Nunavut Tungavik Timeoyomi Ikhivaotalik Cathy Towtongie, Tukleoyok Ikhivaotalikmin Jacke Anawak-lo Tukimoaktitiyilo James T. Arreak katimakatikaktun ipakhak Attawapiskat-mi Itkilen Ataneanik Theresa Spence-mik iglukpakakveani Victoria Island-mi haneani Atoam (Ottawa).

Towtongie okaktok NTI-konin ilaoyun katimakatikagumayun Itkilen Ataneanik Spence-mik ikayoguma-nigakhogo okaohigiyaaganilo ayiken piyotaen Ineon ahelo Nunakakaktun Kanatameotan maligoaginigi-nik Kavaman Kanatami havaagiyageakaktatik ilagani nunatagutinun agikatigegutin uplomilo agikatigegu-tin.  Ataneoyok Spence akeagoakhilikman December 11-min katimakatigeomavlogo Kanatami Atanikpak Stephen Harper agikatigegutini ihomagiyaoyonik.  Katimaneaktun January 11-mi Itkilgin hivolikhoktelo kanatamilo kavamaenin kivgaktoktin.  Ataneoyok Spence katimakataoyomagitok katimalikata.

“Nunavumi, tamaenilo Kanatami, Inoenaen ahelo Nunakakaktun Inoen ayikenik ayokhaotikaktun ihoetonik ilihaknikmi, iglukhakaknikulo, aneaktoniklo monakhinikun, nikitateaknikulo iliganikmiklo, amigaetogun saenikhihimagaloaktilota nunataknikun agikatigegutaoyonik kanatami kavamalo utiktitaagani pivaaligutigiyaaganilo manikhakheogutikhan ilitkohikmilo inuyutikhan,” okaktok Towtongie.  “Piyotaoyok ukunani agikatigegutini ilakoenaohoegeagani atukloaktun inuhikateaknigin Nunakakaktun Inoen Nunakakagitolo Kanatameotan.  Kavaman Kanatami atuginmagin ihomagiteagitogilo ukoa agikatigegutin amigaetoni, ila piyotaoloakman iliganikmik aheniklo ayokhaotigiyaenik Nunakakaktun Kanatameotan inuhikmikni.”

Towtongie okaktok Kavaman Kanatami maligoaginmata Nunavumi Nunataknikun Agikatigegutaoyomik pipkaevlotiklo ayoknakman NTI-kon apikhoeyitiguktitiyaagani 2006-mi akigaktokhogin Koen Kivgaktoktean havaagiginmagin okageyaktatik agikatigegutaoyomi.  Towtongie okaktok NTI-kon kaoyimayun katimavikhamik kavamatokanilo atanikpak January 11-mi akhukhaevlotiklo Kavamanik Kanatami atuteageagani katimanikhak okageaklotiklo ihivgeokhiteageamikni havakhaokhaktomik kanatami pitkoheoyun ihoeliyotaoyun atokpaleanigagun nunatagutin uplomilo agikatigegutin humilikaa Kantami.