ᓴᖅᑭᑕᐅᑲᐅᑎᒋᔭᕆᐊᓕᒃ
(ᒫᑦᓯ 24, 2025 – ᐃᖃᓗᐃᑦ, ᓄᓇᕗᑦ) ᐅᓪᓗᒥ, ᓄᓇᕗᑦ ᒐᕙᒪᖓᓂ ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ ᐊᒻᒪ ᓄᓇᕗᑦ ᑐᙵᕕᒃᑯᑦ (ᓄᓇᕗᑦ ᑐᙵᕕᒃᑯᑦ) ᐊᖓᔪᖅᑳᖅ ᔨᐅᕆᒥ ᑑᕐᖔᓗᒃ ᓇᓗᓇᐃᖅᓯᒃᑲᓐᓂᓚᐅᖅᐳᖅ ᐱᓕᕆᐊᖃᓪᓚᕆᒍᒪᓂᕐᒥᓂᒃ ᐱᑕᖃᕈᓐᓃᖅᑎᑦᑎᔪᒪᓂᕐᒥᒃ ᐳᕙᒡᓗᖕᓂᕐᒥᑦ (TB−ᒥᒃ) ᓄᓇᕗᒻᒥ. ᓄᓇᕐᔪᐊᕐᒥ ᐳᕙᒡᓗᖕᓇᐅᑉ ᐅᓪᓗᖓᓂ, ᐃᓕᑕᖅᓯᐅᒪᖕᒪᑕ ᐱᓕᕆᖃᑎᒌᒍᑕᐅᖏᓐᓇᖅᑐᓂᒃ ᓄᖅᑲᖅᑎᑦᑎᓇᓱᒃᖢᑎᒃ ᐳᕙᒡᓗᒃᑐᓂᒃ, ᐳᕙᒡᓗᒃᑐᑦ ᒥᒃᖠᒋᐊᖅᑎᓪᓗᒋᑦ ᑲᑉᐱᐊᓱᒃᑐᑦ ᐊᒻᒪ ᑲᙳᓱᒍᑕᐅᓲᑦ, ᐱᐅᓯᒋᐊᖅᑕᐅᓗᑎᒡᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓴᖅᑭᓲᑦ ᐃᓄᖕᓄᑦ ᐊᒻᒪ ᓄᓇᓕᖕᓄᑦ ᐳᕙᒡᓗᒃᑐᓄᑦ ᓄᓇᕘᓕᒫᒥ.
ᑕᒪᑐᒪᓂ ᐊᕐᕌᒍᒥ ᓄᓇᕐᔪᐊᕐᒥ ᐳᕙᒡᓗᖕᓇᐅᑉ ᐅᓪᓗᖓᓂ ᐱᓕᕆᐊᖑᓂᐊᖅᑐᖅ “ᐄ! ᓄᖅᑲᕐᑎᑦᑐᓐᓇᕐᑕᕗᑦ ᐳᕙᒡᓗᖕᓂᖅ: ᐊᖏᖅᓯᒪᓂᖅ, ᐱᕈᕐᑎᔾ;ᒍ, ᐱᓕᕆᐊᕆᓗᒍ”. ᑕᒪᓐᓇ ᓴᙱᑦᑎᒋᐊᕈᑕᐅᕗᖅ ᐱᒻᒪᕆᐅᓂᖓᓂᒃ ᓄᓇᕗᑦ ᐊᖏᖅᓯᒪᓂᖓᓂᒃ, ᑐᕌᖅᑕᐅᓇᓱᐊᖅᑐᓂᒃ ᑮᓇᐅᔭᓕᐅᕈᑕᐅᓇᓱᐊᖅᑐᓂᒃ, ᐊᒻᒪᓗ ᖃᓄᐃᓕᒋᐊᕈᑎᖃᕐᓂᕐᒧᑦ ᖃᓄᖅᑑᕈᑎᓂᒃ.
ᓇᓗᓇᐃᕐᓗᒍ ᐅᓪᓗᖅ, ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᓴᖅᑭᑦᑎᓂᐊᖅᑐᑦ ᓄᓇᕘᓕᒫᒥ ᓴᓇᐅᒐᕐᓂᒃ ᓵᓚᒃᓴᕋᓱᒃᑐᓂᒃ. ᓵᓚᒃᓴᕋᓱᖕᓂᖅ ᐅᒃᑯᐃᖓᔪᖅ ᓄᓇᕗᒻᒥᐅᓄᑦ ᖃᓄᑐᐃᓐᓇᖅ ᐅᑭᐅᓕᖕᓄᑦ, ᐱᖃᓯᐅᑎᓗᒋᑦ ᓄᓇᕗᑦ ᐃᓄᐃᑦ ᓄᓇᕗᑦ ᓯᓚᑖᓃᑦᑐᓄᑦ, ᓵᓚᒃᓴᕋᓱᖕᓂᖅ ᐱᐅᔪᒻᒪᕆᖕᓂᑦ ᓵᓚᒃᓴᐅᓯᐊᒃᑕᓕᒃ ᖃᓄᑐᐃᓐᓇᖅ ᐅᑭᐅᓕᖕᓄᑦ. ᑐᓂᓗᒍ ᓴᓇᐅᒐᑎᑦ ᑕᑯᑎᑦᑎᓗᑕ ᖃᓄᖅ ᑲᑎᙵᑎᑦᑐᓐᓇᕐᒪᖔᑦᑎᒍᑦ ᖃᓄᐃᙱᑦᑎᐊᕐᓗᓂ ᓄᓇᓕᐅᓗᑕ ᓄᖅᑲᖅᑎᓪᓗᒍ ᐳᕙᒃᓗᖕᓇᖅ, ᐃᑲᔪᕐᓗᒋᓪᓗ ᑕᐃᒃᑯᐊ ᐊᒃᑐᖅᑕᐅᔪᑦ. ᓴᓇᐅᒐᖏᑦ ᓴᖅᑭᔮᖅᑎᑕᐅᓛᖅᑐᑦ 2026−ᒥᑦ ᐳᕙᒡᓗᖕᓇᒧᑦ ᐅᔾᔨᕈᓱᒃᑎᑦᑎᓂᖕᒧᑦ ᐅᓪᓗᕐᓯᐅᑖᓂᑦ. ᓇᒃᓯᐅᔾᔭᐅᔪᑦ ᒫᓐᓇ ᐅᒃᑯᐃᖓᔪᑦ ᐊᐃᕆᓕ 25, 2025−ᖑᕋᓱᖕᓂᖓᓂᑦ, ᓵᓚᖃᖅᑐᓪᓗ ᐅᖃᐅᓯᐅᓛᖅᖢᑎᒃ ᒪᐃᒥᑦ.
ᐳᕙᒃᓗᖕᓇᖅ ᐊᐃᑦᑐᕐᓘᑕᐅᔪᓐᓇᖅᑐᖅ ᐋᓐᓂᐊᖅ ᐊᒃᑐᐃᓲᖅ ᐅᓄᖅᑐᓂᒃ ᓄᓇᕐᔪᐊᒥ. ᑲᑐᔾᔨᖃᑎᒌᒍᑕᐅᓪᓗᓂ, ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ, ᐊᐅᓚᑕᐅᓪᓗᑎᒃ ᐃᓄᐃᑦ ᑕᐱᕇᑦ ᑲᓇᑕᒥ ᐳᕙᒡᓗᒃᑐᖃᕈᓐᓃᖅᑎᑦᑎᓇᓱᒃᑎᓪᓗᒍ, ᐱᓕᕆᕙᓪᓕᐊᕗᑦ ᓄᖅᑲᖅᑎᑦᑎᓇᓱᒃᖢᑎᒃ ᐳᕙᒡᓗᖕᓇᒧᑦ ᓄᓇᕗᒻᒥ ᐱᐅᓯᒋᐊᖅᑎᑦᑎᓇᓱᒃᖢᑎᒃ ᐱᔪᓐᓇᕐᓂᕆᔭᐅᔪᒥᒃ ᐳᕙᒡᓗᖕᓂᕐᒧᑦ ᖃᐅᔨᓴᖅᑕᐅᔪᓂᒃ ᐊᒻᒪ ᐃᓅᓕᓴᖅᑕᐅᔾᔪᑎᓂᒃ ᓄᓇᓕᖕᓂ. ᐃᑲᔪᖅᑐᐃᖕᒥᔪᑦᑕᐅᖅ ᓄᓇᓕᖕᓂᑦ ᐊᒃᑐᖅᑕᐅᓯᒪᔪᓂᑦ ᐳᕙᒡᓗᒃᑐᓄᑦ, ᐊᒻᒪᓗᑦᑕᐅᖅ ᐃᒧᓯᒪᔪᑦ ᐃᑲᔪᖅᑐᐃᓃᑦ, ᓲᕐᓗ ᓂᕿᑦᑎᐊᕙᖕᓂᑦ ᐱᔪᓐᓇᖕᓂᖅ ᐃᓄᖕᓄᑦ ᐆᒻᒪᕆᒃᑐᒥᑦ ᐳᕙᒡᓗᒃᑐᓄᑦ, ᑎᓕᐅᕆᓪᓗᑎᒡᓗ ᑭᒃᑯᓕᒫᓂᑦ ᐳᕙᒡᓗᒃᑐᑦ ᖃᐅᔨᓴᖅᑕᐅᖁᓪᓗᒋᑦ.
“ᐳᕙᒡᓗᒃᑎᑦᑎᑦᑕᐃᓕᒪᓂᖅ ᐅᕙᑦᑎᓐᓂᓕᒫᖅ ᐱᓕᕆᖃᑎᒌᒋᐊᖃᖅᐸᕗᑦ. ᖃᐅᔨᓴᖅᑕᐅᓂᒃᑯᑦ, ᒪᒥᓴᖅᑕᐅᓚᐅᕐᓗᓂ, ᐃᑲᔪᖅᓱᖃᑦᑕᐅᑎᓗᑕᓗ, ᐃᑲᔪᕈᓐᓇᖅᑐᒍᑦ ᐱᑕᖃᕈᓐᓃᖅᑎᓪᓗᒍ ᐳᕙᒃᓗᖕᓇᖅ ᓄᓇᕗᒻᒥ,” ᐅᖃᖅᑐᖅ ᒥᓂᔅᑕ ᒪᐃᓐ. “ᓇᓗᓇᐃᖅᓯᒃᑲᓐᓂᖅᑎᓪᓗᑕ ᐱᓕᕆᖃᑎᒌᖕᓂᑦᑎᓐᓂᒃ ᓄᓇᕗᑦ ᑐᙵᕕᒃᑯᓐᓂᒃ ᐱᓕᕆᐊᖃᕐᓗᑕᓗ ᓄᓇᕐᔪᐊᕐᒥ ᐳᕙᒡᓗᖕᓇᐅᑉ ᐅᓪᓗᖓᓂᒃ, ᓴᙱᒃᑎᒋᐊᖅᑎᑦᑎᕗᒍᑦ ᐊᑐᕈᓐᓇᖅᑕᑦᑎᓐᓂᒃ ᑐᓴᐅᒪᑎᑦᑎᓂᕐᒥᒡᓗ ᐱᓇᔪᖕᓂᕆᔭᑦᑎᓐᓂᒃ. ᐱᑦᑕᐃᓕᑎᑦᑎᓂᖅ, ᖃᐅᔨᓵᓕᓂᖅ, ᐊᒻᒪ ᐱᔭᕇᖅᓯᓂᖅ ᒪᒥᓴᐃᓂᕐᒥᒃ ᒪᑐᐃᕈᑎᐅᔪᖅ ᒥᒃᖠᒋᐊᖅᑎᓪᓗᒍ ᓯᕗᓂᑦᑎᓐᓂ ᓯᐊᒻᒪᒃᐸᓪᓕᐊᔪᑦ ᓴᐳᒻᒥᓗᒋᓪᓗ ᓄᓇᓕᕗᑦ.”
“ᐳᕙᒡᓗᖕᓇᖅ ᐱᑦᑕᐃᓕᑎᑕᐅᔪᓐᓇᖅᑐᖅ ᐊᒻᒪ ᒪᒥᑕᐅᔪᓐᓇᖅᖢᓂᓗ. ᑎᓕᐅᕆᕗᖓ ᑭᓇᑐᐃᓐᓇᑦᑎᐊᒥᒃ ᖃᐅᔨᔾᔪᑕᐅᔪᓐᓇᖅᑐᓂᒃ ᖃᐅᔨᓴᖅᑕᐅᖁᓪᓗᒋᑦ, ᐱᔭᕆᐊᖃᕐᐸᓪᓗ, ᑲᒪᒋᔭᐅᓗᑎᒃ ᐳᕙᒡᓗᖕᓂᕐᒧᑦ,” ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦ ᑑᙶᓗᒃ ᐅᖃᖅᖢᓂ. “ᐳᕙᒡᓗᖕᓂᖅ ᐊᔪᕐᓇᙱᑦᑐᑯᓘᙱᓚᖅ, ᑕᐃᒪᐃᓐᓂᖓᓄᓪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᓂᕿᑦᑎᐊᕙᖕᓂᒃ ᐃᑲᔪᖅᑐᐃᕙᒃᐳᑦ ᐃᓄᖕᓄᑦ ᐆᒻᒪᕆᒃᑐᒥᒃ ᐳᕙᒡᓗᖕᓇᖅᑐᓕᖕᓄᑦ. ᐱᓕᕆᖃᑎᒌᖕᓂᒃᑯᑦ, ᐃᓱᓕᑎᑦᑐᓐᓇᕐᑕᕗᑦ ᐳᕙᒡᓗᖕᓂᖅ ᓄᓇᕗᒻᒥᑦ.
ᓄᓇᕗᒻᒥᐅᑦ ᑎᓕᐅᖅᑕᐅᕗᑦ ᐱᓕᕆᖃᑕᐅᖁᔭᐅᓪᓗᑎᒃ ᓄᓇᖏᑦ ᖃᓄᐃᙱᑦᑎᐊᕈᓯᖏᓐᓂᒃ ᑐᓴᐅᒪᑎᑕᐅᖏᓐᓇᕐᓗᑎᒃ, ᐃᓚᐅᕙᒡᓗᑎᒃ ᐳᕙᒡᓗᒃᑎᑦᑎᑦᑕᐃᓕᓂᕐᒧᑦ ᐱᓇᔪᒃᑕᐅᔪᓂᒃ, ᐊᑐᖅᐸᒡᓗᑎᒡᓗ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔫᑎᒃᓴᓂᒃ ᖃᐅᔨᓴᖅᑕᐅᕙᒡᓗᑎᒃ ᐊᒻᒪ ᐃᓅᓕᓴᖅᑕᐅᕙᒡᓗᑎᒃ. ᑐᓴᕆᐊᒃᑲᓐᓂᕈᑎᓄᑦ ᐳᕙᒡᓗᖕᓇᒧᑦ ᐱᓗᐊᖅᑕᐃᓕᑎᑦᑎᓂᕐᒥᒃ ᒪᒥᓴᐃᓂᕐᒥᒡᓗ ᖃᐅᔨᔪᒪᒍᕕᓪᓘᓐᓃᑦ ᓵᓚᒃᓴᕋᓱᖕᓂᖕᒥᑦ ᓴᓇᐅᒐᑎᒍᑦ, ᐅᐸᒡᓗᒍ ᓄᓇᕗᒻᒥ ᒐᕙᒪᒃᑯᑦ ᐃᑭᐊᖅᑭᕕᖓᑦ
-30-
ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᒃᑎᑦᑎᔨ ᑐᓴᒐᒃᓴᓕᕆᔨᓄᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
ᓵᒪᐃᓐ ᑎᐅᒍᐊᓯᐊᔅ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
