ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᓇᑦᑎᕙᒃ ᐊᖑᓇᓱᒃᑎᓕᕆᔩᑦ ᑲᑎᒪᔨᖏᑦ ᐃᓕᑕᕐᓯᕘᒃ ᐃᓄᐃᑦ ᐃᖃᓗᒐᓱᒍᓐᓇᓂᕐᒧᑦ ᐱᔪᓐᓇᐅᑎᖏᓐᓂᒃ

ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓᑕ ᑐᖏᓕᐊ ᔭᐃᒥᓯ ᐃᑦᑐᓗᒃ ᑐᓴᖅᑎᑎᖃᐅᔪᖅ ᐅᓪᓗᒥ ᑖᒃᑯᐊ ᓄᓇᕗᑦ ᑐᙵᕕᒃ ᑎᒥᖓ ᐊᖏᖅᓯᒪᓕᕐᒪᑕ ᓂᐅᕕᕐᓂᐊᕐᓗᑎᒃ 1,000 ᑭᓕᒍᓛᒻᓂᒃ ᐃᖃᓗᒃᐱᓐᓂᒃ ᓇᑦᑎᕙᒃᑯᑦ ᐊᖑᓇᓱᒃᑐᓕᕆᔨᒃᑯᖏᑕ ᑲᑎᒪᔨᖏᓐᓂᒃ ᕿᑭᖅᑕᕐᔪᐊᕐᒥᑦ. ᐃᖃᓗᑦᑕᐅᕙᓐᓂᐊᖅᑐᓂᒃ ᖃᒻᒪᖅᑕᓕᐅᑉ ᑲᖏᑦᑐᖓᓂᒃ, ᑕᕝᕙᓂᓕ ᑲᑎᓪᓗᒋᑦ ᓄᓇᖅᑲᑎᒌᓄᑦ ᓂᕿᒃᓴᕆᔭᐅᓗᑎᒃ ᐅᓄᕐᓂᖃᖅᑎᑕᐅᙱᒻᒪᑕ ᐅᕝᕙᓗ ᓄᖑᑕᐅᓗᐊᕐᓂᐊᕆᐊᖏᑕ ᐃᓱᒫᓗᓐᓇᖏᒻᒪᑕ. ᓄᓇᕗᑦ ᑐᙵᕕᒃ ᑎᒥᖓ ᑐᓐᓂᐅᑎᖃᓛᕐᑐᑦ ᐃᖃᓗᓐᓂᒃ ᓂᕿᒃᓴᖃᑦᑎᐊᖏᓗᐊᕐᑐᓄᑦ ᐊᒻᒪ ᐃᓚᖏᑦ ᓂᐅᕕᐊᒃᓴᕆᔭᐅᓗᑎᒃ ᐊᔾᔨᒌᙱᑦᑐᓄᑦ ᓂᐅᕕᕈᒪᔪᓄᑦ.

“ᐃᓄᐃᑦ ᐱᒻᒪᕆᐅᔪᒥᒃ ᐊᖑᓇᓱᒍᓐᓇᐅᑎᖃᕐᒪᑕ ᐱᔪᓐᓇᐅᑎᖃᖅᑐᑎᒃ ᓄᓇᕗᒻᒥ ᐊᖏᕈᑎᑎᒍᑦ, ᐱᖃᓯᐅᑎᓪᓗᒋᑦ ᐃᖃᓗᒐᓱᓐᓂᕐᒥᒃ ᓚᐃᓴᓐᓯᑖᖅᑳᖏᒃᑲᓗᐊᕐᓗᓂ, ᓄᖑᓗᐊᕐᓂᐊᕆᐊᖏᓐᓂᒃ ᐃᓱᒫᓗᓐᓇᕐᑐᖅᑕᖃᖅᑎᓐᓇᒍ, ᓂᕿᒃᓴᕆᔭᕆᐊᓕᕗᑦ ᐱᓪᓗᒋᑦ. ᐅᑯᓂᖓᓗ ᐃᓚᖃᕆᓪᓗᓂ ᐃᖃᓗᑦᑕᐅᔪᑦ ᓂᐅᕕᐅᑎᒋᔭᐅᔪᓐᓇᕐᓂᖏᓐᓂᒃ,” ᐅᖃᖅᑐᖅ ᐃᑦᑐᓗᒃ.

ᒐᕙᒪᒃᑯᓂᖔᖅᑐᑦ ᓄᓇᕘᒥ ᐃᖃᓗᒐᓱᓐᓂᕐᒧᑦ ᑲᒪᑦᑎᐊᕈᑕᐅᔪᑦ ᒪᓕᒃᑐᒋᑦ ᐃᓱᒪᖃᐃᓐᓇᖃᑦᑕᕐᓯᒪᒻᒪᑕ ᐃᓄᐃᑦ ᓂᐅᕕᐊᒃᓴᐅᓂᐊᕐᑐᓂᒃ ᐃᖃᓗᒐᓱᓐᓂᐊᕈᑎᒃ ᐆᒃᑐᕋᐃᓂᕐᒧᑦ ᓚᐃᓴᓐᓯᖃᕆᐊᖃᓐᓂᕋᖅᑕᐅᓪᓗᑎᒃ, ᓈᖕᒪᒋᔭᐅᓯᒪᔪᓂᒃ ᑲᒪᑦᑎᐊᕈᑎᒃᓴᓂᒃ ᐸᕐᓇᒍᑎᓂ ᐅᕝᕙᓗ ᒪᓕᒐᖅᑎᒍᑦ ᒪᓕᒋᐊᖃᖅᑎᑕᐅᓗᑎᒃ ᐃᖃᓗᒐᓱᒍᓐᓇᓂᕐᒥᒃ. ᓄᓇᕗᑦ ᑐᙵᕕᒃ ᑎᒥᖓ ᕿᐱᓗᐊᒍᑎᖃᖅᓯᒪᒻᒪᑕ ᐃᓱᒪᒋᔭᐅᖃᑦᑕᕐᓯᒪᔪᓂᒃ ᑕᒪᐃᓐᓂᒃ ᒪᓕᖏᓐᓂᕋᐃᓪᓗᑎᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᑕᐃᒪᓐᓇ ᓇᓗᓇᐃᖅᓯᒪᒻᒪᑕ ᓄᓇᕘᒥ ᐊᖏᕈᑏᑦ ᐃᑦᑐᓗᒃ ᐅᖃᖅᑐ ᑖᒃᑯᐊ ᓄᓇᕗᑦ ᑐᙵᕕᒃ ᑎᒥᖓ ᑐᑭᑖᓚᐅᕐᒪᑕ ᓂᐅᕕᕈᒪᓪᓗᑎᒃ ᐊᒻᒪ ᓂᐅᕕᐊᒃᓴᖃᕈᒪᓪᓗᑎᒃ ᐃᖃᓗᒃᑕᐅᔪᓂᒃ ᐃᓕᑕᕐᓯᔪᒪᓪᓗᑎᒃ ᐃᓄᐃᑦ ᐃᖃᓗᒐᓱᓐᓂᕐᒧᑦ ᐱᔪᓐᓇᐅᑎᖏᓐᓂᒃ, ᐱᖃᑕᐅᔪᒪᙱᙶᕈᒪᓪᓗᑎᒃ ᓂᐅᕕᐊᒃᓴᖃᓐᓂᒃᑯᑦ ᐃᖃᓗᒐᓱᒍᑕᐅᕙᒃᑐᓂᒃ. ᑖᓐᓇᓕ ᐊᑕᐅᓯᐊᕐᓗᑎᒃ ᓂᐅᕕᓐᓂᖃᕈᑕᐅᓂᐊᕐᑐᖅ ᐃᖃᓗᒃᑕᐅᔪᓂᒃ.

“ᓄᓇᕗᑦ ᑐᙵᕕᒃ ᑎᒥᖓ ᓴᐳᒻᒥᑎᒻᒪᑕ ᐱᒻᒪᕆᐅᓂᖓᓂᒃ ᐃᓄᐃᑦ ᐊᖑᓇᓱᒍᓐᓇᓂᕐᒧᑦ ᐱᔪᓐᓇᐅᑎᖏᓐᓂᒃ ᐱᕕᔾᔪᐊᕆᔭᐅᓪᓗᓂᓗ ᑕᒪᓐᓇ. ᐃᓱᒪᒃᓴᕐᓯᐅᕈᑕᐅᑦᑎᐊᓚᐅᕐᑎᓪᓗᒋᑦ, ᐊᒻᒪᓗ ᑖᒃᑯᐊ ᐱᔪᓐᓇᐅᑎᒋᔭᐅᔪᑦ ᐃᑉᐱᒋᔭᐅᙱᑕᐃᓐᓇᖁᓇᒋᑦ ᐅᕝᕙᓗ ᐱᑕᖃᖏᑦᑐᑎᑐᑦ ᐱᔭᐅᖁᓇᖏᑦ, ᓄᓇᕗᑦ ᑐᙵᕕᒃ ᑎᒥᖓ ᑲᒪᒋᐊᕈᒪᓂᖃᓕᓚᐅᕐᐳᑦ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᐅᔪᓂᒃ ᐱᒡᒍᑎᓗᒋᑦ ᐃᓄᐃᑦ,” ᐅᖃᖅᑐᖅ ᐃᑦᑐᓗᒃ.

ᓄᓇᕗᑦ ᑐᙵᕕᒃ ᐃᑲᔪᖅᐹᓪᓕᕋᓱᐊᕐᐳᑦ ᒪᓕᑦᑕᐅᒋᐊᓕᓐᓂᒃ ᐃᓄᐃᑦ ᐱᖃᑕᐅᓂᖏᓐᓄᒃ ᓂᐅᕕᐊᓴᓂᒃ ᐃᖃᓗᒐᓱᓐᓂᐊᑎᓪᓗᒋᑦ. ᐃᑦᑐᓗᒃ ᐅᖃᕐᒥᔪᖅ ᑖᒃᑯᐊ ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᐃᓐᓇᕐᐳᑦ  ᐋᖅᑭᒃᓱᐃᑎᓪᓗᒋᑦ ᓄᓇᕘᒥ ᐃᖃᓗᒐᓱᓐᓂᕐᒧᑦ ᐱᖁᔭᓂᒃ ᐱᓕᕆᖃᑎᖃᖅᑐᑎᒃ ᐃᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓᓐᓂᒃ ᕼᐊᓐᑐ ᑐᑐᒥ.

 

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: