ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ ᖁᕕᐊᒍᑎᖃᓚᐅᕐᐳᖅ ᐃᓚᐃᓐᓇᖏᓐᓂᒃ ᒐᕙᒪᑐᖃᒃᑯᑦ ᑮᓇᐅᔭᓂᒃ ᐊᑑᑎᖃᖅᑎᑕᐅᒍᒫᕐᓂᐊᕐᑐᑦ ᓴᖅᑭᑕᐅᑎᓪᓗᒋᑦ ᑕᒪᑐᒪᓂ ᐱᓇᓱᐊᕈᓯᑦᑎᓐᓂ. ᑮᓇᐅᔭᑦ ᐊᑑᑎᖃᖅᑎᑕᐅᒍᒫᕐᓂᐊᕐᑐᑦ 2017-ᒥ ᐱᓂᐊᕐᓂᖃᕈᑎᖃᕐᒪᑕ $240 ᒥᓕᐊᓂᒃ ᐅᑭᐅᓄᑦ 11-ᓄᑦ ᑐᕌᖅᑐᓂᒃ ᓄᓇᕗᖕᒥ ᐃᒡᓗᓕᕆᓂᕐᒧᑦ. ᑮᓇᐅᔭᑦ ᐊᑑᑎᖃᖅᑎᑕᐅᒍᒫᕐᓂᐊᕐᑐᑦ ᓇᓗᓇᐃᕆᓯᒪᒋᕗᑦ $828.2 ᒥᓕᐊᓂᒃ ᐅᑭᐅᓄᑦ ᑕᓪᓕᒪᓄᑦ ᐱᕚᓪᓕᕈᑎᑦᓴᐅᓪᓗᑎᒃ ᐋᓐᓂᐊᖃᓐᓇᖏᑦᑐᓕᕆᓂᕐᒧᑦ ᐊᓪᓚᓄᑦ ᐊᒻᒪᓗ ᐃᓄᖕᓄᑦ, ᐊᒻᒪᓗ $89.9 ᒥᓕᐊᓐ ᐅᑭᐅᓄᑦ ᐱᖓᓱᓄᑦ ᐃᑲᔪᕈᑕᐅᓂᐊᕐᓗᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐊᒻᒪᓗ ᐃᓕᖅᑯᓯᖏᓐᓄᑦ.
“ᑖᒃᑯᐊ ᑮᓇᐅᔭᑦ ᖃᐅᔨᓇᕈᑕᐅᔪᑦ ᒐᕙᒪᑐᖃᒃᑯᑦ ᐅᔾᔨᕆᔭᖃᕐᒪᑕ ᓄᓇᕗᖕᒥ ᐃᒡᓗᑭᒃᓴᕐᒪᑕ ᐊᒻᒪᓗ ᑕᒪᓐᓇ ᐊᑦᑐᐃᓂᖃᖅᓯᒪᓪᓗᓂ ᑎᒥᒃᑯᑦ, ᐃᓱᒪᒃᑯᑦ ᐊᒻᒪᓗ ᑮᓇᐅᔭᓕᐅᕐᕕᒃᓴᖃᓗᐊᙱᓂᕐᒧᑦ ᓄᓇᕗᖕᒥ ᐃᓄᖏᓐᓄᑦ. ᓄᓇᕗᑦ ᑐᙵᕕᒃᑯᑦ ᖁᕕᐊᒃᐳᑦ ᐃᓄᖕᓄᐃᓐᓇᖅ ᑐᕌᖓᔪᓂᒃ ᐃᒡᓗᓕᕆᓂᕐᒧᑦ ᑮᓇᐅᔭᖃᕈᑎᒃᓴᕐᑕᖃᕐᒪᑕ” ᐅᖃᖅᑐᖅ ᑰᑦᑎᖅ. “ᓯᕗᓪᓕᕐᐹᖑᑎᑦᑎᓂᖏᓐᓄᒃ ᓄᓇᕗᑦ ᑐᙵᕕᒃᑯᑦ ᕿᓚᓈᕐᐳᑦ ᖃᐅᔨᒍᒪᓪᓗᑎᒃ ᖃᖓᒃᑯᑦ ᐊᒻᒪᓗ ᖃᓄᖅ ᐋᓐᓂᐊᖃᓐᓇᖏᑦᑐᓕᕆᓂᕐᒨᖓᔪᑦ ᐊᒻᒪᓗ ᐅᖃᐅᓯᓕᕆᓂᕐᒨᖓᔪᑦ ᐊᑐᕐᑕᐅᓂᐊᕐᒪᖔᑖ ᓄᓇᕗᖕᒧᑦ.”
ᑰᒃᑎᖅ ᐅᖃᓚᐅᖅᑐᖅ ᓄᓇᕗᑦ ᑐᙵᕕᒃᑯᑦ ᕿᓚᓈᕆᔭᖃᖅᐳᑦ ᓇᓗᓇᐃᔭᕐᓯᒪᒍᑎᖏᓐᓂᒃ ᑖᒃᑯᐊ $180 ᐱᓕᐊᓐ ᐊᑭᑐᔪᓄᑦ ᐊᑲᕐᕆᔾᔪᑎᓅᖓᔪᑦ ᑮᓇᐅᔭᖃᕈᑎᒃᓴᑦ ᐸᕐᓇᒍᑕᐅᔪᑦ ᐊᑑᕚᑉ ᑐᓴᕐᑎᑦᑎᒍᒫᕐᒪᑕᒎᖅ ᐃᐱᕆ 12-ᖑᓕᖅᐸᑦ ᐊᑑᕚᒥ. ᑐᓴᖅᑎᑦᑎᓚᐅᕐᑎᓪᓗᒋᑦ, ᐃᓄᐃᑦ ᑐᑭᓯᑦᑎᐊᓂᕐᓴᐅᔪᒫᕐᐳᑦ ᖃᓄᖅ ᐊᖏᑦᑎᒋᒻᒪᖔᑖ ᐊᑭᑐᔪᓄᑦ ᐊᑲᕐᕆᔾᔪᑎᓄᑦ ᑮᓇᐅᔭᖃᕈᑕᐅᓂᐊᕐᑐᑦ ᓄᓇᕗᖕᒥ. ᐃᓛᒃ ᓄᑖᓂᒃ ᐃᓄᓕᕆᔾᔪᑎᓂᒃ ᐊᒻᒪᓗ ᐊᑭᑐᔪᓄᑦ ᐊᑲᕐᕆᔾᔪᑎᓂᒃ ᐱᔭᕆᐊᖃᓪᓚᕆᑦᑎᓪᓗᒍ, ᓄᓇᕗᑦ ᐃᓅᓯᓕᕆᓂᕐᒧᑦ ᐊᒻᒪᓗ ᐊᑭᑐᔪᓄᑦ ᐊᑲᕐᕆᔾᔪᑎᓄᑦ ᐊᒥᒐᐅᑎᑐᐃᓐᓇᖏᒻᒪᑕ ᐃᑎᓂᕐᓴᐅᖕᒪᓪᓘᓐᓃᑦ.
ᑰᑦᑎᖅ ᐅᔾᔨᕆᔭᖃᓚᐅᕐᑐᖅ ᒪᕐᕈᐃᑦ ᒐᕙᒪᑐᖃᒃᑯᑦ ᑮᓇᐅᔭᓄᑦ ᐊᑑᑎᖃᖅᑎᒍᒫᕐᓂᐊᕐᑕᖏᑦ ᐊᑦᑐᐊᓂᖃᖅᐳᑦ ᐊᑐᓕᖅᑎᑕᐅᕙᓪᓕᐊᔪᒃᓴᓄᑦ ᓄᓇᕗᖕᒥ ᐊᖏᕈᑎᖏᓐᓄᑦ. ᓯᕗᓪᓕᖅ ᑮᓇᐅᔭᖃᕈᑎᒃᓴᑦ ᓇᓗᓇᐃᖅᑕᐅᓯᒪᔪᑦ ᑮᓇᐅᔭᓄᑦ ᐊᑑᑎᖃᖅᑎᒍᒫᕐᓂᐊᕐᑕᖏᓐᓂ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᐊᑦᓛᓐᑎᒃ ᐃᒪᕕᐊᓂ ᐃᖃᓗᒐᓱᒍᑎᑦᓴᑦ ᑐᕌᖓᓂᖃᓐᓂᐊᒥᒻᒪᖔᑖ ᓄᓇᕗᖕᒧᑦ, ᒪᓕᑦᑕᐅᖏᔾᔪᑎᒋᕙᒪᐅᕐᑕᖓᓂᒃ ᐃᓱᓕᑦᑎᑦᑎᒍᑎᐅᓪᓗᓂ ᐃᓚᐃᓐᓈᕆᐊᖃᙱᑎᑕᐅᒍᑎᖏᑦ ᑎᑎᕋᕐᓯᒪᔪᒥ 2.7.3-ᒥ ᓄᓇᕗᑦ ᐊᖏᕈᑎᖏᓐᓂ. ᐊᐃᒃᐹ ᒐᕙᒪᑐᖃᒃᑯᑦ ᐊᑑᑎᖃᖅᑎᑦᑎᒐᔭᕆᐊᖏᑕ ᐃᓕᓐᓂᐊᕈᑎᒃᓴᓂᒃ ᑮᓇᐅᔭᓂᑦ ᐊᒻᒪᓗ ᐃᓄᐃᑦ ᐃᓄᒋᐊᓐᓂᖏᑦ ᒪᓕᒃᑕᐅᒍᑕᐅᓂᕐᓴᐅᓕᕋᔭᕐᒪᖔᑦ ᒐᕙᒪᒃᑯᓐᓂ ᐃᖅᑲᓇᐃᔭᕐᑎᐅᓂᐊᖅᑐᓂᒃ ᑕᐃᒪᓐᓇ ᐱᖁᔭᐅᓯᒪᒻᒪᑕ ᑎᑎᕋᖅᓯᒪᔪᒥᒃ 23-ᒥ ᓄᓇᕗᑦ ᐊᖏᕈᑎᖏᓐᓂ.
