ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃ ᐃᑲᔫᓯᐊᒃᓴᓕᕆᔨᒃᑯᑦ ᒪᑐᐃᕐᓯᑲᓐᓂᓂᐊᖅᑐᑦ ᑐᒃᓯᕋᐅᓯᐅᕐᓇᒥᒃ ᐃᓕᓐᓂᐊᖅᑎᓄᑦ

(ᓅᕙᐃᒻᕙ 21, 2018 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᓄᑦ (ᑐᓐᖓᕕᒃ) ᐊᖓᔪᖅᑳᖅ ᐊᓗᑭ ᑰᑦᑎᖅ ᖁᕕᐊᒋᔭᓕᒃ ᑐᓴᖅᑎᑦᓯᒋᐊᒃᓴᖅ ᑐᓐᖓᕕᒃᑯᑦ ᐊᐅᓚᑦᓯᓪᓗᑎᒃ ᐃᑲᔪᕐᓱᐃᒻᒪᑕ ᓄᓇᕗᒻᒥ ᐃᓄᓐᓂᒃ ᐃᓕᓐᓂᐊᑲᓐᓂᕋᓱᐊᖅᑐᓂᒃ. ᑭᖑᓂᐊᒍᑦ 2018 ᑐᒃᓯᕋᐅᓯᐅᖁᔨᔾᔪᑏᑦ, 214 ᐃᓕᓐᓂᐊᑲᓐᓂᖅᑐᓄᑦ ᐃᑲᔫᓯᐊᓚᐅᖅᑐᑦ ᓄᓇᕗᑦ ᐃᑲᔫᑎᒃᓴᓕᕆᔨᒃᑯᓐᓂᒃ (NTF) ᐃᓄᓐᓄᑦ ᐃᓕᓐᓂᐊᖅᑎᓄᑦ ᐊᑎᖃᖃᑕᐅᔪᓄᑦ ᓄᓇᕗᒻᒥ ᐊᖏᕈᑎᓂ ᐃᑲᔪᖅᑕᐅᖁᓪᓗᒋᑦ ᐃᓕᓐᓂᐊᖅᑕᖏᓐᓂᒃ.

 

“ᖁᕕᐊᒋᔭᕋ ᐅᓄᖅᑐᑦ ᐃᓄᐃᑦ ᐃᓕᓐᓂᐊᖅᑏᑦ ᐃᓕᓐᓂᐊᕐᒪᑕ ᐃᓕᓐᓂᐊᑲᓐᓂᕕᓐᓂ ᐊᒻᒪᓗ ᓄᓇᕗᑦ ᑐᓐᖓᕕᒃᑯᓐᓂᒃ ᐃᑲᔪᖅᑕᐅᔪᓐᓇᕐᒪᑕ. ᓄᓇᕗᑦ ᑐᓐᖓᕕᒃ ᐃᑲᔫᓯᐊᒃᓴᓕᕆᔨᒃᑯᑦ ᒪᑐᐃᕐᓯᑲᓐᓂᓂᐊᖅᑐᑦ ᑐᒃᓯᕋᐅᓯᐅᕐᓇᒥᒃ ᐃᓕᓐᓂᐊᖅᑎᓄᑦ ᑐᒃᓯᕋᐅᓯᐅᓚᐅᓐᖏᑦᑐᓄᑦ ᐊᑯᓐᓂᖏᓐᓂ ᔪᓚᐃ 1 ᐊᒻᒪᓗ ᐊᐅᒡᒍᓯ 31, 2018” ᐅᖃᖅᑐᖅ ᑰᑦᑎᖅ.

 

ᐃᓕᓐᓂᐊᖅᑏᑦ ᑐᒃᓯᕋᕈᒪᔪᑦ ᐊᒻᒪᓗ ᑐᒃᓯᕋᕈᓐᓇᕐᓯᓚᐅᓐᖏᑦᑐᑦ ᐊᕐᕌᒍᑦᑕ ᐱᒋᐊᓕᓵᕐᓂᖓᓂ ᑐᒃᓯᕋᐅᓯᐅᕈᓐᓇᓚᖓᓕᖅᑐᑦ ᐅᑯᓇᓐᖓᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ, ᓅᕙᐃᒻᕙ 30, 2018-ᒧᓄᑦ ᖃᐅᔨᓴᐅᑦ 5-ᒨᕋᓱᐊᕐᓂᖓᓂ ᕿᑎᕐᒥᐅᑦ ᖃᐅᔨᓴᐅᑖᒍᑦ;

 

  1. $1000 ᐊᔪᕈᓐᓃᓴᕐᓂᕐᒧᑦ ᐊᒻᒪᓗ ᐃᖅᑲᓇᐃᔮᒥᒃ ᖁᑉᕙᕆᐊᕋᓱᐊᖅᑐᓄᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᑦ  ᐃᓕᓐᓂᐊᖅᑎᓄᑦ ᐃᓕᓐᓂᐊᕕᒻᒦᑦᑐᓄᑦ ᐊᓐᖑᑎᒋᐊᕈᑎᒃᓴᓂᒃ ᐃᓕᓐᓂᐊᕐᓯᒪᔭᒥᓂᒃ, P.A.S.S., A.B.E., G.R.E.A.T, ᑐᓐᖓᕕᒋᔭᐅᔪᑦ, ᐃᖅᑲᓇᐃᔮᒧᑦ ᐱᓕᖕᒪᓴᕐᓂᖅ, ᐅᑉᕙᓘᓐᓃᑦ ᓴᓇᔭᕆᐅᕐᓴᓂᕐᒧᑦ ᐃᓕᓐᓂᐊᖅᑕᐅᒧᓂᒃ, ᒥᑦᓯᑎᓐᓅᖏᑦᑐᖅ ᓯᑕᒪᓂᒃ ᐱᓇᓱᐊᕈᓯᕐᓂᒃ ᐃᓕᓐᓂᐊᕐᓗᑎᒃ;

 

  1. $2500 ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᑦ ᐃᓕᓐᓂᐊᑲᓐᓂᕕᒻᒦᑦᑐᓄᑦ, 7-ᓂᒃ ᑕᖅᑭᓂᒃ ᐊᑯᓂᐅᓂᕐᓴᓘᓐᓃᑦ ᐃᓕᓐᓂᐊᕐᓗᑎᒃ, ᐃᓕᓴᕆᔭᐅᓯᒪᔪᒥᒃ ᐃᓕᓐᓂᐊᕕᒻᒥ ᓲᕐᓗ ᓯᓚᑦᑐᓴᕐᕕᒻᒥ ᐅᑉᕙᓘᓐᓃᑦ ᐃᓕᓐᓂᐊᕕᔾᔪᐊᒥ (ᐃᓚᒋᔭᐅᔪᑦ ᐃᓕᓐᓂᐊᖅᑕᒥᓄᑦ ᐃᖅᑲᓇᐃᔭᕆᐅᕐᓴᔪᑦ/ᐃᖅᑲᓇᐃᔭᖅᑐᑦ ᐃᓕᓐᓂᐊᓯᓐᓈᖅᑐᑎᒃ)

 

ᑐᑭᓯᒋᐊᒃᑲᓂᕐᕕᒃᓴᖅ, ᑕᑯᒋᐊᕐᓗᒋᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓄᑦ ᐊᑐᐊᒐᑦ www.tunngavik.com. ᐊᑏ ᐅᖃᓕᒫᒃᑭᑦ ᑐᒃᓯᕋᐅᓯᐅᕐᓂᕐᒧᑦ ᑎᑎᕋᕐᕕᒃᓴᑦ ᐊᑐᐊᕐᓯᔾᔪᑏᓪᓗ ᑐᑭᓯᑦᓯᐊᕋᓱᐊᕐᓗᒋᑦ ᐃᑭᐊᖅᑭᕕᒻᒦᑦᑐᑦ ᐊᑖᓂ ᐱᓇᓱᐊᒐᑦᓴᑦ/ᓄᓇᕗᑦ ᑐᓐᖓᕕᒃ ᐃᑲᔫᓯᐊᒃᓴᓕᕆᔨᖏᓐᓂ ᐊᒻᒪᓗ ᖃᐅᔨᒪᒋᐊᕐᓗᒋᑦ ᐃᓚᓕᐅᑎᔭᕆᐊᓕᓕᒫᑦ ᐃᓚᓕᐅᑎᒐᓗᐊᕐᒪᖔᕐᐱᒋᑦ ᐊᑐᖅᑕᐅᒋᐊᓕᓐᓄᑦ ᑐᓴᕈᑎᓄᑦ, ᐃᓚᒋᔭᐅᓪᓗᑎᒃ ᓄᓇᕗᒻᒥ ᐃᓄᐃᑦ ᐊᑎᖃᖃᑕᐅᔪᓂ ᓈᓴᐅᑏᑦ, ᓇᓗᓇᐃᒃᑯᑕᖅ ᖃᐅᔨᒪᔭᐅᒍᑎ ᑭᓇᐅᓂᓐᓂᒃ ᐊᒻᒪᓗ ᖃᐅᔨᒪᔭᐅᒍᑎ ᐃᓕᓐᓂᐊᕕᒻᒦᓂᓐᓂᒃ.

 

ᑐᒃᓯᕋᐅᑏᑦ ᑎᑎᕋᕐᕕᒃᓴᑦ ᐊᒻᒪᓗ ᐊᐅᓚᑕᐅᔪᒧᑦ ᑐᑭᓯᒋᐊᒃᑲᓐᓂᕈᑎᒃᓴᑦ, ᐊᑐᐃᓐᓇᐅᔪᑦ ᐃᑭᐊᖅᑭᕕᑦᑎᓐᓂ, ᐊᐃᔭᐅᖃᑦᑕᕈᓐᓇᖅᑐᑦ ᓄᓇᓕᓐᓂ ᑐᖅᑲᑕᕐᕕᖕᓂᒃ (ᓄᓇᕗᑦ ᓄᓇᓕᓕᒫᖏᓐᓂ) ᐊᒻᒪᓗ ᓇᓕᑐᐃᓐᓇᖏᓐᓂᒃ ᑐᓐᖓᕕᒃᑯᑦ ᐊᓚᑉᕕᖏᓐᓂᒃ ᐃᖃᓗᑦᑑᑦᑎᐊᒥ, ᑲᖏᕐᖠᓂᖅ ᐊᒻᒪᓗ ᐃᖃᓗᐃᑦ. ᐃᓕᓐᓂᐊᑲᓐᓂᖅᑐᓄᑦ ᑐᒃᓯᕋᐅᑏᑦ  ᐊᐅᓪᓚᖅᑎᑕᐅᒍᓐᓇᖅᑐᑦ ᑎᑎᖅᑲᓂᐊᕐᕕᒃᑯᑦ, ᐃᕐᖐᓐᓈᕈᑎᒃᑯᑦ, ᓱᒃᑲᔪᒃᑯᓘᓐᓃᑦ ᐅᑉᕙᓘᓐᓃᑦ ᓇᖕᒥᓂᖅ ᑐᓂᔭᖅᑐᕐᓗᒋᑦ ᑖᒃᑯᓄᖓ ᑎᑎᕋᕐᓯᒪᔪᓄᑦ ᓅᕙᐃᒻᕙ 30−ᕈᕋᓱᐊᕐᓂᖓ, 2018 ᖃᐅᔨᓴᐅᑦ 5-ᒥ ᕿᑎᕐᒥᐅᑦ ᖃᐅᔨᓴᐅᑖᒍᑦ.

 

ᑖᒃᑯᐊ ᐃᑲᔫᓯᐊᒃᓴᓕᕆᔨᒃᑯᑦ NTF ᓴᖅᑭᖅᑕᐅᓚᐅᖅᑐᑦ ᑐᓐᖓᕕᒃᑯᓐᓂᒃ ᐊᐅᓚᑦᓯᖁᓪᓗᒋᑦ ᐊᒥᐊᒃᑯᓂᒃ ᑮᓇᐅᔭᓂᒃ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᑦ ᐊᑭᓕᕐᓱᖅᑕᐅᕕᖓᓂᒃ ᐊᖏᖃᑎᒌᒍᑎᒃᑯᑦ ᑮᓇᐅᔭᓕᑕᐅᒍᑕᐅᓚᐅᖅᑐᓂᒃ. ᑰᑦᑎᖅ ᐅᖃᒃᑲᓐᓂᓚᐅᖅᑐᖅ, ᓄᓇᕗᒻᒥ ᐃᑲᔫᑎᒃᓴᓕᕆᔨᒃᑯᑦ ᖁᓪᓕᕐᐹᖅ ᓯᕗᓪᓕᐅᔾᔭᐅᔭᕆᐊᓕᖁᑎᖏᓐᓂ ᐃᑲᔪᕐᓂᖅ ᐃᓄᓐᓂᒃ ᐃᓕᓐᓂᐊᖅᑎᓂᒃ ᓯᕗᒧᐊᑦᑎᑦᓯᓇᓱᐊᖅᑐᓂᒃ ᐃᓕᓐᓂᐊᕐᓯᒪᓂᕐᒥᓂᒃ ᐃᓕᓐᓂᐊᕕᒻᒥ. ᓄᓇᕗᒻᒥ ᐊᑎᖃᖃᑕᐅᔫᒍᕕᑦ ᐃᓕᓐᓂᐊᑲᓐᓂᓂᒃᑯᑦ ᐱᕙᓪᓕᐊᓇᓱᐊᕐᓗᑎᒃ, ᐊᑏ ᑖᒃᑯᓇᓐᖓᑦ ᐃᑲᔫᑎᒃᓴᓂᒃ ᐱᓇᓱᐊᖃᑕᐅᒋᑦ ᐃᑲᔪᖅᑕᐅᔾᔪᑎᒃᓴᐅᒻᒪᑕ ᑕᐃᒪᐃᑦᑐᓄᑦ, ᐱᔾᔪᑎᒋᓪᓗᒍ ᑲᔪᓯᒍᕕᑦ ᐃᓕᓐᓂᐊᑕᕐᓂᒃ, ᐃᑲᔪᖅᑕᐅᔪᐃᓐᓇᐅᓂᐊᖅᑐᒍᑦ.”

 

ᑭᐅᕋᓐ ᕙᓚᐅᕋᑎ

ᑭ/ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ

ᓄᓇᕗᑦ ᑐᓐᖓᕕᒃ ᑎᒥᖓ

ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ 1-888-646-0006

www.tunngavik.com

 

ᐊᕐᓇᐅᔪᖅ ᖃᐅᒪᒃ

ᐱᓕᕆᐊᒃᓴᓕᕆᔨ

ᓄᓇᕗᑦ ᑐᓐᖓᕕᒃ ᐃᑲᔪᓯᐊᒃᓴᓕᕆᔨᒃᑯᑦ

ᑎᑎᖅᑲᖃᐅᑖ 280 ᑲᖏᕐᖠᓂᖅ, ᓄᓇᕗᑦ X0C 0G0

ᐅᖄᓚᐅᑖ: (867)-645-5435 ᐊᑭᖃᓐᖏᑦᑐᖅ: 1-888-236-5400

ᓱᒃᑲᔪᒃᑯᑦ: (867-645-5414