(October 1, 2009– Iqaluit, Nunavut) Nunavut Tunngaviup Angayuqqangata Tuglia James Eetoolook nipliutigyaa quglungnini Angayuqaryuap Stephen Harper uqauhiinnut G20 katimayuaqtuni, Kanataguuq “angayuqqanngunahuaqpakhimanngittuq.”

“Angayuqqaryuaq itqumayumik uqalimaittuq nalunaittumik kipuktittugu itquhiq taimaniraaluk. Taimaniraaluk itquhiat Inuit piqatigiikniat Kavamanga Kanataup qauyihautauyuq angayuqqanngunahuarnirmi. Taimani itquhiptingni ilauyut nuutiqtauniq, aulaqtitaupluni ilihariaqtuqtitauniq, nunanut nuutiqtauquniq, qinminiq tuqurainiq, vutilimiattuta 1960-ngutinagu, ilitarimayaunngittuni nunamut pijunnautivut, amihullu aallat angayuqqaangunahuarutit huli puiguinnalimaittavut. Uvvalu, hamna nipliutigiyaa kipuktitjutigiyaa inmi uqauhirminik Aulaqtitauhimayut Ilihariaqtuqtitauhimayutigut Mamiahuutimini.” uqaqtuq Eetoolook.

June 11, 2008-mi mamiahuunmini kavamatkunit ikayuqtuqtauyunit Aulaqhimayunut Ilihariaqturvinut Angayuqqaryuaq uqaqtuq “Malruk pitjutauhimayuk Aulaqhimayunut Ilihariaqturvinut arhaqhiniq ahivaqtitlugillu nutaqqat aimavingmingnit, ilaruhimingnit pitquhimingnit ilitquhimingnillu ilautinnahuaqhugit atjigiiktumik ilitquhirluamut. Ukua pitjutauvakhimayut tunngayut ihumagiyauyumut Nunaqaqqaqtut ilitquhiit ukpiriyaillu qutangayuq atjiginngittunilu. Ilaa, ilangit uktuqtut, ilihimayauyuq uqauhiq, “tuqullugu itqilik nutarami.” Uplumi, ilitarimaliqtugut una atuagaq atjigiiktittinahuarnirmut ihuittuq, aannirutauqpiaqhimayuq, iniqanngittunilu nunaptingni.”

“Angayuqqaryuap tukiliuriaqaqtaa uqauhini. Naammagivagaqqut mamiahuutaa Aulaqhimayunut Ilihariaqturvitigut itqumanahugiplugu ilumuuqnahugiplugulu, kihimi uqarluni Kanata angayuqqaangunahuarnirmik itpanngittuq tunuttuni ingilraliqtuq. Umaa uqauhiq apirhuutauniaqtuq piliriniptingnik kavamatuqatkunik” uqaqtuq Eetoolook. “Angayuqqaryuap utiqtitakhait uqauhini tukiliurlugillu qanuq uqarahuarnirminik.”