(ᐊᒃᑐᕙ 20, 2016 –ᑲᖏᖅᖠᓂᖅ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓᑕ ᑐᖏᓕᖓ ᔭᐃᒥᓯ ᐃᑦᑐᓗᒃ ᐅᖃᐅᔾᔨᖃᐅᔪᖅ ᐅᓪᓗᒥ ᑲᑎᒪᔨᓂ ᑲᑎᒪᑎᓪᓗᒋᑦ ᓄᓇᕗᑦ ᑐᙵᕕᒃ ᑎᒥᖓᑕ ᐊᕐᕋᒍᓕᒫᕐᒧᑦ ᑲᑎᒪᓂᖃᖅᑎᓪᓗᒋᑦ ᖃᖏᖅᖠᓂᕐᒥ ᑖᒃᑯᐊ ᓄᓇᕗᑦ ᒐᕙᒪᒃᑯᖏᑕ ᐋᖅᑭᒋᐊᕈᑎᒋᔪᒪᔭᖏᑦ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖏᓐᓄᑦ ᐅᓂᐅᑦᑎᒻᒪᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ ᑎᑎᕋᖅᑕᐅᓯᒪᔪᓂᒃ ᑲᓇᑕᐅᑉ ᒪᓕᒐᕐᔪᐊᖏᑎᒍᑦ ᓴᐳᒻᒥᔭᐅᔾᔪᑎᖏᓐᓂᒃ ᐊᒻᒪ ᐊᑐᐊᒐᓂᒃ, ᐱᖃᓯᐅᑎᓪᓗᒋᑦ ᓄᓇᕗᖕᒥ ᐊᖏᕈᑎᓂᒃ, ᑎᑎᕋᖅᓯᒪᔪᖅ 35-ᒥ ᑲᓇᑕᐅᑉ ᒪᓕᒐᕐᔪᐊᖓᓂ, ᓄᓇᕐᔪᐊᕐᒥ ᓄᓇᓖᑦ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᓯᒪᓂᖏᑎᒋᑦ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐊᑐᓕᖁᔭᐅᓯᒪᓪᓗᑎᒃ ᑎᑎᖅᑲᑎᒋᑦ ᓱᓕᔪᓂᒃ ᑭᓪᓕᓯᓂᐊᕈᑏᑦ ᑭᖑᓪᓕᖅᐹ ᐅᓂᒃᑳᖏᓐᓂ.
ᓇᓗᓇᐃᔭᕐᑐᓂᒋᑦ ᓄᓇᕗᑦ ᑐᙵᕕᒃ ᑎᒥᖓ ᐊᓯᖔᖓᒍᑦ ᐋᖅᑭᒋᐊᕈᑕᐅᖁᔭᖏᓐᓂᒃ, ᐃᑦᑐᓗᒃ ᓴᖅᑭᒍᑕᐅᔪᓂᒃ ᑲᑎᒪᔨᓄᑦ ᓴᖅᑭᓪᓗᓂ ᓇᓗᓇᕈᓐᓃᓐᓂᖓᓂᒃ ᓄᓇᕗᖕᒥ ᐃᓕᓐᓂᐊᕐᓂᓕᕆᔾᔪᑏᑦ ᐊᒻᒪᓗ ᐃᓄᒃᑐᑦ ᓈᖕᒪᖏᑦᑐᒻᒪᕆᐅᓕᕐᓯᒪᓂᖏᓐᓄᑦ. ᓄᓇᕗᑦ ᒐᕙᒪᒃᑯᖏᑕ ᐋᖅᑭᒋᐊᕈᑎᒋᔪᒪᔭᖏᑦ ᑲᒪᒋᐊᓐᓂᖃᖅᓯᒪᙱᒻᒪᑕ ᑕᒪᑦᓱᒪ ᑐᐊᕕᕐᓇᕐᓂᖓᓂ ᐊᒻᒪᓗ ᐳᐃᒍᕈᑕᐅᒃᑲᓂᕐᓂᐊᕐᑐᓂ ᐃᓄᒃᑐᑦ ᐅᖃᐅᓯᕐᒥ ᐊᒻᒪᓗ ᐃᓕᖅᑯᓯᓂᒃ.
“ᖃᓄᐃᓕᐅᕈᑎᒋᔭᕆᐊᖃᓕᕐᑕᕗᑦ ᒫᓐᓇ; ᐅᓪᓗᒥ. ᐅᕙᒍᑦ ᐃᓅᓪᓗᑕ ᓯᕗᓕᖅᑎᐅᔪᒍᑦ, ᑕᑯᓐᓈᑐᐃᓐᓇᔾᔮᙱᓇᑦᑕ ᐃᓅᓱᒃᑐᖁᑎᑦᑎᓐᓂᒃ ᐃᓕᓐᓂᐊᕐᕕᓂᒃ ᐊᔭᑦᑕᐅᑐᐃᓐᓇᕐᑐᓂᒃ ᐊᒻᒪᓗ ᕿᐱᓗᑕᐅᑎᓪᓗᒋᑦ ᐱᔪᓐᓇᐅᑎᖏᓐᓂᒃ ᓈᖕᒪᙱᓗᐊᕐᑐᓂᒃ ᐃᓕᓐᓂᐊᕐᓂᓕᕆᔨᔾᑎᖃᖅᑎᓪᓗᒋᑦ. ᒐᕙᒪᒃᑯᑦ ᐋᖅᑭᒋᐊᕈᑕᐅᖁᔭᖏᑦ ᓱᕈᐃᕙᓪᓕᐊᑐᐃᓐᓇᕐᓂᐊᕐᒪᑕ ᐅᖃᐅᓯᑦᑎᓐᓂᒃ. ᓄᓇᕗᖕᒥᐅᑦ ᐱᓂᐊᕐᓂᖃᕈᑎᖃᕆᐊᖃᕐᒪᑕ ᐊᖏᔪᒥᒃ ᐃᓅᓱᒃᑐᑎᓐᓄᑦ,” ᐅᖃᖅᑐᖅ ᐃᑦᑐᓗᒃ.
ᐃᐊᓐ ᒫᑕᓐ, ᖃᐅᔨᒪᔨᒻᒪᕆᒃ ᐅᖃᐅᓯᓕᕆᓂᕐᒥᒃ ᔪᐊᒃ ᓯᓚᑦᑐᓴᕐᕕᖓᓂᖔᖅᑐᖅ ᑐᕋᓐᑐᒥᒃ ᖃᐅᔨᓇᓱᐊᕐᓯᒪᔪᑦ ᓄᓇᕗᖕᒥ ᐅᖃᐅᓯᕐᓂᒃ ᐅᑭᐅᓂᒃ ᐊᕙᑎᐸᓗᑲᓴᓐᓂᒃ, ᐱᖃᑎᒋᖃᐅᒻᒪᒍ ᐃᑦᑐᓘᑉ ᐅᓂᒃᑳᖅᑐᑎᒃ ᑲᑎᒪᔪᓄᑦ ᑕᐃᒪᓐᓇᓴᐃᓐᓇᖅ ᐅᖃᖅᑲᐅᖕᒪᑦ. ᐃᐊᓐ ᒫᑕᓐ ᐅᓂᒃᑳᖃᐅᒻᒪᑦ ᐅᖃᐅᓯᓕᕆᓂᕐᒥᒃ ᓈᓴᐅᑎᑎᒍᑦ ᑕᑯᒃᓴᐅᑎᑦᑎᓪᓗᓂ ᐅᓄᖅᑐᑦ ᐃᓄᐃᑦ ᐃᓄᒃᑎᑐᑦ ᐅᖃᐅᓯᕐᒥ ᐊᑑᑎᖃᖅᑎᑦᑎᔪᓂᒃ ᐊᖏᕐᕋᒥᓂᓐ ᖃᑦᓯᓐᓇᕈᖅᐹᓪᓕᕐᓯᒪᒻᒪᑕ ᐊᒃᓱᓪᓗᐊᑲᓪᓚᒃ ᐅᑭᐅᑦ 1996 ᐊᒻᒪ 2011 ᐊᑯᓐᓂᐊᓂ. ᑕᐃᒪᐃᓐᓂᖓᓄᑦ, ᐃᓄᐃᓐᓇᕐᑐᑦ ᒫᓐᓇᐅᔪᒥ ᐃᓱᒪᒋᔭᐅᓯᒪᕗᖅ ᐳᐃᒍᖅᑕᐅᑐᐃᓐᓇᕆᐊᖃᓕᓐᓂᖓᓂᒃ ᐊᒻᒪᓗ ᐃᓄᒃᑐᑦ ᐳᐃᒍᖅᑕᐅᑐᐃᓐᓇᕆᐊᖃᓕᓐᓂᕋᖅᑕᐅᓪᓗᓂ ᒪᓕᓪᓗᒋᑦ ᓄᓇᕐᔪᐊᕐᒥ ᓄᓇᓖᑦ ᑲᑐᔾᔨᖃᑎᒌᖏᑕ ᐅᖃᐅᓯᓕᕆᓂᕐᒧᑦ ᖃᐅᔨᒪᔾᔪᑎᒋᓲᖏᑦ. ᐅᖃᖅᑐᓂᓗ ᐅᓪᓗᒥᐅᔪᖅ ᐳᐃᒍᖅᑕᐅᕙᓪᓕᐊᑐᐃᓐᓇᕈᓂ, 2061-ᖑᓕᖅᐸᑦ, 2 ᐳᓴᓐᑐᐃᓐᓇᖏᑦ ᐃᓄᐃᑦ ᐃᓄᒃᑐᑦ ᐅᖃᓪᓚᒍᓐᓇᕈᒫᖅᑐᑦ ᐊᖏᕐᕋᒥᓐᓂ.
“ᐃᓕᓐᓂᐊᕐᕖᑦ ᓄᓇᕗᖕᒥ, ᐃᓚᒋᔭᐅᔭᕆᐊᖃᕋᓗᐊᕐᑐᑎᒃ ᐋᖅᑭᐸᓪᓕᑎᑦᑎᓂᕐᒥᒃ, ᐊᑲᐃᓪᓕᐅᕈᑕᐅᖔᕐᒪᑕ. ᑖᓐᓇ 2008-ᒥ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖅ ᐊᒻᒪᓗ ᐃᓄᒃᑐᑦ ᐅᖃᐅᓯᕐᓂᒃ ᓴᐳᔾᔨᓯᒪᒍᑎᐅᔪᑦ ᒪᓕᒐ ᐊᑐᓕᖅᑎᑕᐅᔪᒃᐸ, ᐅᓄᕐᓂᕐᓴᐃᑦ ᐃᓕᓐᓂᐊᕐᕖᑦ ᐃᓕᓴᐃᓕᕋᔭᕐᑐᑦ ᐃᓕᓐᓂᐊᓕᓵᖅᑐᓂᒃ ᒍᕋᐃᑦ 9-ᒧᑦ ᐃᓄᒃᑐᑦ. ᐊᒥᓱᑦ ᐃᓕᓐᓂᐊᕐᕖᑦ ᐊᓪᓛᑦ ᐃᓕᓴᐃᔪᓐᓇᖏᒃᐳᑦ ᒍᕋᐃ 1-ᒥ ᐃᓄᒃᑐᑦ,” ᐅᖃᖅᑐᖅ ᐃᐊᓐ ᒫᑕᓐ.
ᐱᓗᖅᑯᑕᐅᓯᒪᒻᒪ ᐃᓄᒃᑐᑦ ᐅᖃᕈᓐᓇᕐᑐᓂᒃ ᐃᓕᓴᐃᔨᖃᙱᓂᕐᒧᑦ ᐊᒻᒪᓗ ᐃᓄᒃᑐᑦ ᐃᓕᓐᓂᐊᕈᑎᒃᓴᖃᙱᓗᐊᕐᓂᕐᒧᑦ. ᐃᑦᑐᓗᒃ ᐅᖃᖅᑐᖅ ᓄᓇᕗᑦ ᑐᙵᕕᒃ ᑎᒥᖓᑕ ᐊᑐᓕᖁᔭᓕᐊᖏᑦ ᓄᓇᕗᑦ ᒐᕙᒪᒃᑯᖏᓐᓄᑦ ᖃᓄᖅᑑᕆᐊᖃᕆᐊᖃᓕᓐᓂᖏᓐᓂᒃ ᐊᑐᓕᖅᑎᑦᑎᒋᐊᖅᑕᐅᑎᒋᓗᑎᒃ ᐃᓄᖕᓂᒃ ᐃᖅᑲᓇᐃᔭᖅᑎᑖᖅᐸᓪᓕᐊᓂᕐᒥᒃ ᐸᕐᓇᒍᑎᓂᒃ ᐱᓕᒻᒪᒃᓴᐃᓂᐊᕐᓗᑎᒃ ᐊᒻᒪᓗ ᐃᖅᑲᓇᐃᔭᓕᖅᑎᑦᑎᓂᐊᕐᓗᑎᒃ ᐅᓄᖅᑐᓂᒃ ᐃᓄᒃᑐᑦ ᐅᖃᕈᓐᓇᕐᑐᓐᓂᒃ ᐅᖃᐅᓯᓕᕆᔨᒻᒪᕆᓂᒃ ᐊᒻᒪᓗ ᐃᓕᓴᐃᔨᓂᒃ ᐃᓕᓐᓂᐊᕐᕕᓂ, ᑕᐃᒪᓐᓇ ᐱᖁᔭᐅᓯᒪᓂᖓᑦ ᑎᑎᕋᖅᓯᒪᔪᒥ 23-ᒥ ᓄᓇᕗᑦ ᐊᖏᕈᑎᖏᑦᑎᒍᑦ.
ᐊᑐᓕᖅᑎᑦᑎᓂᖅ ᐃᓄᖕᓂᒃ ᐃᖅᑲᓇᐃᔭᖅᑎᑖᖅᐸᓪᓕᐊᓂᕐᒥᒃ ᐸᕐᓇᒍᑎᓂᒃ ᐃᓕᓐᓂᐊᕐᓂᓕᕆᔨᒃᑯᑎᒍᑦ ᐊᑐᓕᖁᔭᐅᓚᐅᕐᓯᒪᕗᖅ 1994-ᒥ ᐊᒻᒪᓗ ᓱᓕᒃᑲᓐᓂᖅ 2008-ᒥ, ᑖᒃᑯᐊ ᐅᓄᕐᓂᖏᑦ ᐃᓄᐃᑦ ᐃᓕᓴᐃᔨᑦ ᐊᒻᒪᓗ ᐃᓕᓐᓂᐊᕐᕕᓂ ᐊᖏᔪᖅᑳᕆᔭᐅᔪᑦ 85 ᐳᓴᖑᓕᖁᔭᐅᓪᓗᑎᒃ, ᑭᓯᐊᓂᓗ ᒐᕙᒪᒃᑯᑦ ᑕᐃᒪᓐᓇᐃᖁᔭᐅᒐᓗᐊᖅᑐᑎᒃ ᑕᐃᒪᐃᒍᓐᓇᕐᓯᒪᙱᒻᒪᑕ. ᐅᓪᓗᒥᐅᔪᑦ ᐱᖓᓱᐊᖅᑎᓪᓗᐊᕐᓗᒍ ᐅᓄᕐᓂᓴᐅᖕᒪᑕ ᐃᓄᓇᑎᒃ ᐃᓕᓴᐃᔨᐅᔪᑦ ᐃᓄᐃᑦ ᖃᑦᓯᓐᓇᐅᓂᕐᓴᐅᓪᓗᑎᒃ: 453-ᖑᓪᓗᑎᒃ ᓄᓇᑖᖃᑕᐅᓯᒪᙱᑦᑐᑦ ᐊᒻᒪ 126-ᖑᓪᓗᑎᒃ ᐃᓄᐃᑦ. ᑕᐃᒪᐃᓐᓂᖓᓄᑦ, ᐊᒥᓱᑦ ᐃᓕᓐᓂᐊᕐᕖᑦ 42 ᓄᓇᕘᓕᒫᕐᒥ ᐃᓄᒃᑐᑦ ᐃᓕᓐᓂᐊᑎᑦᓯᔪᓐᓇᕐᓯᒪᙱᓚ ᐃᓕᓐᓂᐊᓕᓵᖅᑐᓄᑦ ᑕᐃᒪᓐᓇ ᐱᖁᔭᐅᓯᒪᒻᒪᑕ ᓄᓇᕗᖕᒥ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖅ.
“ᑖᓐᓇ ᑕᐃᒪᐃᑎᓪᓗᒍ ᐃᓕᓐᓂᐊᕐᕕᓂ ᐃᓄᒃᑐᑦ ᐅᖃᓪᓚᒍᓐᓇᓂᕐᒧᑦ ᐱᕙᓪᓕᐊᒍᑕᐅᔪᓐᓇᖏᒻᒪᕆᒃᑐᖅ,’ ᐊᖅᑲᖅᑐᖅ ᐃᑦᑐᓗᒃ.
ᓄᓇᕗᑦ ᑐᙵᕕᒃ ᑎᒥᖓᓄᑦ ᑲᑎᒪᔨᐅᖃᑕᐅᔪᑦ ᓈᖕᒪᓴᖅᑲᐅᔪᑦ ᐱᖁᔨᕗᖔᕈᑎᒥᒃ ᐊᕐᕋᒍᓕᒫᕐᓯᐅᑎᒥᓂᒃ ᑲᑎᒪᓂᖃᖅᑐᑎᒃ, ᓄᓇᕗᑦ ᒪᓕᒐᓕᐅᖅᑎᖏᓐᓂᒃ ᓈᖕᒪᒃᓴᖁᔨᓇᑎᒃ ᒐᕙᒪᒃᑯᑦ ᐋᖅᑭᒋᐊᕈᑎᒋᔪᒪᔭᖏᓐᓂᒃ ᐊᒻᒪᓗ ᐃᓱᒪᒃᓴᕐᓯᐅᕈᑎᖃᖁᔨᓪᓗᑎᒃ ᓄᓇᕗᑦ ᑐᙵᕕᒃ ᑎᒥᖓᑕ ᐊᑐᓕᖁᔭᓕᐊᕆᓯᒪᔭᖏᓐᓂᒃ. ᑕᐃᒪᙵᓂᑦ ᐊᑎᓕᐅᖅᑕᐅᓚᐅᕐᓯᒪᑎᓪᓗᒋᑦ ᓄᓇᕗᖕᒥ ᐊᖏᕈᑎᑦ 1993-ᖑᑎᓪᓗᒍ, ᓄᓇᕗᑦ ᑐᙵᕕᒃ ᐅᖃᓕᖅᑭᑦᑖᓯᒪᕗᑦ ᐃᖅᑲᓇᐃᔭᖃᑎᖃᕈᒪᓪᓗᑎᒃ ᒐᕙᒪᒃᑯᓐᓂᒃ ᓴᖅᑭᖃᑎᖃᕈᒪᓪᓗᑎᒃ ᐃᓕᓐᓂᐊᓂᓕᕆᔾᔪᑎᒃᓴᓂᒃ ᐃᓄᒃᑐᑦ ᐅᖃᐅᓯᕐᓂᒃ ᐊᒻᒪᓗ ᐃᓕᖅᑯᓯᓕᕆᓂᕐᒥᒃ ᐱᖃᓯᐅᔾᔨᔪᓂᒃ.
-30-
ᑐᑭᓯᒋᐊᑲᓐᓂᕈᓐᓇᖅᐳᑎᑦ:
ᑮᐅᕆ ᒪᑲᓪᔅᑭ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
ᐅᖄᓚᐅᑖ: (867) 975-4914 ᐅᖄᓚᐅᑎᕋᓛᖓ: (867) 222-2893 ᐊᑭᓕᕆᐊᖃᙱᑦᑐᖅ: 1- 888-646-0006
|
ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᓄᑦ ᐋᖅᑭᒋᐊᕈᑏᑦ
|
