ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᓯᕗᓪᓕᕐᐹᒥᒃ ᓂᖏᖅᑕᕈᑎᓂᑦ ᐊᑭᓕᖅᑕᐅᕗᑦ ᐅᔭᕋᓐᓂᐊᖅᑐᓂᑦ ᐃᓄᐃᑦ ᓄᓇᖁᑎᖓᓐᓂ

ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑦ ᑳᑎ ᑕᐅᑐᙱ ᐅᓪᓗᒥ ᓇᓗᓇᐃᕐᓯᕗᖅ ᓄᓇᕗᑦ ᑐᙵᕕᒃᑯᑦ ᓯᕗᓪᓕᕐᐹᒥ ᐊᑭᓕᖅᑕᐅᒻᒪᑕ ᓂᖏᖅᑕᕈᑎᓂᑦ ᐅᔭᕋᓐᓂᐊᓂᕐᒥ ᓴᓇᔪᓂᑦ ᐃᓄᐃᑦ ᓄᓇᖁᑎᖓᓐᓂ. ᓂᖏᖅᑕᕈᑎᓂᑦ ᐊᑭᓕᐅᑕᐅᓚᐅᖅᑐᑦ $2,249,500 ᐊᒡᓂᑯ-ᐄᒍᓪ ᐅᔭᕋᓐᓂᐊᖅᑏᑦ ᑎᒥᖓᓐᓂ ᐊᐳᖅᑎᓐᓈᑦᑐᖅ ᒎᓗᑕᕐᕕᒻᒥ ᐅᐊᓐᓇᖓᓂ ᖃᒪᓂᑦᑐᐊᑉ.

 

“ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᑲᔪᓯᑎᑦᑎᓚᐅᕐᓯᒪᒻᒪᑕ ᓄᓇᕗᑦ ᑐᙵᕕᒃᑯᑦ ᐅᔭᕋᓐᓂᐊᓂᕐᒧᑦ ᐊᑐᐊᒐᖓᓐᓂᒃ ᑎᓯᐱᕆ 1997ᒥ ᑐᑭᓯᓇᖅᑐᒥᒃ ᑲᑦᑐᖓᐃᕈᑎᖃᖅᑐᑎᒃ ᐃᑲᔫᑕᐅᓂᐊᖅᑐᒥᒃ ᐱᕙᓪᓕᐊᑎᑦᑎᓂᕐᒥᒃ ᓄᓇᒦᙶᖅᑐᓂᒃ ᐅᔭᕋᑦᑕᕋᔅᓴᓂᑦ ᓄᓇᕗᒥ ᐱᒻᒪᕆᐅᔪᓂᑦ ᐊᑯᓃᖅᑐᒥᒃ ᐃᓅᓯᕐᒧᑦ ᒪᑭᒪᓇᓱᐊᕈᑎᓄᓪᓗ ᐃᑲᔫᑎᖃᕐᓂᐊᖅᑲᑕ ᐃᓄᓐᓄᑦ, ᐊᒻᒪᓗ ᓈᒻᒪᑉᐸᑕ ᓴᐳᔾᔨᓂᕐᒧᑦ ᐊᕙᑎᑦᑎᓐᓃᑦᑐᓄᑦ ᓄᓇᕗᒥ. ᓄᓇᕗᑦ ᑐᙵᕕᒃᑯᑦ ᐊᔅᓱᕈᐊᖃᖅᑐᑎᒃ ᐃᖅᑲᓇᐃᔮᖃᕐᓯᒪᒻᒪᑕ ᑲᔪᓯᑎᑦᑎᕙᓪᓕᐊᓂᕐᒥᒃ ᐊᑐᐊᒐᕐᒥᒃ ᐊᒻᒪᓗ ᖁᕕᐊᓱᑦᑐᖓ ᓇᓗᓇᐃᕐᓯᔭᕆᐊᔅᓴᖅ ᓂᖏᖅᑕᓂᕐᒥᒃ ᐱᕙᓪᓕᐊᓯᒐᑦᑕ ᐃᓄᐃᑦ ᓄᓇᖁᑎᖏᓐᓃᑦᑐᓂᑦ,” ᐅᖃᖅᑐᖅ ᑕᐅᑐᙱ.

 

“ ᑖᒃᑯᐊ ᐊᒡᓂᑯ-ᐄᒍᓪ ᐅᔭᕋᓐᓂᐊᖅᑏᑦ ᑎᒥᖓᑦ ᐊᐳᖅᑎᓐᓈᑦᑐᒥᒃ ᒎᓗᑕᕆᐊᓯᓚᐅᖅᑎᓐᓇᒋᑦ, ᐅᔭᕋᓐᓂᐊᖅᑐᖃᓚᐅᕐᓯᒪᙱᒻᒪᑦ ᓄᓇᕗᒥ ᐃᓄᐃᑦ ᓄᓇᖁᑎᖏᓐᓃᑦᑐᓂᑦ. ᐊᐳᖅᑎᓈᑦᑐᖅ ᓯᕗᓪᓕᕐᐹᖑᓪᓗᓂ ᐱᓕᕆᕕᐅᒻᒪᑦ ᐃᓄᓐᓄᑦ ᓂᖏᕐᕕᐅᓯᒪᔪᖅ ᐅᔭᕋᓐᓂᐊᕐᓂᓕᕆᓂᕐᒥ,” ᐅᖃᖅᑐᖅ ᑕᐅᑐᙱ. “ᖁᕕᐊᓱᒍᑎᒍᒪᕙᒃᑲ ᐊᒡᓂᑯ-ᐄᒍᓪ ᐅᔭᕋᓐᓂᐊᖅᑏᑦ ᑲᔪᓯᕙᓪᓕᐊᑎᐊᕐᖓᑕ ᑕᒪᑐᒥᖓ ᐱᓕᕆᐊᖓᓐᓂᒃ.

 

ᑕᐅᑐᙱ ᐅᖃᖅᑐᖅ ᓂᖏᖅᑕᕈᑎᓂᑦ ᐊᑭᓕᐅᑕᐅᔪᑦ ᐃᑲᔫᑎᑦᑎᐊᕙᐅᒻᒪᑦ, ᑭᓯᐊᓂ ᕿᓂᕐᓂᖅ ᐅᔭᕋᓐᓂᐊᓂᕐᓗ ᐅᔭᕋᑦᑕᕋᔅᓴᓂᑦ ᐊᒥᓱᓂᑦ ᐃᖅᑲᓇᐃᔮᔅᓴᖃᕈᑕᐅᒻᒥᒻᒪᑕ, ᐱᓇᓱᐊᕋᔅᓴᖃᕈᑕᐅᒻᒥᒻᒪᑦ, ᐱᓕᒻᒪᔅᓴᕈᑕᐅᓪᓗᓂᓗ ᐃᓄᓐᓄᑦ.

 

ᐃᓄᐃᑦ ᐱᔾᔪᑎᒋᓪᓗᒋᑦ, ᓄᓇᕗᑦ ᑐᙵᕕᒃᑯᑦ ᑎᒍᒥᐊᖅᑎᐅᒻᒪᑕ ᓄᓇᒦᙶᖅᑐᓂᑦ ᐅᔭᕋᑦᑕᕋᔅᓴᓂᑦ ᐃᓄᐃᑦ ᓄᓇᖁᑎᖏᓐᓃᑦᑐᓂᑦ. ᑕᒪᕐᒥᒃ ᑮᓇᐅᔭᑦ ᐃᓯᖅᑐᑦ ᓄᓇᕗᑦ ᑐᙵᕕᒃᑯᓐᓄᑦ ᐅᔭᕋᑦᑕᕋᔅᓴᓂᑦ ᑎᒍᒥᐊᕈᑎᖏᓐᓄᑦ ᐃᓛᒃᑰᖓᑎᑕᐅᕙᑦᑐᑦ, ᐊᐅᓚᑕᐅᕙᑦᑐᑎᓪᓗ, ᑐᓂᐅᖅᑲᖅᑕᐅᕙᑦᑐᑎᓪᓗ ᒪᓕᑦᑐᒋᑦ ᑮᓇᐅᔭᓕᐅᕋᓱᐊᕈᑎᔅᓴᐃᑦ ᐊᑐᐊᒐᑦ ᑲᔪᓯᑎᑕᐅᓚᐅᕐᓯᒪᒧᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓄᑦ ᑲᑎᒪᕕᔾᔪᐊᕐᓂᖓᓐᓂ ᓄᕕᐱᕆ 2011ᒥ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: