ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖓᔪᖅᑳᖓ ᑳᑎ
ᑕᐅᑐᓐᖏ, ᐊᖓᔪᖅᑳᑉ-ᑐᒡᓕᐊ ᔮᒃ ᐊᓇᕈᐊᖅ ᐊᒻᒪᓗ ᐊᐅᓚᑦᓯᔨᒻᒪᕆᒃ ᔭᐃᒥᓯ ᑕ. ᐋᕆᐊᒃ ᑲᑎᓯᓚᐅᖅᑐᑦ ᐅᓐᓄᒃ ᐋᑕᕚᐱᔅᑳᑦᑯᑦ ᐊᓪᓚᓄᑦ ᐊᖓᔪᖅᑳᒥᒃ ᓯᐱᓐᔅ ᑕᒻᒫᕐᓯᒪᕕᒋᔭᖓᓂ ᕕᒃᑐᕆᐊ ᕿᑭᖅᑖᓂ ᐋᑐᕚ ᖃᓂᒋᔮᓂ.
ᑕᐅᑐᓐᖏ ᐅᖃᓚᐅᖅᑐᖅ ᑐᓐᖓᕕᒃᑯᓃᓐᖔᖅᑐᑦ ᐃᑉᐱᒍᓱᓚᐅᕐᒪᑕ ᐱᖕᒪᕆᐅᓂᖓᓂᒃ ᑲᑎᓯᔭᕆᐊᖃᕐᓂᕐᒥᒃ ᐊᓪᓚᓄᑦ ᐊᖓᔪᖅᑳᒥᒃ ᓯᐱᓐᔅ ᖃᐅᔨᒃᑲᐃᒍᒪᓪᓗᑎᒃ ᐃᑲᔪᖅᓱᐃᓂᕐᒥᓂᒃ ᐊᒻᒪᓗ ᐅᖃᖃᑎᖃᕐᓗᑎᒃ ᐱᓂᐊᕐᕕᐅᓯᒪᓂᕐᒥᖕᓂᒃ ᑕᐃᒫᑦᓴᐃᓐᓇᖅ ᐃᓄᐃᑦ ᐊᒻᒪᓗ ᐊᓯᖏᑦ ᓄᓇᖃᖅᑳᕐᓯᒪᔪᑦ ᑲᓇᑕᒥᐅᑦ ᑲᒪᒋᔭᐅᑦᓯᐊᖏᓐᓂᕆᖃᑦᑕᕐᓯᒪᔭᖏᓐᓂᒃ ᑲᓇᑕᐅᑉ ᒐᕙᒪᖓᓄᑦ ᐱᓂᐊᕐᓂᕋᐅᑎᓕᐊᕆᓯᒪᔭᒥᓂᒃ ᓯᖁᒥᑦᓯᓯᒪᓂᖏᓐᓄᑦ ᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᓂ ᐊᒻᒪᓗ ᐊᓪᓚᓄᑦ ᐊᖏᕈᑕᐅᓯᒪᔪᓂᒃ ᐅᓪᓗᒥᓯᐅᑎᓂ. ᐊᓪᓚᓄᑦ ᐊᖓᔪᖅᑳᖅ ᓯᐱᓐᔅ ᓂᕆᑦᑕᐃᓕᓯᒪᒻᒪᑦ ᑏᓰᒻᕙ 11-ᒥᓂᒃ ᑲᑎᒪᖃᑎᖃᕈᒪᓪᓗᓂ ᑲᓇᑕᐅᑉ ᐊᖓᔪᖅᑳᕐᔪᐊᖓᓂᒃ ᓯᑏᕙᓐ Hᐊᐸ ᐊᐅᓚᓂᐅᔭᕆᐊᓕᖕᓂᒃ ᐊᓪᓚᓅᖓᔪᓂᒃ ᑲᔪᓯᐊᑎᑦᓯᖁᔨᓂᕐᒧᑦ. ᐊᓪᓚᐃᑦ ᓯᕗᓕᖅᑎᖏᑦ ᐊᒻᒪᓗ ᒐᕙᒪᑐᖃᒃᑯᓃᓐᖔᖅᑐᑦ ᑲᑎᒪᖃᑎᒌᓛᕐᓂᐊᖅᑐᑦ ᔭᓐᓄᐊᓕ 11. ᐊᓪᓚᐃᑦ ᐊᖓᔪᖅᑳᖓ ᓯᐱᓐᔅ ᑲᑎᒪᔪᓕᐊᓛᓐᖏᓂᕐᒥᓂᒃ ᓇᓗᓇᐃᕐᓯᓯᒪᔪᖅ.
“ᓄᓇᕗᒻᒥ, ᐊᒻᒪᓗ ᑲᓇᑕᓕᒫᒥ, ᐃᓄᐃᑦ ᐊᒻᒪᓗ ᓄᓇᖃᖅᑳᕐᓯᒪᔫᖃᑎᖏᑦ ᓵᓐᖓᑦᓯᔭᕆᐊᖃᖃᑦᑕᕐᖅᑐᑦ ᐊᔾᔨᒌᑦᑐᓂᒃ ᐊᑦᓱᕈᕐᓇᑐᒃᑰᓂᕐᒥᓄᑦ ᓈᖕᒪᖏᑦᑐᓕᕕᐅᓯᒪᓂᕐᒥᓄᑦ ᐃᓕᓐᓂᐊᖅᑐᓕᕆᓂᕐᒧᑦ, ᐃᒡᓗᓕᕆᓂᕐᒧᑦ, ᐋᓐᓂᐊᖅᑐᑦ ᐃᑉᐱᒋᔭᐅᑦᓯᐊᖏᓐᓂᖏᓐᓄᑦ, ᓂᕆᔭᒃᓴᖃᑦᓯᐊᖃᑦᑕᖏᓐᓂᕐᒧᑦ ᐊᒻᒪᓗ ᐊᔪᖅᓴᓂᕐᒧᑦ, ᐊᒥᓱᑎᒍᑦ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᑎᓕᐅᖃᑎᖃᕐᓯᒪᔪᕋᓴᐅᒐᓗᐊᖅᑎᓪᓗᑕ ᒐᕙᒪᑐᖃᒃᑯᓐᓂ ᐅᑎᖅᑎᑦᓯᒍᒪᓯᒪᓂᕐᒧᑦ ᐊᒻᒪᓗ ᓯᕗᒧᐊᒃᐸᓪᓕᐊᑎᑦᓯᒍᒪᓪᓗᑕ ᒪᑭᒪᔾᔪᑎᓂᒃ ᑮᓇᐅᔭᓕᐅᕈᑎᒍᑦ ᐊᒻᒪᓗ ᐃᓕᖅᑯᓯᑦᑎᓐᓅᖓᑦᓯᐊᕐᓗᑎᒃ,” ᐅᖃᖅᑐᖅ ᑕᐅᑐᓐᖏ. “ᐊᖏᕈᑏᑦ ᑖᒃᑯᐊ ᐱᔾᔪᑎᒋᓯᒪᔭᖏᑦ ᐊᐳᖅᑕᕐᕕᒋᔭᐅᖃᑦᑕᕐᓯᒪᔪᑦ ᐅᕐᕈᑎᒍᒪᓪᓗᒋᑦ ᑐᓐᖓᕕᓕᐅᕐᓗᑕ ᖃᓄᐃᓐᖏᑦᓯᐊᕈᑎᒃᓴᖏᓐᓂᒃ ᓄᓇᖃᖅᑳᕐᓯᒪᔪᑦ ᐊᒻᒪᓗ ᓄᓇᖃᖅᑳᕐᓯᒪᔪᓃᓐᖔᖏᑦᑐᑦ ᑲᓇᑕᒥᐅᑦ. ᑲᓇᑕ ᒐᕙᒪᖓ ᓯᖁᒥᑦᓯᓯᒪᖕᒪᑦ ᐊᑐᓕᖅᑎᒋᐊᖃᕐᓯᒪᔭᕐᒥᓂᒃ ᐊᑐᓕᖅᑎᑦᓯᓯᒪᓐᖏᓐᓂᑯᖓᓄᑦ ᐊᒻᒪᓗ ᑲᒪᒋᔭᖃᑦᓯᐊᕆᐊᓕᖕᒥᓂᒃ ᑖᒃᑯᓂᖓ ᐊᖏᕈᑎᓂᒃ ᓇᐅᒃᑯᑐᐃᓐᓇᖅ ᐱᓇᓱᐊᕈᑕᐅᒋᐊᓕᒃᑎᒍᑦ, ᑖᓐᓇ ᐱᔾᔪᑎᓪᓗᐊᑕᕆᔭᖓ ᓯᐊᒻᒪᕈᑕᐅᓯᒪᔪᖅ ᐊᔪᖅᓴᖃᑦᑕᕐᓂᕐᒧᑦ ᐊᒻᒪᓗ ᑲᑕᑦᓯᒪᓂᕐᒧᑦ ᖁᕕᐊᓇᓐᖏᑐᖅᑎᒎᖏᓐᓇᕐᓯᒪᒍᑕᐅᓪᓗᓂ ᓵᓐᖓᑦᓯᔭᕆᐊᖃᖃᑦᑕᕈᑕᐅᔪᖅ ᓄᓇᖃᖅᑳᕐᓯᒪᔪᓄᑦ ᑲᓇᑕᒥᐅᓄᑦ.
ᑕᐅᑐᓐᖏ ᐅᖃᓚᐅᖅᑐᒻ ᑲᓇᑕ ᒐᕙᒪᖓ ᓯᖁᒥᑦᓯᓯᒪᔪᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᒻᒪᓗ ᑐᓐᖓᕕᒃᑯᑦ ᐃᖅᑲᖅᑐᐃᕕᒃᑰᑎᑦᓯᒋᐊᖃᓚᕿᒻᒪᕆᓚᐅᖅᑐᑦ ᓵᓐᖓᑦᓯᒍᑎᒃᓴᒥᓂᒃ 2006-ᒥ ᑯᐃᓐ ᑭᒡᒐᑐᖅᑎᖏᓐᓂᒃ ᓯᖁᒥᑦᓯᓯᒪᓂᖏᓐᓄᑦ ᑲᔪᓯᑎᑦᓯᓯᒪᓐᖏᓂᕐᒧᑦ ᐊᐅᓚᒋᐊᓕᖕᒥᓂᒃ ᐱᓇᓱᐊᕆᐊᖃᕐᓯᒪᔭᒥᓂᒃ ᐊᖏᕈᑎᖃᕐᓯᒪᓂᕐᒥᒍᑦ ᑲᔪᓯᑎᑦᓯᔭᕆᐊᖃᕐᓯᒪᓂᕐᒥᒃ ᐊᖏᕈᑎᓂᒃ. ᑕᐅᑐᓐᖏ ᐅᖃᖅᑐᖅ ᑐᓐᖓᕕᒃᑯᑦ ᐃᓕᓴᕐᓯᐅᒪᔪᑦ ᐱᖕᒪᕆᐅᓂᖓᓂᒃ ᑲᑎᒪᖃᑎᒋᔭᐅᓂᐊᕐᓂᖓᓂᒃ ᑲᓇᑕᐅᑉ ᐊᖓᔪᖅᑳᕐᔪᐊᖓ ᔭᓐᓄᐊᓕ 11-ᒥ, ᐊᒻᒪᓗ ᐊᔭᐅᖅᑐᐃᒋᐊᒃᑲᓂᖅᑐᓂ ᑲᓇᑕ ᒐᕙᒪᖓᓂᒃ ᐱᕕᖃᕐᓂᕐᒥᖕᓂ ᑲᑎᒪᓂᐅᓂᐊᖅᑐᒥ ᑲᔪᓯᑎᑦᓯᒋᐊᖁᔨᓪᓗᓂ ᐊᖏᕈᑎᖃᑦᓯᐊᕐᓗᑎᒃ ᐃᓘᓐᓈᒍᑦ ᕿᒥᕐᕈᔭᐅᔭᕆᐊᖃᕐᓯᒪᔪᑐᖃᐅᓂᖓᓂᒃ ᑭᖑᕙᕐᓯᒪᔪᕐᔪᐊᖑᔪᒥᒃ ᒐᕙᒪᑐᖃᒃᑯᑦ ᐊᑐᐊᒐᖏᓐᓂᒃ ᓱᕋᑦᑎᕈᑕᐅᓯᒪᔪᒥᒃ ᐃᓘᓐᓈᓂᒃ ᐊᒻᒪᓗ ᓈᖕᒪᓯᐊᖅᑐᒃᑯᑦ ᐊᑐᓕᖅᑎᑕᐅᓯᒪᔭᕆᐊᓕᑐᖃᕐᒥᒃ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᒻᒪᓗ ᐊᓪᓚᐃᑦ ᐃᓕᓴᕆᔭᐅᓯᒪᒍᑎᖏᓐᓂᒃ ᐅᓪᓗᒥᓯᐅᑎᓂᒃ ᑲᓇᑕᓕᒫᒥ.
