ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᑐᓐᖓᓴᐃᖅᑲᐅᔪᖅ ᓴᖅᑭᖅᑕᐅᓂᖏᓐᓂᒃ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᕿᒥᕐᕈᓇᑦᑕᐅᓯᐊᕐᓯᒪᔪᓂᒃ ᑎᑎᕋᕐᓯᒪᔪᓂᒃ ᓄᓇᕗᑦ ᒪᓕᒐᓕᐅᕐᕕᖓᓂ. ᕿᒥᕐᕈᓇᑦᑕᐅᓂᖏᑦ ᑎᑎᕋᕐᓯᒪᔪᑦ ᓴᖅᑭᔮᖅᑎᓯᑦᓯᐊᖅᑐᑦ ᐊᓯᔾᔨᓪᓚᑦᑖᕆᐊᖃᕐᓂᖏᓐᓂᒃ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᐊᑐᐊᒐᑦ ᐊᒻᒪᓗ ᑲᔪᓯᑎᑕᐅᒋᐊᖃᕐᓯᒪᓂᖏᑦ.
“ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᐊᑐᐊᒐᑦ ᓴᖅᑭᖅᑕᐅᔾᔪᑎᖃᕐᓯᒪᒻᒪᑕ ᐊᑐᓕᖅᑎᑕᐅᕙᓪᓕᐊᔭᕆᐊᖃᕐᓂᖏᓐᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐃᓛᒃᑯᑦ 24, ᑭᓯᐊᓂ ᑐᓴᖃᑦᑕᕐᓯᒪᔪᖓ ᐅᓄᖅᑐᓂᒃ ᐃᓄᖕᓂᒃ ᓇᖕᒥᓂᖁᑎᓕᓐᓂᒃ ᐊᑐᖅᑕᐅᖏᑦᓯᐊᒻᒪᕆᓐᓂᖏᓐᓂᒃ ᐊᒻᒪᓗ ᐊᓯᔾᔨᕆᐊᖃᓕᕐᓂᖏᓐᓂᒃ. ᓇᓗᓇᐃᖅᑐᕐᓯᒪᔪᑎᒍᑦ ᐊᓯᔾᔨᕆᐊᖃᓕᕐᒪᑕ ᐊᐅᓚᑕᐅᔾᔪᓯᖏᑎᒍᑦ ᐊᒻᒪᓗ ᐊᑐᐊᒐᑦ ᑖᒃᑯᐊᓚᑦᑖᑦ,” ᐅᖃᖅᑲᐅᔪᖅ ᑕᐅᑐᓐᖏ.
ᑕᐅᑐᓐᖏ ᐅᖃᐅᓯᖃᖅᑲᐅᔪᖅ ᑖᒃᑯᓂᖓ ᓴᖅᑭᖅᑕᐅᓚᐅᖅᑎᓪᓗᒋᒃ ᒪᕐᕉᒃ ᐅᓂᒃᑳᒃ: ᓇᖕᒥᓂᕐᓱᖅᑐᒥᒃ ᕿᒥᕐᕈᓇᑦᑕᐅᓯᒪᓂᖓ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᐊᑐᐊᒐᑦ ᒪᓕᒐᕐᓂᐊᖅᑎᓄᑦ ᕗᐊᑕᓐ-ᓛᑦᓄ-ᔫᕙᐃᔅ; ᐊᒻᒪᓗ ᐅᓂᒃᑳᓕᐊᒥᓂᖓ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᕿᒥᕐᕈᔩᑦ ᑲᑎᒪᔨᕋᓛᖏᓐᓄᑦ. ᕿᒥᕐᕈᔩᑦ ᑲᑎᒪᔨᕋᓛᖏᑦ ᑲᑐᔾᔨᖃᑎᒌᑦᑐᑎᒃ ᑐᓐᖓᕕᒃᑯᑦ-ᓄᓇᕗᑦ ᒐᕙᒪᖓ ᑲᑎᒪᔨᕋᓛᑦ ᑖᒃᑯᓄᓐᖓᖓᔪᓂᒃ ᕿᒥᕐᕈᓇᑦᑏᑦ ᕗᐊᑕᓐ-ᓛᑦᓄ-ᔫᕙᐃᔅ ᐅᓂᒃᑳᓕᐊᒥᓂᖏᓐᓂᒃ. ᑕᐅᑐᓐᖏ ᐅᖃᓚᐅᖅᑐᖅ ᐅᓂᒃᑳᓂ ᖃᐅᔨᓇᖅᑐᖅ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᐊᑐᐊᒐᑦ ᐱᖕᒪᕆᐅᓂᖏᓐᓂᒃ ᐃᓄᐃᑦ ᓇᖕᒥᓂᖁᑎᖏᓐᓄᑦ, ᑭᓯᐊᓂ ᐊᑭᑐᓗᐊᕌᓗᓐᖏᑦᑐᑦ ᒐᕙᒪᓄᑦ ᐊᑐᖅᑕᐅᑎᑕᐅᑉᐸᑕ.
“ᐊᐃᕙᔾᔪᑕᐅᑎᓪᓗᒍ ᑐᓴᕋᔪᑦᑕᕗᑦ ᐊᑭᑐᓗᐊᕐᓂᖓᓂᒃ ᐊᑐᓕᖅᑎᓐᓇᓱᐊᕆᐊᖓ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐃᑲᔫᑎᓄᑦ ᐊᑐᐊᒐᖅ ᒐᕙᒪᓄᑦ, ᑭᓯᐊᓂ ᑕᒪᓐᓇ ᓱᓕᓐᖏᑦᑐᖅ ᐊᒻᒪᓗ ᓯᓚᐃᕐᕆᔭᐃᔪᖅ. ᖃᐅᔨᓴᕐᓂᕆᓚᐅᖅᑕᖓ ᕗᐊᑕᓐ-ᓛᑦᓄ-ᔫᕙᐃᔅ ᐊᒻᒪᓗ ᓇᓗᓇᐃᖅᑕᐅᓪᓗᓂ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᕿᒥᕐᕈᔩᑦ ᑲᑎᒪᔨᕋᓛᖏᓐᓄᑦ ᓴᖅᑭᔮᑦᓯᐊᖅᑐᖅ ᑖᒃᑯᓄᓐᖓᖓᔪᑦ ᐊᑭᓕᖅᓲᑕᐅᒃᑲᓐᓂᖃᑦᑕᕐᓂᖏᑦ ᐊᑐᓕᖅᑎᑕᐅᒋᐊᓕᒻᒧᑦ ᐱᖕᒪᕆᐊᓘᔪᒧᑦ ᒐᕙᒪᒃᑯᑦ ᐊᑐᐊᒐᖓᓄᑦ ᑎᕆᖅᑯᒐᓛᑐᐃᓐᓇᖓ,” ᐅᖃᖅᑐᖅ ᑕᐅᑐᓐᖏ. “ᓄᓇᕗᒻᒥ ᓇᖕᒥᓂᖃᖅᑐᓄᑦ ᐃᑲᔪᑎᓄᑦ ᐊᑐᐊᒐᑦ ᐱᓇᓱᐊᖅᑕᐅᒋᐊᓕᖕᓄᑦ ᑲᔪᓯᑎᑕᐅᒍᑎᒃᓴᒫᓕᐊᖑᓯᒪᒻᒪᑦ ᐃᓛᒃᑯᑦ 24-ᒥᒃ. ᑕᒪᐃᓐᓄᑦ ᒐᕙᒪᑦ ᐱᓕᕆᕝᕕᖏᓐᓄᑦ ᐊᒻᒪᓗ ᑎᒥᖁᑎᖏᓄᑦ ᒪᓕᒐᑦᓴᖅ ᐊᑐᖅᑕᐅᔭᕆᐊᖃᖅᑎᑕᐅᓪᓗᓂ. ᐅᓂᒃᑳᓃᑦᑐᖅ ᑲᔪᓯᑎᑕᐅᓯᒪᓐᖏᓯᐊᕐᓂᖓᓂᒃ, ᐊᒻᒪᓗ ᐊᓯᔾᔨᕆᐊᓕᒃ ᐃᕐᖐᓐᓇᖅ.”
ᕗᐊᑕᓐ-ᓛᑦᓄ-ᔫᕙᐃᔅ ᐅᓂᒃᑳᖓᓃᑦᑐᓂ ᓇᓗᓇᐃᖅᑕᐅᓯᒪᓚᐅᖅᑐᖅ ᖁᓪᓕᖅ ᐊᐅᓚᔪᓐᓇᐅᑎᓕᕆᔨᒃᑯᑦ ᑯᐊᐳᕇᓴᖓᓄᑦ ᒪᓕᑦᑕᐅᓯᒪᓐᖏᓐᓂᖓᓂᒃ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᐊᑐᐊᒐᖅ, ᑐᑭᓯᓇᑦᓯᐊᕋᓗᐊᖅᑎᓪᓗᒍ ᒪᓕᒃᑕᐅᒋᐊᓕᒃ. ᕗᐊᑕᓐ-ᓛᑦᓄ-ᔫᕙᐃᔅ ᐅᓂᒃᑳᖓᓃᒻᒥᔪᖅ ᐊᓯᔾᔨᕆᐊᖃᕋᓱᒋᔭᐅᓂᖓ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐃᑲᔫᑎᓄᑦ ᐊᑭᑦᑐᕋᐅᑎᓄᑦ ᐋᖅᑭᒋᐊᕈᑏᑦ, ᓇᖕᒥᓂᕆᔭᐅᔪᑦ ᑐᓂᔭᐅᔪᓐᓇᖅᑎᑕᐅᓗᑎᒃ ᐊᑭᑦᑐᕋᐅᑎᓂᒃᑯᑦ ᐋᖅᑭᒋᐊᕈᑎᒃᓴᓂᒃ ᑎᑭᐅᑎᓯᒪᔪᓂᒃ 21 ᐳᓴᓐ ᐊᑭᑦᑐᕋᐅᑎᒍᑎᓄᑦ ᐅᕝᕙᓘᓐᓃᑦ ᑐᒃᓯᕋᐅᑎᓄᑦ. ᐊᓯᔾᔨᖅᑕᐅᖏᑉᐸᑦ 21 ᐳᓴᓐ ᑭᒡᓕᓕᐊᖑᓯᒪᔪᖅ ᐋᖅᑭᒋᐊᕈᑎᓄᑦ, ᕗᐊᑕᓐ-ᓛᑦᓄ-ᔫᕙᐃᔅ ᐋᖅᑭᒋᐊᕆᖁᔨᔪᖅ ᐋᖅᑭᒋᐊᕈᑕᐅᕙᑦᑐᓂᒃ ᐃᑲᔫᑎᒃᓴᐅᑲᓐᓂᕋᔭᕐᒪᑦ ᐃᓄᐃᑦ ᓇᖕᒥᓂᖁᑎᖏᓐᓄᑦ ᓴᖅᑭᐅᒪᑎᑦᓯᑦᓯᐊᖅᑐᓄᑦ ᐱᕚᓪᓕᑎᑦᓯᓯᒪᓂᖏᓐᓂᒃ ᐃᓄᐃᑦ-ᓇᖕᒥᓂᖁᑎᒋᔭᖏᓐᓂᒃ.
ᐅᓂᒃᑳᑦ ᐊᑐᐃᓐᓇᐅᔪᑦ ᑐᓐᖓᕕᒃᑯᑦ ᐃᑭᐊᖅᑭᕕᖓᓂ. ᑐᓐᖓᕕᒃᑯᑦ ᐃᓚᒋᔭᐅᔪᓂᒃ ᐃᓄᓕᒫᓂᒃ ᐊᒻᒪᓗ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐅᖃᓕᒫᖃᑦᑕᖁᔨᔪᑦ ᕿᒥᕐᕈᓇᓪᓗᑎᒃ ᐊᒻᒪᓗ ᓂᓪᓕᕐᕕᖃᖁᔨᓪᓗᑎᒃ ᐅᓂᒃᑳᓂᒃ ᓅᕙᐃᒻᕙ 30, 2013 ᑎᑭᒐᓱᐊᕐᓂᖓᓂ. ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓄᑦ ᑲᑎᒪᔨᕋᓛᑦ ᐃᓱᒪᒃᓴᕐᓯᐅᕈᑎᖃᕈᒫᖅᑐᑦ ᐅᖃᐅᓯᐅᓯᒪᔪᓂᒃ ᑭᖑᓪᓕᕐᐹᒥ ᐊᑐᓕᖁᔨᔾᔪᑎᓕᐅᓕᕈᑎᒃ ᑐᓐᖓᕕᒃᑯᓐᓄᑦ ᐊᒻᒪᓗ ᓄᓇᕗᑦ ᒐᕙᒪᖓᓄᑦ. ᐅᖃᐅᓯᒃᓴᑎᑦ ᑐᓂᒍᓐᓇᖅᑕᑎᑦ ᓄᓇᕗᒻᒥ ᓇᖕᒥᓂᖃᖅᑐᑦ ᐃᑲᔫᑎᓄᑦ ᕿᒥᕐᕈᔩᑦ ᑲᑎᒪᔨᕋᓛᖏᓐᓄᑦ ᑎᑎᖅᑲᒃᑯᑦ, ᓱᒃᑲᔪᒃᑯᑦ ᐃᕐᖐᓐᓈᕈᑎᒃᑯᓘᓐᓃᑦ:
ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎᓂᒃ ᕿᒥᕐᕈᔩᑦ
ᑎᑎᖅᑲᖃᐅᑖ 638, ᐃᖃᓗᐃᑦ, ᓄᓇᕗᑦ X0A 0H0
ᓱᒃᑲᔪᒃᑰᕈᑖ: 867-975-4949
