ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᑐᙵᓱᒃᑎᑦᑎᕗᑦ ᖃᐅᔨᓴᕆᐊᓐᓂᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᕐᑎᖏᓐᓂᒃ

ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᑳᑎ ᑕᐅᑐᙱ ᐅᓪᓗᒥ ᐅᖃᖅᑲᐅᔪᖅ ᑐᙵᓱᒃᑎᒃᑲᒥᒋᒡᒎᖅ ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑕ ᐃᖅᑲᓇᐃᔭᕐᑎᖏᑦ ᖃᐅᔨᓴᕐᑕᐅᓂᖏᓐᓂᒃ.

ᐱᓂᐊᕐᓂᕋᕈᑕᐅᓯᒪᒻᒪᑦ ᖃᐅᔨᓴᕐᓂᖅ ᐋᖅᑭᖃᑎᒌᓐᓂᒃᑯᑦ ᐊᖏᕈᑎᖏᑦᑎᒍᑦ ᐊᑎᓕᐅᕐᑕᐅᓚᐅᕐᓯᒪᔪᓂᒃ ᓄᓇᕗᑦ ᑐᙵᕕᒃ ᑎᒥᖓᑕ, ᓄᓇᕗᑦ ᒐᕙᒪᒃᑯᖏᑕ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑕ ᐊᕐᕌᓂ ᐊᖏᕈᑎᑎᒍᑦ ᐋᖅᑭᖃᑎᒌᒍᑕᐅᓗᓂ ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᖅᑐᐃᕕᒃᑯᑎᑦᑎᓚᐅᕐᓯᒪᑎᓪᓗᒋᑦ ᒐᕙᒪᑐᖃᒃᑯᓐᓂᒃ ᒪᓕᓐᓂᖃᖅᓯᒪᙱᓐᓂᖏᓐᓄᑦ ᓄᓇᕘᒥ ᐊᖏᕈᑎᓂᒃ. ᐊᒥᓱᑦ ᐱᓂᐊᕐᓂᕋᕈᑕᐅᓯᒪᔪᑦ ᒪᓕᒃᑕᐅᓯᒪᙱᑦᑐᑦ ᐃᓛᒃᑯᑦ ᑎᑎᕋᖅᓯᒪᔪᑦ 23-ᒦᑦᑐᓂᒃ ᓄᓇᕗᑦ ᐊᖏᕈᑎᖏᓐᓃᒃᑐᓂᒃ, ᓄᓇᕗᑦ ᒐᕙᒪᒃᑯᖏᓐᓂ ᐃᓄᖕᓂᒃ ᐃᖅᑲᓇᐃᔭᕐᑎᖃᖁᔨᓯᒪᓂᖏᑦ ᐃᓄᐃᑦ ᐃᓄᒋᐊᓐᓂᖏᑦ ᒪᓕᒃᑕᐅᓂᖃᖁᔭᐅᓪᓗᑎᒃ, ᓇᓚᐅᑦᓵᖅᑕᐅᓯᒪᓪᓗᓂ 85 ᐳᓴᖏᓐᓃᒐᔭᕐᓂᖏᓐᓂᒃ ᐃᖅᑲᓇᐃᔭᕐᑎᑕᐅᔪᑦ.

“ᒐᕙᒪᒃᑯᑦ ᐃᖅᑲᓇᐃᔭᕐᑎᑖᕐᐸᓪᓕᐊᒋᐊᖃᕐᒪᑕ ᐃᓚᐃᓐᓈᖏᓪᓗᑎᒃ ᐊᒻᒪᓗ ᐃᓄᐃᑦ ᐃᓄᒋᐊᓐᓂᖏᓐᓂᒃ ᒪᓕᓐᓂᖃᕐᔫᒥᔪᓂᒃ ᓄᓇᕘᒥ ᑕᒪᓐᓇᓗ ᐱᒻᒪᕆᐅᖕᒪᑦ ᐱᓂᐊᕐᓂᕋᒍᑕᐅᓯᒪᔪᖅ ᐱᖃᓯᐅᓯᒪᒻᒪᑦ ᓄᓇᕗᑦ ᐊᖏᕈᑎᖏᓐᓂ. ᑖᓐᓇ ᓄᓇᕗᑦ ᑐᙵᕕᒃ ᑎᒥᖓᑕ ᓯᕗᓪᓕᐹᖑᑎᒻᒪᒍ, ᐊᒻᒪᓗ ᖁᕕᐊᒃᐳᖓ ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᖅᑐᐃᕕᒃᑰᑎᑦᑎᓚᐅᕐᑎᓪᓗᒋᑦ ᐊᒻᒪ ᐋᖅᑭᖃᑎᒌᓐᓂᒃᑯᑦ ᐊᖏᕈᑎᒌᒍᑎᑎᒍᑦ ᖃᐅᔨᓴᐃᓂᖃᕆᐊᖃᓚᕿᓯᒻᒪᒻᒪᑕ. ᑐᑭᓯᑦᑎᐊᑲᓐᓂᕆᐊᖃᕋᑦᑕ ᖃᓄᐃᑕᐅᕙᒻᒪᖔᑖ ᐃᓄᐃᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᕐᑎᒋᔭᐅᓪᓗᑎᒃ ᐊᒻᒪᓗ ᓈᖕᒪᓂᕐᓴᓂᒃ ᐃᓄᐃᑦ ᐃᓕᓐᓂᐊᕐᑎᑕᐅᒍᑎᒃᓴᖏᓐᓂᒃ ᐸᕐᓇᒍᑎᖃᖁᓪᓗᒋᑦ ᐊᒻᒪᓗ ᐊᐳᖅᑕᕈᑎᖃᕈᓐᓃᕐᓗᑎᒃ ᐃᖅᑲᓇᐃᔮᒥᒍᑦ ᐱᕙᓪᓕᐊᓂᖃᕈᓐᓇᕐᓂᖏᓐᓂᒃ ᐊᒻᒪᓗ ᐃᖅᑲᓇᐃᔮᒥᒍᑦ ᑲᔪᓯᓂᖃᑦᑎᐊᕈᓐᓇᖁᓪᓗᒋᑦ.

ᖃᐅᔨᓴᕈᑕᐅᔭᕇᖅᑐᑦ ᐊᑑᑎᖃᒻᒪᕆᒃᑐᓂᒃ ᑐᑭᓯᓯᒪᒍᑕᐅᔪᓐᓇᓂᐊᕐᒪᑕ ᐱᕙᓪᓕᐊᓂᖃᖅᑎᑦᑎᒍᑕᐅᓗᑎᒃ ᓄᓇᕗᖕᒥ ᐃᓄᐃᑦ ᐃᖅᑲᓇᐃᔭᕈᓐᓇᕐᑐᑦ ᖃᐅᔨᓴᕐᑕᐅᒍᑎᖏᓐᓂᒃ. ᑭᓇᒃᑯᑐᐃᓐᓇᕐᓄᑦ ᑕᑯᖁᔾᔭᐅᔪᓐᓇᖏᓪᓗᑎᒃ ᖃᐅᔨᓴᕐᓂᖃᓐᓂᐊᕐᑐᑦ ᐃᐱᕆ 25-ᒥ ᐱᒋᐊᕐᓗᒍ ᔫᓂ 3-ᒧᑦ, 2016. ᑕᒪᐃᑕ ᒐᕙᒪᒃᑯᓐᓄᑦ ᐃᖅᑲᓇᐃᔭᕐᑎᐅᔪᑦ ᑎᓕᐅᕐᑕᐅᕗᑦ ᐱᖃᑕᐅᖁᔭᐅᓪᓗᑎᒃ ᖃᐅᔨᓴᐃᓂᒃᑯ ᐃᖅᑲᓇᐃᔭᓐᓇᑎᓪᓗᒍ. ᓄᓇᕗᑦ ᑐᙵᕕᒃ ᑎᒥᖓ ᐋᖅᑭᒃᓱᐃᓚᐅᕐᐳᑦ ᖃᐅᔨᓇᓱᐊᕈᑎᒃᓴᓂᒃ ᐱᖃᑎᖃᖅᑐᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂᒃ. ᖃᐅᔨᓴᕈᑏᑦ ᐊᑐᐃᓐᓇᐅᔪᑦ ᐃᓅᔨᖓᓪᓗᑎᒃ, ᖃᓗᓇᐅᔨᖓᓪᓗᑎᓪᓗ ᐊᒻᒪ ᐅᐃᕖᑎᑐᑦ.

ᑐᑭᓯᒋᐊᑲᓐᓂᕈᓐᓇᖅᐳᑎᑦ:

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: