ᐃᕐᖐᓐᓇᖅ ᓴᖅᑭᖅᑕᐅᒋᐊᓕᒃ
(ᐄᐳᕈᓪ 15, 2024 – ᐃᖃᓗᐃᑦ, ᓄᓇᕗᑦ) ᐱᓇᓱᐊᕈᓯᑦᑎᓐᓂ ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᖁᕕᐊᓱᑦᑐᖅ ᑲᒪᒋᔭᖃᕐᓂᐊᓂᕐᒥᓂᒃ ᓘᑦᑖᒻᒪᕆᒃ ᑐᕇᓴ ᑖᒻ, ᑲᓇᑕ ᐃᖢᐊᖅᓴᐃᔨᒻᒪᕆᖓ, ᓄᓇᕗᑦ ᓄᓇᓕᖕᓅᕐᓂᐊᕐᓂᖏᓐᓂ ᓇᐅᔮᑦ, ᒥᑦᑎᒪᑕᓕᒃ, ᐊᒻᒪᓗ ᐃᖃᓗᐃᑦ. ᓘᑦᑖᒻᒪᕆᒃ ᑖᒻ ᐳᓚᕋᖃᑕᐅᓂᐊᕐᓂᖓ ᓈᖕᒪᓈᕆᐊᖅᓯᒪᔪᖅ ᓴᖅᑭᖅᑕᐅᓂᖓᓂᒃ ᓄᓇᓕᓕᒫᖅ−ᖃᐅᔨᓴᖅᑕᐅᓂᐊᕐᓂᖏᓐᓂᒃ ᐃᓄᖏᑦ ᐳᕙᓪᓗᓇᖅᑐᖃᕐᒪᖔᑕ (TB) ᓇᐅᔮᓂ.
ᓇᐅᔮᓂᓗ ᒥᑦᑎᒪᑕᓕᒻᒥᓗ ᒫᓐᓇ ᓯᐊᒻᒪᖃᑦᑕᕐᒪᑦ ᐳᕙᓪᓗᓐᓂᖅ, ᓴᐳᔾᔭᐅᓯᒪᒍᓐᓇᖅᑐᖅ ᒪᒥᓴᖅᑕᐅᔪᓐᓇᖅᑐᓂᓗ ᐋᓐᓂᐊ ᐊᑦᑐᐃᓂᖃᖅᓯᒪᔪᖅ ᓄᓇᕗᒻᒥ ᐃᓄᓐᓂᒃ ᖁᑦᓯᓂᖅᓴᒥᒃ 400-ᖏᖅᓱᖅᑐᒥᒃ ᑲᓇᑕᒥ ᐊᑐᖅᑕᐅᕙᑦᑐᒥᒃ. ᓄᓇᕗᒻᒨᕐᓂᖓ ᑲᓇᑕᒥ ᖁᑦᓯᓂᖅᐹᖓ ᓘᑦᑖᕐᔪᐊᖅ ᐱᓕᕆᖃᑎᖃᕐᓂᐊᖅᑐᖅ ᑐᙵᕕᒃᑯᓐᓂᒃ, ᐊᒻᒪᓗ ᑲᑐᔾᔨᖃᑎᖃᕐᓗᓂ ᓄᓇᕗᑦ ᒐᕙᒪᖓᓂᒃ, ᖃᐅᔨᑐᐃᓐᓇᖏᓪᓗᓂ ᑕᑯᑦᓯᐊᒻᒪᕆᒍᒪᓪᓗᓂ ᐃᓚᖏᓐᓂᒃ ᐃᓅᓯᕐᒧᑦ ᐃᖢᐃᓪᓕᐅᕈᑕᐅᕙᑦᑐᓂᒃ, ᓲᕐᓗ ᐃᓪᓗᑭᑦᓴᕐᓂᖅ ᐊᒻᒪᓗ ᓂᕆᔭᑦᓴᖃᑦᓯᐊᖃᑦᑕᖏᓐᓂᖅ, ᐃᖢᐃᓗᑕᐅᖃᑦᑕᖅᑐᒥᒃ ᐃᓗᓯᖏᓐᓄᑦ ᓄᓇᕗᒻᒥ ᐃᓄᐃᑦ.
ᓘᑦᑖᕐᔪᐊᖅ ᑖᒻ ᐃᓚᖃᕐᓂᐊᖅᑐᖅ ᐳᓚᕋᓐᓂᕐᒥᓂ ᑐᙵᕕᒃᑯᓐᓂ ᐊᖓᔪᖅᑳᑉ−ᑐᒡᓕᐊᓂᒃ ᐹᓪ ᐃᕐᖓᐅᑦ, ᓄᓇᕗᒻᒥ ᒥᓂᔅᑕᖓᓂᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂ ᔮᓐ ᒪᐃᓐ, ᓄᓇᕗᒻᒥ ᐃᖢᐊᖅᓴᐃᔨᒻᒪᕆᐅᑉ ᑐᒡᓕᐊᓂᒃ ᓘᑦᑕᖅ ᐃᑯᐊ ᐋᒡᔨᒫᓐᖕ, ᐊᒻᒪᓗ ᐊᒥᓱᒐᓚᓐᓂᒃ ᐃᖅᑲᓇᐃᔭᖅᑎᖏᓐᓂᒃ ᑐᙵᕕᒃᑯᑦ, ᐋᓐᓂᐊᖅᑐᓕᕆᔨᕐᔪᐊᑦ ᑎᒥᖓᓂᒃ ᑲᓇᑕᒥ (PHAC), ᐊᒻᒪᓗ ᓄᓇᕗᑦ ᒐᕙᒪᖓᓂᒃ.
“ᓄᓇᕗᒻᒥ ᐃᓄᐃᑦ ᐊᑦᓱᕈᕐᓇᑐᒃᑰᖃᑦᑕᕐᒪᑕ ᐊᑦᑐᐃᓂᖃᓲᖑᙱᑦᑐᓂᒃ ᑲᓇᑕᒥᐅᓕᒫᒐᓚᓐᓂᒃ ᐃᖢᐊᖅᓴᖅᑕᐅᓂᕐᒧᑦ,” ᐅᖃᖅᑐᖅ ᐹᓪ ᐃᕐᖓᐅᑦ, ᑐᙵᕕᒃᑯᓐᓂ ᐊᖓᔪᖅᑳᑉ−ᑐᒡᓕᐊ. “ᑕᒪᐅᙵᓂᐊᕐᓂᖓ ᓘᑦᑖᕐᔪᐊᖅ ᑖᒃᑕ ᑖᒻ ᓄᓇᕗᑦ ᓄᓇᓕᖏᓐᓅᖃᑦᑕᕐᓗᓂ ᑕᑯᑦᓯᐊᒻᒪᕆᒍᓐᓇᓂᐊᖅᑐᖅ ᐃᓚᖏᓐᓂᒃ ᐊᐳᖅᓯᒪᕕᐅᕙᑦᑐᓂᒃ ᐃᓄᓐᓄᑦ ᖃᐅᔨᓇᓱᐊᖅᑐᑎᒃ ᐋᓐᓂᐊᖅᑐᓕᕆᔨᒃᑯᑦ ᐊᐅᓚᑦᓯᔾᔪᑎᖏᓐᓂᒃ ᓄᓇᕗᒻᒥ.”
ᐳᓚᕋᓐᓂᖓ ᐃᓱᓕᒍᑎᖃᕐᓂᐊᖅᑐᖅ ᒪᕐᕉᓐᓂᒃ ᐅᓪᓘᓐᓂᒃ ᑲᑎᒪᖃᑎᖃᖃᑦᑕᕐᓗᓂ ᑲᑎᖃᑎᖃᖃᑦᑕᕐᓗᓂᓗ ᐃᖃᓗᓐᓂ. ᐳᕙᓪᓗᑦᑐᓕᕆᓂᐊᕋᓗᐊᖅᑎᓪᓗᒋᑦ TB ᑕᒪᐅᙵᖅᓯᒪᓂᓕᒫᖓᓂ, ᓘᑦᑖᕐᔪᐊᖅ ᑖᒻ ᑲᑎᖃᑎᖃᖃᑦᑕᓂᐊᕐᒥᔪᖅ ᓄᓇᓕᓐᓂ ᑲᑐᔾᔨᖃᑎᒌᑦᑐᓂᒃ ᑲᑐᔾᔨᖃᑎᒌᓂᓪᓗ ᐋᔩᕋᖃᑎᖃᕐᓗᓂ ᐊᖏᕐᕋᖃᙱᑦᑐᓕᕆᓂᕐᒥᒃ, ᐃᖢᐊᖅᓴᐃᔾᔪᑎᓂᒃ ᐃᓕᓐᓂᐊᓂᕐᒥᒃ, ᐃᓱᒪᒃᑰᖅᑐᓕᕆᓂᕐᒥᒃ, ᐊᒻᒪᓗ ᐃᓗᓯᕐᒨᖓᔪᓂᒃ ᑐᑭᓯᓂᐊᕈᑕᐅᕙᑦᑐᓂᒃ ᓄᓇᕗᒻᒥ, ᑕᒪᒃᑯᓂᖓᓗ ᐊᓯᖏᓐᓂᒃ.-30-
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
