ᑐᓴᕋᑦᓴᓕᕆᔩᑦ

ᐃᓄᒃᑐᑦ ᑎᑎᕋᕐᓗᓂ ᓵᓚᒃᓴᕋᓱᐊᕐᓂᖅ ᓴᖅᑭᖅᑕᐅᔪᖅ

(ᔪᓚᐃ 9, 2020 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᐅᓪᓗᖓᓂ, ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᓴᖅᑮᔪᖅ ᐃᓄᒃᑐᑦ ᑎᑎᕋᕐᓗᓂ ᓵᓚᒃᓴᕋᓱᐊᕐᓂᕐᒥᒃ, ᐊᐅᓚᑕᖓ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ, ᐃᑲᔫᑎᒃᓴᓕᕆᔩᑦ ᑲᑐᔾᔨᖃᑎᒌᑦ ᐊᐅᓚᑕᖏᑦ ᑐᙵᕕᒃᑯᑦ.

ᓄᓇᕗᒻᒥ ᐃᓄᐃᑦ ᑐᓂᓯᖃᑦᑕᕈᓐᓇᖅᑐᑦ ᓴᖅᑭᖅᑕᐅᓯᒪᒌᙱᑦᑐᓂᒃ ᐅᖃᓕᒫᒐᕐᓂᒃ, ᓄᐊᑕᐅᓯᒪᔪᓂᒃ ᓴᖅᑭᖅᑕᐅᓯᒪᙱᑦᑐᓂᒃ ᐅᓂᒃᑳᓂᒃ ᐅᖃᓗᕋᐅᔭᐅᑎᓂᓪᓘᓐᓃᑦ, ᐅᕝᕙᓘᓐᓃᑦ ᓇᓗᓇᐃᔭᐅᑎᓂᒃ ᐅᖃᓕᒫᒐᓕᐊᑦᓴᒧᑦ ᐅᕝᕙᓘᓐᓃᑦ ᓇᐃᓈᖅᓯᒪᔪᒥᒃ−ᐅᓂᒃᑳᓕᐅᕐᓂᕐᒥᒃ. ᐃᓄᒃᑐᑦ ᑎᑎᕋᕐᓗᓂ ᓵᓚᒃᓴᐅᓯᐊᖅ ᑐᓂᔭᐅᓂᐊᖅᑐᖅ ᐊᑕᐅᓯᕐᒧᑦ ᐅᓂᒃᑳᓕᐅᖅᑐᒧᑦ $80,000 ᐊᒻᒪᓗ ᐃᑲᔪᕐᓗᓂ ᑲᔪᓰᓐᓇᑎᑦᓯᓂᕐᒥᒃ ᑎᑎᕋᖃᑦᑕᓂᕐᒥᒃ ᐊᕐᕌᒍᓕᒫᒥ, ᐃᓚᒋᔭᐅᓗᑎᒃ ᐱᓕᕆᐊᖃᕐᓂᕐᒥᒃ ᐊᒻᒪᓗ ᐃᓕᓴᐃᖃᑦᑕᓂᕐᒥᒃ, ᓇᐃᑦᑐᓂᒃ ᐅᓂᒃᑳᓂᒃ ᐅᖃᓕᒫᒐᓕᐅᕐᓗᓂ. ᓯᑕᒪᐅᓂᐊᕐᒥᔪᑦ ᓵᓚᒃᓴᐅᓯᐊᖑᒃᑲᓂᖅᑐᑦ ᐊᑭᖃᕋᔭᖅᑐᑦ $10,000, $5,000, $3,000 and $2,000. ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᐃᖅᑲᓇᐃᔭᖃᑎᖃᕐᓂᐊᖅᑐᑦ ᓵᓚᒃᓴᖅᑐᒥᒃ ᑎᑎᕋᖅᑐᒥᓂᕐᒥᒃ ᐱᐊᓂᕐᓗᒍ ᓴᖅᑭᕐᓗᒍᓗ ᐅᖃᓕᒫᒐᖅ ᐊᒻᒪᓗ ᑲᑎᖅᓱᐃᓂᕐᒥᒃ ᓇᐃᑦᑐᓂᒃ ᐅᓂᒃᑳᓂᒃ ᑐᓂᔭᐅᓯᒪᔪᓂᒃ.

ᓴᐳᔾᔨᓯᒪᓂᖅ, ᐱᕚᓪᓕᑎᑦᓯᓂᖅ ᐊᒻᒪᓗ ᐅᑎᖅᑎᑦᓯᓇᓱᐊᕐᓂᖅ ᐃᓄᒃᑐᑦ−ᐃᓘᓐᓈᒍᑦ ᐃᓅᓯᐅᔪᑦ ᓄᓇᕗᒻᒥ−ᐃᓚᒋᔮ ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃ) ᑕᓪᓕᒪᑦ ᓂᕆᐅᒃᑖᕆᔭᖏᑦ 2018-2021. ᐃᓄᒃᑐᑦ ᑎᑎᕋᕐᓗᓂ ᓵᒪᒃᓴᕋᓱᐊᕈᑎ ᐃᑲᔫᑎᓂᐊᖅᑐᖅ ᑎᑭᐅᑎᓂᕐᒧᑦ ᑖᑦᓱᒧᖓ ᑐᕌᒐᕐᒧᑦ, ᓴᖅᑮᓂᖅ ᐃᓄᒃᑐᑦ ᑎᑎᕋᖅᓯᒪᔪᓂᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᖃᐅᑕᒫᖅᓯᐅᑎᒋᓗᒍ ᐊᑐᖃᑦᑕᕐᓂᕐᒥ ᑐᑭᓯᐊᓂᕐᒥᓪᓗ ᐃᓄᒃᑐᑦ.

“ᐃᓄᒃᑐᑦ ᐆᒪᔪᖅ ᐅᖃᐅᓯᖅ. ᐃᓄᒃᑐᑦ ᑎᑎᕋᕐᓗᓂ ᓵᓚᒃᓴᐅᓯᐊᖅᑎᑦᓯᓂᖅ ᐅᓄᖅᓯᑲᓐᓂᕈᑕᐅᔪᓐᓇᖅᑐᖅ ᐊᑐᐃᓐᓇᐅᔪᓂᒃ ᐅᖃᓕᒫᒐᕐᓂᒃ ᐅᓂᒃᑲᐅᓯᓕᓐᓂᒃ ᐅᓂᒃᑳᑎᓐᓂᒃ. ᐃᓚᒋᔮ ᓇᓗᓇᐃᖅᓯᓂᕐᒥᒃ ᐅᖃᐅᓯᑦᑕ ᐊᑐᖅᑕᐅᓕᖅᐸᓪᓕᐊᒍᑎᒃᓴᖓᓄᑦ,” ᐅᖃᖅᑐᖅ ᐊᖓᔪᖅᑳᖅ ᐊᓗᑭ ᑰᑦᑎᖅ”.

ᓴᖅᑭᖅᑕᐅᒍᒪᔪᓕᒫᑦ ᑐᙵᓱᑦᑎᑕᐅᔪᑦ, ᓇᓕᑐᐃᓐᓇᖏᑎᒍᑦ ᓄᓇᕗᒻᒥ ᐃᓄᒃᑐᑦ ᐅᖃᐅᓯᖏᑦ ᐊᑐᖅᑕᐅᓗᑎᒃ ᐊᒻᒪᓗ ᑎᑎᕋᖅᑑᑉ ᑎᑎᕋᕈᓯᕐᒥᒃ ᐊᑐᕈᒪᔭᖓᒍᑦ (ᐃᓅᔨᖓᔪᑦ, ᖃᓪᓗᓇᐅᔨᖓᔪᑦ, ᐊᓯᖏᑎᒍᓪᓗ). ᓄᓇᕗᒻᒥ ᐃᓄᐃᑦ ᐅᑭᐅᓖᑦ 18−ᓂᒃ ᐅᖓᑖᓂᓗ ᐆᑦᑐᕈᓐᓇᖅᑐᑦ. ᑐᓂᔭᐅᔪᑦ/ᓇᓗᓇᐃᔭᐅᑎᑦ ᓴᖅᑭᖅᑕᐅᓚᐅᖅᓯᒪᒋᐊᖃᙱᑦᑐᑦ, ᐃᔾᔪᐊᖅᓯᓯᒪᙱᓪᓗᓂ ᐅᖃᓕᒫᒐᖅ ᐅᕝᕙᓘᓐᓃᑦ ᓇᐃᑦᑐᑦ ᐅᓂᒃᑳᓕᐊᑦ ᐅᕝᕙᓘᓐᓃᑦ ᐅᖃᓗᕋᐅᔭᐅᑏᑦ ᐊᒻᒪᓗ ᑐᓂᔭᐅᓯᒪᒋᐊᓖᑦ ᐆᑦᑑᕝᕙ 9, 2020. ᑕᑕᑎᕋᑦᓴᖅ ᑕᑕᑎᖅᑕᐅᓯᒪᑦᓯᐊᕐᓗᓂ ᑐᒃᓯᕋᐅᑦ ᐊᒻᒪᓗ ᑐᑭᓯᒋᐊᒃᑲᓐᓂᕈᑏᑦ ᐊᑐᐃᓐᓇᐅᔪᑦ ᑐᙵᕕᒃᑯᑦ ᐃᑭᐊᖅᑭᕕᖓᓂ.

-30-

ᖃᐅᔨᒋᐊᕐᕕᒃᓴᖅ:

ᔨᐊᓯ ᕗᕋᐃᓱ
ᐃᓄᒃᑎᑐᑦ ᐊᑐᐊᒐᕐᓂᒃ ᖃᐅᔨᒪᔨᑕᒻᒪᕆᒃ

ᐃᑭᐊᖅᑭᕕᒃ: www.tunngavik.com

ᑲᒪᒋᔭᐅᓯᒪᓂᖓ

ᐱᓇᓱᐊᒐᑦᓴᖅ
ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᐃᓕᓴᖅᓯᓯᒪᔪᑦ ᐱᖕᒪᕆᐅᓂᖓᓂᒃ ᓴᐳᔾᔨᓯᒪᓂᕐᒥᒃ, ᐱᕚᓪᓕᕈᑎᒃᓴᓂᒃ ᐊᒻᒪᓗ ᐅᑎᖅᑎᑦᓯᓂᕐᒥᒃ ᐃᓄᒃᑐᑦ ᑎᑎᕋᖅᓯᒪᔪᒃᑯᑦ ᐊᒻᒪᓗ ᑲᔪᖏᖅᓴᐅᑎᒃᓴᒥᒃ ᐃᑲᔪᖅᓯᒍᑎᒃᓴᒥᓪᓗ ᑲᑦᓱᖓᐃᒃᑲᓐᓂᖁᓪᓗᒋᑦ ᐃᓄᐃᑦ ᐊᒥᓲᓂᖅᓴᐃᑦ ᑎᑎᕋᕐᓂᕐᒥᒃ ᓴᖅᑮᓂᕐᒥᓪᓗ ᑎᑎᕋᖅᓯᒪᔪᓂᒃ ᐃᓄᒃᑐᑦ.

ᓵᓚᒃᓴᐅᓯᐊᑦᓴᖅ
ᐃᓄᒃᑐᑦ ᑎᑎᕋᕐᓂᕐᒧᑦ ᓵᓚᑦᓴᖅᑐᖅ ᑐᓂᔭᐅᓂᐊᖅᑐᖅ ᐊᑕᐅᓯᕐᒧᑦ ᐅᓂᒃᑳᓕᐅᖅᑐᒧᑦ:

a) ᑮᓇᐅᔭᑎᒍᑦ ᓵᓚᑦᓴᐅᓯᐊᖑᓂᐊᖅᑐᖅ $80,000.00
b) ᐱᕕᒃᓴᖃᖅᑎᑕᐅᓗᓂ ᐊᑭᓕᖅᑕᐅᓯᒪᔪᒥᒃ ᑎᑎᕋᕐᓂᕐᒧᑦ ᐃᓂᒋᓂᐊᖅᑕᖓᓂᒃ; ᐊᒻᒪᓗ
c) ᐱᕕᒃᓴᖃᖅᑎᑕᐅᓗᓂ ᐃᖅᑲᓇᐃᔭᖃᑎᖃᕐᓂᕐᒥᒃ ᐊᓯᖏᓐᓂᒃ ᐃᓄᓐᓂᒃ ᓲᕐᓗ ᑎᑎᕋᖅᑎᓂᒃ, ᐅᖃᐅᓯᓕᕆᔨᓂᒃ, ᐃᓕᓴᐃᔨᓂᒃ, ᐊᒻᒪᓗ ᑎᑎᕋᖅᓯᒪᔪᓂᒃ ᐋᖅᑭᒋᐊᕆᔨᓂᒃ ᐊᓯᖏᓐᓂᓪᓗ ᐱᐊᓂᒍᑎᒃᓴᖓᓂᒃ ᑎᑎᕋᖅᓯᒪᔪᓂᒃ ᐱᓕᕆᐊᒥᒍᑦ ᐅᖃᓕᒫᒐᐅᓕᕐᓗᓂ.

ᑮᓇᐅᔭᑦ ᓵᓚᑦᓴᐅᓯᐊᖑᓂᐊᖅᑐᑦ ᓯᑕᒪᓄᑦ (4) ᑭᖑᓕᖏᓐᓄᑦ ᓵᓚᓕᓐᓄᑦ (ᑖᒃᑯᐊ “ᓵᓚᖃᐅᓯᐊᑦᓴᑲᓐᓃᑦ”), ᐊᒻᒪᓗ ᑐᓂᔭᐅᔪᓂᒃ ᑲᑎᖅᓱᐃᓂᕐᒧᑦ ᐊᒻᒪᓗ ᓴᖅᑮᓂᕐᒥᒃ ᑎᑎᕋᖅᓯᒪᔪᓂᒃ, ᐃᓚᒋᐊᕈᑕᐅᓗᑎᒃ ᑲᑎᖅᓱᖅᑕᐅᓯᒪᔪᓄᑦ ᑎᑎᕋᖅᑕᐅᓯᒪᔪᓂᒃ ᐃᓄᓐᓄᑦ ᐃᓄᒃᑐᑦ. ᐅᓄᕐᓂᖏᑦ ᓵᓚᖃᐅᓯᐊᑦᓴᑲᓐᓃᑦ ᑭᖑᓕᖏᓐᓄᑦ ᓵᓚᓕᓐᓄᑦ ᐃᒪᐃᓕᖓᓂᐊᖅᑐᑦ:

$10,000.00 – ᑐᓪᓕᐊ
$5,000.00 – ᐱᖓᔪᐊᑦ
$3,000.00 – ᓯᑕᒪᖓ
$2,000.00 – ᑕᓪᓕᒪᖓ

ᐱᔪᓐᓇᖅᑎᑕᐅᔪᑦ
ᑭᓇᑐᐃᓐᓇᖅ ᐃᓅᑉᐸᑦ ᐊᑎᖃᖃᑕᐅᓗᓂ ᓄᓇᕗᑦ ᐊᖏᕈᑎᖏᓐᓂ ᐅᑭᐅᖃᕐᓗᓂ 18 ᐅᖓᑖᓂᓗ, ᑐᓂᓯᔪᓐᓇᖅᑐᖅ ᐃᓄᒃᑐᑦ ᑎᑎᕋᖅᓯᒪᔪᓂᒃ ᐃᓱᒪᒃᓴᖅᓯᐅᕈᑎᒃᓴᓂᒃ.

ᐅᑯᐊ ᐃᓚᒋᔭᐅᔪᓐᓇᖅᑎᑕᐅᙱᑦᑐᑦ ᐱᓇᓱᐊᕐᓂᕐᒧᑦ: NTF ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ; ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ) ᑲᑎᒪᔩᑦ ᐃᖅᑲᓇᐃᔭᖅᑏᓪᓗ; ᐊᒻᒪᓗ ᐃᓄᒃᑐᑦ ᑎᑎᕋᕐᓗᓂ ᓴᓚᒃᓴᕋᓱᐊᕐᓂᕐᒧᑦ ᓂᕈᐊᖅᑏᑦ ᑲᑎᒪᔨᕋᓛᖏᑦ ᐊᒻᒪᓗ ᐅᓐᓂᓗᕝᕖᑦ ᑲᑎᒪᔨᕋᓛᖏᑦ.

ᒪᓕᒐᑦᓴᓕᐊᖑᓯᒪᔪᑦ
ᐃᓱᒪᑦᓴᖅᓯᐅᕈᑕᐅᒍᒪᔪᑦ ᐃᓄᒃᑐᑦ ᑎᑎᕋᕐᓗᓂ ᓵᓚᒃᓴᕋᓱᐊᕐᓂᕐᒧᑦ, ᐃᓄᒃ ᑐᓂᓯᔭᕆᐊᓕᒃ ᐃᓄᒃᑐᑦ ᑎᑎᕋᖅᓯᒪᔪᓂᒃ ᓇᓗᓇᐃᖅᓯᓯᒪᓗᑎᒃ ᐊᑕᖏᑦᑐᒥᒃ ᑎᑎᕋᕈᒫᕐᓂᐊᑕᕐᓂᒃ ᐃᓄᒃᑐᑦ ᒥᑦᓯᑎᓐᓅᖏᑦᑐᖅ 8 ᐊᓪᓗᐃᓯᒪᓗᓂ ᑎᑎᕐᓂᖓᓂᒃ ᑎᑎᕋᕐᕕᑦᓴᐅᑉ ᒪᑉᐱᒐᕐᓂᒃ ᐊᒻᒪᓗ ᐊᖏᓂᖅᐹᖑᒍᓐᓇᖅᑐᖅ 12 ᐊᓪᓗᐃᖃᑦᑕᖅᓯᒪᓗᓂ ᑎᑎᕋᕐᓂᖓ ᒪᑉᐱᒐᕐᓂᒃ. ᐃᓄᒃᑐᑦ ᑎᑎᕋᖅᓯᒪᔪᓂᒃ ᐱᓕᕆᐊᖑᓯᒪᔪᑦ ᐃᔾᔪᐊᖅᓯᓯᒪᔭᕆᐊᖃᙱᑦᑐᑦ ᑎᑎᕋᖅᑕᐅᔪᑦ ᐅᓂᒃᑳᓕᐅᖅᑐᒧᑦ ᓴᖅᑭᖅᑕᐅᓚᐅᖅᓯᒪᙱᓪᓗᑎᒃ ᐅᓂᒃᑳᓕᐊᒥᓃᑦ. ᐃᓄᒃᑐᑦ ᑎᑎᕋᕐᓗᓂ ᐱᓕᕆᐊᖅ ᐃᓗᓕᖃᕆᐊᖃᙱᑦᑐᖅ ᑎᑎᕋᖅᑕᐅᓯᒪᔪᓂᒃ ᐊᓯᖏᓐᓄᑦ ᑎᑎᕋᖅᑐᒥᓂᕐᓄᑦ.

ᐊᑐᖅᑕᐅᔭᕆᐊᓖᑦ
ᑐᓂᔭᐅᔪᖅ ᐃᓄᒃᑐᑦ ᑎᑎᕋᖅᓯᒪᔪᖅ ᐱᓕᕆᐊᖑᔪᒥ ᐃᓚᖃᕆᐊᓕᒃ ᑐᑦᓯᕋᐅᒻᒥᒃ ᑕᑕᑎᒐᑦᓴᒥᒃ. ᑎᑎᕋᖅᑐᑦ ᐊᑎᖓ ᓴᖅᑭᔮᕆᐊᖃᙱᑦᑐᖅ ᓇᓂᓕᒫᖅ ᐃᓄᒃᑐᑦ ᑎᑎᕋᖅᓯᒪᔪᓂ ᑎᑎᕋᖅᑕᖓᑕ ᐃᓗᐊᓂ, ᑕᐃᒎᓯᖓᓂ, ᐅᕝᕙᓘᓐᓃᑦ ᖃᕆᓴᐅᔭᒃᑯᑦ ᐊᑎᖓ ᖃᐅᔨᒪᔭᐅᖁᓇᒍ ᐱᓕᕆᐊᒃᓴᕆᔭᖏᓐᓄᑦ ᓂᕈᐊᕐᓂᐊᖅᑎᐅᓂᐊᖅᑐᓄᑦ.

ᑐᓂᔭᐅᓯᒪᒍᓐᓇᕐᕕᖓ
ᑐᓂᔭᐅᓯᒪᔭᕆᐊᓖᑦ ᐆᑦᑑᕝᕙ 9, 2020.

ᕿᒥᕐᕈᔭᐅᓂᖏᑦ ᑐᓂᔭᐅᔪᑦ
ᑐᓂᔭᐅᔪᑦ ᖃᐅᔨᓴᖅᑕᐅᒋᐊᙵᖅᑳᕐᓂᐊᖅᑐᑦ ᑐᙵᕕᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᓱᖅᑯᐃᒪᒍᑎᒃᓴᓂᒃ ᑐᓂᔭᐅᔪᑦ ᒪᓕᑦᓯᒪᑦᓯᐊᕋᓗᐊᕐᒪᖔᑕ ᐊᑐᖅᑕᐅᒋᐊᓕᓐᓂᒃ ᓵᓚᒃᓴᐅᓯᐊᕐᓂᕐᒧᑦ ᐊᒻᒪᓗ ᐊᑐᖅᑕᐅᒋᐊᓖᑦ ᐃᓚᒋᔭᐅᔪᓐᓇᕈᑎᒃᓴᖓᓄᑦ ᒥᑦᓯᑎᓐᓅᖓᒋᐊᖃᕐᓂᕐᒧᑦ ᐅᓄᕐᓂᖅᐹᖑᔭᕆᐊᖃᕐᓂᖏᓐᓂᓪᓗ ᒪᑉᐱᒐᑦ.

ᑐᓂᔭᐅᔪᑦ ᕿᒥᕐᕈᔭᐅᓂᐊᖅᑐᑦ ᓂᕈᐊᖅᑏᑦ ᑲᑎᒪᔨᕋᓛᖏᓐᓄᑦ ᑎᒃᑯᐊᖅᑕᐅᓯᒪᔪᓄᑦ ᑐᙵᕕᒃᑯᑦ ᐊᖓᔪᖅᑳᖓᓄᑦ ᐅᑯᓇᙶᖅᓯᒪᓂᐊᖅᑐᓂᒃ ᖃᐅᔨᒪᔪᕐᔪᐊᓂᒃ ᐃᓄᒃᑐᑦ ᐅᖃᐅᓯᓕᕆᓂᕐᒥᒃ, ᓴᓇᑐᔪᒥᒃ ᑎᑎᖅᑭᕆᔩᑦ, ᐊᒻᒪᓗ ᐅᖃᓕᒫᒐᑦᓴᓂᒃ ᓴᖅᑮᓂᕐᒥᒃ. ᑲᑎᒪᔨᕋᓛᓃᖃᑕᐅᓂᐊᖅᑐᑦ ᐊᕕᑦᑐᖅᓯᒪᓂᕐᓂᒃ ᑭᒡᒐᖅᑐᐃᔪᑦ ᓄᓇᕗᒻᒥ, ᐊᒻᒪᓗ ᐃᓚᒋᔭᐅᒍᓐᓇᓂᐊᕐᒥᔪᑦ ᑎᒃᑯᐊᖅᑕᐅᓯᒪᔪᑦ ᐊᓯᖏᓐᓄᑦ ᐃᓚᒋᔭᐅᔪᓄᑦ ᕿᒥᕐᕈᔪᑦᓴᒫᓂᒃ ᐃᓄᐃᓐᓇᖅᑐᓐ ᑎᑎᕋᖅᓯᒪᔪᓂᒃ.

ᕿᒥᕐᕈᓂᖏᑦ ᓂᕈᐊᖅᑏᑦ ᑲᑎᒪᔨᕋᓛᑦ ᐊᔾᔨᒌᑎᑦᓯᓂᐊᖅᑐᑦ, ᐃᓚᐃᓐᓇᓱᙱᓪᓗᑎᒃ ᐊᒻᒪᓗ ᐃᓚᐅᑎᑦᓯᓗᑎᒃ ᑕᒪᐃᓐᓂᒃ ᐃᓄᒃᑐᑦ ᑎᑎᕋᖅᓯᒪᔪᓂᒃ. ᕿᒥᕐᕈᓂᖅ ᐃᑉᐱᒋᔭᖃᑦᓯᐊᕆᐊᖃᕐᓂᐊᕐᒥᔪᖅ ᐅᖃᐅᓯᖃᑎᒌᙱᑦᑐᓂᒃ ᐊᒻᒪᓗ ᐊᑐᕈᒪᓯᒪᔭᖏᓐᓂᒃ ᐅᖃᐅᓯᖃᑎᒌᙱᓂᒃᑯᑦ ᐱᓇᓱᐊᖃᑕᐅᔪᒥᒃ.
ᕿᒥᕐᕈᓂᕐᒦᖃᑕᐅᒍᓐᓇᖅᑐᑦ ᓈᖕᒪᒃᑲᓗᐊᕐᒪᖔᑕ ᐊᕕᑦᑐᖅᓯᒪᓂᕐᓂ ᑭᒡᒐᖅᑐᐃᔪᑦ ᐃᓄᒃᑐᑦ ᑎᑎᕋᖅᓯᒪᔪᓕᒪᓂᒃ.

ᐅᓐᓂᕐᓗᓐᓂᕐᒧᑦ ᐊᐅᓚᓂᖓ
ᓵᓚᖃᖃᑕᐅᙱᑦᑐᖅ ᐱᓇᓱᐊᖃᑕᐅᔪᖅ ᐅᓐᓂᕐᓘᑎᖃᕈᓐᓇᖅᑐᖅ ᐃᓱᒪᓕᐅᕈᑕᐅᔪᒥᒃ ᐅᓐᓂᕐᓗᕝᕖᑦ ᑲᑎᒪᔨᕋᓛᖏᓐᓄᑦ ᑖᒃᑯᐊ ᐱᖓᓲᒍᓐᓇᖅᑐᑦ (3) ᑎᒃᑯᐊᖅᓯᒪᔭᖏᑦ ᑐᙵᕕᒃᑯᑦ ᐊᖓᔪᖅᑳᖓᑕ. ᐃᓱᒪᓕᐅᕈᑎᖓ ᐅᓐᓂᕐᓗᕝᕖᑦ ᑲᑎᒪᔨᕋᓛᖅ ᓵᓚᒋᔭᑦᓴᐅᖏᑦᑐᖅ. ᐅᓐᓂᕐᓗᓐᓂᕐᒧᑦ ᑐᒃᓯᕋᐅᑎᒦᒋᐊᓕᒃ ᐱᔾᔪᑕᐅᔪᓂᒃ ᐅᓐᓂᕐᓗᓐᓂᕐᒧᑦ ᐃᓱᒪᑦᓴᖅᓯᐅᕈᑕᐅᖁᔭᐅᔪᑦ. ᐅᓐᓂᕐᓗᑦᑐᖃᕐᐸᑦ ᓯᓚᐃᕐᕆᑦᓯᔪᖃᕆᐊᖓ, ᐅᕝᕙᓘᓐᓃᑦ ᖃᐅᔨᓴᕐᓂᕐᒧᑦ ᐃᖅᑲᓇᐃᔭᖅᑏᑦ, ᐅᕝᕙᓘᓐᓃᑦ ᐃᓚᒋᔭᐅᔪᒥᒃ ᓂᕈᐊᖅᑎᓃᙶᖅᑐᒥᒃ ᑲᖐᓱᑦᑐᖃᖅᐸᑦ ᑐᓂᓯᓯᒪᔪᖃᕆᐊᖓ ᓯᓚᐃᕐᕆᑦᓯᒍᑎᒥᒃ, ᑐᙵᕕᒃᑯᑦ ᐊᐅᓚᔾᔭᐃᓂᐊᖅᑐᑦ ᖃᐅᔨᓴᖅᑎᑦᓯᓕᕐᓗᑎᒃ ᓈᖕᒪᑦᑐᒃᑯᑦ ᐊᒻᒪᓗ ᐊᔪᖅᑎᑕᐅᓕᕐᓗᓂ ᑐᓂᔭᐅᑎᒪᔪᖅ ᓯᓚᐃᕐᕆᑦᓯᒍᑎᒥᓂᐅᓂᖓ ᓇᓗᓇᐃᖅᑕᐅᑉᐸᑦ.

Download (PDF, 106KB)

Download (PDF, 371KB)

Download (PDF, 73KB)