Nunavut Tungavikon Timeoyumi Ikhivaotalik Cathy Towtongie uplomi okaohikaktok aetuheaktuknik umiga Jose Amaujaq Kusugak Sikuktonik Aetuheaktuknik.  Miali-Elise Coley Ikaloknin Lynn Kilabuk-lo Pakniktumin atuni pineaktuk 5-taositalamik ikayutikhanik sikuktamiknun.  Coley ilihaktok Sikuktitiyeoyamini Ilihakpaalikvikmi Regina-mi.  Kilabuk ilihaktok Sikuktitiyeoyaminilo Nunavumi Sikuktitiyikhan Ilihakveani Nunavumi Ilihakpaalikvikmi.

“Kuveahuktoga aetoeyamni malguknik sikuktitiyukhaknik manikhaakhaenik ikayutoayagani akhugutikaktilogik kaoyimayamiknik ayokiktoeyamikni Inoen okaohenik ilitkoheniklo nutakaptiknun,” okaktok Towtongie.  “Akhugutigiyaen Jose-m atokpaaligeagani ilipkamayaaganilo Inoen ihumakhutaenik pihimageagani tamaeni inuhikni ila atokhimaginageagani.”

NTI-kon pihimayun 22-nik uktoktunik sikuktonun ikayuheakhanik.  Nalaktun ihivgeoktean tukhiktutin aetuheaktitugiklo Coley Kilabuk-lo tamakmik sikuktuk naonaekhiteakmanik akhugutigiyamiknik Inoen okaohenik ilihaknikmiklo.

“Kivgaktokhogin ilagiyavun, koyayotigiyatka aetuheaktun.  Koyagiyatkalo tamaeta uktoktun sikuktonun ikayutikhanik.  Ilagiyavun koyahuktun ihomagiyaoteakman aapaga, Jose, umuga sikuktonun ikayutaoyomik.  Sikuktun ilihateakonaogaloen, “ okaktok Pujjuut Kusugak.

Tukleom ihulilvikhaa Jose Amaujaq Kusugak Sikuktonun Ikayutaoyunik July 9, 2013-mi.  Sikuktun Nunatakataohimayun Nunavumi Nunataknikun Agikatigegutaoyomi uktolaktun sikuktonun aetuheakhanik ikayutinik.