ᐱᓇᓱᐊᕈᓐᓇᖅᑐᑦ ᐱᓇᓱᐊᕈᓯᕐᒥᒃ ᐊᑕᐅᓯᕐᒥᒃ ᐱᕕᖃᓱᖓᓕᕐᖓᑕ ᑐᓂᓯᓯᒪᒋᐊᖃᕐᓂᕐᒧᑦ ᐱᓇᓱᐊᕈᑎᖏᓐᓂᒃ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑐᒧᑦ ᐃᑲᔫᓯᐊᔅᓴᕐᒥᒃ ᐱᓇᓱᐊᕈᓯᐅᓂᐊᖅᑐᒥ. ᐃᓱᓕᕝᕕᔅᓴᖃᕐᖓᑦ ᓄᓇᕗᑦ ᐅᓪᓗᖓᓂ, ᔪᓚᐃ 9, 2013.
ᑎᑎᕋᕐᕕᔅᓴᐃᑦ ᓄᓇᕗᑦ ᑐᙵᕕᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓃᑦᑐᑦ, ᐊᒻᒪᓗ ᑐᑭᓯᐅᒪᔾᔪᑎᔅᓴᐃᑦ ᓈᒪᔪᑦ ᑐᓂᐅᖅᑲᖅᑕᐅᔪᒻᒥᔪᑦ ᐃᓕᓴᕕᓕᒫᓄᑦ, ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᓐᓄᑦ, Hᐊᒪᓚᒃᑯᑦ ᐊᓪᓚᕝᕕᖏᓐᓄᑦ ᐊᒻᒪᓗ ᓄᓇᓕᓐᓂᑦ ᑐᓴᐅᒪᖃᑦᑕᐅᑎᓂᕐᒧᑦ ᑐᖅᑲᑕᕐᕕᓐᓄᑦ.
ᐱᓇᓱᐊᖅᑐᑦ ᑎᑎᕋᕆᐊᓖᑦ 500ᓂᑦ−ᐅᖃᐅᓯᓕᒻᒥᒃ ᐅᓂᒃᑳᓕᐊᖏᓐᓂᒃ ᐱᔾᔪᑎᓕᓐᓂᒃ ᖃᓄᖅ ᐃᓕᓐᓂᐊᕈᑎᖏᑦ ᐊᑐᖅᑎᑦᑎᒋᐊᕐᓂᐊᕐᒪᖔᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᑭᒃᑰᔾᔪᓯᖏᓐᓂᒃ, ᐅᖃᐅᓯᖓᓐᓂᒃ ᐃᓕᖅᑯᓯᖓᓐᓂᓪᓗ. ᑕᒪᕐᒥᒃ ᐅᓂᒃᑳᓕᐊᑦ ᑖᒃᑯᐊᓪᓚᑦᑖᖑᒋᐊᓖᑦ ᐊᒻᒪᓗ ᐊᔪᕆᓯᒪᒋᐊᖃᙱᑦᑐᑦ ᑎᑎᕋᖅᑕᐅᒌᕐᓯᒪᔪᓂᑦ ᐊᓯᖏᓐᓄᑦ ᑎᑎᕋᕐᓯᒪᔪᓄᑦ. ᐱᓇᓱᐊᖅᑐᑦ ᐃᓕᓐᓂᐊᖅᑲᑕ ᐃᓕᓐᓂᐊᕐᓂᓕᕆᓂᕐᒥᒃ ᐅᕝᕙᓘᓐᓃᑦ ᐃᓄᐃᑦ ᐅᖃᐅᓯᖓᓐᓂᒃ ᐱᔪᒥᓇᓗᐊᙳᐊᕋᔭᕐᒥᔪᖅ. ᖃᓄᖅᑑᕈᑕᐅᔪᓐᓇᕐᒥᔪᑦ ᐱᓇᓱᐊᖅᑐᖅ ᓇᓗᓇᐃᕐᓯᑦᑎᐊᑐᐊᖅᑲᑦ ᖃᓄᖅ ᐃᓕᓐᓂᐊᕈᑎᖏᑦ ᐃᖅᑲᓇᐃᔮᖓᓗ ᐃᑲᔫᑎᖃᕐᓂᐊᕐᒪᖔᑦ ᐱᕙᓪᓕᐊᑎᑦᑎᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ.
ᐃᓕᓐᓂᐊᕈᓯᐊᖅᑖᑎᑦᑎᒐᔭᖅᑐᑦ ᒪᕐᕉᓐᓂᒃ ᐃᓅᓐᓂᒃ $5,000ᓂᑦ ᐃᓕᓐᓂᐊᓂᐊᖅᑎᓪᓗᒍ ᐃᓕᓴᕆᔭᐅᓯᒪᔪᓂᑦ ᓯᓚᑦᑐᓴᕐᕕᓐᓂᑦ. ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᕿᒥᕈᔩᑦ ᕿᒥᕐᕈᒐᔭᖅᑐᑦ ᐱᓇᓱᐊᕈᑕᐅᓯᒪᔪᓂᑦ ᓂᕈᐊᕋᔭᖅᑐᑎᓪᓗ ᐃᓕᓐᓂᐊᖅᑎᓂᑦ ᒪᓕᓪᓗᒋᑦ ᐃᓕᓐᓂᐊᖅᑕᖏᑦ, ᐅᓂᒃᑳᓕᐊᕆᓯᒪᔭᖏᑦ, ᐊᒻᒪᓗ ᑐᑭᓯᒋᐊᕐᕕᐅᒍᓐᓇᕐᓯᒪᓂᕋᖅᑕᖏᑦ.
ᐃᓕᓐᓂᐊᖅᑏᑦ ᐊᑎᖃᖃᑕᐅᔪᑦ ᐅᕝᕙᓘᓐᓃᑦ ᐊᑎᓕᐅᖅᑕᐅᒍᓐᓇᖅᑐᑦ ᐃᓚᒋᔭᐅᓂᕐᒧᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂᑦ ᐱᓇᓱᐊᕈᓐᓇᖅᑐᑦ ᐃᓕᓐᓂᐊᕈᓯᐊᔅᓴᓂᑦ.
