ᓴᒃᑯᑕᐅᑲᐅᑎᒋᔭᕆᐊᓕᒃ

(ᔮᓐᓄᐊᕆ 26, 2024 – ᐃᖃᓗᐃᑦ, ᓄᓇᕗᑦ)  ᒪᑭᒋᐊᖅᑕ ᐃᓄᐃᑦ ᐃᓕᓐᓂᐊᕋᑦᓴᖏᑦ ᑯᐊᐳᕇᓴᓐ (ᒪᑭᒋᐊᖅᑕ) ᑲᑎᒪᔨᖏᑦ ᐊᖏᖅᓯᓚᐅᖅᑐᑦ $12 ᒥᓕᐊᓐᓂᒃ ᑮᓇᐅᔭᓂᒃ ᑮᓇᐅᔭᖃᖅᑎᑕᐅᖁᓪᓗᒋᑦ ᐃᑲᔫᑎᒋᔭᐅᓲᑦ ᐱᓕᒻᒪᒃᓴᖅᑐᓄᑦ ᐊᒻᒪᓗ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᐸᑦᑐᓄᑦ ᓄᓇᕗᒻᒥᐅᑦ ᐃᓄᖏᑕ ᐃᑲᔫᓯᐊᖅᑖᕐᕕᒋᔪᓐᓇᕐᓂᐊᖅᑐᓂᒋᑦ.

ᒪᑭᒋᐊᖅᑕᒃᑯᑦ ᐊᖏᖅᓯᓚᐅᖅᑐᑦ ᐊᑐᐊᒐᕐᒥᒃ ᐊᖏᔪᓄᑦ ᐱᓕᕆᐊᕐᓄᑦ ᐃᑲᔪᖅᑐᐃᓂᖃᓲᑦ ᐃᓄᓐᓂᒃ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᐸᑦᑐᓄᑦ ᑮᓇᐅᔭᖃᖅᑎᑕᐅᔪᓐᓇᖁᓪᓗᒋᑦ $5 ᒥᓕᐊᓐ ᑮᓇᐅᔭᑦ ᐃᑲᔫᓯᐊᖅᑖᕐᕕᐅᖃᑦᑕᕐᓂᐊᕐᒪᑦ ᑕᒪᒃᑮᓐᓄᒃ ᐊᕐᕌᒎᓐᓄᒃ 2023-2024 ᐊᒻᒪᓗ 2024-2025. ᑮᓇᐅᔭᑦ ᖄᖓᒍᒃᑲᓐᓂᐅᕗᑦ ᓴᓂᕐᕙᖅᑕᐅᔪᑦ ᐃᓄᐃᑦ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᕐᓂᖏᑦ ᐱᓕᕆᐊᑦ ᑲᑐᔾᔭᐅᓪᓗᓂ ᐊᐅᓚᑕᐅᔪᖅ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᐱᖓᓱᓄᑦ ᐊᕕᑦᑐᖅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ: ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖏᑦ, ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ. ᐊᒥᓲᓂᖏᑦ ᐃᓄᐃᑦ ᐃᓕᓐᓂᐊᖅᑐᑦ ᓯᓚᑦᑐᖅᓴᕐᕕᒻᒥ ᐊᒻᒪᓗ ᐱᓇᓱᐊᖅᑐᑦ ᐃᓄᐃᑦ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑐᑦ ᑮᓇᐅᔭᖅᑖᕋᓱᐊᖅᑐᑦ ᐃᑲᔫᑎᒃᓴᓂᑦ ᐊᒥᓲᒥᓲᓂᖅᓴᐅᓚᐅᕐᒪᑕ ᑕᒪᐃᓐᓂ ᐊᕕᑦᑐᖅᓯᒪᔪᓂ ᑮᓇᐅᔭᖏᑕ ᐊᑐᐃᓐᓇᐅᒪᔪᑦ ᐃᑲᔫᓯᐊᖅᑖᕈᑕᐅᕙᑦᑐᓂ.

“ᐱᐅᔪᒥᒃ ᐃᑉᐱᓐᓂᐊᓇᖅᑐᖅ ᑕᑯᓪᓗᓂ ᐊᒥᓱᒻᒪᕇᑦ ᐃᓕᓐᓂᐊᖅᑐᑦ ᖃᐅᔨᒪᓂᖅᓴᐅᓕᕋᓱᐊᕐᒪᑕ ᐊᒻᒪᓗ ᐊᔪᕈᓐᓃᖅᓴᓪᓗᑎᑦ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑐᑦ, ᐊᒻᒪᓗ ᖁᕕᐊᓱᑦᑐᒻᒪᕆᐅᕗᖓ ᐃᑲᔪᖅᑐᕈᓐᓇᕋᑦᑎᒍᑦ ᐃᓕᓐᓂᐊᕇᕋᓱᐊᖅᑎᓪᓗᒋᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᒻᒪᓗ ᒪᑭᒋᐊᖅᑕᒃᑯᑦ ᐃᒃᓯᕙᐅᑕᖓ, ᐊᓗᑭ ᑰᑦᑎᖅ.

ᖄᖓᒍᒃᑲᓐᓂᖅ, ᒪᑭᒋᐊᖅᑕᒃᑯᑦ ᑲᑎᒪᔨᖏᑦ ᐊᖏᖅᓯᓚᐅᕐᒥᔪᑦ ᓄᑖᕐᒥᒃ ᐊᑐᐊᒐᕐᒥᒃ ᐊᑐᐃᓐᓇᐅᒪᑎᑦᑎᓕᖅᑐᑎᑦ $1 ᒥᓕᐊᓐ ᑮᓇᐅᔭᓂᑦ ᒪᑭᒋᐊᖅᑕᒃᑯᑦ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑐᓄᑦ ᑮᓇᐅᔭᖏᑕ ᐱᓕᕆᐊᖓᓂᒃ, ᑖᓐᓇᓗ ᐊᑐᖅᑕᐅᒋᐊᓯᓛᖅᑐᓂ ᐃᑲᔫᓯᐊᖅᑖᕐᕕᐅᖃᑦᑕᓕᕐᓗᓂ ᐄᐳᕈᓪ 1, 2024.

ᐱᓕᕆᐊᖅ ᐱᓕᕆᖃᑎᒌᒍᑕᐅᓂᐊᕐᒪᑦ, ᑮᓇᐅᔭᖃᖅᑎᑦᒃᑎᓗᓂ, ᐊᒻᒪᓗ ᐃᑲᔪᖅᑐᐃᓂᖃᓪᓚᑦᑖᕐᓗᓂ ᐃᓄᓐᓄᑦ ᐊᖏᖅᑕᐅᓯᒪᔪᑦ ᓯᓚᑦᑐᖅᓴᕐᕕᕐᔪᐊᕐᒥ ᓇᓗᓇᐃᒃᑯᑕᖅᑖᕋᓱᐊᖅᑐᑎᑦ ᐃᓕᓐᓂᐊᕋᔭᖅᑐᓄᑦ, ᐊᒻᒪᓗ ᐅᖓᑕᐅᔨᒻᒪᕆᑦᑐᖅ ᐃᓕᓐᓂᐊᖅᑏᑦ ᑮᓇᐅᔭᖅᑎᒍᑦ ᐃᑲᔪᖅᑐᖅᑕᐅᓗᑎᑦ, ᑮᓇᐅᔭᖃᒃᑲᓐᓂᖅᑎᑕᐅᓪᓗᑎᑦ ᐱᓕᕆᐊᖓ ᐃᑲᔪᖅᑕᐅᓂᐊᕐᒪᑕ ᐱᕚᓪᓕᕋᓱᐊᖅᑎᓪᓗᒋᑦ ᐃᓕᓐᓂᐊᖅᑐᑦ, ᐱᓕᒻᒪᒃᓴᖅᑐᑦ, ᐊᒻᒪᓗ ᐃᖅᑲᓇᐃᔮᖅᑖᕋᓱᐊᖅᑐᑦ ᐱᕚᓪᓕᕋᓱᐊᖅᑐᓪᓗ ᐱᓕᕆᐊᕐᓄᑦ.

ᒪᑭᒋᐊᖅᑕᒃᑯᑦ ᑲᑎᒪᔨᖏᑦ ᐊᖏᖅᓯᓚᐅᖅᑐᑦ ᐋᖅᑭᒋᐊᖅᓯᒪᔪᒥᒃ ᐊᑐᐊᒐᕐᒥᒃ ᖁᕝᕙᕆᐊᕐᓂᖅ ᐱᓕᕆᐊᕐᒧᑦ, ᐃᑲᔪᖅᑐᐃᔨᖃᖅᑎᑦᑎᒍᑕᐅᓂᐊᖅᑐᖅ ᑕᒪᒃᑮᓐᓄᑦ ᑲᑐᔾᔨᖃᑎᒌᓄᑦ ᐃᑲᔪᖅᑐᐃᔨᖃᖅᑎᑦᑎᒐᔭᕐᒪᑕ ᐊᒻᒪᓗᑦᑕᐅᖅ ᓄᓇᕗᒻᒥ ᐃᓄᐃᑦ ᐃᓄᖏᖕᓄᑦ ᐃᑲᔪᖅᑐᖅᑕᐅᓗᑎᑦ. ᐱᓕᕆᐊᖅ ᑮᓇᐅᔭᖅᑐᕈᑎᒃᓴᖏᑦ 2024-25−ᒧᑦ ᐋᖅᑭᒃᑕᐅᓚᐅᖅᑐᖅ $1 ᒥᓕᐊᓐ ᑮᓇᐅᔭᑦ.

-30-

ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒃᑲᕋᔅᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ