ᓄᓇᕗᒻᒥ ᐃᖅᑲᖅᑐᐃᔨᑎᒍᑦ ᐅᓐᓂᓗᕝᑰᑦ ᓇᓗᓇᐃᕐᓯᓯᒪᓕᖅᑐᑦ, ᐃᓱᒪᓕᐅᕈᑕᐅᓪᓗᓂ ᐋᖅᑭᑦᑕᐅᓚᐅᖅᑐᖅ ᐄᑉᕈ 23, 2014, ᑲᓇᑕ ᒐᕙᒪᖓ ᓯᖁᒥᑦᓯᓯᒪᒋᐊᒃᓴᖓᓂᒃ ᐊᕕᑦᑐᕐᓯᒪᓂᖅ 12.7.6 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ (ᐊᖏᕈᑏᑦ) ᐊᑐᓕᖅᑎᒋᐊᖃᕐᓯᒪᔭᒥᓂᒃ ᑲᒪᑦᓯᐊᓚᐅᓐᖏᓐᓂᖏᓐᓄᑦ ᓴᖅᑭᕆᐊᖃᕐᓯᒪᔭᒥᓂᒃ ᓄᓇᕗᒻᒥ ᖃᐅᔨᓴᕐᓂᕐᒧᑦ ᐸᕐᓇᐅᑎᓂᒃ, ᐊᒻᒪᓗ ᐃᓄᐃᑦ ᓄᓇᕗᒻᒥᐅᑦ ᓱᕈᑦᑎᑕᐅᓯᒪᓪᓚᕆᓐᓂᖏᓐᓄᑦ ᐱᔭᕆᐊᖃᖅᑎᑕᐅᓯᒪᓂᖏᓐᓂᒃ. ᐅᓐᓂᓗᕝᕕᒃ ᐃᖅᑲᖅᑐᐃᔨᒃᑯᑦ ᒪᓕᒐᖅᑎᒍᑦ ᓇᓗᓇᐃᖅᑕᖓ ᐊᑭᓖᒍᑕᐅᔭᕆᐊᖃᕐᓂᐊᖅᑐᒥᒃ ᖃᓄᑎᒋᓪᓚᑦᑖᖅ ᓱᕈᐃᓯᒪᓂᕆᔭᖏᓐᓂᒃ ᓇᓗᓇᐃᖅᑕᐅᒋᐊᖃᕐᓂᐊᖅᑐᖅ ᐃᖅᑲᖅᑐᐃᕕᒃ ᓈᓚᓚᐅᖅᑎᓪᓗᒍ ᖃᐅᔨᒪᔨᑕᓂᒃ ᓇᓗᓇᐃᖅᑕᐅᓚᑦᑖᕈᑎᖏᓐᓂᒃ ᓯᖁᒥᑦᓯᒍᑎᒋᓯᒪᔭᖏᓐᓂᒃ ᐃᖅᑲᖅᑐᐃᓂᓪᓚᑦᑖᒨᖅᑕᐅᓯᒪᓕᕐᐸᑦ.

“ᐃᖅᑲᖅᑐᐃᕖᑦ ᐃᓱᒪᓕᐅᕈᑎᓪᓗᒍ ᐋᖅᑭᓚᐅᖅᑕᖓ ᓱᖅᑯᐃᕐᓯᒍᑕᐅᔪᖅ ᑲᓇᑕ ᒐᕙᒪᖓ, ᑯᐃᓐ ᑭᒡᒐᑐᖅᑕᐅᓪᓗᓂ, ᐱᖕᒪᕆᐅᑎᑕᐅᒋᐊᒃᑲᓐᓂᕆᐊᓕᒃ ᐅᐱᒍᓱᓐᓂᕐᒧᑦ ᐊᑐᓕᖅᑎᑦᓯᕙᓪᓕᐊᓂᕐᒧᓪᓗ ᐱᓇᓱᐊᕋᑦᓴᓕᐊᖑᓯᒪᔪᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ,” ᐅᖃᓚᐅᖅᑐᖅ ᔭᐃᒥᓯ ᐃᑦᑐᓗᒃ, ᑐᓐᖓᕕᒃᑯᓐᓂ ᐊᖓᔪᖅᑳᖑᓚᐅᐱᓪᓚᑦᑐᖅ ᑭᖑᕝᕕᐅᑎᓯᒪᓪᓗᓂ. “ᖁᕕᐊᓇᓐᖏᑐᒃᑰᕐᓂᐅᖃᑦᑕᕐᓯᒪᔪᑦ ᐃᓅᓯᕐᒥ ᐊᖏᔪᕐᔪᐊᕌᓗᒃ ᐃᓚᒋᔭᐅᓪᓗᑎᒃ ᓯᖁᒥᑦᓯᓂᐅᓯᒪᔪᑦ ᐱᓂᐊᕐᓂᕋᐅᑎᓂᒃ ᐊᖏᕈᑎᑎᒍᑦ ᓄᓇᖃᖅᑳᕐᓯᒪᔪᓄᑦ ᑯᐃᓐ ᑭᒡᒐᑐᖅᑎᖏᓐᓂᒃ. ᐊᓯᔾᔨᕈᓐᓇᖏᑕᕗᑦ ᐊᑐᖅᑕᐅᕌᓂᒃᓯᒪᔪᖅ ᐃᓅᓯᕐᒥ ᑭᓯᐊᓂ ᓂᕆᐅᖕᓂᖃᕆᐊᖃᖅᑐᒍᑦ ᓯᕗᓂᕗᑦ ᖁᕕᐊᓇᕐᓂᕐᓴᐅᓂᐊᕐᓂᖓᓂᒃ. ᑐᓐᖓᕕᒃᑯᑦ ᖃᐅᔨᒃᑲᐃᔪᑦ ᑲᓇᑕ ᒐᕙᒪᖓᓂᒃ ᑲᔪᓯᐊᑎᑦᓯᖁᔨᓪᓗᑎᒃ ᑕᒪᐃᓐᓂᒃ ᐱᓂᐊᕐᓂᕋᐅᑕᐅᓯᒪᔪᓂᒃ ᐅᐱᒍᓱᓪᓗᑎᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᒻᒪᓗ ᒪᑭᑕᒍᑎᒋᓗᒍ ᐅᐱᓇᕐᓂᖓ ᑯᐃᓐ ᑭᒡᒐᑐᖅᑕᐅᓂᖓ ᐅᐱᒍᓱᓐᓂᕐᒧᑦ.”

ᐃᑦᑐᓗᒃ ᐅᖃᓚᐅᖅᑐᖅ ᑐᓐᖓᕕᒃᑯᑦ ᕿᒥᕐᕈᓇᑦᑐᑦ ᐃᓱᒪᓕᐅᕐᓂᐅᓚᐅᖅᑐᒥᒃ ᒪᓕᒐᕐᓂᐊᖅᑎᒥᒍᑦ ᐊᒻᒪᓗ ᓇᓗᓇᐃᕐᓯᓂᐊᖅᑐᑦ ᖃᓄᐃᓕᐅᖅᑐᒃᓴᐅᓂᐊᓕᕐᒥᒻᒪᖔᕐᒥᒃ ᕿᓚᒥᐅᓂᕐᐹᒃᑯᑦ ᓇᓗᓇᐃᖅᑕᐅᓚᐅᖅᑐᒧᑦ ᐃᖅᑲᖅᑐᐃᔨᑎᒍᑦ ᐋᖅᑭᑦᑕᐅᓚᐅᖅᑐᒧᑦ.

ᐅᓐᓂᕐᓘᑎ, ᐊᐅᓚᔾᔭᑦᑕᐅᓯᒪᔪᖅ ᑲᓇᑕ ᒐᕙᒪᖓᓂᒃ, ᑕᕝᕙᓐᖔᕐᓯᒪᔪᖅ ᐃᖅᑲᖅᑐᐃᔨ ᐅᐊᕈ ᔮᓐᓴᓐ ᐃᓱᒪᓕᐅᕐᓂᕆᓚᐅᖅᑕᖓᓂᒃ ᔫᓂ 27, 2012 ᖃᐅᔨᓚᐅᑦᒪ ᑐᓐᖓᕕᒃᑯᑦ ᐱᒋᐊᖃᕐᓂᓯᒪᓂᖏᓐᓂᒃ $14.8 ᒥᓕᔭᓂᒃ ᐱᕋᔭᑕᐅᓯᒪᓂᕐᒥᓄᑦ ᓯᖁᒥᑦᓯᓪᓗᑎᒃ ᑲᓇᑕ ᒐᕙᒪᖓ ᑲᒪᓯᒪᓐᖏᓐᓂᖏᓐᓄᑦ ᖃᐅᔨᓴᕐᓂᕐᒧᑦ ᐸᕐᓇᐅᑎᓂᒃ ᒪᓕᓪᓗᒋᑦ ᐃᓛᒃᑯᑦ 12.7.6 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ. ᑐᐊᕕᕐᓇᖅᑎᑕᐅᓂᖓ ᑖᓐᓇ, ᐅᕝᕙᓘᓐᓃᑦ ᓯᕗᒧᐊᒃᑎᑕᐅᓵᓕᒋᐊᖃᕐᓂᖓ, ᐃᖅᑲᑐᖅᑕᐅᒍᑕᐅᔪᖅ ᐊᖏᔪᕐᔪᐊᕌᓘᑎᓪᓗᒍ ᐃᓚᐃᓐᓇᒐᓛᖓ ᐃᖅᑲᖅᑐᐃᕕᖕᒨᑎᑦᓯᒍᑕᐅᓚᐅᖅᑐᒧᑦ ᑐᓐᖓᕕᒃᑯᓐᓂᒃ ᑏᓰᒻᕙ, 2006 ᑕᕝᕗᓐᖓᖓᔪᖅ ᐊᔾᔨᒌᓐᖏᑦᑐᓂᒃ ᐱᕋᔭᐃᓯᒪᒍᑎᖏᓐᓄᑦ ᑲᔪᓯᑎᑦᓯᓯᖃᑦᑕᕐᓯᒪᓐᖏᓐᓂᖏᓐᓄᑦ ᑯᐃᓐ ᑭᒡᒐᑐᖅᑕᐅᓪᓗᓂ ᑲᔪᓯᑎᒋᐊᖃᕐᓯᒪᔭᖏᓐᓂ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᓈᖕᒪᑦᑐᒥ ᐊᑕᖏᕐᓗᑎᓪᓗ. ᐱᓗᐊᕐᓂᖓ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᖅ ᑭᖑᓪᓕᐹᒥ ᐃᖅᑲᖅᑐᐃᕕᖕᒦᒍᑕᐅᓂᐊᖅᑐᖅ ᒫᑦᓯ, 2015.

ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐊᑎᓕᐅᖅᑕᐅᓚᐅᖅᑐᑦ 1993-ᒥ ᐊᒻᒪᓗ ᓴᐳᔾᔭᐅᓯᒪᔪᑦ ᑲᓇᑕᒥ ᒪᓕᒐᕐᓄᑦ ᑐᓐᖓᕕᒡᔪᐊᖓᓄᑦ, ᐊᒻᒪᓗ ᑲᓐᑐᓛᒃᑯᑦ ᐊᖏᖃᑎᒌᒍᑕᐅᓯᒪᔪᓂ ᐃᓗᓕᖃᖃᓯᐅᑎᓪᓗᓂ.