(ᓅᕙᐃᒻᕙ 16, 2021 – ᑲᖏᕐᖠᓂᖅ, ᓄᓇᕗᑦ) ᐅᓪᓗᒥ, ᐃᓚᒋᔭᐅᔪᑦ ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᙵᕕᒃ) ᐊᕐᕌᒍᑕᒫᖅᓯᐅᒻᒥᒃ ᑲᑎᒪᔪᑦ ᑲᔪᓯᑎᑦᓯᖅᑲᐅᔪᑦ ᐊᑐᓕᖁᔨᔾᔪᑎᒥᒃ ᐋᔩᕋᕈᑕᐅᕙᓪᓕᐊᖁᓪᓗᒍ ᑎᓕᓯᔾᔪᑎᒥᒃ ᑲᓇᑕ ᒐᕙᒪᒃᑯᖏᓐᓄᑦ ᐊᐅᓚᑕᐅᕙᓪᓕᐊᖁᓪᓗᒍ ᐊᖏᕈᑕᐅᓯᒪᔪᖅ ᐱᔪᓐᓇᐅᑎᖓ ᐃᓄᐃᑦ ᓇᖕᒥᓂ− ᒐᕙᒪᖃᕐᓂᖓᓄᑦ.
22 ᐊᕐᕌᒍᑦ ᐊᓂᒍᖅᓯᒪᓕᕐᒪᑕ ᐱᙳᖅᑎᑕᐅᓚᐅᖅᓯᒪᒻᒪᓂᒃ ᓄᓇᕗᑦ ᑭᒃᑯᑐᐃᓐᓇᕐᓄᑦ ᒐᕙᒪᖓ, ᐃᓄᐃᑦ ᓂᕆᐅᒋᔭᖏᑦ ᒐᕙᒪᖃᕐᓂᕐᒧᑦ ᑐᕌᕈᒪᔭᖏᓐᓅᖓᔪᓂᒃ ᐱᓇᓱᐊᕈᒪᔭᖏᓐᓄᓪᓗ ᑲᔪᓯᑎᑕᐅᓯᒪᙱᑦᑐᖅ, ᐊᔪᐃᓐᓇᐃᓐᓇᕋᓗᐊᖅᑎᓪᓗᒋᑦ ᑐᙵᕕᒃᑯᑦ ᐃᖅᑲᓇᐃᔭᖃᑎᖃᕈᒪᓪᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ. ᑭᓯᐊᓂᓕ, ᐃᓄᐃᑦ ᒪᑭᒪᓗᑎᒃ ᐃᓅᓯᖏᑦ ᖃᓄᐃᙱᓯᐊᖁᓪᓗᒋᑦ ᖁᐊᖅᓵᓇᖅᑐᒦᓕᖅᑐᑦ ᑲᑕᑦᓯᒪᓂᖓ ᐊᒻᒪᓗ ᐋᖅᑭᑦᓲᑎᒃᓴᓂᒃ ᐋᖅᑭᑦᓯᒪᔪᖃᙱᓯᐊᖅᑐᖅ ᐱᕚᓪᓕᕈᑎᒃᓴᓂᒃ, ᔭᒐᔾᔭᐃᕈᑎᒃᓴᓂᒃ ᐊᒻᒪᓗ ᓴᐳᔾᔨᓯᒪᒍᑎᒃᓴᓂᒃ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᓪᓗ.
ᓄᓇᕗᑦ ᒐᕙᒪᒃᑯᑦ ᐊᑐᐊᒐᓕᐅᕈᒪᙱᒻᒪᑕ, ᐱᓕᕆᐊᒃᓴᓂᒃ ᐱᔨᑦᓯᕈᑎᓂᓪᓗ ᑎᑭᐅᑎᓯᒪᔾᔪᑕᐅᓇᔭᖅᑐᓂᒃ ᐱᔭᕆᐊᓕᖏᓐᓄᑦ ᐃᓄᐃᑦ, ᑐᕌᖓᔪᓂᒃ ᐅᓄᕐᓂᖅᓴᓄᑦ ᐃᓄᖏᓐᓄᑦ ᑭᓯᐊᓂᓕ, ᑕᐃᑦᓱᒪᓂᕐᓂᓴᒥᒃ ᖃᓪᓗᓈᓄᑦ ᐊᑐᐊᒐᓕᐊᒥᓃᑦ, ᐱᖠᕆᐊᒃᓴᑦ ᐱᔨᑦᓯᕈᑏᓪᓗ ᓴᐳᔾᔭᐅᓯᒪᓂᖏᓐᓄᑦ ᐅᕝᕙᓘᓐᓃᑦ ᓴᙱᓂᖅᓴᐅᑎᑕᐅᓂᖏᓐᓄᑦ ᒐᕙᒪᒃᑯᑦ ᐱᓇᓱᐊᒐᖃᖔᖅᑐᑦ ᐃᓅᙱᑦᑐᓄᑦ ᐃᓅᓴᓐᓂᖅᓴᓄᑦ ᑐᕌᖓᔪᓂᒃ. ᑕᒪᓐᓇ ᐃᑉᐱᓇᕐᓂᖓ ᑐᑭᖃᑦᓯᐊᙱᑐᐃᓐᓇᖏᑦᑐᖅ, ᑭᓯᐊᓂᓕᑦᑕᐅᖅ ᐃᓘᓐᓈᒍᑦ ᐃᐱᕋᐃᓐᓇᐃᓯᒪᔪᑦ ᑐᙵᕕᓕᐊᖑᓯᒪᔪᓂᒃ ᐱᓇᓱᐊᕋᑦᓴᓂᓪᓗ ᓄᓇᕗᑦ ᐊᖏᕈᑎᖏᓐᓂ.
“ᑐᙵᕕᒃᑯᓐᓂ, ᑐᑭᓯᑦᓯᐊᖅᑐᒍᑦ ᖃᓄᑎᒋ ᐱᔭᕆᐊᑐᑎᒋᓂᐊᕐᒪᖔᖅ ᑲᔪᓯᓇᓱᐊᕐᓂᐊᕈᒃᑕ ᐊᑦᓱᕈᕐᓇᑐᒃᑰᖏᓐᓇᕐᓗᑕ ᒐᕙᒪᖃᕐᓗᑕ ᑖᒃᑯᓂᖓ ᐃᑲᔪᖅᓱᐃᖏᑦᑐᓂᒃ ᐅᕙᑦᑎᓐᓂᒃ ᑲᔪᓯᖁᔨᙱᑦᑐᓂᒃ ᑲᔪᓯᑎᒋᐊᓕᑦᑎᓐᓂᒃ ᑕᑯᓐᓇᒐᐅᓯᒪᔪᓂᒃ ᒪᑭᒪᑦᓯᐊᕐᓗᑎᒃ ᐆᒻᒪᕆᑦᓯᐊᖅᑐᓂᓪᓗ ᓄᓇᕗᑦ ᑕᑯᓐᓇᒐᐅᓚᐅᕐᓂᖓᓂᒃ ᒪᒃᑯᑦᑐᓄᑦ, ᒫᒃᑐᔪᓄᑦ ᐃᓄᓐᓄᑦ ᓯᕗᓕᖅᑎᓄᑦ 1970-ᖏᓐᓂ. ᒪᑭᒋᐊᒃᑲᓂᕐᓂᖅ ᓂᕆᐅᖕᓂᒃᑯᑦ ᐊᒻᒪᓗ ᓯᓐᓇᑦᑑᒪᒋᔭᐅᓚᐅᖅᑐᓂᒃ ᑕᑯᓐᓇᒐᐅᒋᐊᙵᓚᐅᖅᑐᓂᒃ ᐃᓄᓐᓄᑦ ᐊᒻᒪᓗ ᓯᕗᓂᕐᒥᓂ ᑭᖑᕚᕆᓂᐊᖅᑕᒥᓐᓄᑦᓗ, ᑕᒪᓐᓇ ᐅᖃᐅᓯᐅᔪᖅ ᓇᖕᒥᓂᖅ−ᒐᕙᒪᖃᕐᓂᖅ ᐱᒋᐊᒃᑲᓐᓂᕆᐊᖃᓕᕐᒪᑦ.” ᐅᖃᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ.
ᑲᔪᓯᑎᑕᐅᓂᖓᒍᑦ ᑖᓐᓇ ᐊᑐᓕᖁᔨᔾᔪᑦ, ᐃᓚᒋᔭᐅᔪᑦ ᑎᓕᓯᔪᑦ ᑐᙵᕕᒃᑯᓐᓂᒃ ᐊᐅᓚᑦᓯᖁᓪᓗᒋᑦ ᐱᓇᓱᐊᒐᖃᕐᓗᑎᒃ ᐃᓄᐃᑦ ᓇᖕᒥᓂᖅ−ᒐᕙᒪᖓᓂᒃ ᐊᒻᒪᓗ ᒪᑐᐃᕈᑕᐅᓗᓂ ᐅᖃᖃᑎᖃᖃᑦᑕᕐᓂᕐᒥᒃ ᑲᓇᑕ ᒐᕙᒪᒃᑯᖏᓐᓂᒃ ᐃᓱᒪᒃᓴᖅᓯᐅᕈᑎᒃᓴᒥᒃ ᐆᑦᑐᕋᐅᑎᒃᓴᑲᓐᓂᕐᓂᒃ ᓇᓖᕌᕐᕕᒃᓴᓂᒃ ᐃᓄᓐᓄᑦ ᑎᒍᓯᒃᑲᓐᓂᖁᓪᓗᒋᑦ ᐊᐅᓚᑦᓯᓂᕐᒥᒃ ᓇᖕᒥᓂᖅ ᒐᕙᒪᖃᕐᓂᒃᑯᑦ ᐊᐅᓚᑦᓯᒍᓐᓇᕐᓗᑎᒃ.
“ᐊᑭᓖᕕᒋᔭᕆᐊᖃᕋᑦᑎᒍᑦ ᐃᓄᐃᑦ ᑭᒡᒐᑐᕐᓗᒋᑦ ᐊᔪᕐᓇᖏᓐᓂᓕᒫᖓᒍᑦ “ᐊᖓᔪᖅᑳᖅ ᑰᑦᑎᖅ ᐅᖃᖅᑐᖅ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
