ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᙱ ᓇᓗᓇᐃᖅᓯᔪᖅ ᐅᓪᓗᒥ ᐃᑲᔫᓯᐊᑑᓐᓂᒃ ᔫᓯ ᐊᒪᐅᔭᖅ ᑯᓱᒐᐅᑉ ᐃᖅᑲᐅᒪᔭᐅᓂᖓᓄᑦ ᐃᓕᓐᓂᐊᖅᑏᑦ ᐃᑲᔫᓯᐊᕈᓐᓇᐅᑎᖏᑦ. ᒥᐊᓕ-ᐃᓖᔅ ᑰᓕ ᐃᖃᓗᖕᒥᐅᑕᖅ ᐊᒻᒪᓗ ᓕᓐ ᕿᓚᕝᕙᖅ ᐸᓐᓂᖅᑑᒥᐅᑕᖅ ᐊᑐᓂᑦ ᑐᓐᓂᖅᑯᓯᐊᖅᑎᑕᐅᓂᐊᖅᑑᒃ $5,000-ᓂᒃ ᐃᑲᔫᑎᒃᓴᓂᒃ ᐃᓕᓐᓂᐊᕐᓂᖏᓐᓄᑦ. ᒥᐊᓕ ᐃᓕᓴᕆᔭᐅᔾᔪᑎᒻᒪᕆᑦᑖᕋᓱᐊᖅᑐᖅ ᐃᓕᓴᐃᔨᐅᓂᕐᒧᑦ ᕆᔭᐃᓇ ᐃᓕᓐᓂᐊᕕᔾᔪᐊᖓᓂᒃ. ᓕᓐ ᐃᓕᓴᕆᔭᐅᔾᔪᑎᒻᒪᕆᑦᑖᕋᓱᐊᖅᑐᖅ ᐃᓕᓴᐃᔨᐅᓂᕐᒧᑦ ᐸᓐᓂᖅᑑᒥ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᕕᖓᒍᑦ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒃᑯᑦ.

“ᑯᕕᐊᓱᒃᐳᖓ ᑐᓐᓂᖅᑯᓯᐊᖅᑎᑦᓯᔭᕆᐊᒃᓴᖅ ᒪᕐᕉᓄᑦ ᐃᓕᓴᐃᔨᒃᓵᓐᓄᑦ ᑮᓇᐅᔭᓂᒃ ᐃᑲᔫᑎᓂᒃ ᐱᓇᓱᐊᒻᒪᕆᑦᑎᓪᓗᒋᒃ ᖃᐅᔨᑎᑦᓯᑲᓐᓂᕋᓱᐊᕐᓂᕐᒥᒃ ᐃᓕᓴᐃᓂᕐᒥᒍᑦ ᖃᐅᔨᒪᓂᕐᒥᓐᓂᒃ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᓪᓗ ᓄᑕᖅᑲᑎᓐᓄᑦ,” ᐅᖃᖅᑐᖅ ᑕᐅᑐᓐᖏ. “ᐱᓇᓱᐊᕐᓂᖏᒃ ᓇᓗᓇᓐᖏᓛᒃ ᔫᓯ ᐃᖅᑲᐅᒪᔭᐅᔾᔪᑎᖓᒍᑦ ᐱᕚᓪᓕᑎᑦᓯᓇᓱᐊᕈᑎᓂᒃ ᐊᒻᒪᓗ ᓴᐳᔾᔨᓯᒪᒍᑎᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓇᐅᒃᑯᑐᐃᓐᓇᖅ ᐃᓄᓯᕆᓚᖅᑕᖓᓄᑦ ᑲᔪᓯᑎᑦᓯᓂᐊᕐᒪᑎᒃ.”

ᑐᙵᕕᒃᑯᑦ 22-ᓂᒃ ᑐᒃᓯᕋᐅᑎᓕᐅᕐᕕᐅᓚᐅᑐᑦ ᐃᑲᔫᓯᐊᒃᓴᓄᑦ. ᓂᕈᐊᖅᑏᑦ ᕿᒥᕐᕈᓚᐅᖅᑐᑦ ᑐᒃᓯᕋᐅᓯᐅᖅᓯᒪᔪᓂᒃ ᑐᓐᓂᖅᑯᓯᐊᒃᓴᒧᑦ ᐃᓕᓐᓂᐊᑲᓐᓂᖅᑑᓐᓂᒃ ᓂᕈᐊᕐᓯᓪᓗᑎᒃ ᒥᐊᓕ ᐊᒻᒪᓗ ᓕᓐ ᑕᒪᒃᑮᒃ ᐃᓕᓐᓂᐊᖅᑑᒃ ᑐᑭᓯᓇᖅᑐᒥᒃ ᓴᖅᑭᔮᕐᑎᓯᑦᓯᐊᕐᓂᖏᓐᓄᑦ ᐊᖏᕈᑎᒋᓯᒪᔭᒥᓂᒃ ᑐᓂᓯᒪᑦᓯᐊᓂᕐᒥᒃ ᐃᓄᐃᑦ ᐅᖃᐅᓯᖓᓄᑦ ᐃᓕᓐᓂᐊᓂᕐᒧᓪᓗ

ᐊᒻᒪ ᑭᒍᑦᑕᕐᒥᒃ ᐱᔾᔪᑎᒋᓪᓗᒍ ᑕᒪᒃᑮᒃ ᐃᓕᓐᓂᐊᖅᑏᒃ ᓴᖅᑭᔮᖅᑎᑦᓯᑎᐊᓛᖑᓚᐅᕐᒪᑎᒃ ᖃᓄᖅ ᑲᔪᓯᑎᑦᓯᕙᓪᓕᐊᓂᐊᕐᓂᕐᒥᓂᒃ ᔫᓯᐅ ᐱᓕᕆᐊᕆᓯᒪᔭᖏᓐᓂᒃ ᐊᕐᕌᒍᒐᓵᓗᓐᓄ. ᑕᐅᑐᙱ ᐅᖃᖅᑲᐅᔪᖅ ᐱᔭᕆᐊᑐᓚᐅᕐᒪᑦ ᓂᕈᐊᕐᕕᒋᓇᓱᐊᖅᖢᒋᑦ ᑐᒃᓯᕋᐅᑏᑦ ᐱᐅᔪᒻᒪᕆᐅᓚᕐᖓᑕ.

“ᑭᒡᒐᖅᑐᕐᓗᒋᑦ ᐃᓚᒃᑲ, ᖁᕕᐊᒃᑯᑎᕙᕗᑦ ᑐᓐᓂᖅᑯᓯᐊᓚᐅᖅᑐᑦ. ᖁᔭᓐᓇᒦᕈᒪᒻᒥᔭᒃᑲ ᑐᒃᓯᕋᐅᓯᐅᓚᐅᖅᑐᓕᒫᑦ ᐱᓇᓱᐊᖅᑐᑎᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᒃᓴᒥᒃ. ᐃᓚᕗᑦ ᓇᑯᖅᓴᑐᒻᒪᕆᐅᕗᑦ ᐅᐱᒋᔭᐅᓂᖓᓂᒃ ᐊᑖᑕᒋᓚᐅᖅᑕᕋ, ᔫᓯ, ᐃᓕᓐᓂᐊᓂᒃᑯᑦ ᐃᑲᔫᓯᐊᕈᑕᐅᕙᓐᓂᖓᓂᒃ. ᐃᓕᓐᓂᐊᖅᑏᑦ ᑲᔪᓯᑦᓯᐊᕐᓂᐊᖁᓇᖅᐳᓯ ᐃᓕᓐᓂᐊᑕᑦᓯᓐᓂᒃ,” ᐅᖃᖅᑐᖅ ᐳᔾᔫᑦ ᑯᓱᒐᖅ.

ᑭᖑᓪᓕᕐᒥ ᐃᓱᖃᕐᓂᐊᖅᑐᖅ ᔫᓯ ᐊᒪᐅᔭᖅ ᑯᓱᒐᐅᑉ ᐃᖅᑲᐅᒪᔭᐅᓂᖓᓄᑦ ᐃᑲᔫᓯᐊᖅᑖᕋᓱᐊᕐᓂᖅ ᔪᓚᐃ 9, 2013. ᐃᓕᓐᓂᐊᖅᑏᑦ ᐊᑎᖃᖃᑕᐅᔪᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᑐᒃᓯᕋᖃᑕᐅᔪᓐᓇᖅᑐᑦ ᐃᑲᔫᓯᐊᓄᑦ.