᑯᓂᐅᔪᒧᑦ ᐃᓐᓇᕐᓂᒃ ᐸᖅᑭᕖᑦ ᐊᒻᒪᓗ ᐃᓐᓇᒻᒪᕆᒃᑯᑦ ᐃᒡᓗᖁᑎᖏᑦ. ᓄᓇᕗᑦ ᑐᙵᕕᒃ ᑎᒥᖓ ᐅᐸᓗᖓᐃᖅᓯᒪᔪᑦ ᐃᖅᑲᓇᐃᔭᖃᑎᖃᕐᓗᑎᑦ ᓄᓇᕗᑦ ᒐᕙᒪᖓᓂᒃ ᐋᖅᑭᒃᓱᐃᖃᑎᒌᖁᓪᓗᒋᑦ ‘ᐊᑯᓂᐅᔪᒧᑦ ᐸᕐᓇᐅᑎ ᐃᓐᓇᒻᒪᕇᑦ ᐸᖅᑭᕕᖏᖕᓂᒃ ᓴᓇᒃᑲᓐᓂᖅᑐᖃᖁᓪᓗᒍ’ ᑕᐃᒪᐃᓐᓂᐊᕐᓂᕋᖅᓯᒪᒻᒪᑕ ᑕᐃᑲᓂ ᐃᓐᓇᒻᒪᕇᑦ ᖃᓄᐃᓕᐅᕈᑕᐅᓂᖏᑦᑕ ᖃᓄᖅᑑᕈᑎᖓᓂᒃ.
ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᓗᓂ ᐃᓕᓐᓂᐊᕐᓂᓕᕆᓂᖅ
ᑲᑎᒪᔩᑦ ᐊᖏᖅᓯᒃᑲᓐᓂᖅᓯᒪᔪᑦ ᑲᒪᒋᔭᖃᕐᓂᐊᕐᓂᕋᖅᓯᒪᔭᕐᒥᓂᒃ ᐃᓄᐃᑦ ᓇᖕᒥᓂᖅᓱᕐᓂᐊᕐᓂᖏᓐᓂᒃ ᐃᓕᓐᓂᐊᕐᓂᓕᕆᓂᕐᒥᒃ, ᐱᒻᒪᕆᐅᓂᕋᐃᔪᒻᒪᕆᐅᓪᓗᑎᑦ ᐃᓕᓐᓂᐊᕐᓂᕐᒧᑦ ᐋᖅᑭᒃᓱᖅᑕᐅᓯᒪᓂᖏᑦ ᓯᕗᒃᑲᖅᑖᖑᔪᑦ ᐃᓄᖕᓄᑦ ᐊᒻᒪᓗ ᑐᙵᕕᖃᕆᐊᖃᖅᑐᑎᑦ ᐃᓄᐃᑦ ᐅᖃᐅᓯᖓᓂᒃ, ᐃᓕᖅᑯᓯᖓᓂᒃ, ᐊᒻᒪᓗ ᐱᒻᒪᕆᒋᔭᖏᖕᓂᒃ. ᑕᒪᒃᑯᐊ ᐅᖃᐅᓯᕆᔭᐅᓯᒪᓚᐅᖅᑐᑦ ᐃᓕᓴᖅᓯᓚᐅᕐᒪᑕ ᐃᓕᓐᓂᐊᕐᓂᖅ ᑐᑦᑕᕐᕕᓪᓚᕆᐅᖕᒪᑦ ᐃᑲᔪᖅᑐᐃᔾᔪᑎᖃᓲᖅ ᓴᙱᔫᓕᖅᑐᓂᒃ ᐃᓚᒌᓐᓂᒃ, ᓄᓇᓖᑦ ᖃᓄᐃᙱᓐᓂᖅᓴᐅᓗᑎᑦ, ᐊᒻᒪᓗ ᐃᓄᐃᑦ ᐃᓚᐅᖃᑕᐅᓗᑎᑦ ᐃᖅᑲᓇᐃᔭᖅᑐᓂᒃ.
ᐊᒥᓱᕈᕆᐊᖁᓪᓗᒋᑦ ᓂᕈᐊᕆᐊᖅᑐᖃᑦᑕᓱᑦ ᓂᕈᐊᕐᓇᐅᑎᓪᓗᒍ
ᑲᑎᒪᔩᑦ ᐊᖏᖅᓯᓚᐅᕐᒥᔪᑦ ᐊᑐᐊᒐᕐᒥᒃ ᐱᓕᕆᐊᕆᔭᐅᔪᑦ ᑲᔪᖏᖅᓴᖅᑕᐅᖁᓪᓗᒋᑦ ᓂᕈᐊᕆᐊᖅᑐᕐᓂᖅᓴᐅᖃᑦᑕᕐᓂᖏᑦ ᐃᓄᐃᑦ ᐊᒥᓲᓂᖏᑦ ᓂᕈᐊᖅᑐᖃᖅᓯᑎᓪᓗᒍ, ᑲᒪᒋᔭᖃᕆᐊᓯᒃᑲᓐᓂᖅᑐᑎᑦ ᓴᙱᔪᒥᒃ ᑕᑯᓯᒪᓕᕐᓂᕗᑦ 2024-ᒥ ᓄᓇᕗᑦ ᑐᙵᕕᒃ ᑎᒥᖓᑕ ᓂᕈᐊᕐᓂᖃᖅᑎᑦᑎᑎᓪᓗᒋᑦ ᐊᖓᔪᖅᑳᑉ ᐃᓂᖓᓄᑦ. ᐊᑐᐊᒐᖅ ᐋᖅᑮᕗᖅ ᐊᑐᖅᑕᐅᓂᐊᖅᑐᓂᒃ ᓯᕗᓂᒃᓴᒥ ᓂᕈᐊᕐᓇᐅᔪᓄᑦ, ᐱᖃᓯᐅᑎᓪᓗᒍ ᒪᕐᕉᓐᓂᒃ ᐅᖃᐅᓰᓐᓂᒃ ᐊᑐᕐᓗᑎᑦ ᐊᐃᕙᐅᑎᓂᖃᕐᓂᖏᑦ ᓈᓚᒃᑕᐅᓗᑎᑦ, ᐊᐅᓪᓚᕈᑎᖏᑦᑕ ᓂᕈᐊᕋᒃᓴᐅᔪᑦ ᐃᑲᔪᖅᑐᖅᑕᐅᓗᑎᑦ, ᐊᒻᒪᓗ ᑲᔪᓯᓂᖃᖅᑎᑕᐅᓗᓂ $100 ᓂᐅᕕᕈᓐᓇᐅᑎᑖᖅᑎᑕᐅᖃᑦᑕᕐᓂᖏᑦ ᓂᕈᐊᕐᕕᒻᒧᐊᖅᑐᑦ, ᑎᑭᑕᐅᓇᓱᐊᕐᓗᓂ ᓄᓇᕗᑦ ᑐᙵᕕᒃ ᑎᒥᖓᓄᑦ ᓂᕈᐊᕐᓇᑦ ᐊᑐᖅᑕᐅᓂᖅᓴᐅᒍᓐᓇᕐᓗᓂ, ᓇᓕᒧᒌᑦᑐᒃᑰᖓᑎᑕᐅᓗᓂ ᐊᒻᒪᓗ ᑭᒡᒐᖅᑐᐃᓂᖃᕐᓗᓂ ᐃᓄᐃᑦ ᓂᐱᖏᖕᓂᒃ ᓄᓇᕗᓕᒫᕐᒥ. ᓂᕈᐊᕐᓂᕐᒧᑦ ᐱᓕᕆᐊᑦ ᑮᓇᐅᔭᖃᖅᑎᑕᐅᓂᐊᖅᑐᑦ ᐅᔭᕋᓐᓂᐊᖅᑐᓕᕆᓂᕐᒧᑦ ᑮᓇᐅᔭᑦ ᐃᓯᖅᐸᓪᓕᐊᔪᓂᒃ ᕿᓂᖅᐸᑦᑐᓂᒃ ᐊᒻᒪᓗ ᐅᔭᕋᓐᓂᐊᖅᐸᑦᑐᓂᒃ ᐃᓄᐃᑦ ᓄᓇᖁᑎᖏᖕᓂᒃ.
ᑮᓇᐅᔭᓕᕆᔨᒃᑯᑦ ᑐᓴᕆᐊᖅᑎᑦᑎᒍᑎᖏᑦ
ᑲᑎᒪᔩᑦ ᐊᖏᖅᓯᓚᐅᖅᑐᑦ ᓄᓇᕗᑦ ᑐᙵᕕᒃ ᑎᒥᖓᑕ 2026–27 $30.2 ᒥᓕᐊᓐ ᑮᓇᐅᔭᑦ ᐊᐅᓚᑦᑎᓂᕐᒧᑦ ᑮᓇᐅᔭᖅᑐᕈᑎᒃᓴᐅᓂᐊᖅᑐᑦ. 2024-ᖑᑎᓪᓗᒍ, ᑲᑎᒪᔩᑦ ᐱᐅᓯᕚᓪᓕᖅᑎᑦᑎᓚᐅᖅᓯᒪᔪᑦ ᐃᓚᐃᖅᑐᓄᑦ ᐊᐅᓪᓚᕈᑏᑦ ᐱᓕᕆᐊᖓᓄᑦ ᐱᖓᓱᑦ ᐊᐅᓪᓚᖅᑐᑦ ᖃᖓᑦᑕᐅᓯᖅᑕᐅᔪᓐᓇᕐᓗᑎᑦ ᑐᔪᕐᒥᕕᒻᒦᓪᓗᑎᓪᓘᓐᓃᑦ ᐃᓚᒥᓄᐊᕋᓱᒃᑎᓪᓗᒋᑦ. ᑕᒫᓂ ᐊᕐᕌᒍᒥ, ᑲᑎᒪᔩᑦ ᐊᖏᖅᓯᓚᐅᖅᑐᑦ 29.55% ᐊᒥᓱᕈᕆᐊᖅᑕᐅᓂᖏᑦ ᑮᓇᐅᔭᖅᑐᕈᑎᒃᓴᑦ ᑖᔅᓱᒧᖓ ᐱᒻᒪᕆᐅᔪᒧᑦ ᐱᓕᕆᐊᕐᒧᑦ ᐊᒥᓱᓂᖃᓕᖅᑎᑕᐅᓪᓗᓂ ᐱᓕᕆᐊᖅ $2.85 ᒥᓕᐊᓐ ᑮᓇᐅᔭᐅᓕᖅᑐᑦ. ᐱᓕᕆᐊ ᐊᐅᓚᑕᐅᓲᖅ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ.
ᑭᖑᓪᓕᕐᒥᒃ ᑲᑎᒪᔩᑦ ᑲᑎᒪᓂᕆᓛᖅᑕᖓᑦ ᐃᖃᓗᓐᓂ ᔫᓂ 8-ᖑᓕᖅᐸᑦ, ᖃᒪᓂ’ᑐᐊᕐᒥ ᐋᒡᒌᓯ 25-27, ᐊᒻᒪᓗ ᐃᖃᓗᒃᑑᑦᓯᐊᕐᒥ, ᐊᒃᑑᕝᕙ 19−ᖑᓕᖅᐸᑦ ᑭᖑᓂᐊᒍᑦ ᐊᕐᕌᒍᑕᒪᑦ ᑲᑎᒪᕕᔾᔪᐊᕐᓂᖃᕐᓗᑎᑦ ᐃᖃᓗᒃᑑᑦᓯᐊᕐᒥ, ᐊᒃᑑᕝᕙ 20-22, 2026-ᒥ.
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ
ᕗᕉᑎ ᓚᕌᒃ
ᑭᖑᕝᕕᐅᑎᓯᒪᔪᖅ ᑐᑭᒧᐊᒃᑎᑦᑎᔨᒧᑦ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
