ᑐᓴᕋᑦᓴᓕᕆᔩᑦ

ᓴᐳᔾᔭᐅᓕᒃ ᐃᓄᐃᑦ ᐱᔪᓐᓇᐅᑎᖏᑦ: ᓄᖅᑲᖅᑎᑕᐅᓕ ᐱᖁᔭᒃᓴᖅ 25

(ᓅᕙᐃᒻᕙ 4, 2020 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐅᓪᓗᒥ ᐅᖃᐅᔾᔨᖅᑲᐅᔪᑦ ᒪᓕᒐᓕᐅᖅᑎᓂᒃ ᓄᖅᑲᑎᑦᓯᖁᓪᓗᒋᑦ ᐱᖁᔭᒃᓴᖅ 25-ᒥ, ᐱᖁᔭᖅ ᐋᖅᑭᒋᐊᖅᓯᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᒥᒃ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᒥᒃ.

 “ᓄᓇᕗᑦ ᐱᙳᖅᑎᑕᐅᒻᒪᑦ ᐃᓄᓐᓄᑦ 1999-ᒥ, ᐃᓄᐃᑦ ᖁᑦᓯᑐᒻᒪᕆᒻᒥᒃ ᓂᕆᐅᖕᓂᖃᓚᐅᖅᑐᒍᑦ ᐃᓕᓐᓂᐊᕐᕖᑦ ᐊᐅᓚᓂᖏᑦ ᑐᙵᕕᖃᓪᓗᐊᑕᕐᓂᐊᕐᓂᖏᓐᓂᒃ ᐃᓄᒃᑐᑦ, ᐊᒻᒪᓗ ᒐᕙᒪᒃᑯᑦ ᐃᖅᑲᓇᐃᔭᖅᑎᖃᓪᓗᐊᑕᓕᕐᓗᑎᒃ ᐃᓄᒋᐊᒃᑎᒋᓂᖓᒍᑦ ᓄᓇᕗᑦ, ᐱᓕᕆᔨᐅᓕᕐᓗᑎᒃ ᐃᓄᐃᑦ ᐅᖃᕈᓐᓇᓯᐊᖅᑐᑦ ᓇᖕᒥᓂᖅ ᐅᖃᐅᓯᑦᑎᓐᓂᒃ,” ᐅᖃᓚᐅᖅᑐᖅ ᐊᖓᔪᖅᑳᖅ ᑰᑦᑎᖅ. “ᑖᓐᓇ ᑐᕌᒐᓕᐊᖑᓚᐅᖅᑐᖅ ᓇᓗᓇᐃᖅᑕᐅᑲᓐᓂᓚᐅᖅᑐᖅ ᐃᓄᓐᓄᑦ ᐊᒻᒪᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᑐᓴᕋᓱᐊᕈᑕᐅᑎᓪᓗᒋᑦ 2007, 2016 ᐊᒻᒪᓗ 2019.”

ᐱᖁᔭᒃᓴᖅ 25 ᑎᑎᕋᕆᐊᙵᐅᑎᓕᐊᖑᒍᑎᖃᓚᐅᖅᑐᖅ ᑭᖑᕝᕕᐅᑎᖁᓪᓗᒍ ᐱᓕᕆᕝᕕᒻᒥ ᐱᓕᕆᐊᒃᓴᓄᑦ ᑎᓕᓯᔾᔪᑕᐅᓯᒪᔪᓂᒃ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᓂ. ᐱᖁᔭᒃᓴᖅ ᐊᒃᑐᐃᓂᖃᑦᑕᐃᓕᔪᖅ ᑕᑎᒋᔭᐅᒋᐊᖃᕐᓂᕐᒥᒃ ᑲᑕᑦᓯᒪᒍᑕᐅᔪᒧᑦ ᐅᐸᖃᑦᑕᖅᑐᑦ ᐊᒻᒪᓗ ᐃᓕᓐᓂᐊᖅᑏᑦ ᑲᔪᓯᑎᖃᑦᑕᖏᓐᓂᖏᓐᓄᑦ ᓇᓗᓇᐃᖅᓯᒪᔭᐅᔪᓂᒃ ᐊᒻᒪᓗ ᐱᔨᑦᓯᕈᑎᖃᑦᓯᐊᖏᓐᓂᕐᒧᑦ ᐊᑕᖐᔪᒥᒃ ᐃᓕᓐᓂᐊᑎᑦᓯᓂᕐᒥᒃ.

ᑎᑎᕋᖅᑕᐅᓂᕆᓚᐅᖅᑕᖓ ᑭᖑᓪᓕᖅᐹᒥ ᐱᖁᔭᒃᓴᖅ 25 ᐊᓯᔾᔨᖅᓯᒪᙱᓯᐊᖅᑐᖅ ᓯᕗᓪᓕᖅᑎᑐᑦ ᑎᑎᕋᖅᑕᐅᓚᐅᖅᑐᓂ ᓴᖅᑭᖅᑕᐅᓚᐅᖅᑐᖅ ᔫᓂ 2019 ᐊᒻᒪᓗ ᐅᖃᐅᓯᖃᕐᕕᐅᒍᓐᓇᖅᑎᑕᐅᖏᑦᑐᖅ ᑲᑎᒪᔨᕋᓛᖑᑲᐃᓐᓇᖅᑐᓄᑦ ᒪᓕᒐᑦᓴᓕᕆᓂᕐᒧᑦ ᑐᙵᕕᒃᑯᓐᓂᒃ, ᑲᑐᔾᔨᖃᑎᒌᑦ ᓄᓇᕗᒻᒥ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ (CNDEA), ᐊᓪᓚᕝᕕᖓᓂᒃ ᐅᖃᐅᓯᓕᕆᓂᕐᒧᑦ ᑲᒥᓯᓇ ᐊᒻᒪᓗ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᖏᓐᓂᒃ.

“ᒪᓕᒐᓕᐅᖅᑎᐅᓪᓗᓯ (MLA), ᓄᓇᕗᑦ ᒐᕙᒪᖓ ᓴᙲᓕᒋᐊᖁᔨᔪᖅ ᐃᓄᐃᑦ ᐅᖃᐅᓯᖏᓐᓄᑦ ᐱᔪᓐᓇᐅᑎᓂᒃ, ᐱᕖᕈᔾᔨᓗᑎᒃ ᐃᓄᒃᑐᑦ ᐃᓕᓐᓂᐊᕐᕕᐊᕈᓯᕐᒥ ᖃᓄᐃᑦᑑᓂᖓᒍᑦ ᐊᒻᒪᓗ ᐅᖃᐅᔾᔨᓂᐊᖅᑐᑦ ᐃᓕᓐᓂᒃ, ᐊᓯᐊᒍᑦ ᐱᕕᒃᓴᖃᙱᓐᓇᕕᑦ,” ᐅᖃᖅᑐᖅ ᐊᖓᔪᖅᑳᑉ−ᑐᒡᓕᐊ ᔭᐃᒥᓯ ᐃᑦᑐᓗᒃ. “ᐱᕕᒃᓴᖃᑦᓯᐊᖅᑐᑎᑦ ᐊᓯᐊᒍᑦ. ᓂᕈᐊᕆᑦ ᑲᔪᓯᖁᓇᒍ ᐱᖁᔭᒃᓴᖅ 25.”

-30-

ᑐᑭᓯᒋᐊᒃᑲᓂᕐᕕᒃᓴᖅ:

ᒪᓚᐃᔭ ᒥᑭᔾᔪᒃ

ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ

ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006

www.tunngavik.com

 

Download (PDF, 208KB)

Download (PDF, 187KB)

Download (PDF, 642KB)