(ᓅᕙᐃᒻᕙ 10, 2020, ᐃᖃᓗᐃᑦ, ᑲᖏᕐᖠᓂᖅ ᐊᒻᒪᓗ ᐃᖃᓗᑦᑑᑦᑎᐊᖅ, ᓄᓇᕗᑦ) ᐃᓄᐃᑦ ᐊᖏᙱᑦᑐᑦ ᐊᑭᓕᖅᓱᐃᑎᑕᐅᓂᕐᒥᒃ ᐊᑭᓕᖅᓱᕆᐊᓕᓐᓂᒃ ᐅᔭᕋᓐᓂᐊᖅᑎᓄᑦ ᑳᒻᐸᓂᓄᑦ ᑖᒃᓰᔭᐅᑎᓂᒃ ᐊᒻᒪᓗ ᖃᐅᔨᒃᑲᐃᔪᑦ ᐱᖁᔭᒃᓴᖅ 55 − ᐱᖁᔭᖅ ᐋᖅᑭᒋᐊᕈᑎᓄᑦ ᓇᖕᒥᓂᖁᑕᐅᔪᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᑖᒃᓯᓕᕆᓂᕐᒧᑦ ᐱᖁᔭᖅ (PATA) ᓴᒃᑯᑕᐅᖁᓪᓗᒍ ᐋᖅᑭᒋᐊᖅᑕᐅᓗᓂᓘᓐᓃᑦ, ᐅᖃᓚᐅᖅᑐᑦ ᐊᖓᔪᖅᑳᑦ ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᙵᕕᒃ), ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ), ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ (KivIA) ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ (KitIA).
ᐱᖁᔭᒃᓴᖅ 55 ᐃᓄᓐᓂᒃ ᐱᓕᕆᐊᒃᓴᓖᒍᑕᐅᔪᖅ ᐊᑭᓕᖅᓱᐃᓂᕐᒥᒃ ᐅᔭᕋᓐᓂᐊᖅᑏᑦ ᓇᖕᒥᓂᖁᑎᖏᓐᓂᒃ ᑖᒃᓯᓄᑦ ᓄᓇᐅᑉ ᐃᑭᐊᖓᓂ ᐃᓄᐃᑦ ᓄᓇᖁᑎᖏᓐᓂ (IOL) ᑕᐃᒪᙵᓂᑐᖃᖅ ᐄᑉᕈ 1, 1999-ᒥᒃ. ᐊᓯᓕᒫᖏᓐᓂ ᑲᓇᑕᒥ, ᓴᓇᔪᑦ ᓄᓇᓂ (ᓲᕐᓗ ᐅᔭᕋᓐᓂᖅᑏᑦ ᑲᒻᐸᓃᑦ) ᐱᓕᕆᐊᒃᓴᖏᑦ ᐊᑭᓕᖅᓱᐃᓂᕐᒥᒃ ᓇᖕᒥᓂᖁᑕᐅᔪᓂᒃ ᑖᒃᓰᔭᐅᑎᓂᒃ ᐱᕚᓪᓕᕈᑎᒃᓴᖏᓐᓂᒃ.
“ᓄᓇᕗᑦ ᒐᕙᒪᖓ (GN) ᑕᒻᒪᖅᓯᒪᔪᒥᒃ ᑐᑭᓯᒪᓂᓕᒃ ᐃᑲᔫᑎᓂᒃ ᐅᔭᕋᓐᓂᐊᕋᑦᓴᓕᕆᓂᕐᒧᑦ, ᐱᓗᐊᖅᑐᒥ ᑕᐃᑲᙵᕐᓂᓴᓂᒃ ᐊᐅᓚᑕᐅᕌᓂᓚᐅᖅᑐᓂᒃ ᓄᓇᒥᒃ ᐊᑐᖅᑐᐊᓂᕐᒧᑦ ᐃᓄᐃᑦ ᓄᓇᖁᑎᖏᓐᓂ ᐃᓄᐃᑦ ᕿᒻᒪᑯᑖᖅᑐᒃᓴᒫᖑᓪᓗᑎᒃ ᓂᖏᖅᑕᐅᑎᓄᑦ ᐋᖅᑭᑦᓯᒪᔪᓂᒃ ᑲᓇᑕ ᒐᕙᒪᒃᑯᖏᓐᓂᒃ ᑭᓯᐊᓂ ᑲᒪᒋᔭᒃᓴᒫᖃᒃᑲᓐᓂᕋᔭᕐᓗᑎᒃ ᒥᓕᔭᕋᓴᓐᓂᒃ ᑮᓇᐅᔭᓂᒃ ᐅᕙᕋᓐᓂᐊᓂᕐᒧᑦ ᑖᒃᓰᔭᐅᑎᓄᑦ,” ᐅᖃᖅᑐᖅ ᐊᖓᔪᖅᑳᒧᑦ ᑭᖑᕝᕕᐅᑎᓯᒪᔪᖅ ᔭᐃᒥᓯ ᐃᑦᑐᓗᒃ.
ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖅᑎᑕᐅᑦᓯᐊᓚᐅᙱᒻᒥᔪᑦ ᐱᖁᔭᒃᓴᒧᑦ. ᐃᓛᒃ, ᓄᓇᕗᑦ ᒐᕙᒪᖓ ᑐᓴᕆᐊᓚᐅᖅᑑᒐᓗᐊᖅ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐱᒋᐊᕈᑎᓂᒃ ᒪᓕᒐᑦᓴᓕᐅᕐᓂᕐᒧᑦ ᑐᒃᓯᕋᐅᒻᒥᒃ ᐅᑭᐊᑦᓵᖓᓂ 2018, ᐊᖏᓈᖅᑐᒥᒃ ᐊᓯᔾᔨᕈᑎᑕᖃᓚᐅᖅᑐᖅ ᐊᒻᒪᓗ ᐃᓚᒋᐊᕈᑕᐅᔪᓂᒃ. ᓄᓇᕗᑦ ᒐᕙᒪᖓ ᐊᐱᕆᔪᖅ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᓄᐊᑦᓯᖁᓪᓗᒋᑦ ᑖᒃᓯᓂᒃ ᑭᒡᒐᑐᖅᑕᐅᓗᑎᒃ ᐊᒻᒪᓗ ᓄᖅᑲᖅᑎᑕᐅᓗᑎᒃ ᐊᑐᖅᑐᐊᕈᑎᖏᑦ ᐅᔭᕋᓐᓂᐊᖅᑏᑦ ᑲᒻᐸᓃᑦ ᐊᑭᓖᙱᑉᐸᑕ ᑖᒃᓯᓂᒃ, ᐊᒥᓱᕐᔪᐊᕌᓗᓐᓂᒃ ᐃᓄᓐᓂᒃ ᐃᖅᑲᓇᐃᔭᕋᔭᖅᑐᓂᒃ ᐃᖅᑲᓇᐃᔮᖃᕈᓐᓃᑎᑦᓯᓯᒪᓪᓗᑎᒃ.
ᓄᓇᕗᑦ ᒐᕙᒪᖓ ᓴᒃᑯᐃᓚᐅᖅᑐᖅ “ᑭᒃᑯᑐᐃᓐᓇᐃᑦ” ᐊᐅᓚᓂᕆᓲᖏᓐᓂᒃ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᐃᓄᐃᑦ ᓄᓇᖁᑎᖏᑦ, ᐊᒻᒪᓗ ᕿᐱᓗᒃᑐᑎᒃ ᒪᓕᒍᒪᓇᑎᒃ ᐱᒋᐊᕈᑎᓂᒃ ᒪᓕᒐᑦᓴᓕᐅᕐᓂᕐᒧᑦ ᐋᖅᑭᑦᑕᐅᓚᐅᖅᑐᒥᒃ ᓄᓇᑦᓯᐊᒥ ᐃᓄᕕᐊᓗᐃᑦ ᓄᓇᖁᑎᖏᓐᓄᑦ, ᓴᖑᑎᑦᓯᓪᓗᑎᒃ ᐃᓕᓴᕆᔭᐅᓕᖅᐸᓪᓕᐊᒍᑎᓂᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᑕᑯᑦᓴᐅᑎᑕᐅᔪᒥᒃ ᐊᔾᔨᐅᔪᖁᑎᓕᐊᖑᕋᑖᓚᐅᖅᑐᒥᒃ ᐃᓄᐃᑦ−ᑯᐃᓐ ᐱᓇᓱᐊᖃᑎᒌᑦ ᑲᑎᒪᔨᕋᓛᖏᓄᑦ (ICPC).
“ᓄᓇᕗᑦ ᒐᕙᒪᖓ ᐃᓄᓐᓂᒃ ᐊᑭᓖᑎᑦᓯᖔᕈᒪᑐᐃᓐᓇᖅᑐᑦ ᒥᓕᔭᓃᑦᑐᓂᒃ ᑖᒃᓯᓂᒃ ᐊᑭᓕᑦᓴᖏᓐᓂᒃ ᐅᔭᕋᓐᓂᐊᖅᑏᑦ ᑲᒻᐸᓃᑦ, ᓄᐊᑦᓯᙱᖔᕐᓗᑎᒃ ᑖᒃᓯᑎᒍᑦ ᓇᖕᒥᓂᖅ ᑖᒃᑯᓇᙵᑦ ᑲᒻᐸᓂᓂᒃ,” ᐅᖃᖅᑐᖅ ᑭᖑᕝᕕᐅᑎᓯᒪᔪᖅ ᐊᖓᔪᖅᑳᒧᑦ ᔭᐃᒥᓯ ᐃᑦᑐᓗᒃ. “ᐊᐱᕆᔭᕆᐊᖃᖅᑐᒍᑦ ᖃᓄᐃᒐᔭᕐᒪᖔᖅ ᑭᖑᓂᐊᒍᑦ− ᐊᐅᓚᔪᓐᓇᐅᑎᑖᖅᐸᓪᓕᐊᓂᕐᒧᑦ ᐱᓕᕆᖃᑎᒌᓐᓂᕐᒧᑦ ᐱᓇᓱᐊᖃᑎᒌᓐᓂᖏᑦ ᓄᓇᕗᑦ ᒐᕙᒪᒃᑯᑦ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᑦ ᓄᓇᕗᑦ ᒐᕙᒪᒃᑯᑦ ᑎᒍᓯᑉᐸᑕ ᐱᓕᕆᐊᒃᓴᖃᕐᓂᕐᒥᒃ ᓄᓇᓂᒃ ᓄᓇᒦᙶᖅᑐᓂᓪᓗ ᓄᓇᕗᒻᒥ.”
– 30 –
ᑐᓴᐅᒪᔾᔪᑎᓕᕆᔨᒃᑯᓐᓂ ᖃᐅᔨᒋᐊᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᓂᕐᒧᑦ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᓕᕆᐊᖃᙱᑦᑐᖅ: 1-888-646-0006
ᕗᕆᑦ ᐲᑐᓴᓐ
ᑐᑭᒧᐊᒃᑎᑦᑎᔨ ᐸᕐᓇᓂᕐᒧᑦ ᑐᓴᐅᒪᔾᔪᑎᓕᕆᓂᕐᒧᓪᓗ
ᕿᑎᕐᒥᐅᑦ ᐃᓄᐃᑦ ᑲᑐᔾᖃᑎᒌᑦ
ᐅᖄᓚᐅᑖ: (867) 983-2458
ᓴᐃᒪ ᓴᕼᐊ ᔨᕆᕼᐃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
ᐆᖃᓚᐅᑖ: (867) 975-8413 ᐊᑭᖃᙱᑦᑐᖅ: 1-800-667-2742
ᑲᐃᔪᓪ ᑕᑦᑐᐃᓂ
ᑭᖑᕝᕕᐅᑎᓯᒪᔪᖅ ᐊᐅᓚᑦᓯᔨᒧᑦ ᑐᓴᐅᒪᔾᔪᑎᓕᕆᓂᕐᒧᑦ
ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ
ᐅᖄᓚᐅᑖ: (867) 645-2800 ᐊᑭᖃᙱᑦᑐᖅ: 1-800-220-6581
ᐱᓕᕆᐊᖑᓯᒪᓂᖓ
ᓄᓇᕗᑦ ᒐᕙᒪᖓ (GN) ᓴᖅᑮᓚᐅᖅᑐᖅ ᐱᖁᔭᒃᓴᖅ 55-ᒥᒃ ᐆᑦᑑᑉᐱᕆ 21, 2020-ᒥ, ᐃᓚᒋᔭᐅᔪᒥᒃ ᐅᑕᖅᑭᔭᐅᓲᔭᖅᓯᒪᔪᖅ ᐋᖅᑭᒋᐊᖅᑕᐅᔾᔪᑎᒃᓴᖏᓐᓄᑦ PATA ᒪᓕᑦᓯᒪᖁᓪᓗᒋᑦ ᑖᒃᑯᓇᙶᕐᓗᑎᓪᓗ ᐃᓛᒃᑯᑦ 22 ᓄᓇᕗᑦ ᐊᖏᕈᑎᖏᓐᓄᑦ. ᐃᓛᒃᑯᑦ 22 ᐃᓗᓕᖏᓐᓃᖃᑕᐅᔪᑦ ᐃᓚᖏᑦ ᒪᓕᒐᑦᓴᓕᐊᖑᓯᒪᔪᑦ ᓇᖕᒥᓂᖁᑎᖃᓪᓚᑦᑖᖅᑐᓄᑦ ᑖᒃᓰᔭᐅᑏᑦ ᐃᓄᐃᑦ ᓄᓇᖁᑎᖏᓐᓄᑦ (IOL).
ᐱᖁᔭᒃᓴᖅ 55 ᓈᖕᒪᙱᒍᑎᖓ ᑲᒪᒋᔭᑑᓇᔭᕐᒪᑕ ᓄᓇᐃᑦ ᖄᖏᓐᓇᖏᑦ ᐃᓄᐃᑦ ᓄᓇᖁᑎᖏᓐᓂᒃ ᑕᕝᕙᓂᑦᓴᐃᓐᓇᖅ ᑐᙵᕕᖃᕐᓗᑎᒃ ᑯᐃᓐ ᓄᓇᖁᑎᖏᑎᑐᑦ ᑭᓯᐊᓂ ᐃᓄᐃᑦ ᓄᓇᖁᑎᖏᓐᓅᖏᑦᑐᖅ ᐃᓄᐃᑦ ᓇᖕᒥᓂᖁᑎᒋᒻᒪᒋᑦᑕᐅᖅ ᓄᓇᐃᑦ ᐃᑭᐊᖏᓐᓄᑦ ᐱᔪᓐᓇᐅᑏᑦ.
ᐊᓯᖏᑦ ᐊᕕᑦᑐᖅᓯᒪᓂᕐᓂ ᐅᑭᐅᖅᑕᖅᑐᒥᓗ ᒐᕙᒪᖏᑦ ᑲᓇᑕᒥ ᐊᑐᖃᑦᑕᖅᑐᑦ ᐊᔾᔨᒌᙱᑦᑐᓂᒃ ᒪᓕᒐᖅᑎᒍᑦ ᐱᓕᕆᔾᔪᑕᐅᒍᓐᓇᖅᑐᓂᒃ ᓄᐊᑦᓯᓂᕐᒧᑦ ᐅᔭᕋᓐᓂᐊᖅᑎᓂᒃ ᑖᒃᓰᔭᐅᑎᓂᒃ ᑐᕋᐃᓐᓇᖅᑐᒥᒃ ᐅᔭᕋᓐᓂᐊᖅᑎᓂᒃ ᑲᒻᐸᓂᓂᒃ ᓲᕐᓗ ᐱᖁᑎᖏᓐᓂᒃ ᐱᓯᒪᑦᓯᓂᕐᒧᑦ ᐊᑭᓕᐅᑎᒃᓴᒧᑦ ᐅᔭᕋᓐᓂᐊᖅᑏᑦ ᐊᑭᓕᑦᓴᐃᔭᕋᓱᐊᕐᓂᖏᓐᓂ ᑖᒃᓯᓄᑦ.
ᓄᓇᕗᑦ ᒐᕙᒪᖓᑕ ᖃᓄᐃᓕᖓᓂᖓ ᑕᕝᕙᙶᖅᑐᖅ ᓱᓕᙱᑦᑐᒥᒃ ᐃᓱᒪᒋᔭᐅᔪᒥᒃ ᐃᓄᐃᑦ ᑐᓂᔭᐅᖃᑦᑕᕆᐊᖏᑦ ᐃᓵᔪᓂᒃ ᐅᔭᕋᓐᓂᐊᕕᒻᒥᒃ, ᐃᒪᐃᓕᖓᖔᖅᑎᓪᓗᒍ ᒐᕙᒪᒃᑯᑦ ᐱᖃᑦᑕᖅᑕᖏᑦ ᐅᓄᕐᓂᖅᓴᓂᒃ ᐃᓵᔪᓂᒃ ᑎᒥᐅᔪᑦ ᐊᒻᒪᓗ ᓇᖕᒥᓂᖅ ᐅᑎᖅᑐᑦᓴᔭᒃᑯᑦ, GST ᐊᒻᒪᓗ ᐊᓯᖏᑎᒍᑦ ᑖᒃᓰᔭᐅᑎᑎᒍᑦ ᐅᔭᕋᓐᓂᐊᓂᕐᒧᑦ ᐱᓕᕆᐊᓕᒫᓂ ᐃᓄᐃᑦ ᓄᓇᖁᑎᖏᓐᓃᒃᑲᓗᐊᖅᐸᑕ ᐋᒡᒐᓘᓐᓃᑦ. ᑐᙵᕕᒃᑯᑦ ᓂᖏᖅᑕᐅᑎᑖᖃᑦᑕᖏᑦᑐᑦ ᑕᐃᑲᙵᕐᓂᓴᑐᖃᕐᓂᖅ ᓄᓇᕗᑦ ᐱᙳᖅᑎᑕᐅᓚᐅᖅᑎᓐᓇᒍ ᓴᖅᑭᖅᑕᐅᓯᒪᔪᓂᒃ ᓄᓇᒧᑦ ᐊᑐᖅᑐᐊᕈᑎᓂᒃ, ᐊᑭᑐᔫᑎᓄᑦ ᐊᑭᖏᑦ ᐊᒻᒪᓗ ᐊᐅᓚᔾᔪᑎᓄᑦ ᐊᑭᓕᖅᓱᕋᑦᓴᑦ ᐊᑭᓕᖅᑕᐅᓚᐅᖅᑎᓐᓇᒋᑦ.
