ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᐊᑭᕋᖅᑐᖅᑐᑦ ᐳᕋᐃᒻ ᒥᓂᔅᑕ ᕼᐋᕐᐸ-ᒥᒃ ᐱᔾᔪᑎᖃᖅᓱᑎᒃ ᐊᑐᑐᐃᓐᓇᕐᓂᖓᓂᒃ ᐃᓄᓐᓂᒃ

(ᐅᑦᑑᕝᕙ 1, 2009– ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᓯᕗᓪᓕᖅ ᐊᖓᔪᖅᑳᑉ ᑐᖏᓕᖓ ᔭᐃᒥᓯ ᐃᑦᑐᓗᒃ ᖁᐊᖅᓵᕈᑎᖃᓚᐅᖅᑐᖅ ᐳᕋᐃᒻ ᒥᓂᔅᑕ ᓯᑏᕙᓐ ᕼᐋᐸᐅᑉ ᐅᖃᐅᓯᖏᓐᓂᒃ, ᐅᖃᖅᑕᒥᓂᖏᓐᓂᒃ G20 ᑲᑎᒪᓂᕐᒥ, ᑲᓇᑕ “ᐊᑐᓚᐅᖅᓯᒪᓐᖏᒋᐊᖓ ᐃᓄᓐᓂᒃ ᐊᑐᑐᐃᓐᓇᕐᓂᕐᒥᒃ.”

“ᐳᕋᐃᒻ ᒥᓂᔅᑕ ᐅᖃᖃᑦᑕᕆᐊᓐᖏᑦᑐᖅ ᓱᓕᓐᖏᑦᑐᓂᒃ ᑕᐃᒫᖑᓯᒪᑎᓐᓇᒍ ᐱᐅᓯᐅᓯᒪᔪᖅ. ᐱᐅᓯᕆᓯᒪᔭᖓᑦ ᐃᓄᐃᑦ ᑲᓲᒪᖃᑎᖃᕐᓂᕐᒥᒃ ᒐᕙᒪᒃᑯᖏᓐᓂᒃ ᑲᓇᑕᐅᑉ ᖃᐅᔨᓴᖅᑕᐅᓂᐅᔪᖅ ᐃᓄᓐᓂᒃ ᐊᑐᕐᓂᕐᒥᒃ. ᐱᐅᓯᕆᓯᒪᔭᕗᑦ ᓄᑦᑎᖅᑕᐅᖃᑦᑕᖅᓯᒪᓂᖅ, ᐃᓕᓐᓂᐊᕆᐊᖅᑎᑕᐅᖃᑦᑕᖅᓯᒪᓃᑦ, ᓄᓇᓕᓐᓄᑦ ᓄᑦᑎᖅᑎᖅᑎᑕᐅᓃᑦ, ᕿᒻᒦᔭᖅᑕᐅᓂᖅ, ᓂᕈᐊᕈᓐᓇᖃᑦᑕᖅᓯᒪᓐᖏᑦᑐᒍᑦ ᑭᓯᐊᓂ 1960-ᕈᕐᒪᑦ, ᐃᓕᑕᕆᔭᐅᓯᒪᓐᖏᑦᑐᓄᑦ ᓄᓇᒧᑦ ᐱᔪᓐᓇᐅᑎᕗᑦ, ᐊᓯᖏᓪᓗ ᖃᓄᑐᐃᓐᓇᖅ ᐃᓄᐃᑦ ᐊᑐᖅᑕᐅᓂᕆᓯᒪᔭᖏᑦ ᓱᓕ ᓄᑖᐹᓗᐃᑦ ᐃᓱᒪᑦᑎᓐᓂ. ᓱᓕᒃᑲᓐᓂᖅ, ᑕᒪᓐᓇ ᐅᖃᖅᑕᖓ ᓇᒻᒥᓂᖅ ᐅᖃᐅᓯᕆᓯᒪᔭᖓᓄᑦ ᐊᐳᖅᑐᖅ ᐃᓕᓐᓂᐊᕆᐊᖃᑦᑕᖅᓯᒪᔪᒥᓂᕐᓄᑦ ᒪᒥᐊᔾᔪᑎᒥᓂ.” ᐃᑦᑐᓗᒃ ᐅᖃᖅᑐᖅ.

ᔫᓂ 11, 2008-ᒥ ᒪᒥᐊᓐᓂᖃᖅᓱᓂ ᒐᕙᒪᑐᖃᒃᑯᑦ ᐃᓕᓐᓂᐊᕆᐊᖅᑎᑦᓯᖃᑦᑕᖅᓯᒪᓂᒥᓂᖓᓂᒃ ᐳᕋᐃᒻ ᒥᓂᔅᑕ ᐅᖃᔪᔪᖅ “ᒪᕐᕉᒃ ᑐᕌᒐᓪᓗᐊᑕᐅᔫᒃ ᐃᓕᓐᓂᐊᕆᐊᖃᑦᑕᖅᓯᒪᔪᒥᓂᕐᓄᑦ ᐊᐅᓚᓂᐅᔪᑦ ᓄᑦᑎᑎᑦᓯᓂᖅ ᐊᐅᓪᓚᑎᑦᓯᓂᕐᓗ ᓱᕈᑦᓯᓂᒃ ᐊᖏᕐᕋᒥᓂᒃ ᕿᒪᐃᑎᑕᐅᑦᓱᑎᒃ, ᐃᓚᒥᓐᓂᒃ, ᐱᖅᑯᓯᕐᒥᓂᒃ, ᐊᔾᔨᐅᓕᖅᑎᒐᓱᐊᖅᓱᒋᑦ ᐱᖅᑯᓯᖃᑎᒋᓐᖏᑕᖏᓐᓄᑦ. ᑖᒃᑯᐊ ᑐᕌᒐᐅᔪᑦ ᑐᓐᖓᕕᖃᖃᑦᑕᖅᓯᒪᔪᑦ ᑕᒪᒃᑯᐊ ᐱᖅᑯᓯᑐᖃᖅᑎᒍᑦ ᐱᐅᓯᕆᔭᐅᔪᑦ ᐅᑉᐱᕆᔭᐅᔪᓪᓗ ᓴᓐᖐᓂᖅᓴᐅᒋᐊᖏᑦ ᓇᒻᒥᓂᖅ ᐱᖅᑯᓯᕐᒥᓂᒃ. ᐃᓚᖏᑦ ᐊᓪᓛᑦ ᐅᖃᖅᓯᒪᔪᑦ “ᑐᖁᓪᓗᒍ ᐊᓪᓚᐅᓂᖓ ᓱᕈᓯᐅᑉ.” ᐅᓪᓗᒥ, ᐃᓕᑕᖅᓯᕗᒍᑦ ᑖᑦᓱᒪᓐᖓᑦ ᐊᑐᐊᒐᐅᓯᒪᔪᒥᒃ ᐊᔾᔨᐅᔪᖅᑖᕋᓱᐊᕐᓂᖅ ᑕᒻᒪᖅᓯᒪᒋᐊᖓ, ᐋᓐᓂᖅᑎᕆᓯᒪᔪᖅ, ᐃᓂᑦᓴᖃᕋᓂᓗ ᑕᕝᕙᓂ ᓄᓇᓕᕐᔪᐊᑎᓐᓂ.”

“ᐳᕋᐃᒻ ᒥᓂᔅᑕ ᑐᑭᓯᓇᖅᑎᑦᓯᒋᐊᕆᐊᓕᒃ ᖃᓄᐃᓕᐅᕐᒪᖔᕐᒥ. ᒪᒥᐊᓐᓂᕆᔪᔭᖓ ᐃᓕᓐᓂᐊᕆᐊᖃᑦᑕᖅᓯᒪᔪᒥᓂᕐᓄᑦ ᐅᑉᐱᕆᔪᒐᑦᑎᒍ ᓱᓕᔫᑎᒋᑦᓱᒍ, ᑭᓯᐊᓂ ᐅᖃᕐᓂᖅ ᑲᓇ ᐃᓄᓐᓂᒃ ᐊᑐᖃᑦᑕᖅᓯᒪᓐᖏᒋᐊᖓ ᐃᓪᓗᐊᓄᖔᖅ ᐱᒻᒪᑦ. ᑕᐃᒪᓐᓇ ᐅᖃᐅᓯᖃᕐᓂᖅ ᐊᐱᖅᑯᑎᓄᑦ ᓴᖅᑭᕈᑕᐅᒻᒪᑦ ᐱᓕᕆᖃᑎᖃᕐᓂᑎᓐᓄᑦ ᒐᕙᒪᑐᖃᒃᑯᓐᓂᒃ” ᐅᖃᖅᑐᖅ ᐃᑦᑐᓗᒃ. “ᐳᕋᐃᒻ ᒥᓂᔅᑕ ᐅᖃᖅᓯᒪᔭᒥᓂᒃ ᐅᑎᖅᑎᑦᓯᒋᐊᓕᐅᒐᓗᐊᖅ ᑐᑭᓯᑎᑦᓯᒋᐊᕐᓗᓂᓗ ᖃᓄᖅ ᐅᖃᕋᓱᐊᕐᓂᕐᒪᖔᕐᒥ.”

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: