ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ (ᑐᓐᖓᕕᒃ) ᑲᑎᒪᔨᖏᑦ ᓂᕈᐊᓚᐅᖅᑐᑦ ᐊᖏᕈᑎᓖᓐᓇᐅᓪᓗᑎᒃ ᖃᐅᔨᒃᑲᐃᖁᔨᓪᓗᑎᒃ ᓄᓇᕗᑦ ᒪᓕᒐᓕᐅᕐᕕᖓᓂᒃ ᑲᔪᓯᑎᑕᐅᖁᔨᒐᑎᒃ ᐱᖁᔭᒃᓴᖅ 37-ᒥᒃ, ᒪᓕᒐᑦᓴᓕᐊᖑᒍᒪᔪᖅ ᐋᖅᑭᒋᐊᖅᑕᐅᖁᔨᔾᔪᑏᑦ ᓄᓇᕗᑦ ᒐᕙᒪᖓᓄᑦ (GN) ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᓂᒃ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᓂᒃ. ᑐᓐᖓᕕᒃᑯᑦ ᑲᑎᒪᔨᖏᑦ ᑲᔪᓯᑎᑦᓯᓚᐅᖅᑐᑦ ᐱᖁᔨᕗᖔᕈᒻᒥᒃ ᑲᑎᒪᓂᕐᒥᓂ ᐊᕐᕕᐊᓂ ᐱᓇᓱᐊᕈᓯᐅᓚᐅᖅᑐᒥ. ᑐᓐᖓᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᑐᑦ ᑲᑎᒪᔩᑦ ᐃᓱᒫᓘᑎᖃᓚᐅᖅᑐᑦ ᐊᑐᓕᖁᔨᔾᔪᑎ ᑎᑭᐅᑎᓯᒪᓂᖓᓄᑦ ᑕᒡᕗᖓ, ᐊᒻᒪᓗ ᖃᐅᔨᒃᑲᐃᓪᓗᑎᒃ ᐱᖁᔭᒃᓴᖅ 37 ᐲᖅᑕᐅᖁᓪᓗᒍ.
2016−ᒥᓂᒃ, ᑎᑎᕋᖃᑎᒌᖃᑦᑕᓂᕐᒥᒍᑦ ᑐᒃᓯᐅᑎᑎᒍᓪᓗ, ᑐᓐᖓᕕᒃᑯᑦ ᐊᐱᕆᓚᐅᖅᑐᑦ ᓄᓇᕗᑦ ᒐᕙᒪᖓ ᐊᖏᕈᑎᖃᕐᓯᒪᖁᓪᓗᒍ ᑮᓇᐅᔭᓕᑕᐅᒍᑎᒃᓴᓂᒃ ᐱᓕᕆᒍᑎᒃᓴᐅᓂᐊᖅᑐᓂᒃ ᐃᓄᐃᑦ ᐃᖅᑲᓇᐃᔮᖏᓐᓄᑦ ᐸᕐᓇᐅᑎᓂᒃ ᐊᒻᒪᓗ ᐱᒋᐊᕈᑎᒃᓴᓂᒃ ᐱᓇᓱᐊᖅᑕᐅᒻᒪᕆᒋᐊᖃᕐᓂᖓᓄᑦ ᐱᓕᖕᒪᒃᓴᖅᑕᐅᒍᑎᒃᓴᖏᓐᓂᒃ ᐃᓄᐃᑦ ᐃᓕᓴᐃᔩᑦ. ᑭᓯᐊᓂᓕ ᐊᓯᔾᔩᒐᑎᒃ ᒪᓕᒐᑦᓴᒥᒃ, ᐊᑐᕆᐊᖃᕐᓂᐊᖅᑕᖏᓐᓂᒃ ᐅᓄᕐᓯᒋᐊᒃᑲᓂᒻᒪᕆᒋᐊᓕᓐᓂᒃ ᑮᓇᐅᔭᓕᑕᐅᒍᑎᓂᒃ ᐊᒻᒪᓗ ᐃᑲᔫᑎᒃᓴᓂᒃ ᐃᓄᓐᓂᒃ ᐃᓕᓴᐃᔨᒃᓴᓄᑦ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ ᐃᓄᒃᑎᑐᑦ ᐅᖃᐅᓯᕐᒥᒃ ᐃᓕᓐᓂᐊᕈᑎᒃᓴᓕᐅᕈᑎᒃᓴᓂᒃ.
ᑐᓐᖓᕕᒃᑯᑦ ᕿᒥᕐᕈᓇᑦᓯᐊᓚᐅᖅᑕᖓ ᐱᖁᔭᒃᓴᖅ 37. ᓴᓐᖐᓕᑎᑦᓯᓂᐊᖅᑐᖅ ᐃᓅᓪᓗᑕ ᐱᔪᓐᓇᐅᑎᑦᑎᓐᓂᒃ ᐃᓄᒃᑎᑐᑦ ᐃᓕᓐᓂᐊᓂᕐᒥᒃ. ᑕᒪᓐᓇ ᐊᖏᕈᑎᒃᓴᐅᖏᑦᑐᖅ. ᓄᓇᕗᑦ ᓴᖅᑭᖅᑕᐅᓚᐅᕐᓯᒪᒻᒪᑦ ᐱᔪᓐᓇᐅᑎᑦᑎᓐᓂᒃ ᐊᑐᕈᓐᓇᖁᓪᓗᑕ ᐃᓕᓐᓂᐊᓂᕐᒥᒃ ᐃᓄᒃᑎᑐᑦ ᐃᓕᓴᕆᔭᐅᓯᒪᖁᓪᓗᒍ ᓴᐳᔾᔭᐅᓯᒪᓗᓂᓗ,” ᐅᖃᓚᐅᖅᑐᖅ ᑰᑦᑎᖅ. “ᑐᓐᖓᕕᒃᑯᑦ ᑲᑎᒪᔨᖏᑦ ᖃᐅᔨᒃᑲᐃᔪᑦ ᑲᑎᒪᔨᕋᓛᖑᑲᐃᓐᓇᖅᑐᓂᒃ ᓴᒃᑯᑕᐅᖁᓪᓗᒍ ᐱᖁᔭᒃᓴᖅ 37 ᒫᓐᓇᐅᓂᖓᓂ. ᓈᖕᒪᓂᕐᓴᓂᒃ ᒪᓕᒐᑦᓴᓄᑦ ᐊᓯᔾᔨᕈᑏᑦ ᐃᓱᒪᒃᓴᕐᓯᐅᕈᑕᐅᒃᑲᓐᓂᕈᓐᓇᓂᐊᖅᑐᑦ ᐃᓄᐃᑦ ᐃᖅᑲᓇᐃᔮᖏᓐᓄᑦ ᐸᕐᓇᐅᑏᑦ ᐋᖅᑭᓱᖅᑕᐅᓯᒪᓕᕐᐸᑕ ᑲᔪᓯᑎᑕᐅᕙᓪᓕᐊᒍᑎᒃᓴᖏᓪᓗ ᐊᒻᒪᓗ ᓈᖕᒪᑦᑐᓂᒃ ᑮᓇᐅᔭᓕᑕᐅᓗᑎᒃ. ᓂᕈᐊᖅᑕᐅᓯᒪᔪᓕᒫᑦ ᓯᕗᓕᖅᑏᑦ ᑕᒡᕙᓂ ᓄᓇᑦᑎᓐᓂ ᑭᒡᒐᖅᑐᐃᔪᑦ ᐃᓄᓐᓂᒃ. ᒪᓂᑐᐃᓐᓇᕆᐊᖃᓐᖏᓇᑦᑕ ᐊᒻᒪᓗ ᑕᑯᓐᓇᑐᐃᓐᓇᕐᓗᑕ ᐃᓘᓐᓇᑕ ᒐᕙᒪᒃᑯᑦ ᒪᓕᒐᓕᐅᖅᑎᓪᓗᒋᑦ ᒥᑭᒃᓕᒋᐊᖅᑕᐅᔪᑦ ᐃᓄᐃᑦ ᐱᔪᓐᓇᐅᑎᖏᑦ ᒪᑯᓄᖓ ᐃᓄᒃᑎᑐᑦ ᐅᖃᐅᓯᖏᓐᓂᒃ ᐃᓕᓴᐃᓂᕐᒥᑦ, ᐊᒻᒪᓗ ᐃᓄᐃᑦ ᑎᒍᒻᒥᓗᑎᒃ ᐊᐅᓚᑦᑎᓂᒃᑯᑦ ᑕᒪᑦᓱᒧᖓ ᐃᓕᓐᓂᐊᕐᓂᓕᕆᓂᕐᒧᑦ,” ᐅᖃᖅᑐᖅ ᑰᑦᑎᖅ.
