Nunavut Tunngavik Timinga Angayukaak Cathy Towtongie ublumi tunngahukuyait tuniyainik NNImi Inikpiakhimayuk Ihivgiugutait makpigaat Nunavumi Maligaliuktinut. Ihivgiugutait makpigaat takupkaiyut piyumayait akhut aalanguklugit NNImi Pikuyait ovalo atanguyait.
“NNImi Pikuyait pinahuakhimayut iniktiklugit Nunavumi Nunataagutit Angigutaanut Ilangani 24, kihimi tuhakhimayunga amigaitunit Inuit busniit atutiangituk ovalo aalanguktukhat. Piyumayugut naunaiyakhimayumik aalangugutikhait mungiyaanganik ovalo pikuyait tamaat,” ukaktuk Towtongie.
Towtongie ukakhimayuk malikhugit autlaktitjutainik malguuk tuhaktakhat: inminik ihivgiuktut NNImi Pikuyait akigaktuiyinit hanahimayait Borden-Ladner-Gervais; ovalo tuhaktakhat NNImi Ihivgiuktit Katimayigalaat. Ihivgiuktit Katimayigalaat ilaukatauyut NTIkut-GNkut katimayigalaat nani BLGkut tuhaktakhat paknaiyakhimayait. Towtongie ukaktuk tuhaktakhat takupkaiyut NNImi Pikuyait akhut ikpinaktut Inuit Busniinut kihimi akiit mikiyut kavamatkunut atugiaganik.
“Akigaktuktait tuhakataktavut akiit iniktigutikhainik NNImi Pikuyait angilipkakpaktait akiit kavamatkunut, kihimi hamna ukatiangitut ovalo ikuyut. Ihivgiukhimayut pihimayait BLGkut ovalo pipkaikuhimayait NNImi Ihivgiuktit Katimayigalaat takupkaiyut ilaukatautjutait akiit iniktigiaganik ikpinaktut kavamatkut pikuyait mikiyut,” ukaktuk Towtongie. “NNImi Pikuyait pinahuaktut pihimayait Ilangani 24. Tamamik kavamatkut munagiyit ovalo havakviit maliniaktait hapkoa. Tuhaktakhtat takupkaiyut hamna pingitut ovalo aalanguktukhat kilamik.”
BLGkut tuhaktakhat nalvaakhimayut Qulliq Kuliligiyit Kuapurisitkut maliyuitait NNImi Pikuyait, ilaa, takukhauyut piyukhat. BLGkut tuhaktakhat pitkuhimayut aalangugutikhait NNImi uktugutikhait keeliniit, ataani busniit pilaaniaktut tamamik aatjikutaulutik ihuakhautikhait 21%mut uktugutainik ovaluniit pinahuaktainik. Aalanguktingitkumik 21%mik uktugutikhait ihuakhaitjutainik keeliniit, BLGkut uktukuyut ihuakhaklugit ihuakhagutait tuniyaanganik ikayugutikhainik Inuit busniit takupkaiyut amigainahuagutainik Inuit inminiigutait.
Tuhaktakhat takulaaktut NTIkut kagitauyakut takulviani. NTIkut pitkuyut ilaukatauyut Inunut ovalo Nunavumi busniit ihivgiuklugit ovalo ukaklugit tuhaktakhat tikitinagu November 30mi, 2013. NNImi Katimayigalaat ihumaginiaktait hapkoa ukautait piligumik iniktigutikhait pitkuyakhainik NTIkunut ovalo GNkunut. Ukaktait tunilaaktut NNImi Ihivgiuktit Katimayigalaat titigakut, sukatukut ovaluniit kagitauyakut hamunga:
NNImi Ihivgiuktit,
Titigakvia: P.O. Box 638, Iqaluit, NU X0A 0H0
Sukatukut: 867-975-4949
