ᓴᒃᑯᑕᐅᑲᐅᑎᒋᔭᕆᐊᓕᒃ
(ᒫᑦᓯ 21, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᓚᐅᖅᑐᑦ ᑕᒫᓂ ᐱᓇᓱᐊᕈᓯᕐᒥᒃ ᐊᒻᒪᓗ ᑮᓇᐅᔭᓂᒃ ᐊᑐᕐᓂᐊᕐᓂᕋᖅᑐᑎᑦ ᐳᕙᒡᓗᒃᑐᖃᕈᓐᓃᖅᑎᑦᑎᓇᓱᐊᖅᑐᓄᑦ, ᐊᑯᓂᐅᔪᒧᑦ ᑮᓇᐅᔭᖃᖅᑎᑕᐅᖁᔨᓪᓗᑎᑦ ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᖕᓄᑦ ᐱᓕᕆᐊᕐᒥᒃ,
ᐳᕙᒡᓗᒃᑐᖃᕈᓐᓃᖅᑎᑦᑎᓂᕐᒧᑦ ᑮᓇᐅᔭᑦ
ᐃᓕᓴᖅᓯᓯᒪᓪᓗᑎᑦ ᑐᐊᕕᕐᓇᖅᑐᒥᒃ ᖃᓄᐃᓕᐅᕈᑕᐅᔭᕆᐊᖃᓕᕐᓂᖓᓂᒃ, ᑲᑎᒪᔩᑦ ᐊᖏᖅᓯᓚᐅᖅᑐᑦ $4 ᒥᓕᐊᓐ ᑮᓇᐅᔭᓂᒃ ᐃᑲᔪᖅᑐᑎᑦ ᓄᓇᕗᑦ ᒐᕙᒪᖏᖕᓂᒃ ᐳᕙᒡᓗᒃᑕᐃᓕᒪᔪᓕᕆᓂᕐᒧᑦ. ᑲᑎᒪᔩᑦ ᐊᖏᖅᓯᓚᐅᕐᒥᔪᑦ ᓄᓇᕗᑦ ᑐᙵᕕᒃ ᑎᒥᖓᑕ ᐊᑭᓕᕆᐊᖃᓲᖏᖕᓂᒃ ᐊᑭᓕᐅᑕᐅᓗᑎᑦ, ᐱᖃᓯᐅᑎᓪᓗᒋᑦ ᐱᖓᓱᓄᑦ ᑕᖅᑭᓄᑦ ᓂᖀᑦ ᑲᑎᖅᓱᖅᑕᐅᓯᒪᔪᑦ ᐊᑐᓂ ᐃᓅᓕᓴᖅᑕᐅᔪᓄᑦ, ᐱᔭᐅᖃᑦᑕᕈᓐᓇᕐᓂᐊᕐᒪᑕ ᐃᑲᔫᑏᑦ ᓄᓇᓕᐅᔪᓄᑦ ᐳᕙᒡᓗᓐᓇᖅ ᐊᐃᑦᑑᑖᓘᖃᑦᑕᑎᓪᓗᒍ, ᐊᒻᒪᓗ ᑐᓴᐅᒪᑎᑦᑎᒋᐊᕐᔫᒥᓂᐊᖅᑐᑎᑦ ᑲᒪᒋᔭᐅᓂᐊᕐᒪᑦ ᐳᕙᒡᓗᒃᑐᑦ ᐃᓱᒪᒋᔭᐅᑲᒻᒪᖃᑦᑕᕐᓂᖓ.
ᑮᓇᐅᔭᓕᕆᓂᕐᒧᑦ ᑐᓴᕆᐊᖅᑎᑦᑎᔾᔪᑎ
ᑲᑎᒪᔩᑦ ᐊᖏᓚᐅᖅᑐᑦ $29.4 ᒥᓕᐊᓐ ᑮᓇᐅᔭᓂᒃ ᑮᓇᐅᔭᖃᖅᑎᑦᑎᒍᑎᓪᓗᐊᑕᑦ ᑮᓇᐅᔭᖅᑐᕈᑎᒃᓴᒥᒃ ᐊᒻᒪᓗ $2 ᒥᓕᐊᓐ ᑮᓇᐅᔭᓂᒃ ᑮᓇᐅᔭᖅᑐᕈᑎᒃᓴᑦ ᓄᓇᕗᒻᒥ ᐊᖑᓇᓱᒃᑏᑦ ᐃᑲᔪᖅᑐᖅᑕᐅᔾᔪᑎᒃᓴᖏᑦ ᐱᓕᕆᐊᕐᒧᑦ, 3.7%−ᓂᒃ ᐊᒥᓱᕈᕆᐊᖅᑕᒥᓂᐅᓪᓗᑎᑦ. ᓄᑖᖅ ᑮᓇᐅᔭᖅᑑᑕᐅᓗᐊᕐᓂᐊᕐᒥᔪᖅ ᑮᓇᐅᔭᑦ ᐋᖅᑭᒃᓱᖅᓯᒪᓂᖏᑦᑕ ᐊᑐᐊᒐᖓ ᐊᑐᖅᑕᐅᖃᑦᑕᕐᓂᐊᓕᕐᓂᖓᓂᒃ ᐊᖏᖅᑕᐅᓚᐅᖅᑐᖅ, ᖃᐅᔨᒪᓇᑦᑎᐊᖅᑎᑦᑎᔪᖅ ᓴᖅᑭᔮᕐᔫᒥᔪᒃᑰᕐᓂᐊᕐᒪᑕ, ᓂᕆᐅᓇᕐᓗᑎᑦ ᐊᒻᒪᓗ ᓇᓕᒧᒌᓕᖅᑎᑦᑎᓂᖃᖅᑐᒥᒃ ᑮᓇᐅᔭᖃᖅᑎᑦᑎᔾᔪᓯᕐᒥᒃ ᓄᓇᕗᑦ ᑐᙵᕕᒃ ᑎᒥᖓᓄᑦ, ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ, ᐊᒻᒪᓗ ᐃᓄᐃᑦ ᐱᖁᑎᖏᖕᓂᒃ ᓇᐅᑦᓯᖅᑐᖅᑎᒃᑯᓐᓄᑦ. ᐱᐅᓯᑎᑕᐅᖁᓪᓗᒍ ᑮᓇᐅᔭᓕᕆᓂᕐᒧᑦ ᐅᐊᑦᑎᔭᐅᕙᓐᓂᖏᑦ, ᑮᓇᐅᔭᓕᕆᔨᒃᑯᑦ ᑲᑎᒪᔨᐊᓛᖏᑦ ᑲᑎᒪᖃᑦᑕᕐᓂᖅᓴᐅᓂᐊᖅᑐᑦ ᐊᒻᒪᓗ ᕿᒥᕐᕈᓇᓪᓗᑎᑦ ᑮᓇᐅᔭᖅᑐᕈᑎᒃᓴᑦ ᐊᔾᔨᒌᙱᓐᓂᖏᑦ ᐊᑐᖅᑕᒥᓃᑦ ᐊᒻᒪᓗ ᓴᓂᕐᕚᖑᓯᒪᔪᑦ ᐅᓂᒃᑳᖏᓐᓂᒃ ᓄᓇᕗᑦ ᑐᙵᕕᒃ ᑎᒥᖓᓄᑦ, ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᐊᒻᒪᓗ ᐃᓄᐃᑦ ᐱᖁᑎᖏᖕᓂᒃ ᓇᐅᑦᓯᖅᑐᖅᑎᒃᑯᓐᓄᑦ.
ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖅ
ᑕᖅᑭᖅ ᐱᒋᐊᓕᖅᑎᓪᓗᒍ ᑕᒫᓂ, ᑲᓇᑕᒥ ᒐᕙᒪᒃᑯᑦ ᑐᓴᖅᑎᑦᑎᓚᐅᖅᑐᑦ ᐊᑕᐅᓯᕐᒧᑦ ᐊᕐᕌᒍᒧᑦ ᐊᑯᓂᐅᓂᖃᒃᑲᓐᓂᖅᑎᑕᐅᓂᐊᕐᓂᖓᓂᒃ ᐃᓄᐃᑦ ᓄᑕᖅᑲᑦ ᓯᕗᓪᓕᐅᑎᑕᐅᓂᖏᑦ ᐱᓕᕆᐊᖓ. ᓄᓇᕗᑦ ᑐᙵᕕᒃ ᑎᒥᖓ ᑕᒪᔅᓱᒥᖓ ᖁᕕᐊᓲᑎᖃᕋᓗᐊᖅᑎᓪᓗᒋᑦ ᑐᓴᕈᒥᓇᖅᑐᓂᒃ, ᓇᓗᓇᐃᔭᖅᓯᒪᓂᖏᑦ ᐊᑕᐅᓯᕐᒧᑦ ᐊᕐᕌᒍᒧᑦ ᐊᑐᕋᒃᓴᐅᒃᑲᓐᓂᕐᓂᐊᕐᓂᖏᑦᑕ ᐃᓄᖕᓄᑦ ᑐᓴᖅᑎᑕᐅᓚᐅᙱᑦᑐᖅ, ᑐᓴᖅᑎᑕᐅᓚᐅᙱᒃᑭᓪᓗᑎᑦ ᖃᑦᑎᐅᒐᔭᕐᒪᖔᑕ ᐊᒥᓲᓂᖏᑦ. ᐊᑯᓂᐅᔪᒧᑦ ᑮᓇᐅᔭᖃᖅᑎᑦᑎᓂᐊᕐᓂᕋᖅᓯᒪᒍᑎᑦ ᐱᕐᔪᐊᖑᕗᖅ ᓴᐳᒻᒥᐅᓯᖅᑕᐅᓯᒪᖁᓪᓗᒋᑦ ᐃᓄᐃᑦ ᓄᑕᖅᑲᑦ ᓄᓇᕗᒻᒥ, ᐊᒻᒪᓗ ᖃᐅᔨᒪᑦᑎᐊᖅᑎᑦᑎᒍᑕᐅᓗᓂ ᐊᑐᕈᓐᓇᕐᓂᐊᕐᒪᑕ ᐊᑐᖅᑕᐅᔭᕆᐊᖃᓪᓚᕆᕐᓂᒃ ᒐᕙᒪᒃᑯᓐᓄᑦ ᑮᓇᐅᔭᖃᖅᑎᑕᐅᓲᑦ ᓲᕐᓗᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓅᓯᓕᕆᓂᖅ, ᐊᒻᒪᓗ ᐃᓕᓐᓂᐊᖅᑐᓕᕆᓂᕐᒧᑦ ᐊᑐᖅᑕᐅᔭᕆᐊᖃᓲᑦ ᓱᓇᒃᑯᑖᑦ, ᐱᔨᑦᑎᕋᕈᑏᑦ, ᐊᒻᒪᓗ ᐃᑲᔪᖅᑐᐃᔾᔪᑏᑦ.
ᐊᑐᓕᖅᑎᑦᑎᓂᕐᒧᑦ ᑳᓐᑐᕌᒃᑦ ᓄᑖᕈᕆᐊᖅᑎᑕᐅᓂᖓ
ᑲᑎᒪᔩᑦ ᓯᕗᓪᓕᖅᐹᒥᒃ ᐃᓄᑐᐃᓐᓇᕐᓄᑦ ᓈᓚᒃᑕᐅᓪᓗᑎᑦ ᑐᑭᓯᒋᐊᖅᑎᑕᐅᓚᐅᖅᑐᑦ ᓄᑖᕈᕆᐊᖅᓯᒪᔪᒥᒃ ᐊᑐᓕᖅᑎᑦᑎᓂᕐᒧᑦ ᑳᓐᑐᕌᒃᑦ−ᒥᒃ ᐊᒻᒪᓗ ᐱᒻᒪᕆᐅᔪᒥᒃ ᕿᒥᕐᕈᔭᐅᑦᑎᐊᖅᑐᓂ. ᓄᓇᕗᑦ ᑐᙵᕕᒃ ᑎᒥᖓ ᓯᕗᓪᓕᐅᑎᑦᑎᓯᒪᔪᑦ ᖃᐅᔨᒪᓇᑦᑎᐊᖅᑎᑦᑎᓪᓗᑎᑦ ᐊᑐᓂᖅᑎᑕᐅᓂᖓ ᑳᓐᑐᕌᒃᑦ ᑐᙵᕕᖃᕐᓂᐊᕐᒪᑦ ᓇᓗᓇᕈᓐᓃᕈᑕᐅᓯᒪᔪᓂᒃ ᐊᑐᖅᑕᐅᖃᑦᑕᕐᓂᑯᓂᑦ, ᐊᑐᖃᑦᑕᕐᓗᑎᑦ ᐱᕙᓪᓕᐊᔪᓕᕆᓂᕐᒧᑦ ᐅᓂᒃᑳᕐᓂᒃ ᐊᒻᒪᓗ ᐊᑭᖃᕋᔭᕐᓂᖏᑦᑕ ᐋᖅᑭᒃᓱᖅᑕᐅᓯᒪᔪᓂᒃ ᕿᒥᕐᕈᓗᑎᑦ ᐃᓱᒪᓕᐅᕈᑕᐅᖁᓪᓗᒋᑦ ᑐᒃᓯᕋᐅᐅᑎᓂ. ᑲᑎᒪᔩᑦ ᓇᓗᓇᐃᔭᑦᑎᐊᖅᓯᒪᔪᑯᓗᒃᑯᑦ ᑐᑭᓯᒋᐊᖅᑎᑕᐅᓚᐅᖅᑐᑦ ᐃᖅᑲᓇᐃᔭᓛᖅᑐᓄᑦ ᐱᓕᒻᒪᒃᓴᐃᑎᑦᑎᓂᕐᒧᑦ ᖃᓄᖅᑑᕈᑎᖓᓂᒃ.
ᑕᒪᓐᓇ ᐊᑐᖅᑕᐅᓚᐅᖅᓯᒪᙱᑦᑐᖅ ᐊᖏᕈᑎ ᐱᔪᓐᓇᑎᑦᑎᓂᐊᖅᑐᖅ $1.5 ᕕᓕᐊᓐᓂᒃ ᑮᓇᐅᔭᓂᒃ ᑮᓇᐅᔭᖃᖅᑎᑕᐅᒐᔭᕐᓗᓂ ᑳᓐᑐᕌᒃᑦ ᐊᑯᓂᐅᓂᖓᓄᑦ 2024-2034-ᒧᑦ.
• ᐱᓕᒻᒪᒃᓴᖅᑎᑕᐅᓂᖏᑦ ᐃᓄᐃᑦ ᐃᖅᑲᓇᐃᔭᖁᓪᓗᒋᑦ (ᐊᕕᑦᑐᖅᓯᒪᓂᖓ 23) – $679.7 ᒥᓕᐊᓐ ᑮᓇᐅᔭᑦ
• ᐆᒪᔪᕐᓂᐊᖅᑎᒃᑯᑦ ᑲᑐᔾᔨᖃᑎᒌᖏᑦ/ᐊᕕᑦᑐᖅᓯᒪᔪᓂ ᐆᒪᔪᓕᕆᔨᒃᑯᑦ ᑲᑐᔾᔨᖃᑎᒌᖏᑦ – $211.9 ᒥᓕᐊᓐ ᑮᓇᐅᔭᑦ
• ᑲᑎᒪᔨᕈᖅᑎᑕᐅᓯᒪᔪᑦ ᑭᒃᑯᑐᐃᓐᓇᐃᑦ ᐱᓕᕆᕝᕕᖏᑦ ᐊᐅᓚᑦᑎᓂᕐᒧᑦ − $338.9 ᒥᓕᐊᓐ ᑮᓇᐅᔭᑦ
• ᓄᓇᕗᑦ ᑐᙵᕕᒃ ᑎᒥᖓ ᐱᓕᕆᕝᕕᒃ ᒪᑭᒪᔪᓐᓇᖁᓪᓗᒋᑦ ᑮᓇᐅᔭᑦ – $118.3 ᒥᓕᐊᓐ ᑮᓇᐅᔭᑦ
• ᓄᓇᕗᑦ ᐱᖁᑎᖏᖕᓂᒃ ᓇᐅᑦᓯᖅᑐᖅᑏᑦ – $50 ᒥᓕᐊᓐ ᑮᓇᐅᔭᑦ
• ᓄᓇᕗᑦ ᒐᕙᒪᖏᑦ ᐊᕕᑦᑐᖅᓯᒪᔪᓃᙱᑦᑐᓂᒃ ᐊᖏᕈᑎᒥ 23 ᑮᓇᐅᔭᖃᖅᑎᑕᐅᓂᖏᑦ – $107 ᒥᓕᐊᓐ ᑮᓇᐅᔭᑦ
ᑲᒪᒋᔭᐅᓗᐊᖅᓯᒪᔪᖅ ᑳᓐᑐᕌᒃᑦ−ᒥ ᐊᒥᓱᕈᕆᐊᖅᑎᑕᐅᓗᑎᑦ ᐃᓄᐃᑦ ᐃᖅᑲᓇᐃᔭᖅᑐᑦ ᒐᕙᒪᒃᑯᓐᓂ. ᐃᓄᐃᑦ 85%-ᖑᑎᓪᓗᒋᑦ ᐊᒥᓲᓂᖏᑦ ᓄᓇᕗᒻᒥ 50%-ᑐᐃᓐᓇᑯᓗᐃᑦ ᒐᕙᒪᒃᑯᓐᓂ ᐃᖅᑲᓇᐃᔭᖅᑐᑦ, ᑖᓐᓇ ᑳᓐᑐᕌᒃᑦ ᐱᒻᒪᕆᐊᓘᕗᖅ ᐊᑑᑎᒃᓴᖅ ᑲᒪᒋᔭᐅᖁᓪᓗᒍ ᓇᓕᒧᒌᙱᓗᐊᖅᑐᐊᓘᓂᖏᑦ ᑕᒪᒃᑯᐊ ᐊᒻᒪᓗ ᐱᕕᖃᑦᑎᐊᖅᑎᑦᑎᒍᑕᐅᔪᓐᓇᖅᑐᓂ ᐃᓄᓐᓂᒃ ᐃᖅᑲᓇᐃᔭᕐᓗᑎᑦ ᐃᓄᓐᓂᒃ ᑭᒃᑯᑐᐃᓐᓇᕐᓂᒃ ᐱᔨᑦᑎᕋᖅᑎᐅᔪᓂᒃ. ᑖᒃᑯᑎᒎᓇᖅ ᓄᑖᕈᕆᐊᖅᓯᒪᔪᑎᒍᑦ ᑳᓐᑐᕌᒃᑦ, ᐃᓄᐃᑦ ᓂᕆᐅᒍᓐᓇᖅᓯᔪᑦ ᐃᖅᑲᓇᐃᔮᖅᑖᒻᒪᕆᒍᓐᓇᕋᔭᕐᓂᖏᖕᓂᒃ, ᓴᙱᔪᒥᒃ ᐃᓄᐃᑦ ᑭᒃᑯᑐᐃᓐᓇᐃᑦ ᐱᔨᑦᑎᖅᑕᐅᓲᑦ ᐊᐅᓚᑦᑎᒍᓯᖃᓕᕐᓗᑎᑦ, ᐱᐅᓯᑎᑕᐅᒋᐊᖅᓯᒪᔪᑦ ᐆᒪᔪᓕᕆᓂᕐᒧᑦ ᐊᒻᒪᓗ ᐱᖅᑯᓯᓕᕆᓂᕐᒧᑦ ᑮᓇᐅᔭᓂᒃ ᐊᒻᒪᓗ ᐃᑲᔪᖅᑐᖅᑕᐅᑦᑎᐊᖅᓯᒪᓗᑎᑦ ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑐᓕᖅᑎᑦᑎᑎᓪᓗᒋᑦ ᓄᓇᕗᑦ ᐊᖏᕈᑎᖓᓂᒃ.
ᑲᑎᒪᔩᑦ ᐊᕐᕕᐊᓅᕐᓂᐊᓚᐅᕋᓗᐊᕐᒪᑕ, ᓄᓇᕗᒻᒥ ᑲᑎᒪᔭᖅᑐᕐᓗᑎᑦ, ᑭᓯᐊᓂᓕ ᓯᓚ ᐱᓪᓗᒍ, ᑲᑎᒪᓂᖅ ᖃᕋᓴᐅᔭᒃᑯᑦ ᑲᔪᓯᓂᖃᓚᐅᖅᑐᖅ ᐱᖓᓱᓄᑦ ᐅᓪᓗᓄᑦ ᐊᑯᓂᐅᑎᒋᔪᖅ.
– 30 –
ᐱᕙᓪᓕᐊᔪᓕᕆᔨ ᖃᐅᔨᒋᐊᕐᕕᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
