ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᓇᓗᓇᐃᕐᓯᒍᑎᖏᑦ NIRB−ᑯᑦ ᓄᖅᑲᕐᓂᕆᓚᐅᖅᑕᖓᓄᑦ

(ᑏᓰᒻᕙ 4, 2019, ᐃᖃᓗᐃᑦ) ᓄᓇᕗᑦ ᑐᓐᖓᕕᒃ ᑎᒥᖓ (ᑐᓐᖓᕕᒃ) ᐱᓂᐊᕐᓂᕋᐅᑎᖓ ᓴᐳᔾᔨᓂᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓄᓇᕗᑦ ᐊᖏᕈᑎᖏᑎᒍᑦ. ᐃᓄᐃᑦ ᓇᓗᓇᐃᕐᓯᒪᑦᓯᐊᖅᑐᓂᒃ ᐱᔪᓐᓇᐅᑎᓖᑦ ᖃᐅᔨᑲᖅᑕᐅᒋᐊᖃᕐᓂᕐᒧᑦ ᓄᓇᒦᓐᖔᖅᑐᓂᒃ ᐱᕙᓪᓕᐊᑎᑦᓯᓂᕐᒥᒃ ᓄᓇᕗᒻᒥ. ᐃᓛᒃ, ᑖᓐᓇ ᐱᔾᔪᑕᐅᔪᖅ ᓄᓇᕗᑦ ᐊᖏᕈᑎᖏᑦ ᓴᖅᑭᖅᑕᐅᔾᔪᑎᒋᓯᒪᔭᖓ.

ᐱᔭᕆᐊᑐᓚᐅᖅᑐᖅ ᐃᓱᒪᓕᐅᕈᑎᒋᓇᓱᐊᕆᐊᖓ ᑐᓐᖓᕕᒃᑯᓐᓄᑦ ᓴᖅᑮᓂᕐᒥᒃ ᐱᖁᔨᕗᖔᕈᒻᒥᒃ ᓄᖅᑲᖁᓪᓗᒋᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ (NIRB) ᓈᓚᖕᓂᖓ ᑲᒪᒋᔭᐅᓂᖓᑕ II ᐹᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᑎᒃᑯᑦ ᑯᐊᐳᕇᓴᓐ ᓄᓘᔮᓐᓂ ᐱᓕᕆᐊᖑᒍᒪᔪᒧᑦ ᑕᖅᑭᓂᒃ 9−ᓂᒃ ᑎᑭᓪᓗᒍ ᐊᕐᕌᒍ ᐊᑕᐅᓯᖅ, ᐅᑉᕙᓘᓐᓃᑦ NIRB−ᑯᑦ ᓈᖕᒪᒐᓱᕆᔭᖓᓂᒃ. ᑐᑭᓯᓇᕐᓯᑎᒋᐊᕐᓗᒍ, ᑐᓐᖓᕕᒃᑯᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᐃᓕᓴᕐᓯᓚᐅᖅᑐᑦ NIRB−ᑯᑦ ᐋᖅᑭᑦᓯᒌᖅᑐᒥᓂᐅᒋᐊᖏᑦ ᐃᒫᒃ, ᐱᕕᒃᓴᕆᔭᐅᔪᖅ ᐱᔾᔪᑕᐅᓪᓗᓂ ᑖᑦᓱᒧᖓ ᓈᓚᖕᓂᕐᒧᑦ, ᑲᑎᒻᒪᓗᑎᒃ ᓈᓚᓐᓃᑦ ᐃᓱᕐᕆᐅᑎᓅᖓᔪᓂᒃ ᑲᔪᓯᒋᐊᖃᕐᓂᐊᓕᖅᑐᑦ ᐅᕙᑦᓯᐊᕈᒋᐊᒃᑲᓐᓂᖅ, ᒫᓐᓇᒫᒃ ᓯᕗᓂᑦᑎᓐᓂ, ᒪᓕᓪᓗᒋᑦ ᒐᕙᒪᑐᖃᒃᑯᑦ ᑮᓇᐅᔭᓖᓂᐊᕐᓂᖏᑦ ᐊᒻᒪᓗ ᐊᑐᕆᐊᓕᓐᓂᒃ.

ᑐᓐᖓᕕᒃᑯᑦ ᖁᔭᓕᔪᑦ ᑖᑦᓱᒧᖓ ᐊᐅᓚᑦᓯᓂᕆᓚᐅᖅᑕᖏᓐᓂᒃ NIRB ᐊᐅᓚᓂᐅᔭᕆᐊᓕᑦᑎᒍᑦ ᐋᖅᑭᑦᓯᓯᒪᓇᓱᐊᖅᑐᑎᒃ ᓈᖕᒪᑦᑐᒥᒃ ᐊᒻᒪᓗ ᓱᑲᖓᓗᐊᓐᖏᑦᑐᒃᑯᑦ, ᐱᖕᒪᕆᐅᔪᓂᒃ ᐊᐅᓚᓂᐅᒋᐊᓕᓐᓂᒃ ᐊᑦᓱᕈᓐᓇᑐᒃᑰᕈᑎᖃᖅᑎᓪᓗᒋᑦ ᕿᒥᕐᕈᓂᕐᒥᒃ ᐊᒃᑐᐊᔪᓂᒃ ᑐᓴᐅᒪᔾᔪᑎᓂᒃ ᑕᐃᑲᓂ ᑐᓂᔭᐅᓯᒪᓚᐅᖅᑐᓂᒃ. ᑕᒪᓐᓇ ᓈᖕᒪᑦᑐᖅ ᓱᑲᖓᓗᐊᕋᓂ NIRB ᐊᐅᓚᑦᓯᒋᐊᖃᕐᓂᖓ ᓄᓇᕗᑦ ᐊᖏᕈᑎᖏᑎᒍᑦ ᐊᒻᒪᓗ ᓄᓇᕗᒻᒥ ᐸᕐᓇᐃᔨᒃᑯᑦ ᐊᒻᒪᓗ ᐱᓕᕆᐊᒃᓴᓂᒃ ᕿᒥᕐᕈᓂᕐᒧᑦ ᐱᖁᔭᖅ. ᑭᓯᐊᓂᓕ, ᐃᓱᕐᕆᐅᑎᓕᕆᓂᕐᒧᑦ ᓈᓚᓐᓂᖃᖅᑎᓪᓗᒍ, ᑐᕌᒐᕆᔭᐅᔪᒧᑦ ᓈᖕᒪᒍᓐᓃᕈᑕᐅᑐᐃᓐᓇᕆᐊᓕᒃ ᓴᖅᑭᐸᓪᓕᐊᑐᐃᓐᓇᓕᓚᐅᖅᑐᖅ ᓈᖕᒪᓈᕈᓐᓃᐸᓪᓕᐊᕐᓱᓂᓗ, ᐃᓚᒋᔭᐅᓪᓗᓂ ᐱᕕᒃᓴᖃᓗᐊᓐᖏᓂᕐᒧᑦ ᑐᒃᓯᕋᕐᓯᒪᔪᑦ ᑭᐅᑦᑕᓪᓗᐊᖃᑦᑕᕈᓐᓃᑎᓪᓗᒋᑦ ᐃᓱᕐᕆᐅᑎᓅᖓᔪᓂᒃ ᐊᐱᖅᑯᑎᓂᒃ ᐊᒻᒪᓗ ᐊᐱᕆᓕᖅᑭᖅᑖᖃᑦᑕᓕᖅᑐᑎᒃ ᑖᒃᑯᓂᖓᑦᓴᐃᓐᓇᖅ ᓈᖕᒪᒐᓗᐊᕐᖔᑕ ᑐᓴᐅᒪᔾᔪᑎᑦ ᐊᑐᐃᓐᓇᐅᔪᑦ, ᑕᐃᑲᓂ, ᐃᓄᒃᑎᑐᑦ. ᑖᒃᑯᐊ ᐊᑲᐅᓐᖏᓪᓕᐅᕈᑏᑦ ᐊᐅᓚᓂᖓᓂ ᓴᖅᑭᖏᑦᑕᖏᑦ ᑲᑎᒪᔩᑦ, ᐅᑉᕙᓘᓐᓃᑦ ᑐᒃᓯᕋᕐᓯᒪᔪᑦ. ᓴᖅᑭᖅᑐᐃᓪᓗ ᑐᓐᖓᕕᒋᔭᐅᒋᐊᓖᑦ ᐱᐊᓂᒃᓯᒪᓐᖏᓐᓂᖏᓐᓄᑦ ᖃᐅᔨᓴᕈᑎᒥᓂᕐᓂᒃ ᑐᓴᖅᑎᑦᓯᒍᑕᐅᒋᐊᓖᑦ ᐊᖏᔪᕐᔪᐊᕌᓘᓚᐅᕐᒪᑦ ᐱᓇᓱᐊᒐᐅᔪᒧᑦ ᐋᖅᑭᑦᑕᐅᓯᒪᓐᖏᑦᑐᑦ.

ᑐᓐᖓᕕᒃᑯᑦ ᐃᓕᓴᕐᓯᓚᐅᖅᑐᖅ ᐸᕐᓇᑕᐅᓯᒪᓚᐅᖅᑐᑦ ᓄᓇᓕᓐᓂ ᑲᑎᒪᒍᑎᒃᓴᐅᓪᓗᑎᒃ ᒥᑦᑎᒪᑕᓕᒻᒥ. ᐃᖃᓗᓐᓂ ᓈᓚᖕᓂᖅ ᐃᓚᐃᓐᓇᒐᓛᑯᓗᖏᓐᓂᒃ ᓈᓚᖕᓂᐅᓚᐅᖅᑐᖅ ᐃᓱᕐᕆᐅᑎᓕᕆᓂᕐᒧᑦ. ᐅᓄᖅᑐᑦ ᑐᒃᓯᕋᐅᓯᐅᕐᓯᒪᔪᑦ ᐊᐱᕆᒍᓐᓇᕐᓯᒪᓐᖏᑦᑐᑦ ᐊᑕᖏᖅᑐᒥᒃ ᐱᓇᓱᐊᒐᑦᓴᒥᒃ ᐊᐱᖅᑯᑎᒥᓂᒃ ᐊᓪᓛᑦ ᐊᒥᓲᓗᐊᓐᖏᑦᑐᓄᑦ ᑲᒪᒋᔭᐅᔪᓄᑦ, ᐊᓪᓛᑦ ᐱᕕᒃᓴᖃᓚᐅᓐᖏᑦᑐᑦ ᓇᖕᒥᓂᖅ ᐃᓱᕐᕆᐅᑎᓅᖓᔪᓂᒃ ᐅᓂᒃᑳᓂᕐᒥᒃ. ᐱᔾᔪᑎᖃᕆᐊᓕᒃ ᓄᓇᓕᓐᓂ ᑲᑎᒻᒪᓂᖅ ᓄᓇᓖᑦ ᐅᖃᕈᓐᓇᕐᕕᖃᖁᓪᓗᒋᑦ ᐊᐱᖅᑯᑎᒥᓐᓂᒃ ᓱᖅᑯᐃᖅᑕᐅᓯᒪᔪᓃᓐᖔᖅᑐᓂᒃ, ᒫᓐᓇ ᓱᖅᑯᐃᒪᓇᑦᓯᐊᓕᖅᑐᓂᒃ ᐱᐊᓂᒃᓯᒪᓐᖏᓐᓂᖏᓐᓂᒃ.

ᑕᐃᒪᐃᒍᒪᓕᓚᐅᕐᒪᑕ ᐱᓇᓱᐊᖃᑎᒌᑦᑐᓕᒫᑦ ᐊᒻᒪᓗ ᑲᑎᒪᔩᑦ ᓱᖅᑯᐃᖅᑕᐅᓯᒪᓗᓂ ᓱᓕᓂᖓᓂᒃ ᐊᑕᖏᖅᑐᖅ ᐊᒻᒪᓗ ᕿᒥᕐᕈᔭᐅᑦᓯᐊᕐᓗᓂ, ᐃᓚᓕᐅᔾᔭᐅᓯᒪᓂᖓᒍᑦ ᐊᑕᖏᖅᑐᒥᒃ ᐱᓇᓱᐊᒐᑦᓴᒥᒃ ᐊᑐᐃᓐᓇᐅᔪᒥᒃ ᓱᖅᑯᐃᖅᑕᐅᓯᒪᔪᒥᒃ. ᑕᒪᓐᓇ ᓴᓐᖏᓂᖃᕆᐊᓕᒃ ᐊᒻᒪᓗ ᓈᖕᒪᑦᑐᒥᒃ ᐱᓇᓱᐊᒐᑦᓴᒥᒃ ᐃᓄᐃᑦ ᓄᓇᓕᖏᓐᓄᑦ ᑐᑭᓯᓇᑦᓯᐊᕐᓗᓂ ᑐᒃᓯᕋᐅᑦ
ᐊᒻᒪᓗ ᐊᒃᑐᐃᓂᕆᓂᐊᖅᑕᖏᑦ, ᐋᖅᑭᑦᓯᓯᒪᑦᓯᐊᖁᓪᓗᒋᑦ ᓈᖕᒪᑦᑐᒥᒃ ᐊᐅᓚᑦᓯᔾᔪᑎᓂᒃ ᐱᓕᕆᐊᒃᓴᒧᑦ ᐃᓚᒋᔭᐅᓗᑎᒃ ᐃᑯᓪᓚᐅᒥᑎᑦᓯᒪᒍᑎᒃᓴᑦ. ᑖᒃᑯᐊ ᓇᓗᓇᖅᑐᑦ ᐋᖅᑭᒐᑦᓴᐅᖏᒻᒪᑕ, ᐊᓪᓛᑦ ᐊᐳᖅᑕᕐᕖᒃ ᖃᐅᔨᓴᖅᑕᐅᓯᒪᔪᓄᑦ ᐋᖅᑭᒐᑦᓴᐅᖏᑦᑐᑦ, ᐱᕕᒃᓴᓕᐊᖑᓯᒪᔪᒥᒃ ᑭᖑᓪᓕᕐᐹᒥ ᓈᓚᖕᓂᐅᓚᐅᖅᑐᒥ ᐱᕕᒃᓴᓕᐅᖅᑕᐅᓯᒪᓂᖅ ᑕᖅᑮᓐᓂᒃ ᒪᕐᕉᓐᓂᒃ ᓄᖅᑲᖓᑲᐃᓐᓇᓂᕐᒥᒃ ᑲᑎᒻᒪᓗᑎᒃ ᑲᑎᒪᓂᕐᒨᖓᓂᖓᓂᒃ ᑭᒃᑯᑐᐃᓐᓇᕐᓂᒃ ᓈᓚᖕᓂᕐᒥ ᐃᓱᕐᕆᐅᑎᓅᖓᔪᓂᒃ.

ᑐᓐᖓᕕᒃᑯᑦ ᐃᑲᔪᕐᓱᐃᓇᖅᑐᑦ ᓄᓘᔮᓐᓂ ᐱᓕᕆᐊᒥᒃ. ᑐᓐᖓᕕᒃᑯᑦ ᐊᑭᕋᖅᑐᖏᑦᑐᑦ ᑐᓐᖓᕕᓕᐊᖑᓯᒪᔪᒥᒃ ᐅᔭᕋᓐᓂᐊᕕᒃ ᐊᖏᓪᓕᒋᐊᖅᑕᐅᓇᓱᐊᕐᓂᖓᓂᒃ ᑭᓯᐊᓂ ᐃᓱᒫᓘᑎᓖᑦ ᑲᒪᒋᔭᐅᒋᐊᖃᕐᓂᐊᕐᓂᖓᓂᒃ ᐋᖅᑭᑦᓯᒪᔪᒃᑯᑦ ᐃᑉᐱᒋᔭᐅᑦᓯᐊᕐᓯᒪᓗᑎᒃ ᓇᓕᒧᒌᒋᐊᖃᕐᓂᖏᑦ ᐃᑲᔫᓯᐊᑦ ᐱᕙᓪᓕᐊᓂᐅᔪᒥᒃ ᐊᒻᒪᓗ ᐊᕙᑎᓕᕆᓂᕐᒥᒃ ᐊᒻᒪᓗ ᐃᓕᖅᑯᓯᕐᒧᑦ ᐊᒃᑐᐃᓂᕆᔭᐅᔪᑦ. ᑕᒪᓐᓇ ᐊᔪᕐᓇᓂᐊᖅᑐᖅ ᐊᐅᓚᓂᖓᒍᑦ ᑭᒃᑯᑐᐃᓐᓇᕐᓂᒃ ᓈᓚᖕᓂᐅᓚᐅᖅᑐᒥᒃ ᓴᖅᑭᐊᓂᓚᐅᓐᖏᒻᒪᑦ ᐅᓪᓗᓂᒃ ᑕᓪᓕᒪᓂᒃ. ᑐᓐᖓᕕᒃᑯᑦ ᑕᐃᒪᐃᒻᒪᑦ ᑐᒃᓯᕋᓕᓚᐅᕐᐳᑦ ᐃᑉᐱᒍᓱᑦᓯᐊᖅᑐᑎᒃ ᑲᑎᒪᔨᓂᒃ ᓄᖅᑲᖁᓪᓗᒋᑦ ᑭᒃᑯᑐᐃᓐᓇᕐᓂᒃ ᓈᓚᖕᓂᕐᒥᒃ, ᐅᑉᕙᓘᓐᓃᑦ ᐊᓯᖏᑎᒍᑦ ᐊᐅᓚᑕᐅᖔᕐᓗᓂ ᑲᒪᒋᒋᐊᓕᒃᑎᒍᑦ ᐃᓱᒪᒋᔭᒥᒍᑦ ᐋᖅᑭᑦᓯᒪᑦᓯᐊᕋᔭᕐᓂᖓᓂᒃ ᐊᐅᓚᓂᖓ, ᐊᐅᓚᓂᕆᓂᐊᖅᑕᖓᓂᒃ 9−ᓂᒃ ᑕᖅᑭᓂᒃ ᑎᑭᓪᓗᒍ ᐊᑕᐅᓯᕐᒧᑦ ᐊᕐᕌᒍᒧᑦ, ᐹᕕᓐᓛᒃᑯᑦ ᐱᕕᒃᓴᖃᖁᓪᓗᒋᑦ ᐃᖅᑲᓇᐃᔭᖃᑎᖃᕐᓂᕐᒥᒃ ᐱᓇᓱᐊᖃᑎᒥᓐᓂᒃ ᑎᑭᑕᑦᓴᐅᓂᕐᓴᐅᔪᒥᒃ ᑐᕌᒐᑦᓴᓕᐅᕐᓗᑎᒃ ᑲᒪᒋᔭᐅᓯᒪᓐᖏᑦᑐᓄᑦ ᐊᒻᒪᓗ ᐋᖅᑭᑦᑕᐅᓯᒪᓐᖏᑦᑐᓄᑦ ᐃᓱᒫᓘᑎᓄᑦ.

ᒪᑉᐱᒐᖓᓂ 9 ᐸᕕᓐᓛᓐ ᓴᕕᒃᓴᓂᒃ ᐅᔭᕋᓐᓂᐊᖅᑏᑦ ᑯᐊᐳᕇᓴᒃᑯᑦ ᑭᒡᒍᑎᖏᑦ ᑐᓐᖓᕕᒃᑯᑦ ᐱᖁᔭᕗᖔᕈᑎᖓᓄᑦ ᓇᐃᓈᕐᓯᒪᓗᑎᒃ ᐃᒪᐃᓕᖓᔪᑦ, “ᑕᐃᒪᐃᒻᒪᑦ, ᓱᖅᑯᐃᓇᕐᓯᒻᒪᑦ ᑐᓂᓯᓂᕐᒧᑐᐃᓐᓇᐅᖏᒻᒪᑦ ᓄᖅᑲᓂᕐᒧᑦ − ᑕᒪᕐᒥᒃ ᐱᓇᓱᐊᖃᑎᒌᑦᑐᑦ, ᐃᓚᒋᔭᐅᓪᓗᑎᒃ ᐹᕕᓐᓚᓐ, ᐊᖏᖃᑎᒌᑉᐳᑦ ᐱᓇᓱᐊᖃᑎᒌᑦᑐᑦ ᑲᔪᓯᓂᐊᕐᓗᑎᒃ ᓈᓚᖕᓂᕐᒥᒃ ᓯᕗᓂᑦᑎᓐᓂ. ᐊᑲᐅᓐᖏᓪᓕᐅᕈᑕᐅᒻᒪᓕ ᐱᕕᒃᓴᖃᖅᑎᑕᐅᑦᓯᐊᕐᓯᒪᓐᖏᓐᓂᖅ ᐋᖅᑭᑦᑕᐅᓯᒪᔪᒧᑦ ᓄᖅᑲᕐᓂᖓᓄᑦ.”

ᐸᕐᓇᓯᒪᔭᒥᓂᒃ ᑐᓂᓯᓚᐅᖅᑎᓪᓗᒋᑦ ᐱᓇᓱᐊᖃᑕᐅᔪᑦ ᐃᓚᒋᔭᐅᓪᓗᑎᒃ ᐹᕕᓐᓛᑦ, NIRB−ᑯᑦ ᓱᓕ ᐃᓱᒪᓕᐅᕈᑎᖃᕆᐊᓖᑦ ᐅᓪᓗᖏᓐᓂᒃ ᑭᖑᓪᓕᕐᐹᕐᓯᐅᑎᓂ ᓈᓚᖕᓂᕐᒧᑦ ᑲᒪᒋᔭᐅᓂᖓᓄᑦ II ᓄᓘᔮᓐᓂ ᐱᓕᕆᐊᖅ.

Download (PDF, 81KB)