ᓄᓇᕗᑦ ᑐᓐᖓᕕᒃ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᓪᓗᒥ ᐅᖃᖅᑲᐅᔪᖅ ᖁᕕᐊᒋᔭᖃᓐᖏᓂᕐᒥᓂᒃ ᓄᓇᕗᑦ ᒐᕙᒪᖓᑕ (GN) ᑐᒃᓯᕋᐅᑎᖏᓐᓂᒃ ᑮᓇᐅᔭᖅᑑᑎᒃᓴᓄᑦ. ᑮᓇᐅᔭᓕᕆᓂᕐᒧᑦ ᒥᓂᔅᑕ ᑮᑦ ᐲᑐᓴᓐ ᓴᖅᑮᓚᐅᖅᑐᖅ ᑮᓇᐅᔭᖅᑑᑎᒃᓴᓂᒃ ᓄᓇᕗᑦ ᒪᓕᒐᓕᐅᕐᕕᖓᓂ ᐃᒃᐸᑦᓴᖅ. ᑰᖅᑎ ᐅᖃᖅᑲᐅᔪᖅ ᓂᕆᐅᓚᐅᕋᓗᐊᕐᓂᕐᒥᓂᒃ ᐱᕙᓪᓕᐊᔾᔪᑎᒃᓴᓂᒃ ᓇᓗᓇᐃᕐᓯᒪᑦᓯᐊᖅᑐᓂᒃ ᐃᓄᐃᑦ ᐃᖅᑲᓇᐃᔮᖏᓐᓄᑦ ᐸᕐᓇᐅᑎᓂᒃ (IEP). ᐅᖃᖅᑲᐅᔪᖅ IEP ᑭᖑᕙᕐᓯᒪᔪᑦ ᐊᒻᒪᓗ ᒪᓕᒐᖅᑎᒍᑦ ᐊᑐᖅᑕᐅᒋᐊᓖᑦ ᐃᓛᒃᑯᑦ 23 ᓄᓇᕗᒻᒥ ᐊᖏᕈᑎᓂ.
ᑎᑭᐅᑎᒍᓐᓇᖁᓪᓗᒋᑦ ᐃᓄᑦᑎᑐᑦ ᐃᓕᓐᓂᐊᓂᕐᒧᑦ ᑐᕌᒐᕐᓄᑦ, ᑮᓇᐅᔭᒻᒪᕆᓐᓂᒃ ᐊᖏᕈᑎᖃᕆᐊᓖᑦ ᐱᓕᖕᒪᒃᓴᐅᑎᒃᓴᓂᒃ ᐃᖅᑲᓇᐃᔭᖅᑎᑖᕈᑎᒃᓴᓂᓪᓗ ᐃᓄᓐᓂᒃ ᐃᓕᓴᐃᔨᓂᒃ ᐊᒻᒪᓗ ᐃᓄᑦᑎᑑᓕᕆᔨᑖᕆᐊᓖᑦ ᐃᓚᖃᖅᑐᓂ ᐱᖕᒪᕆᐅᔪᓂᒃ ᑮᓇᐅᔭᓕᑕᐅᔾᔪᑎᓂᒃ ᐃᓄᒃᑎᑐᑦ ᐃᓕᓐᓂᐊᕈᑎᒃᓴᓕᐅᕐᓂᕐᒧᑦ. ᑕᒪᓐᓇ ᐊᓪᓗᕆᐊᕈᑕᐅᓇᔭᖅᑐᖅ ᓱᖅᑯᐃᕐᓯᓯᒪᒍᑕᐅᓗᓂ ᐊᔪᓐᖏᑦᑐᓂᒃ ᐃᓄᓐᓂᒃ ᐃᖅᑲᓇᐃᔭᖅᑎᑦᓯᓂᕐᒥᒃ ᒐᕙᒪᒃᑯᑦ ᐃᖅᑲᓇᐃᔭᖏᓐᓂ. ᓱᓕᒃᑲᓐᓂᖅ, ᐱᐅᔫᒐᓗᐊᖅ ᓄᓇᕗᑦ ᒐᕙᒪᖓ ᐅᓄᕐᓯᒋᐊᕆᓂᖓ ᑮᓇᐅᔭᓕᑕᐅᒍᑎᓂᒃ ᐃᓅᓯᕐᒥᒃ ᑭᐱᓯᑦᑕᐃᓕᓂᕐᒧᑦ, ᐊᖏᓕᒋᐊᖅᑕᐅᑉᐸᑕ ᐃᓄᑦᑎᑐᑦ ᐃᓕᓴᐃᒍᑏᑦ ᐃᓕᓐᓂᐊᕕᓐᓂ ᐋᖅᑭᒍᑕᐅᓇᔭᖅᑐᑦ ᐅᐱᒍᓱᓐᓂᖏᓐᓂᒃ ᐃᓄᐃᑦ ᒪᒃᑯᑦᑐᑦ ᐊᒻᒪᓗ ᐃᑯᓪᓚᕈᑕᐅᓗᓂ ᓴᒃᑯᐃᔭᐅᕙᓪᓕᐊᓂᖓᓄᑦ ᐃᓄᐃᑦ ᐃᓕᖅᑯᓯᖓ.
“ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᐅᖃᓚᐅᖅᑐᖅ ᐃᓕᓐᓂᐊᕐᓂᖅ ᖁᓪᓕᕐᐹᐅᒋᐊᖓ ᓯᕗᓪᓕᐅᔾᔭᐅᖁᔭᖏᓐᓂ, ᑭᓯᐊᓂ ᓄᓇᕗᑦ ᒐᕙᒪᖓᑕ ᑐᒃᓯᕋᐅᑎᖏᑦ ᑮᓇᐅᔭᖅᑑᑎᒃᓴᖏᑦ ᓇᓗᓇᐃᖅᑕᐅᔪᑦ ᐅᓄᕐᓯᒋᐊᕈᑕᐅᔾᔮᖏᒋᐊᖏᑦ ᐊᑐᐃᓐᓇᐅᔪᓂᒃ ᐃᓄᓐᓂᒃ ᐃᓕᓴᐃᔨᓂᒃ ᐊᓪᓛᑦ ᐅᓄᕐᓯᒋᐊᕈᑕᐅᔾᔮᖏᑦᑐᑦ ᐃᓄᒃᑎᑐᑦ ᐅᖃᐅᓯᖅ ᐃᓕᓴᐃᒍᑕᐅᖃᑦᑕᕐᓂᖓᓂᒃ. ᐱᐅᓐᖏᓪᓚᕆᑦᑐᖅ. ᐊᑐᖅᑕᐅᒍᓐᓃᐸᓪᓕᐊᓂᖓ ᐃᓄᑦᑎᑐᑦ ᐊᒻᒪᓗ ᓄᓇᕗᒻᒥ ᐃᓕᓐᓂᐊᓂᕐᒧᑦ ᐊᐅᓚᓂᖓ ᑲᔪᓯᑐᐃᓐᓇᓂᐊᖅᑐᖅ ᑖᒃᑯᑎᒎᓇ ᒐᕙᒪᑎᒍᑦ. ᓂᕆᐅᓪᓚᕆᓚᐅᕋᓗᐊᕋᒪ ᑕᑯᓂᐊᕋᓱᒋᓪᓗᖓ ᑮᓇᐅᔭᖅᑑᑎᒃᓴᓂᒃ ᐃᓗᓕᓕᓐᓂᒃ ᐱᖕᒪᕆᐅᔪᓂᒃ ᓴᓂᕐᕙᐃᒍᑕᐅᔾᔭᐅᓂᐊᕆᐊᖏᑦ ᐃᓄᓐᓄᑦ ᐃᓕᓴᐃᔨᓄᑦ ᐊᒻᒪᓗ ᐃᓄᑦᑎᑐᑦ ᐃᓕᓐᓂᐊᕈᑎᓂᒃ,” ᐅᖃᖅᑐᖅ ᑰᑦᑎᖅ.
ᑭᐅᕆ ᒪᒃᓕᔅᑭ
ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4914
ᐊᑭᖃᓐᖏᑦᑐᖅ 1-888-646-0006
ᐃᑉᐱᐊᔪᒻᒥᒐᖅ: (867) 222-2893
www.tunngavik.com
