ᑐᓴᒐᑦᓴᑦ 14-02 ᐃᓕᓐ ᖁᑉᕙ ᐃᓄᒃ – ᐃᕐᖐᓐᓇᖅ ᓴᖅᑭᖅᑕᐅᒋᐊᓖᑦ
ᐃᓄᖕᓂᒃ ᐃᓕᓐᓂᐊᖅᑕᒥᒍᑦ ᓇᖕᒥᓂᕐᒥᓄᑦ ᐱᕚᓪᓕᕈᑎᒃᓴᒥᓄᑦ ᖁᑉᕙᕆᐊᕈᑎᑖᕐᓂᖅ ᓴᖅᑭᖅᑕᐅᕗᖅ
(ᔭᓐᓄᐊᓕ 10, 2014 — ᐃᖃᓗᐃᑦ, ᓄᓇᕗᑦ) ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᑭᓖᒍᑎᒃᓴᓄᑦ ᐊᖏᖃᑎᒌᒍᑕᐅᓯᒪᔪᓂ, ᑎᑎᕋᕐᓯᒪᒻᒪᑦ ᐊᑐᖅᑕᐅᒋᐊᖃᕐᓂᖏᑦ ᐊᒥᐊᒃᑯᑦ ᑮᓇᐅᔭᖅᑑᑎᒃᓴᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᑭᓖᒍᑕᐅᓚᐅᖅᑐᓂᒃ ᑮᓇᐅᔭᓂᒃ ᑐᕌᖔᖅᑎᑕᐅᓗᑎᒃ ᐃᓕᓐᓂᐊᖅᑕᒥᒍᑦ ᓇᖕᒥᓂᕐᒥᓄᑦ ᐱᕚᓪᓕᕈᑎᒃᓴᒥᓄᑦ ᖁᑉᕙᕆᐊᕈᑎᑖᕐᓂᕐᒥᒃ ᐃᓕᓐᓂᐊᓂᒃᑯᑦ. ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᑭᓕᖅᑕᐅᓚᐅᖅᑐᑦ ᐊᑯᓐᓂᖓᓂ 2007 ᐊᒻᒪᓗ 2012 ᐊᑐᐃᓐᓇᐅᕕᐅᓂᐊᖅᑐᑦ ᐊᒻᒪᓗ ᐊᑐᕈᓐᓇᕐᓗᑎᒃ ᐃᓕᓐᓂᐊᖅᑕᒥᒍᑦ ᓇᖕᒥᓂᕐᒥᒍᑦ ᐱᕚᓪᓕᕈᑎᒃᓴᓂᒃ ᖁᑉᕙᕆᐊᕈᑎᑖᕈᑎᒃᓴᒥᓂᒃ. ᓇᖕᒥᓂᕐᒥᒍᑦ ᐃᓕᓐᓂᐊᓂᒃᑯᑦ ᐱᕚᓪᓕᕈᑎᒃᓴᓄᑦ ᐃᓕᓐᓂᐊᕈᑎᒃᓴᑦ ᐊᖏᖅᑕᐅᓚᐅᖅᑐᑦ ᐊᑐᕈᓐᓇᕐᓯᑎᑕᐅᓪᓗᑎᒃ ᔭᓐᓄᐊᓕ 1, 2014. 2,600 ᓄᓇᕗᒻᒥ ᐃᓄᐃᑦ ᓇᖕᒥᓂᕐᒥᓄᑦ ᖁᑉᕙᕆᐊᕈᑎᑖᕈᑎᒃᓴᒥᓄᑦ ᐱᕚᓪᓕᕈᑎᒃᓴᓂᒃ ᐱᔪᓐᓇᖅᑎᑕᐅᔪᑦ, ᐃᓚᒋᔭᐅᓪᓗᑎᒃ ᐃᓄᐃᑦ ᓄᓇᕗᑦ ᓯᓚᑖᓂᒥᐅᑕᑦ.
ᓄᓇᕗᑦ ᑐᓐᖓᕕᒃᑯᑦ ᐊᒻᒪᓗ ᐊᓯᖏᑦ ᓄᓇᖃᖅᑳᕐᓯᒪᔪᑦ ᑲᑐᔾᔨᖃᑎᒌᖏᑦ ᒫᓐᓇ ᐊᐃᕙᔾᔪᑎᖃᓚᐅᖅᑐᑦ ᐊᑐᖅᑕᐅᒋᐊᓕᖕᓂᒃ ᒪᓕᒐᑦᓴᖏᓐᓂᓪᓗ ᐃᓕᓐᓂᐊᖅᑕᒥᒍᑦ ᓇᖕᒥᓂᕐᒥᓄᑦ ᐱᕚᓪᓕᕈᑎᒃᓴᒥᓄᑦ ᖁᑉᐸᕆᐊᕈᑎᑖᕐᓂᕐᒧᑦ ᐃᓕᓐᓂᐊᓂᒃᑯᑦ ᒐᕙᒪᑐᖃᒃᑯᓐᓂᒃ.
ᐊᑕᐅᓰᖅᑐᒥᒃ ᐊᑐᕋᑦᓴᐅᔪᑦ ᐃᓕᓐᓂᐊᖅᑕᒥᒍᑦ ᓇᖕᒥᓂᕐᒥᓄᑦ ᐱᕚᓪᓕᕈᑎᒃᓴᒥᓄᑦ ᐊᑐᕋᑦᓴᖅ $3,000 ᑮᓇᐅᔭᐅᔾᔮᖏᑦᑐᖅ ᑮᓇᐅᔭᒃᓴᐅᔾᔮᒐᓂᓗ, ᑭᓯᐊᓂᓕ ᐊᑐᕋᑦᓴᒫᑐᐃᓐᓇᐅᓂᐊᖅᑐᖅ ᐃᓕᓐᓂᐊᕕᖕᒧᑦ ᐊᑭᓕᐅᑎᒃᓴᐅᓗᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᒧᑦ ᐃᓕᓐᓂᐊᕐᕕᐅᔪᒪᔪᒥ. ᐃᓕᓐᓂᐊᖅᑎᒥᓃᑦ ᓄᓇᕗᒻᒦᖔᖅᑐᑦ ᐊᑐᕈᓐᓇᓂᐊᖅᑕᖓ ᐃᓕᓐᓂᐊᑲᓐᓂᕐᕕᒋᔪᒪᔭᒥᓄᑦ, ᐊᒻᒪᓗ ᐃᓕᓐᓂᐊᓂᕐᒧᑦ ᐃᓄᐃᑦ ᐊᑐᕐᓯᒪᔭᖏᓐᓂᒃ, ᐃᓕᖅᑯᓯᖏᓐᓂᒃ ᐊᒻᒪᓗ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᖅᑕᐅᕙᑦᑐᓂ ᐃᓕᓐᓂᐊᓂᕐᒧᓪᓗ.
ᓇᖕᒥᓂᕐᒥᓄᑦ ᐱᕚᓪᓕᕈᑎᒃᓴᒥᓄᑦ ᖁᑉᕙᕆᐊᕈᑎᑖᕐᓂᖅ ᐊᐅᓚᑕᐅᔪᖅ ᑯᕌᕗᑦ ᐃᓕᓐᓂᐊᕈᑎᒃᓴᓕᕆᕕᖓᓂᒃ, ᐊᐅᓪᓚᑎᑦᓯᓚᐅᖅᑐᖅ ᑕᑕᑎᕋᑦᓴᓂᒃ ᐃᓕᓐᓂᐊᕆᐊᖅᑎᑕᐅᓚᐅᕐᓯᒪᔪᓕᒫᓄᑦ ᐊᑭᓕᐅᓯᐊᕐᓯᒪᔪᓄᑦ ᐊᕐᕌᓂ.
ᓇᓖᕌᕐᕕᒃᓴᖃᕐᓂᐊᖅᑐᑦ ᐊᑐᕈᒪᔪᑦ ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᓂᒃ
- ᑐᒃᓯᕋᖅᑐᖅ ᓂᕈᐊᕈᓐᓇᖅᑐᖅ ᐊᑐᕈᒪᒍᓂ ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᓂᒃ ᐊᑕᖏᕐᓗᒋᑦ.
- ᑐᒃᓯᕋᖅᑐᖅ ᓂᕈᐊᕈᓐᓇᖅᑐᖅ ᐊᑐᕈᒪᒍᓂ ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᑦ ᐃᓚᐃᓐᓇᖏᓐᓂᒃ ᐊᒻᒪᓗ ᖁᕝᕙᕆᐊᕈᑎᒃᓵᒃ ᐃᓚᒥᓅᖔᕐᓗᒋᑦ ᒪᕐᕈᐃᓈᓐᓄᑦ ᐃᓚᒥᓄᑦ ᑐᓂᓯᒍᓐᓇᖅᑐᑦ.
- ᑐᒃᓯᕋᖅᑐᖅ ᓂᕈᐊᕈᓐᓇᖅᑐᖅ ᐊᒡᒍᐃᒍᒪᔪᓂ ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᓂᒃ ᒪᕐᕉᓕᖅᑲᖓᔫᓐᓂᒃ ᐃᓕᓐᓂᐊᕈᒪᒍᓂ ᐃᓕᖅᑯᓯᕐᒥᓂᒃ ᐃᓕᓐᓂᐊᓂᕐᒧᓘᓐᓃᑦ.
- ᑐᒃᓯᕋᖅᑐᖅ ᐋᖅᑭᑦᓯᖔᕈᓐᓇᕐᒥᔪᖅ ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᓂᒃ ᑲᑐᔾᔨᖃᑎᖃᕐᓗᓂ ᑲᑎᓐᖓᓗᑎᒃ ᐃᓕᓐᓂᐊᓂᕐᒨᖓᔪᓂᒃ ᐃᓕᖅᑯᓯᕐᒧᓘᓐᓃᑦ ᐃᓕᓐᓂᐊᓂᕐᒥᒃ ᐊᓯᖏᓐᓂᒃ ᑐᒃᓯᕋᖅᓯᒪᔪᓂᒃ.
ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᑦ ᐊᑐᖅᑕᐅᔪᓐᓇᓂᐊᖅᑐᑦ ᐊᑭᓕᐅᑎᒃᓴᓄᑦ ᓲᕐᓗ ᐃᓕᓐᓂᐊᓂᕐᒧᑦ, ᐊᑭᓕᕆᐊᓕᖕᓄᑦ, ᐃᖏᕐᕋᔾᔪᑎᓄᑦ ᐊᒻᒪᓗ ᑐᔪᕐᒥᔾᔪᑎᒃᓴᓄᑦ, ᓂᕆᔾᔪᑎᒃᓴᓄᑦ, ᐅᖃᓕᒫᒐᕐᓄᑦ, ᖃᕆᓴᐅᔭᓄᑦ, ᐃᓕᓐᓂᐊᖅᑕᐅᔪᒧᑦ ᓱᓇᒃᑯᑖᓄᑦ, ᐊᒻᒪᓗ ᐊᑐᕆᐊᓕᖕᓄᑦ ᐃᓚᒋᔭᐅᓂᕐᒧᑦ ᐃᓕᖅᑯᓯᕐᒨᖓᔪᓂᒃ ᐃᓕᓐᓂᐊᓂᕐᒧᓘᓐᓃᑦ ᐃᓕᓐᓂᐊᕐᕕᒋᔭᐅᔪᒥ, ᐊᒻᒪᓗ ᐅᑎᖅᑎᑦᓯᒍᑕᐅᒍᓐᓇᓂᐊᖅᑐᑦ ᐅᑯᑎᒎᓇ ᐃᓕᓐᓂᐊᓂᒃᑯᑦ ᐃᓕᖅᑯᓯᕐᒨᖓᔪᓂᒃ ᐃᓕᓐᓂᐊᓂᕐᒧᓪᓗ ᐃᓕᓐᓂᐊᕈᑎᓄᑦ:
- ᓄᓇᓕᖕᓃᑦᑐᓂ ᑲᑐᔾᔨᖃᑎᒌᓂ ᐃᓕᓐᓂᐊᕕᒡᓂᓗ ᐃᓕᓐᓂᐊᑎᑦᓯᕕᐅᖃᑦᑕᖅᑐᓂ ᐃᓄᐃᑦ ᐃᓕᖅᑯᓯᖓᓂᒃ, ᐅᖃᐅᓯᖓᓂᒃ ᐊᒻᒪᓗ ᐊᑐᕐᓯᒪᔭᖏᓐᓂᒃ.
- ᐃᓕᓐᓂᐊᑲᓐᓂᕕᖕᓂ ᑲᓇᑕᒥ, ᓲᕐᓗ ᐃᓕᓐᓂᐊᕕᒡᔪᐊᑦ ᓯᓚᑦᑐᓴᕐᕖᓘᓐᓃᑦ.
- ᐃᓱᕐᕆᐅᑎᓕᕆᕕᖕᓂ ᓴᓇᔭᕆᐅᕐᓴᕕᖕᓂᓘᓐᓃᑦ ᐃᓕᓐᓂᐊᕕᖕᓂ ᑲᓇᑕᒥ.
- ᐃᓕᓐᓂᐊᕆᐅᕆᐅᕐᓴᕕᖕᓂ ᐸᐃᕆᕕᖕᓂᓘᓐᓃᑦ (ᐅᑭᐅᓖᑦ 0-ᒥᒃ 6-ᒧᑦ).
- ᓱᕈᓯᓛᓄᑦ ᐊᒻᒪᓗ ᐃᓕᓐᓂᐊᕐᕕᐅᕙᑦᑐᓄᑦ ᓄᓇᕗᒻᒥ (ᐃᓕᓐᓂᐊᕐᓂᓕᖕᓄᑦ K-12).
ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᑦ ᐱᕝᕕᖃᖅᑎᑕᐅᔪᑦ ᐅᑯᑎᒎᓇ:
- ᔭᓐᓄᐊᓕ 1, 2014 – ᐊᑐᓕᖅᑎᑕᐅᕕᒃᓴᖓᑕ ᐅᓪᓗᖓ.
- ᐆᑦᑑᕝᕙ 31, 2014 – ᐃᓱᕕᒃᓴᖓ ᑕᑕᑎᕆᐊᓕᖕᓂᒃ ᖃᐅᔨᒃᑲᐃᔾᔪᑎᓂᒃ ᑕᑕᑎᕆᓂᕐᒧᑦ.
- ᑏᓰᒻᕙ 1, 2014 – ᐃᓱᓕᕝᕕᒃᓴᖓ ᐅᑎᕐᕕᐅᓂᕐᒧᑦ ᐊᑭᓕᐅᑎᒥᓂᕐᓂᒃ (ᐅᑎᕐᕕᐅᓂᕐᒧᑦ ᑕᑕᑎᒐᑦᓴᑦ ᑕᑕᑎᖅᑕᐅᓗᑎᒃ ᐃᓕᖅᑯᓯᕐᒥᒃ ᐃᓕᓐᓂᐊᓂᕐᒥᓘᓐᓃᑦ ᐱᓕᕆᕝᕕᖓᓂᒃ ᓂᕈᐊᖅᑕᐅᖓᓂᒃ)
ᐃᓕᖅᑯᓯᕐᒨᖓᔪᓂᒃ ᐃᓕᓐᓂᐊᓂᕐᒧᓪᓗ ᐃᓕᓐᓂᐊᕐᓂᖅ ᑐᒃᓯᕋᐅᓯᐅᖅᑐᒧᑦ ᓂᕈᐊᖅᑕᖓᓂ ᐃᓕᓐᓂᐊᕆᐊᕈᓐᓇᓂᐊᖅᑐᖅ ᑭᖑᓂᐊᒍᑦ ᖃᖓᑐᐃᓐᓇᖅ ᑏᓰᒻᕙ 1, 2014 ᐅᑎᖅᑎᑕᖏᑦ ᐃᓕᓐᓂᐊᓂᕐᒧᑦ ᖁᕝᕙᕆᐊᖅᑎᑦᓯᓂᕐᒧᑦ ᐃᑲᔫᑎᒃᓴᑦ ᐃᓱᓕᕝᕕᒃᓴᖓ ᑎᑭᓯᒪᓐᖏᑐᐊᕐᐸᑦ.
ᑐᓐᖓᕕᒃᑯᑦ ᒪᕐᕉᓐᓂᒃ ᐃᖅᑲᓇᐃᔭᖅᑎᑖᓚᐅᖅᑑᒃ ᐃᑲᔪᕐᓂᐊᖅᑑᓐᓂᒃ ᐃᓕᓐᓂᐊᕆᐊᖃᑦᑕᖅᑐᒥᓂᕐᓂᒃ ᓄᓇᕗᒻᒥ ᐊᐅᓚᑕᐅᔪᒧᑦ. ᑐᑭᓯᒋᐊᒃᑲᓂᕐᕕᒃᓴᖅ, ᐅᖄᓚᓗᓂ ᑐᓐᖓᕕᒃᑯᓐᓄᑦ (867) 975-4900 ᐅᕝᕙᓘᓐᓃᑦ 1-888-646-0006, ᐃᑭᐊᖅᑭᔾᔪᑎᖓᓅᕐᓗᑎᓪᓘᓐᓃᑦ www.tunngavik.com.
-30-
ᖃᐅᔨᒋᐊᒃᑲᓂᕐᕕᒃᓴᖅ
ᑭᐅᕆᓐ ᕙᓚᐅᕋᑎ
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4941 ᐊᑭᖃᓐᖏᑦᑐᖅ: 1-888-646-0006
ᐅᖄᓚᐅᑎᕋᓛᖅ: (867) 222-2393
www.tunngavik.com
