(ᒪᐃ 13, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᔪᐃᓐᓈᓖᑦ ᓄᓇᕗᑦ ᒐᕙᒪᒃᑯᑦ (GN) ᐋᖅᑮᖁᓪᓗᒋᑦ ᐊᓯᖅᑯᕝᕕᖃᙱᑦᑐᒥᒃ ᐊᑭᓕᖅᓱᖅᑕᐅᒍᓐᓇᖁᓪᓗᒋᑦ ᐋᓐᓂᐊᓂᕐᒧᑦ ᓄᖅᑲᖓᔪᑦ ᐋᓐᓂᐊᒧᑦ ᒪᓂᒪᑎᑕᐅᖁᓪᓗᒍ ᐃᖅᑲᓇᐃᔭᖅᑎᓕᒫᑦᓯᐊᓄᑦ ᓄᓇᕗᒻᒥ.

ᑐᙵᕕᒃᑯᑦ ᐃᓱᒫᓘᑎᓖᑦ ᐅᓄᖅᓯᕙᓪᓕᐊᑐᐃᓐᓇᕐᓂᖏᓐᓂᒃ ᓄᕙᔾᔪᐊᕐᓇᓖᑦ−19-ᒥᒃ ᓄᓇᕗᒻᒥ ᐊᒻᒪᓗ ᐊᒃᑐᐊᓂᖃᑐᐃᓐᓇᕆᐊᖃᕐᓂᖏᓐᓂᒃ ᐃᖅᑲᓇᐃᔭᕆᐊᓕᓪᓚᑦᑖᓄᑦ ᐱᓕᕆᐊᒥᓂᒃ. ᓄᓇᕗᑦ ᐊᓯᖅᑯᕝᕕᖃᙱᑦᑐᒥᒃ ᐊᑭᓕᖅᓱᖅᑕᐅᔾᔪᑎᖃᙱᑦᑐᖅ ᐋᓐᓂᐊᓂᕐᒧᑦ ᐃᖅᑲᓇᐃᔭᖅᑎᓄᑦ, ᐊᑭᓕᖅᓱᖅᑕᐅᔾᔪᑏᑦ ᐋᓐᓂᐊᓂᕐᒧᑦ ᑭᒡᓕᖃᕐᒪᑕ ᐅᕝᕙᓘᓐᓃᑦ ᐱᖃᙱᓯᐊᒻᒪᕆᑦᑐᑦ ᐅᓄᖅᑐᓂ ᓇᖕᒥᓂᖁᑕᐅᔪᓂ−ᐱᓕᕆᕝᕕᓐᓂ ᐃᖅᑲᓇᐃᔭᕆᐊᖃᓪᓚᑖᖅᑐᓄᑦ ᐱᓕᕆᐊᒥᓂᒃ, ᐊᒻᒪᓗ ᑕᒪᓐᓇ ᐱᓗᖅᑯᑕᐅᑐᐃᓐᓇᕆᐊᓕᒃ ᓯᐊᒻᒪᐸᓪᓕᐊᓂᖓᓄᑦ ᐊᐃᑦᑐᕐᓘᑎᓂᕐᒧᑦ ᐋᓐᓂᐊᒥ. ᐃᖅᑲᓇᐃᔭᕆᐊᖃᓪᓚᑖᖅᑐᑦ ᐱᓕᕆᐊᒥᓂᒃ, ᓇᓂᐅᒐᓗᐊᖅᐸᑦ ᐱᓕᕆᕝᕕᖓ, ᑐᓂᔭᐅᖃᑦᑕᕆᐊᓖᑦ ᓈᖕᒪᑦᑐᓂᒃ ᐃᑲᔫᑎᓂᒃ ᓲᕐᓗ ᐋᓐᓂᐊᓂᕐᒧᑦ ᓄᖅᑲᖓᔾᔪᑎᓂᒃ ᐊᖏᕐᕋᖅᓯᒪᖁᓪᓗᒋᑦ ᐋᓐᓂᐊᓂᕐᒥᓂ ᐅᕝᕙᓘᓐᓃᑦ ᐃᓄᑐᐊᒃᑯᕕᒻᒦᑎᒋᐊᖃᕐᓂᕐᒧᑦ ᓇᒧᙶᔭᙱᓂᕐᒥᒃ.

ᐊᖓᔪᖅᑳᖅ ᑰᑦᑎᖅ ᐅᖃᓚᐅᖅᑐᖅ “ᐊᕐᕌᒍᒥ ᓄᓇᕐᔪᐊᒥ ᖃᓂᒪᓐᓇᖅ ᓴᖅᑭᖅᓯᒪᓕᖅᑎᓪᓗᒍ ᐊᒻᒪᓗ ᓈᖕᒪᖏᑦᑐᖅ ᐃᖅᑲᓇᐃᔭᖅᑏᑦ ᐋᓐᓂᐊᔪᑦ ᐊᑭᓕᖅᓱᖅᑕᐅᔾᔮᖏᓐᓂᕐᒧᑦ ᐊᖏᕐᕋᖅᓯᒪᑐᐃᓐᓇᖃᑦᑕᖏᑦᑐᑦ. ᐃᑲᔪᖅᑎᒌᒋᐊᖃᖅᑐᒍᑦ ᐅᕙᒍᑦ ᓇᖕᒥᓂᖅ ᐅᓇᑕᕐᓗᒍ ᑕᒪᓐᓇ ᓄᕙᔾᔪᐊᕐᓇᖅ−19 ᐊᒻᒪᓗ ᑕᒪᐅᓇ ᐅᑉᐱᕆᔭᕗᑦ ᓄᓇᕗᑦ ᒐᕙᒪᒃᑯᑦ ᐊᑑᑎᓕᒻᒥᒃ ᐃᑲᔫᑎᒍᓐᓇᖅᑐᑦ ᒫᓐᓇᐅᓂᖓᓂ ᐊᒻᒪᓗ ᐊᒃᑐᐃᓂᖃᖅᓯᒪᐃᓐᓇᓂᐊᖅᑐᒥᒃ ᓯᕗᓂᑦᑎᓐᓂ ᑭᖑᕚᕆᓂᐊᖅᑕᑎᓐᓄᑦ.”

ᑕᒪᓐᓇ ᐱᓕᕆᐊᖑᒍᓐᓇᖅᑐᖅ ᑲᔪᓯᑎᑦᓯᓗᑎᒃ ᒪᓕᒐᑦᓴᒥᒃ ᓱᖅᑯᕈᑕᐅᓂᐊᖅᑐᒥᒃ ᒥᑭᓂᖅᐹᖑᒍᓐᓇᖅᑐᒥᒃ ᐊᑭᓕᖅᓱᖅᑕᐅᓂᕐᒥᒃ ᐋᓐᓂᐊᓂᕐᒧᑦ ᓄᖅᑲᖓᓂᕐᒥᒃ ᒪᓂᒪᑎᑕᐅᓗᓂ ᐃᖅᑲᓇᐃᔭᖅᑎᓕᒫᑦᓯᐊᓄᑦ ᓄᓇᕗᒻᒥ ᐊᒻᒪᓗ/ᐅᕝᕙᓘᓐᓃᑦ ᒪᓂᒪᑎᑕᐅᓗᓂ ᐊᑭᓕᖅᓱᖅᑕᐅᓂᖅ ᐋᓐᓂᐊᓂᕐᒧᑦ ᓄᖅᑲᖓᓂᕐᒧᑦ ᐅᑎᕐᕕᐅᓂᕐᒧᑦ ᐃᑲᔫᑎᒥᒃ ᐃᖅᑲᓇᐃᔭᕐᕕᓐᓄᑦ ᐊᔾᔨᐸᓗᐊᓂᒃ ᒪᓂᒪᑎᑕᐅᔪᒥᒃ ᔫᑳᓐᒥ.

ᑕᒪᓐᓇ ᐊᑲᐅᙱᓪᓕᐅᕈᑕᐅᔪᖅ ᑭᒡᓕᖃᖅᑎᑕᐅᑎᓐᓇᒍ ᐊᓯᖏᓐᓂ ᐊᐅᓚᑦᓯᒍᓐᓇᕐᕕᒋᔭᐅᔪᓂ, ᑐᙵᕕᒃᑯᑦ ᖁᓚᙱᑦᑐᑦ ᑕᒪᓐᓇ ᓄᓇᕗᒻᒥ ᑕᑯᑎᑦᓯᔾᔪᑕᐅᒍᓐᓇᖅᑐᖅ ᓯᕗᓕᕐᓂᕐᒥᒃ ᑲᓇᑕᓕᒫᒥ.

ᑐᑭᓯᒋᐊᒃᑲᓂᕐᕕᒃᓴᖅ:

ᑭᐅᕆᓐ ᕙᓚᐅᕋᑎ

ᑐᑭᒧᐊᒃᑎᑦᑎᔨᒧᑦ ᑭᖑᕝᕕᐅᑎᓯᒪᔪᖅ ᑐᓴᐅᒪᔾᔪᑎᓕᕆᔨᒃᑯᓐᓂ

ᓄᓇᕗᑦ ᑐᙵᕕᒃ ᑎᒥᖓ

ᐅᖄᓚᐅᑖ: (867) 975-4900