ᑐᓴᕋᑦᓴᓕᕆᔩᑦ

ᐃᓄᐃᑦ ᐅᖃᖅᑐᑦ ᓴᓐᓂᕈᑎᐅᑉ ᓇᓄᖏᑦ ᐃᓄᐃᓴᓪᓕᕙᓪᓕᐊᓐᖏᒋᐊᖏᑦ

(ᓯᑦᑕᕝᕙ 30, 2009–ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐊᖓᔪᖅᑳᖓᑕ ᑐᖏᓕᖓ ᑮᓇᐅᔭᓕᕆᓂᕐᒧᑦ, ᕋᐃᒪᓐ ᓂᖏᐅᑦᓯᐊᖅ ᐅᖃᐅᔾᔨᔪᖅ ᓄᓇᕗᒻᒥ ᐅᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᑐᐊᕕᐅᔾᔨᖁᓇᒋᑦ ᓴᓐᓂᕈᑎᒨᖓᔪᓂᒃ ᐃᓱᒪᑦᓴᖅᓯᐅᕈᑎᖃᑦᓯᐊᓚᐅᕋᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ.

ᐃᓄᐃᑦ ᐃᓱᒪᖃᖃᑦᑕᕐᒪᑕ ᖃᐅᔨᒪᓂᖏᑦ ᑲᒪᒋᔭᐅᓐᖏᑦᓯᐊᕆᐊᖏᑦ.

“ᐊᖑᓇᓱᑦᑏᑦ ᐊᖑᓇᓱᐊᖅᐸᑦᑐᑦ ᑕᖅᑭᓂᒃ 12-ᓂᒃ ᐊᕐᕌᒎᑉ ᐃᓗᐊᓂ ᕿᒥᕐᕈᐃᓐᓇᖅᓱᑎᒃ ᓄᓇᒥᒃ ᐆᒪᔪᕐᓂᓪᓗ ᐊᖑᓇᓱᒋᐊᖅᓯᓴᑦᑐᑎᒃ, ᐊᕐᕌᒍᓂ ᖃᑦᓯᒐᓛᓂ ᐊᓂᒍᖅᑐᓂ, ᐊᖑᓇᓱᑦᑏᑦ ᓴᓐᓂᕈᑎᒥ ᑕᑯᓯᒪᔪᑦ ᐊᒥᓱᓐᖑᐹᓪᓕᖅᑐᓂᒃ ᓇᓄᕐᓂᒃ.” ᐅᖃᖅᑐᖅ ᓂᖏᐅᑦᓯᖅ.

ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᒫᓐᓇ ᕿᒥᕐᕈᔪᑦ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᓂᒃ ᓴᓐᓂᕈᑎᐅᑉ ᓇᓄᖏᓐᓂ. ᐊᖑᔭᐅᓚᐅᖅᑐᓪᓕ ᓂᓵᓐᓂᕈᑎᒥᒃ ᓄᓇᕗᒻᒥ ᓄᓇᓕᓐᓂᒃ 1998-ᒥᒃ 2007-ᒧᑦ 77-ᖑᓚᐅᖅᑐᑦ. ᑕᐃᑲᓂᑦᓴᐃᓐᓇᖅ ᐊᖑᔭᐅᓚᐅᖅᑐᑦ 111 ᑲᓛᖡᑦ ᓄᓇᖓᓐᓂ.

ᑭᓯᐊᓂᓕ ᑲᓛᖡᑦ ᓄᓇᖓᓐᓃᓐᖔᖅᑐᓂᒃ ᓇᔫᑎᔪᖃᓚᐅᓐᖏᒻᒥᔪᖅ ᑭᓇᒃᑯᑐᐃᓐᓇᕐᓄᑦ ᓈᓚᓐᓂᖅᑕᖃᖅᑎᓪᓗᒍ ᓄᓇᓕᓐᓂ ᑐᕋᐃᓐᓇᖅᑐᑦ ᐊᑦᑐᖅᑕᐅᔾᔮᖏᑦᑐᑦ ᐃᓄᐃᓴᓪᓕᒋᐊᖅᑕᐅᒋᐊᕐᓂᕋᓗᐊᖅᐸᑕ ᐊᖑᔭᐅᒍᓐᓇᖅᑐᑦ.

“ᓇᐅᑐᐃᓐᓇᖅ ᐋᖅᑭᑦᑕᐅᔪᖅ ᒫᓐᓇ ᑐᐊᕕᐊᖑᓗᐊᕋᔭᖅᑐᖅ ᐊᑦᑐᐃᓂᕐᓗᓐᓂᖃᕈᓐᓇᖅᓱᓂᓗ ᒫᓐᓇ ᐊᐃᕙᓂᕆᔭᖏᓐᓂᒃ ᑲᓛᖡᑦ ᓄᓇᖓᓐᓂᒥᐅᑦ ᑲᓇᑕᐅᓪᓗ ᑐᑭᓯᐅᒪᖃᑎᒌᒍᑎᒥᒃ ᓴᖅᑭᖅᑕᐅᕙᓪᓕᐊᔪᒥᒃ ᒪᕐᕉᓐᓄᑦ ᓄᓇᓕᕐᔪᐊᓄᑦ ᐊᐅᓚᑦᓯᖃᑎᒌᓐᓂᕐᒧᑦ ᓴᓐᓂᕈᑎᐅᑉ ᓇᓂᖏᓐᓂᒃ.”

ᐃᓄᐃᑦ ᐃᓱᒫᓘᑎᓖᑦ ᖃᑦᓯᐅᓂᖏᓐᓂᒃ ᒥᑦᓴᐅᓯᒍᑕᐅᔪᖅ ᒐᕙᒪᒃᑯᖏᓐᓄᑦ ᓄᓇᕗᑦ ᖃᕆᑕᐅᔭᒃᑰᖅᑐᓂᒃ ᐊᑐᖅᓯᒪᒻᒪᑕ ᓇᓗᓇᐃᖅᑕᐅᓯᒪᒐᑎᓪᓗ ᐄᒎᕈᑎᑎᒍᑦ. ᖃᐅᔨᓴᖅᑎᒻᒪᕇᑦ ᑭᖑᓪᓕᖅᐹᒥ ᒥᑦᓴᐅᓯᓯᒪᔭᖏᑦ 2100 ᓇᓄᐃᑦ 1997-ᖑᑎᓪᓗᒍ.

“ᑲᑎᖅᓱᖅᑕᐅᓯᒪᔪᑦ ᒐᕙᒪᒃᑯᑦ ᖃᐅᔨᓴᖅᑎᖏᓐᓄᑦ ᐊᕐᕌᒍᖃᖅᐸᑕ ᐊᕐᕌᒍᐃᑦ ᖁᓕᑦ ᐅᖓᑖᓂ, ᐊᓚᒡᒐᐃᒐᔭᖅᑑᔮᖅᑑᒐᓗᐊᖅ ᑕᒪᓐᓇ.” ᐅᖃᓚᐅᖅᑐᖅ ᓂᖏᐅᑦᓯᐊᖅ.

ᐃᓄᐃᑦ ᐅᖃᖅᓯᒪᔪᑦ ᐊᑦᓱᕈᕐᓇᖅᓯᕙᓪᓕᐊᓯᒪᒋᐊᖓ ᓱᕋᑦᑎᖅᑕᐅᕙᒻᒪᑕ ᐃᓪᓗᕋᓛᑦ, ᓱᓇᒃᑯᑏᑦ ᕿᓐᓃᓪᓗ.

“ᐃᓄᐃᓴᓪᓕᒋᐊᖅᑕᐅᓐᓂᖅᐸᑕ ᑲᑎᑦᓱᑎᒃ ᐊᖑᔭᐅᒍᓐᓇᖅᑐᖅ ᐃᓄᓐᓄᑦ ᐊᑦᓱᕈᕐᓇᖅᑐᒨᕈᑕᐅᒋᐊᒃᑲᓐᓂᕐᓂᐊᖅᑐᑦ. ᐃᓄᐃᑦ ᓱᓇᒃᑯᑎᖏᑦ ᓱᕋᑦᑕᐅᓕᖅᐸᓪᓕᐊᑐᐃᓐᓇᓚᖓᔪᑦ ᐅᓗᕆᐊᓇᖅᑐᒦᒍᑕᐅᓯᕙᓪᓗᑎᓪᓗ ᓇᓄᐃᑦ.”

“ᐃᓄᐃᑦ ᓄᖒᑦᓯᒐᓱᐊᖅᓯᐅᑎᐅᖏᑦᑐᑦ. ᐃᓄᐃᑦ ᐱᐅᓯᕆᖏᓐᓇᓲᖓᑦ ᐆᒪᔪᓗᐊᑦᑕᐃᓕᓂᖅ. ᐱᖅᑯᓯᖃᕋᑦᑕ ᐅᐱᒍᓱᑦᓯᐊᕐᓂᕐᒥᒃ ᓄᓇᒥᒃ ᐆᒪᔪᓂᓪᓗ ᑕᐃᒪᓐᖓᓂᑐᖄᓗᒃ. ᖃᐅᔨᒪᔭᐅᖏᓐᓇᖅᑐᖅ ᑖᒃᑯᐊᖑᓐᖏᑉᐸᑕ ᐆᒪᔪᐃᑦ, ᐃᓄᐃᑦ ᐊᓐᓇᒍᓐᓇᖅᓯᒪᒐᔭᓐᖏᑦᑐᑦ ᐃᒃᑮᓇᖅᑐᐊᓗᒻᒥ. ᐅᓪᓗᒥᒧᑦ, ᐅᐱᒍᓱᓐᓂᖅ ᓄᓇᒥᒃ ᐆᒪᔪᕐᓂᓪᓗ ᑐᓐᖓᕕᐅᔪᖅ ᐱᖅᑯᓯᑦᑎᓐᓄᑦ” ᐅᖃᓚᐅᖅᑐᖅ ᓂᖏᐅᑦᓯᐊᖅ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: