ᓴᒃᑯᑕᐅᑲᐅᑎᒋᔭᕆᐊᓕᒃ
(ᐊᒃᑑᕝᕙ 28, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᖃᓚᐅᖅᑐᑦ ᐃᖃᓗᓐᓂ, ᓄᓇᕗᑦ ᐱᓇᓱᐊᕈᓯᐅᓚᐅᖅᑐᒥ. ᓄᓇᕗᑦ ᑐᙵᕕᒃ ᑎᒥᖓ ᐃᓚᒋᔭᐅᔪᑦ ᐅᖃᐅᓯᖃᖃᑦᑕᓚᐅᖅᑐᑦ ᐱᒻᒪᕆᓂᒃ ᐱᔾᔪᑎᓂᒃ ᓄᓇᕗᒻᒥ ᐃᓄᒻᒪᕆᖏᖕᓄᑦ, ᐊᒻᒪᓗ ᑲᔪᓯᑎᑦᑎᓪᓗᑎᑦ ᐊᒥᓱᓂᑦ ᐱᖁᔨᕗᖔᕈᑎᓂᑦ, ᓲᕐᓗᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ, ᐃᒡᓗᓕᕆᓂᖅ ᐊᒻᒪᓗ ᐱᖁᑎᕐᔪᐊᓕᕆᓂᖅ ᐊᒻᒪᓗ ᐃᓄᒃᑐᑦ ᐱᓕᕆᐊᖃᕈᑕᐅᓂᖓ ᐱᔨᑦᑎᕋᕈᑎᖏᓪᓗ.
ᓄᓇᒦᙶᖅᑐᓂᒃ ᑮᓇᐅᔭᖅᑖᕈᑕᐅᔪᑦ ᐃᓯᖅᐸᓪᓕᐊᓂᖏᖕᓄᑦ ᐊᑐᐊᒐᖅ
ᐊᒥᓱᑦ ᐱᖁᔨᕗᖔᕈᑏᑦ ᑲᔪᓯᑎᑕᐅᓯᒪᔪᑦ ᑕᒫᓂ ᐊᕐᕌᒍᑕᒫᑦ ᑲᑎᒪᕕᔾᔪᐊᕐᓂᖏᖕᓂ, ᓄᓇᕗᑦ ᑐᙵᕕᒃ ᑎᒥᖓᑕ ᐃᓚᒋᔭᐅᔪᖁᑎᖏᑦ ᐊᖏᖅᓯᓚᐅᖅᑐᑦ ᓄᑖᕈᖅᑎᑕᐅᓂᖏᑦᑕ ᓄᓇᒦᙶᖅᑐᓂᒃ ᑮᓇᐅᔭᖅᑖᕈᑕᐅᔪᑦ ᐃᓯᖅᐸᓪᓕᐊᓂᖏᖕᓄᑦ ᐊᑐᐊᒐᖅ ᐊᒻᒪᓗ ᓄᓇᕗᒻᒥ ᐃᓄᐃᑦ ᓄᓇᒦᙶᖅᑐᓂᑦ ᑮᓇᐅᔭᑦ ᐃᓯᖅᐸᓪᓕᐊᔪᑦ ᐸᐸᑦᑎᓂᕐᒧᑦ ᐊᖏᕈᑎ. ᓇᓪᓕᐅᒃᑯᒫᑦ ᑮᓇᐅᔭᑦ ᑎᑭᓐᓇᓱᐊᖅᑕᒥᓄᑦ ᐃᓱᓕᑦᑎᓕᕐᒪᑦ ᐱᓇᓱᐊᒐᖃᖅᓯᒪᓂᑰᓪᓗᓂ $110 ᒥᓕᐊᓐ ᑮᓇᐅᔭᑦ. ᓄᑖᕈᕆᐊᖅᓯᒪᔪᑦ ᐊᑐᐊᒐᖅ ᐱᔪᓐᓇᑎᑦᑎᕗᖅ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐋᖅᑭᒃᓱᐃᓗᑎᑦ ᐱᓕᕆᐊᕐᓂᒃ ᐃᓄᖕᓄᑦ ᓇᓚᐅᒃᑖᕋᒃᓴᖃᕈᓐᓇᖅᑐᑎᑦ ᐊᕐᕌᒍᑕᒫᑦ ᐊᑭᓕᐅᑕᐅᓗᑎᑦ $10 ᒥᓕᐊᓐ ᑮᓇᐅᔭᑦ ᐱᕈᖅᓴᖅᑎᑕᐅᓇᓱᐊᖅᑐᑦ ᑮᓇᐅᔾᔭᒃᓵᖏᓐᓂᒃ. ᓄᑖᕈᕆᐊᖅᓯᒪᔪᑦ ᐊᑐᐊᒐᖅ ᐊᑭᓖᔪᓐᓇᖅᑎᑦᑎᕗᑦ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᐊᕐᓄᑦ ᐊᒻᒪᓗ ᐱᕈᖅᓴᕈᑎᓄᑦ ᐃᑲᔪᕐᓂᖃᕋᖅᑐᑦ ᐅᓪᓗᒥᐅᔪᖅ ᑭᖑᕚᕆᔭᐅᔪᓂᑦ. ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑮᓇᐅᔭᓂᑦ ᐊᑐᕐᓂᐊᕐᓂᕋᖅᓯᒪᒋᕗᑦ ᐊᕝᕙᖏᑦ ᑮᓇᐅᔭᑦ ᐊᑭᓕᐅᑕᐅᖃᑦᑕᓚᐅᖅᓯᒪᔪᓂᑦ ᐊᕐᕌᒍᑕᒫᑦ ᐊᒻᒪᓗ ᑐᓴᐅᒪᖃᑎᒌᑦᑎᐊᕐᓂᖅᓴᐅᓕᕐᓗᑎᑦ ᖃᐅᔨᒪᓇᑦᑎᐊᖁᓪᓗᒍ ᓄᓇᕗᒻᒥᐅᑦ ᐃᓄᒻᒪᕆᖏᑦ ᑐᓴᐅᒪᒐᓗᐊᕐᒪᖔᕐᒥᒃ ᐱᕙᓪᓕᐊᓂᕐᒧᑦ ᐃᑲᔫᑕᐅᒐᓗᐊᕐᒪᖔᑦ ᐅᔭᕋᓐᓂᐊᖅᑐᓂᑦ.
ᐃᒡᓗᓕᕆᓂᖅ ᐊᒻᒪᓗ ᐱᖁᑎᕐᔪᐊᓕᕆᓂᖅ
ᐃᓚᒋᔭᐅᔪᑦ ᐱᖁᔨᕗᖔᕈᑎᓂᑦ ᑲᔪᓯᑎᑦᑎᓚᐅᖅᑐᑦ ᓄᓇᕗᑦ ᒐᕙᒪᖏᖕᓂᒃ ᐊᒻᒪᓗ ᑲᓇᑕᒥ ᒐᕙᒪᒃᑯᑦ ᑲᒪᒋᔭᐅᖁᔭᐅᓕᕐᓗᑎᑦ ᐃᒡᓗᑭᒃᓴᓗᐊᖅᑐᐊᓘᓕᕐᓂᕐᒧᑦ, ᐱᖃᓯᐅᑎᓪᓗᒋᑦ ᐊᖏᕐᕋᖃᙱᑦᑐᓂᖅ, ᖃᐅᔨᔭᒃᓴᐅᙱᑦᑐᑦ ᐊᖏᕐᕋᖃᐅᙱᑦᑐᑦ, ᐊᑦᑕᕐᓇᖅᑐᓂᒃ ᓈᒻᒪᙱᑦᑐᓂᑦ ᐃᒡᓗᐃᑦ ᖃᓄᐃᓕᖓᓕᕐᓂᖏᑦ, ᐊᒻᒪᓗ ᐃᒡᓗᒃᓴᖃᙱᓗᐊᖅᑐᑦ ᓈᒻᒪᑦᑐᓂᑦ ᐊᒻᒪᓗ ᑮᓇᐅᔭᓂᑦ ᐊᑐᑲᐅᑎᒋᖁᔭᐅᓕᕐᓗᑎᑦ ᐃᒡᓗᓕᕆᓂᕐᒧᑦ.
ᑕᒫᓂ ᐱᓇᓱᐊᕈᓯᐅᓚᐅᖅᑐᒥᒃ ᐱᒋᐊᕋᑖᖅᑎᓪᓗᒍ, ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᔪᓯᑎᑦᑎᓚᐅᖅᓯᒪᔪᑦ ᐱᖁᔨᕗᖔᕈᑎᒥᒃ ᑮᓇᐅᔭᓂᑦ ᐊᑐᖁᔨᓪᓗᑎᑦ $10 ᒥᓕᐊᓐ ᑮᓇᐅᔭᓂᑦ ᐊᑐᖅᑐᖃᕐᓗᓂ ᓴᒃᑯ ᖃᓄᖅᑑᕈᑎᓕᐅᖅᓯᒪᓪᓗᓂ ᐃᒡᓗᓕᐅᕐᓂᕐᒧᑦ ᐊᕐᕕᐊᓂ ᐊᒻᒪᓗ $2 ᒥᓕᐊᓐ ᑮᓇᐅᔭᓂᒃ ᐊᑐᖅᑐᖃᕐᓗᓂ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᕐᔪᐊᖓᓄᑦ.
ᐃᓚᒋᔭᐅᔪᑦ ᑲᔪᓯᑎᑦᑎᓚᐅᕆᕗᑦ ᐱᖁᔨᕗᖔᕈᑎᒥᒃ ᐊᔭᐅᖅᑐᐃᓪᓗᑎᑦ ᓄᓇᕗᑦ ᒐᕙᒪᖏᖕᓂᒃ ᐋᖅᑮᖁᓪᓗᒋᑦ ᐋᓐᓂᐊᕐᕕᒻᒧᑦ ᐊᐅᓪᓚᖅᑐᑦ ᓇᔪᒐᒃᓴᖏᖕᓂᒃ ᑲᖏᖅᖠᓂᕐᒥ ᐊᒻᒪᓗ ᐃᖃᓗᒃᑑᑦᓯᐊᕐᒥ, ᖃᐅᔨᒪᓇᑦᑎᐊᖁᓪᓗᒍ ᐋᓐᓂᐊᕐᕕᓕᐊᖅᑐᑦ ᓈᒻᒪᑦᑐᒃᑯᑦ ᓇᔪᒐᒃᓴᖃᖃᑦᑕᕐᓂᐊᕋᓗᐊᕐᒪᖔᕐᒥᒃ ᐊᖅᑯᓵᖅᑎᓪᓗᒋᑦ ᐊᕕᑦᑐᖅᓯᒪᔪᓂ ᐊᖅᑯᓵᕐᕖᓐᓂᒃ ᐊᒻᒪᓗ ᖃᖓᑕᓂᕆᓂᐊᖅᑕᖏᑦ ᑭᖑᕙᕆᐊᖅᑎᓪᓗᒋᑦ ᐅᕝᕙᓘᓐᓂᑦ ᖁᔭᓈᖅᑕᐅᖃᑦᑕᖅᑎᓪᓗᒋᑦ. ᐋᓐᓂᐊᕐᕕᓕᐊᖅᑐᓄᑦ ᑕᒻᒫᕐᕖᑦ ᐊᒃᓱᕈᕐᓇᖅᑎᑦᑎᙲᓐᓇᕋᔭᖅᑐᑦ ᐋᓐᓂᐊᕐᕕᓕᐊᖅᑐᓄᑦ ᐊᐅᓪᓚᖅᑐᓄᑦ ᐊᒻᒪᓗ ᒐᕙᒪᒃᑯᓐᓂᑦ ᑮᓇᐅᔭᓂᑦ ᐊᑐᙱᓂᖅᓴᐅᑎᑦᑎᒃᑲᓐᓂᕐᓗᑎᑦ ᐊᑯᓂᐅᔪᒧᑦ ᑕᑯᓐᓈᕐᓗᒍ.
ᐃᓄᒃᑑᖓᓗᒋᑦ ᐱᓕᕆᐊᖑᔪᑦ ᐱᔨᔅᓯᕋᕈᑏᓪᓗ
ᓄᓇᕗᑦ ᑐᙵᕕᒃ ᑎᒥᖓ ᐃᓚᒋᔭᐅᔪᑦ ᒪᕐᕉᓐᓂᒃ (2) ᐱᖁᔨᕗᖔᕈᑏᓐᓂᒃ ᑲᔪᓯᑎᑦᑎᓚᐅᕐᒥᔪᑦ ᑲᒪᒋᔭᐅᖁᓪᓗᒍ ᐃᓲᒫᓗᒍᑎᒋᔭᐅᔪᖅ ᐃᓄᒃᑐᑦ ᐅᖃᐅᓯᖅ ᐊᓯᐅᔨᔭᐅᓂᖓ ᓄᓇᕗᒻᒥ, ᐃᓄᓐᓂᒃ ᑭᒃᑯᑐᐃᓐᓇᕐᓂᒃ ᐱᔨᔅᓯᕋᓲᕐᓂᒃ ᐊᒻᒪᓗ ᐱᕙᓪᓕᐊᔪᑎᒍᑦ ᐊᑐᐃᓐᓇᐅᒪᓂᖓ ᐃᓄᒃᑐᑦ.
ᐃᓄᐃᑦ ᐅᖃᐅᓯᖏᑦ ᓴᐳᒻᒥᔭᐅᓂᖓᓄᑦ ᐱᖁᔭᖅ ᐋᖅᑭᒃᑕᐅᓚᐅᖅᓯᒪᒐᓗᐊᕐᒪᑦ ᒐᕙᒪᒃᑯᑦ ᑲᑐᔾᔨᖃᑎᒌᖑᔪᓪᓗ ᐱᓕᕆᐊᖃᖅᑎᑦᑎᔪᑦ ᐱᔨᔅᓯᕋᖅᑐᓪᓗ ᐃᓄᖕᓄᑦ ᑭᒃᑯᑐᐃᓐᓇᕐᓄᑦ ᐊᑐᐃᓐᓇᐅᒪᒐᓗᐊᕐᒪᖔᕐᒥᒃ ᐃᓄᒃᑑᖓᓗᑎᑦ. ᓄᓇᕗᑦ ᒐᕙᒪᖏᑦ ᐊᒻᒪᓗ ᓇᖕᒥᓂᖁᑎᓖᑦ ᒪᓕᙱᑦᑐᑦ ᐃᓄᐃᑦ ᐅᖃᐅᓯᖏᑦ ᓴᐳᒻᒥᔭᐅᓂᖓᓄᑦ ᐱᖁᔭᕐᒥᒃ ᐊᕝᕕᐊᕈᑎᓕᐅᑐᐃᓐᓇᖅᖢᑎᑦ ᐃᓄᒻᒪᕆᖕᓄᑦ ᐱᔨᑦᑎᕋᕈᑎᓂᒃ ᐊᒻᒪᓗ ᐃᓚᖓᒍᑦ, ᖃᑦᑏᓐᓇᕈᕆᐊᖅᓯᒪᓕᖅᑐᑦ ᐊᒥ ᓱᓂᖏᑦ ᐃᓄᒃᑑᖅᐸᑦᑐᑦᑦ ᓄᓇᕗᓕᒫᕐᒥ. ᓄᓇᕗᑦ ᑐᙵᕕᒃ ᑎᒥᖓ ᓄᓇᕗᑦ ᒐᕙᒪᒃᑯᖏᖕᓂ ᒪᓕᖁᔨᔪᑦ ᐃᓄᐃᑦ ᐅᖃᐅᓯᖏᑦ ᓴᐳᒻᒥᔭᐅᓂᖓᓄᑦ ᐱᖁᔭᕐᒥᒃ ᐊᒻᒪᓗ ᓴᓂᕐᕙᐃᓗᑎᑦ ᓈᒻᒪᑦᑐᓂᑦ ᑮᓇᐅᔭᓂᒃ ᐃᓄᒃᑐᑦ ᐱᓕᕆᐊᖑᓂᒃᓴᖓᓄᑦ ᓴᐳᒻᒥᐅᓯᖅᑕᐅᖁᓪᓗᒍ ᐊᒻᒪᓗ ᐊᑐᕐᔫᒥᓕᖅᑎᑕᐅᖁᓪᓗᒍ ᐃᓄᒃᑐᑦ.
ᖄᖓᒍᒃᑲᓐᓂᓂᖅ, ᐱᖁᔨᕗᖔᕈᑎᒥᒃ ᑲᔪᓯᑎᑦᑎᓂᖃᓚᐅᕐᒥᔪᑦ ᑲᓇᑕᒥ ᒐᕙᒪᒃᑯᓐᓂ ᓴᓂᕐᕙᐃᖁᓪᓗᒋᑦ ᐊᒥᓲᓂᖅᓴᒃᑲᓐᓂᕐᓂᒃ ᑮᓇᐅᔭᓂᑦ ᐊᑐᖅᑕᐅᖃᑦᑕᕋᔭᖅᑐᑦ ᐃᓄᒃᑎᑐᑦ ᑐᓴᒐᒃᓴᓕᐅᖅᐸᑦᑐᓄᑦ, ᑕᒪᐃᓐᓂ ᐃᓄᖕᓄᑦ ᓯᕗᒃᑲᖅᑕᖅᑏᑦ ᑕᑯᓐᓇᕋᒃᓴᓕᐅᖅᑎᐅᔪᑦ ᐋᖅᑭᒃᓱᐃᖁᓪᓗᒋᑦ ᑕᑯᒃᓴᐅᑎᑦᑎᒐᔭᕐᓗᑎᑦ ᐊᒥᓲᓂᖅᓴᒃᑲᓐᓂᕐᓂᒃ ᐃᑲᕐᕋᓂᒃ ᐊᒻᒪᓗ ᓇᓖᕌᕋᒃᓴᓂᑦ ᐃᓄᒃᑐᑦ ᑕᑯᓐᓇᒐᒃᓴᓕᐅᓲᑦ ᑕᓚᕖᓴᓕᕆᕙᑦᑐᓪᓗ ᑕᑯᒃᓴᐅᑎᑦᑎᓪᓗᑎᑦ; ᐊᒻᒪᓗ ᐋᖅᑭᒋᐊᖅᑕᐅᖁᓪᓗᒍ ᑕᑯᒃᓴᐅᑎᑦᑎᓂᕐᒧᑦ ᑕᓚᕖᓴᒃᑯᑦ ᓈᓚᐅᑎᒃᑯᓪᓗ ᐱᖁᔭᖓᓂᒃ ᐊᒻᒪᓗ ᐊᑐᐊᒐᕋᓛᖏᖕᓂᒃ ᓄᓇᖃᖅᑳᖅᓯᒪᔪᓄᑦ ᑕᑯᓐᓇᒐᒃᓴᓕᐅᖅᑏᑦ ᐊᑭᓖᑎᑦᑎᖃᑦᑕᕐᓗᑎᑦ ᑕᑯᓐᓇᖃᑦᑕᕐᓂᐊᖅᑕᒥᓄᑦ ᑕᓚᕖᓴᒃᑯᑦ ᐊᑦᑎᓐᓂᖅᓴᐅᒐᓗᐊᕐᓗᒍ ᖃᓄᐃᑦᑑᔭᕆᐊᖃᕈᑎᖏᑦ, ᐊᒻᒪᓗ ᓴᙵᑦᑎᑕᐅᓕᕐᓗᑎᑦ ᓄᓇᖃᖅᑳᖅᓯᒪᔪᑦ ᐅᖃᐅᓰᑦ ᑲᓇᑕᓕᒫᕐᒥ.
ᐃᓄᒻᒪᕇᑦ ᐃᖅᑲᓇᐃᔭᖅᑎᑕᐅᓂᖏᑦ
ᓄᓇᕗᑦ ᑐᙵᕕᒃ ᑎᒥᖓᓄᑦ ᐃᓚᒋᔭᐅᔪᑦ ᐃᓕᓴᖅᓯᓯᒪᕗᑦ ᓄᓇᕗᒻᒥ, ᐃᓄᒻᒪᕇᑦ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔭᖅᑐᑦ ᒐᕙᒪᒃᑯᓐᓂ ᐱᑎᑕᐅᕙᙱᓚᑦ ᐊᔾᔨᖏᖕᓂᒃ ᐃᖅᑲᓇᐃᔭᕐᓂᕐᒧᑦ ᐱᔪᓐᓇᐅᑎᓂᒃ ᐃᑲᔫᑎᓂᓪᓗ, ᐱᖃᓯᐅᑎᓪᓗᒋᑦ ᐃᖅᑲᓇᐃᔭᖅᑏᑦ ᐃᒡᓗᑖᖅᑎᑕᐅᓯᒪᓂᖏᑦ ᓈᒻᒪᑦᑐᓄᑦ ᐊᒥᓲᓂᖏᖕᓄᑦ; ᑐᑭᓕᒃ ᐃᓄᐃᑦ ᐊᒥᓲᓂᖏᑦ ᐊᐅᓚᑦᑎᔨᐅᓗᑎᑦ ᐃᖅᑲᓇᐃᔮᖃᙱᑦᑐᑦ, ᐊᒻᒪᓗ ᐃᓄᐃᑦ ᐃᖅᑲᓇᐃᔭᖅᑎᖏᑕ ᒐᕙᒪᒃᑯᓐᓂ ᑭᒡᓕᓯᓂᐊᖅᑕᐅᓯᒪᔪᑦ ᐊᑦᑎᓗᐊᖅᑐᐊᓘᔪᑦ. ᐅᓪᓗᒥᒧᑦ, ᓄᓇᕗᑦ ᒐᕙᒪᖏᑦ ᐊᒻᒪᓗ ᑲᓇᑕᒥ ᒐᕙᒪᖏᑦ ᐋᖅᑮᓯᒪᙱᑦᑐᑦ ᐊᒻᒪᓗ ᐊᑐᓕᖅᑎᑦᑎᐊᖅᓯᒪᙱᑦᑐᑦ ᐃᓄᒻᒪᕇᑦ ᐃᖅᑲᓇᐃᔭᖅᑎᑕᐅᓂᖏᑦᑕ ᐸᕐᓇᐅᑎᖏᖕᓂ. ᐅᓂᒃᑳᓕᐊᕆᔭᐅᖁᔭᐅᓯᒪᔪᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᑕᑯᒃᓴᐅᑎᑦᑎᓯᒪᒻᒪᑕ ᐃᓄᒻᒪᕇᑦ ᑮᓇᐅᔾᔭᒃᓴᒐᔭᙳᐊᖅᑐᒥᓂᑯᓘᒐᓗᐊᕐᒪᑕ $200 ᒥᓕᐊᓐ ᑮᓇᐅᔭᓂᑦ ᐅᖓᑖᓄᑦ ᖄᖓᒍᒃᑲᓐᓂᖅ ᑮᓇᐅᔾᔭᒃᓵᓂᑦ ᐊᒻᒪᓗ ᐊᓯᖏᓐᓂᒃ ᐃᑲᔫᑎᓂᑦ ᐊᕐᕌᒍᑕᒫᑦ ᒐᕙᒪᒃᑯᑦ ᐊᑐᓕᖅᑎᑦᑎᑦᑎᐊᕐᓂᕈᑎᑦ ᐊᕕᑦᑐᖅᓯᒪᓂᖓ 23-ᖑᔪᒥᒃ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓂ.
ᓄᓇᕗᑦ ᑐᙵᕕᒃ ᑎᒥᖓᓄᑦ ᐃᓚᒋᔭᐅᔪᑦ ᐱᖁᔨᕗᖔᕈᑎᓕᐅᓚᐅᖅᑐᑦ ᒐᕙᒪᒃᑯᑦ ᑕᒪᐃᓐᓂ ᐊᑐᓕᖁᔭᐅᓪᓗᑎᑦ ᐊᕕᑦᑐᖅᓯᒪᓂᖓ 23 ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓂ ᐊᒻᒪᓗ ᑲᒪᒋᔭᖃᕆᐊᓯᓗᑎᑦ ᐱᓕᕆᖃᑎᖃᕐᓂᒃᑯᑦ ᓄᓇᕗᑦ ᑐᙵᕕᒃ ᑎᒥᖓᓂᒃ ᓯᕗᓂᐊᒍᑦ ᐃᖅᑲᓇᐃᔭᕆᐅᖅᓴᓂᕐᒧᑦ ᐱᓕᒻᒪᒃᓴᖅᑎᑕᐅᖃᑦᑕᖁᓪᓗᒋᑦ ᐸᕐᓇᐅᑎᖃᕐᓗᑎᑦ ᐃᓄᒻᒪᕇᑦ ᑭᙴᒪᒋᔭᖏᑦ ᐱᑎᑕᐅᖃᑦᑕᕐᓂᐊᕐᒪᑕ ᐊᒻᒪᓗ ᐅᓪᓗᒥᐅᔪᖅ ᐃᓄᐃᑦ ᓴᓇᕙᑦᑐᑦ ᒐᕙᒪᒃᑯᓐᓂ ᐃᖅᑲᓇᐃᔭᓕᖁᓪᓗᒋᑦ.
ᑮᓇᐅᔭᓕᕆᓂᖅ
ᓄᓇᕗᑦ ᑐᙵᕕᒃ ᑎᒥᖓ ᐅᓂᒃᑲᐅᓯᖃᓚᐅᖅᑐᑦ ᑕᒻᒪᖅᓯᒪᔪᕐᓂᐊᖅᑕᐅᓯᒪᔪᓂᑦ ᑮᓇᐅᔭᑦ ᐅᓂᒃᑳᖏᖕᓂᒃ 2023-2024 ᐊᕐᕌᒍᐊᓄᑦ ᑕᐃᒪᐃᒍᓐᓇᙱᖦᖢᑎᑦ ᐃᓱᒪᒋᔭᕐᒥᓂᒃ ᐅᖃᐅᓯᖃᖅᖢᓂ ᑕᒻᒪᖅᓯᒪᔪᕐᓂᐊᖅᑎ. ᑮᓇᐅᔭᑦ ᐅᓂᒃᑳᖏᑦ ᐋᖅᑭᒋᐊᖅᑕᐅᓚᐅᖅᓯᒪᔪᑦ ᐊᕐᕌᓂ ᑮᓇᐅᔭᖅᑎᒍᑦ ᓴᖅᑭᔮᑦᑎᐊᕐᓂᖅᓴᐅᖁᓪᓗᒋᑦ ᑮᓇᐅᔭᓕᕆᓂᕐᒧᑦ ᐊᐅᓚᓂᖏᑦ ᐊᒻᒪᓗ ᖃᓄᐃᓕᖓᓂᖏᑦ ᓄᓇᕗᑦ ᑐᙵᕕᒃ ᑎᒥᖓᓄᑦ.
ᓄᓇᕗᑦ ᑐᙵᕕᒃ ᑎᒥᖓ ᖁᓅᕐᒥᖅᓯᒪᔪᑦ ᐊᒥᒐᖅᑐᑦ ᐋᖅᑭᒋᐊᖅᑕᐅᓂᖏᑦ ᓄᓇᕗᑦ ᒐᒐᑦᑎᕕᖓᓂ ᐃᒪᓐᓇᓂᒃ $28.2 ᒥᓕᐊᓐ ᑮᓇᐅᔭᓂᑦ ᒫᓐᓇᐅᔪᖅ ᐊᕐᕌᒍᒥ, ᑮᓇᐅᔭᑦ ᐊᑐᖅᑕᐅᓂᖏᑦ ᐃᓄᒻᒪᕆᖕᓄᑦ ᐱᓕᕿᐊᓕᐊᕆᔭᐅᓯᒪᔪᑦ ᑕᐃᑲᓃᒃᓯᒪᓕᖅᑐᑦ $157 ᒥᓕᐊᓐᓂᒃ ᑮᓇᐅᔭᓂᑦ ᐊᕐᕌᒍᒥ, ᕿᓚᒥᐅᔪᒃᑯᑦ ᐊᒻᒪᓗ ᐊᓯᖏᑦ ᐱᕈᖅᓴᔭᐅᔪᑦ ᐊᒥᓱᑯᓗᓐᓂᒃ ᐊᒥᓱᕈᖅᑎᑦᑎᓯᒪᔪᑦ ᑮᓇᐅᔾᔭᒃᓵᓄᑦ, ᐊᒥᓱᕈᕆᐊᖅᖢᑎᑦ ᑮᓇᐅᔭᑦ ᐃᒡᓗᓕᕆᓂᕐᒧᑦ ᐱᖁᑎᕐᔪᐊᓕᕆᓂᕐᒧᓪᓗ ᐱᓕᕆᐊᓄᑦ ᓄᓇᕗᑦ ᑐᙵᑯᒃ ᑎᒥᖓᓄᑦ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᐊᕐᕌᒎᓛᖅᑐᒧᑦ. ᓄᓇᕗᑦ ᑐᙵᕕᒃ ᑎᒥᖓ ᐊᐅᓚᑦᑎᓚᐅᖅᓯᒪᔪᑦ 58 ᐃᓛᒃᑰᖓᔪᑦ ᐱᓕᕆᐊᑦ 2023-24 276% ᐊᒥᓱᕈᕆᐊᖅᓯᒪᔪᑦ ᑕᓪᓕᒪᑦ ᐊᕐᕌᒎᔪᒻᒪᓂᑦ.
ᑭᖑᓪᓕᕐᒥᒃ ᐊᕐᕌᒍᑕᒫᑦ ᑲᑎᒪᕕᒡᔪᐊᓛᓕᕐᒥᔪᑦ ᐊᒃᑑᕝᕙ 21-23, 2025 ᑲᖏᖅᖠᓂᖅ, ᓄᓇᕗᒻᒥ.
-30-
ᖃᐅᔨᒃᑲᕋᔭᒃᓴᖅ:
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᑎᓚᐃᓚ ᕌᔅ
ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᔨᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
