ᐃᖃᓗᑦᑑᑎᐊᖅ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᕆᑲᐃᓐᓇᖅᑕᖓ ᔭᐃᒥᓯ ᐃᑦᑐᓗᒃ ᖁᓅᒻᒥᖅᓯᒪᔪᖅ ᐅᓐᓄᒃ ᓂᕈᐊᕐᓂᕆᓚᐅᖅᑕᖏᓐᓄᑦ ᒪᓕᒐᓕᐅᖅᑎᕐᔪᐊᑦ ᒪᓕᒐᓕᐅᕐᕕᕐᔪᐊᒥ ᖁᑭᐅᑏᑦ ᑎᑎᖃᖅᑕᐅᓯᒪᔭᕆᐊᖃᕐᓂᖏᓐᓄᑦ. ᒪᓕᒐᓕᐅᖅᑎᕐᔪᐊᑦ ᓂᕈᐊᓚᐅᖅᑐᑦ ᑎᑎᕋᕐᑕᐅᓯᒪᔪᑦ 153-151-ᒥᒃ ᐊᑐᐃᓐᓇᕈᒪᓪᓗᑎᒃ.
“ᑐᙵᕕᒃᑯᑦ ᖁᓅᒻᒥᖅᓯᒪᔪᑦ ᖁᑭᐅᑏᑦ ᑎᑎᕋᖅᑕᐅᓯᒪᔭᕆᐊᖃᕐᓂᖏᑦ ᐃᓕᓯᒪᐃᓐᓇᓂᐊᕐᓂᖏᓐᓄᑦ. ᑕᒪᓐᓇ ᐱᔭᕆᐊᑐᖅᐸᓪᓕᐊᖏᓐᓇᓂᐊᑐᖅ ᐃᓄᖕᓄᑦ ᖁᑭᐅᑎᑖᕈᒪᑎᓪᓗᒋᑦ ᐊᓯᕙᕈᑎᒃᓴᒥᓐᓄᑦ ᐊᒻᒪ ᓂᕿᒃᓴᖅᓯᐅᕆᐊᖃᕐᓂᖏᓐᓄᑦ ᖃᑕᓐᖑᑎᖏᓐᓄᑦ,” ᐅᖃᖅᑐᖅ ᐃᑦᑐᓗᒃ.
ᑖᓐᓇ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎ ᐱᔪᓐᓇᑎᑦᓯᔪᖅ ᐃᓄᖕᓂᒃ ᐊᖑᓇᓱᒍᓐᓇᕐᓗᑎᒃ ᐱᔪᓐᓇᐅᑎᑖᖅᓯᒪᖏᒃᑲᓗᐊᕐᓗᑎᒃ. ᔪᓚᐃ, 2003-ᒥᓂᒃ, ᓄᖅᑲᖓᑎᑕᐅᑲᐃᓐᓇᓚᐅᕐᒪᑕ ᓄᓇᕗᒻᒥ ᐃᖅᑲᖅᑐᐃᕕᑎᒍᑦ ᑎᑎᕋᖅᑕᐅᓯᒪᔭᕆᐊᖃᕐᓂᖏᒃ ᐊᒻᒪ ᐱᔪᓐᓇᐅᑎᑖᖅᓯᒪᔭᕆᐊᖃᕐᓂᖏᑦ ᐅᕘᓇ ᖁᑭᐅᑎᓕᕆᓂᕐᒧᑦ ᒪᓕᒐᕐᔪᐊᖓᑎᒍᑦ ᓄᓇᕗᒻᒥ ᐃᓄᓐᓄᑦ ᖁᑭᐅᑎᓂᒃ ᐊᖑᓇᓱᐊᕈᑎᖃᖅᐸᒃᑐᓄᑦ.
ᐃᑦᑐᓗᒃ ᐅᖃᖅᑐᖅ ᑐᙵᕕᒃᑯᑦ ᓂᕆᐅᑦᑐᑦ ᐱᓕᕆᖃᑎᖃᕐᓂᐊᓂᕐᒥᓂᒃ ᒪᓕᒐᓕᐅᖅᑎᕐᔪᐊᒥᒃ ᓕᐅᓇ ᐊᒡᓘᒃᑲᕐᒥᒃ ᐊᒻᒪ ᑲᓇᑕᐅᑉ ᒐᕙᒪᒃᑯᖏᓐᓂ ᐱᕙᓪᓕᐊᑎᑦᓯᓂᕐᒥᒃ ᓄᑖᒥᒃ ᖁᑭᐅᑎᓄᑦ ᐊᑐᐊᒐᐅᓂᐊᖅᑐᓂᒃ ᐅᐱᒍᓱᓪᓗᑎᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪ ᐊᒃᑐᑦᓯᐊᕐᓗᑎᒃ ᓄᓇᕗᒻᒥ ᖃᓄᐃᓕᖓᓪᓚᕆᓐᓂᖓᓄᑦ.
