ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᐃᑲᔪᖅᑐᐃᕗᑦ ᕿᒥᕐᕈᔭᐅᑦᑕᐅᑎᒋᔭᕆᐊᖃᕐᓂᖏᓐᓂᒃ ᒐᕙᒪᒃᑯᑦ ᑳᓐᑐᕌᒃᑖᖅᑎᑦᓯᕙᓐᓂᖏᓐᓄᑦ

ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᙱ ᓇᓗᓇᐃᖅᓯᔪᖅ ᐃᑲᔪᖅᑐᐃᒻᒪᑕ ᕿᒥᕐᕈᔭᐅᔾᑦᑕᐅᑎᒋᔭᕆᐊᖃᕐᓂᖏᓐᓂᒃ ᓄᓇᕗᑦ ᒐᕙᒪᒃᑯᑦ ᑳᓐᑐᕌᒃᑖᖅᑎᑦᓯᕙᓐᓂᖏᓐᓄᑦ ᐊᑐᐊᒐᖓᓂᒃ.

“ᓄᓇᕗᑦ ᑐᙵᕕᒃᑯᑦ ᐋᔩᕋᕈᑎᖃᓚᐅᖅᓯᒪᖕᒪᑕ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎ (NNI) ᐊᑐᐊᒐᖓᓂᒃ ᐃᓄᐃᑦ ᓇᖕᒥᓂᖁᑎᒋᔭᖏᑦ ᐱᓇᓱᐊᖃᑕᐅᔪᓐᓇᑦᓯᐊᖁᓪᓗᒋᑦ ᓄᓇᕗᒻᒥ ᐱᕙᓪᓕᐊᓂᐅᔪᒧᑦ,” ᐅᖃᖅᑐᖅ ᑕᐅᑐᙱ. “ᑭᓯᐊᓂ, ᑕᑯᖃᑦᑕᕋᑦᑕ ᐊᔾᔨᒌᖏᑦᑐᓂᒃ ᐊᑐᖅᑎᓪᓗᒋᑦ ᑳᓐᓇᕌᒃᑖᖅᑎᑦᓯᓂᕐᒧᑦ, ᑕᒪᓐᓇᓕ ᐱᓕᕆᓂᕐᒧᑦ ᐱᐅᙱᑦᑐᓂ. ᓂᕆᐅᒃᐳᒍᑦ ᐱᓕᕆᐊᖃᕐᓂᐊᓂᑦᑎᓐᓂᒃ ᓄᓇᕗᑦ ᒐᕙᒪᒃᑯᓐᓂ ᐋᖅᑮᖃᑎᒋᓗᒋᑦ ᐱᓕᕆᐊᖑᔪᓄᑦ ᐋᖅᑭᒃᓯᒪᔾᔪᑎᒃᓂ, ᑮᓇᐅᔭᖅᑐᕈᑎᒃᓴᓂᒃ ᓈᒻᒪᓈᖅᓯᒪᓗᒋᑦ ᑖᒃᓱᒧᖓ ᐱᒻᒪᕆᐅᔪᒧᑦ. ᐋᖅᑭᒋᐊᕆᐊᖃᓕᕐᒪᑕ ᐊᑲᐅᙱᓕᐅᕈᑕᐅᕙᒃᑐᑦ.”

ᐊᒻᒪᓗ, ᑐᙵᕕᒃᑯᑦ ᕿᒥᕐᕈᓂᐊᕐᒥᔪᑦ ᐃᓄᖕᓄᑦ ᓇᖕᒥᓂᖁᑎᒋᔭᐅᔪᑦ ᑎᑎᕋᖅᑕᐅᓯᒪᔪᖁᑎᖏᓐᓂᒃ.

ᑕᐅᑐᙱ ᐅᖃᕆᐊᓯᒪᕗᖅ ᓄᓇᕗᑦ ᓯᕗᓕᖅᑎᐊ ᐄᕙ ᐋᕆᐊᒃ ᓇᓗᓇᐃᖅᓯᓚᐅᖅᑎᓪᓗᒍ ᕿᒥᕐᕈᓂᖃᕐᓂᐊᕐᓂᖏᓐᓂᒃ ᐅᓪᓗᒥᐅᖃᐅᔪᖅ ᒪᓕᒐᓕᐅᕐᕕᖕᒥ. ᑐᙵᕕᒃᑯᑦ ᐃᓚᐅᖏᓐᓇᓂᐊᖅᐳᑦ ᕿᒥᕐᕈᓂᐅᔪᒥ ᒪᓕᒃᖢᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᐅᑉ ᐃᓛᒃᑰᖓ 24.3.4

ᐱᓇᓱᐊᕈᓯᖅ ᐱᒋᐊᓕᓵᖅᑎᓪᓗᒍ, ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᒻᒪᕆᖓ ᓴᖅᑮᓚᐅᕐᒪᑦ ᐅᓂᒃᑳᖓᓂ ᒪᓕᒐᓕᐅᕐᕕᖕᒥ, ᐅᓂᒃᑳᓕᐊᕆᓯᒪᔪᖅ ᓄᓇᕗᑦ ᒐᕙᒪᒃᑯᑦ ᑳᓐᑐᕌᒃᑖᖅᑎᑦᑎᖃᑦᑕᕐᓂᖏᓐᓄᑦ. ᑖᓐᓇ ᐅᓂᒃᑳᖅ ᐅᖃᖅᓯᒪᖕᒪᑦ ᑳᓐᑐᕌᒃᑖᖅᑎᑦᓯᓂᕐᒧᑦ ᐋᖅᑭᒃᓯᒪᔾᔪᑕᐅᔪᑦ ᓈᒻᒪᓈᖅᓯᒪᓂᖏᓐᓂᒃ, ᑭᓯᐊᓂ ᐃᓱᒫᓘᑎᐅᓯᒪᔪᑦ ᑐᑭᓯᓂᕐᓗᒃᑕᐅᕙᓐᓂᖏᑦ ᐊᑐᐊᒐᐅᑉ, ᖃᐅᔨᒪᔭᐅᓐᖏᓗᐊᖅᑐᓂ, ᐃᓕᓐᓂᐊᕈᑕᐅᓯᒪᙱᓗᐊᖅᑐᓂ ᐊᒻᒪ ᓄᓇᕗᑦ ᒐᕙᒪᒃᑯᑦ ᑳᓐᑐᕌᒃᑖᖅᑎᑦᓯᖃᑦᑕᓂᕐᒧᑦ ᐃᖅᑲᓇᐃᔭᖅᑎᖏᑕ ᐊᓯᔾᔨᖅᑕᓗᐊᖃᑦᑕᕐᓂᖏᓐᓄᑦ.

“ᑐᙵᕕᒃᑯᑦ ᐋᔩᕋᕈᑎᖃᓚᐅᖅᓯᒪᖕᒪᑕ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᑐᐊᒐᖓᓂᒃ ᐊᑐᓕᖅᑎᑕᐅᕙᓪᓕᐊᖁᓪᓗᒍ ᓄᓇᑖᕈᑎᐅᑉ ᐃᓛᒃᑰᖓ 24. ᐊᑐᖅᑕᐅᑦᓯᐊᖏᓐᓂᖓ ᐊᑐᐊᒐᐅᑉ ᑐᑭᖃᖅᐳᖅ ᓄᓇᕗᑦ ᒐᕙᒪᒃᑯᑦ ᐱᓕᕆᐊᒃᓴᖏᓐᓂᒃ ᑲᒪᑦᓯᐊᖏᓐᓂᖏᑦ ᒪᓕᒃᖢᒍ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ,” ᐅᖃᖅᑐᖅ ᑕᐅᑐᙱ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: