(ᑎᓯᐱᕆ 14, 2009-ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᖓ ᐹᓪ ᖃᓗᔾᔭᖅ ᓇᓗᓇᐃᖅᓯᔪᖅ ᐅᓪᓗᒥ ᑲᑎᒪᔩᑦ ᓈᒻᒪᓴᓚᐅᕐᓂᖏᓐᓂᒃ $500,000-ᓂ ᐃᑲᔫᑎᖃᕐᓂᐊᕐᓗᑎᒃ ᓄᑖᒥᒃ ᐃᓕᓐᓂᐊᕐᕕᒃᑖᓂᐊᖅᑎᓪᓗᒋᑦ ᓄᓇᕗᑦ ᓯᕗᓂᒃᓴᕗᑦ. ᐱᖓᓱᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᔾᔨᓪᓗᐊᖓᓂᒃ ᐃᑲᔫᑎᖃᕐᓂᐊᕐᒥᔪᑦ. ᓯᕗᓪᓕᖅᐹᖅ ᐃᑲᔫᑕᐅᒋᐊᙵᖅᑐᖅ $200,000 ᐊᑭᓕᖅᑕᐅᑦᓴᐅᑎᒋᓂᐊᖅᑐᖅ, ᐊᒥᐊᒃᑯᖓ ᐊᑭᓕᖅᑕᐅᕙᓐᓂᐊᑐᖅ $200,000 ᐊᕐᕌᒍᑕᒫᑦ. ᑖᓐᓇ ᐃᑲᔫᑎᖃᕈᓐᓇᖅᓯᒪᔪᑦ ᓄᕕᐱᕆᒥ ᐃᑲᔪᖅᑐᖅᑕᐅᓚᐅᕐᓂᖓ ᐃᓚᒋᔭᐅᔪᓄᑦ ᓄᓇᕗᑦ ᑐᙵᕕᒃ ᑎᒥᖓ ᐊᕐᕌᒍᑕᒫᖅᓯᐅᑎᖓᓂ ᑲᑎᒪᕐᔪᐊᕐᓂᖃᖅᑎᓪᓗᒋ5.

“ᐱᒻᒪᕆᐅᔪᖅ ᑕᒪᓐᓇ ᑐᓴᒐᒃᓴᖅ, ᐱᓗᐊᖅᑐᒥᒃ 25-ᓂ ᐅᑭᐅᖅᑖᕐᓂᐅᓴᑎᓪᓗᒋᑦ ᐊᕐᕌᒍᓂᐊᑐᖅ. ᐊᒃᓱᕈᐊᖃᕐᓂᖏᓐᓄᑦ ᐃᖅᑲᓇᐃᔭᖅᑏᑦ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᑎᑦᓯᓂᕐᒥᒃ ᐊᕐᕌᒍᓂ ᐊᓂᒍᖅᑐᓂ 330 ᐃᓕᓐᓂᐊᕌᓂᒍᓐᓇᖅᓯᒪᕗᑦ, ᐅᒃᐱᕈᓱᒃᐳᒍᑦ ᖁᕝᕙᐹᓪᓕᕐᓂᐊᕆᐊᖓ ᓄᑖᒧᑦ ᐃᓕᓐᓂᐊᕐᕕᖕᒧᑦ ᐊᐅᓪᓛᖅᓯᒪᓕᖅᑎᓪᓗᒋᑦ,” ᐅᖃᖅᑐᖅ ᖃᓗᔾᔭᖅ, ᐅᖃᕈᔾᔨᓪᓗᓂ ᑎᓴᒪᓂᒃ ᑲᑐᔾᔨᖃᑎᒌᑦ ᐊᖏᔪᖅᑳᖏᓐᓂᒃ.

ᑲᑎᒪᔨᖏᑦ ᑐᙵᕕᑐᖃᒃᑯᑦ ᓄᓇᕗᒻᒥ ᐃᓕᓐᓂᐊᕋᒃᓴᒥᒃ ᐱᒋᐊᖅᑎᑦᑎᓚᐅᓯᒪᔪᑦ 1985- ᖑᑎᓪᓗᒍ ᒪᒃᑯᑐᐃᑦ ᐃᓄᐃᑦ ᐃᓕᓐᓂᐊᖁᓪᓗᒋᑦ ᓄᓇᑖᕐᓂᕐᒥᒃ. ᐃᓕᓐᓂᐊᕋᒃᓴᖅ ᐱᒻᒪᕆᐅᓯᒪᕗᑦ ᐃᓄᐃᑦ ᒪᒃᑯᑦᑐᖏᓐᓄᑦ ᐊᒻᒪ ᓄᓇᕗᒻᒧᑦ. ᐃᓄᐃᑦ ᒪᒃᑯᑐᖏᓐᓂᒃ ᐊᑐᐃᓐᓇᕈᐃᕙᖕᒪᑦ ᐃᖅᑲᓇᐃᔮᒃᓴᓄᑦ ᖁᕕᐊᓇᖅᑐᓄᑦ ᓄᓇᕗᒻᒥ ᐃᓕᓐᓂᐊᕐᑎᑕᐅᓪᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᓄᓇᑖᕐᓂᕐᒥᒃ ᐊᒻᒪ ᐃᓯᖏ ᓐᓂᒃ.  ᑮᓇᐅᔭᒧᑦ ᑐᓂᓯᓂᖓ ᑕᑯᒃᓴᐅᑎᑦᓯᕗᖅ ᓄᓇᕗᑦ ᑐᙵᕕᒃ ᑎᒥᖓᑦ ᐅᒃᐱᕈᓱᓐᓂᖓ ᐃᓕᓐᓂᐊᕈᑎᐅᔪᒥᒃ ᐃᑲᔪᖅᑐᐃᓂᕐᒥᓪᓗ ᐱᕕᒃᓴᖃᖅᑎᑕᐅᓂᖏᑦ ᒪᒃᑯᑐᐃᑦ.

“ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᒃᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐅᐱᒍᓱᒃᐳᑦ ᐃᑲᔪᕈᓐᓇᕋᒥᒃ ᓄᑖᒥᒃ ᐃᓕᓐᓂᐊᕐᕕᒃᑖᕐᓂᖓᓄᑦ ᓄᓇᕗᑦ ᓯᕗᓂᒃᓴᕗᒻᒧᑦ. ᑕᒪᓐᓇ ᐃᑲᔪᕐᓂᖃᒃᑲᓂᕐᓂᕐᐊᐳᖅ ᐃᓕᓐᓂᐊᒐᒃᓴᑦᑎᐊᕙᐅᔪᒧᑦ ᒪᒃᑯᑐᓄᑦ. ᒐᕙᒪᑐᖃᒃᑯᓐᓄᑦ ᐊᖏᖃᑎᒌᑎᑦᓯᓇᓱᐊᖅᑎ ᑖᒪᔅ ᐳᕐᒍᕐ ᐅᖃᐅᓯᕆᑦᓯᐊᓚᕆᓚᐅᖅᑕᖓ ᐅᓂᒃᑳᓕᖓᖏᓐᓂ 2006-ᖑᑎᓪᓗᒍ ᐃᓕᓐᓂᐊᖅᑏᑦ ᐃᓕᓐᓂᐊᕇᖅᑐᓪᓗ ᐃᓕᓐᓂᐊᒐᒃᓴᐅᔪᒥᒃ ᓯᕗᓂᒃᓴᕆᔭᐅᓂᖏᓐᓄᑦ ᓄᓇᕗᒻᒥ,” ᐅᖃᖅᑐᖅ ᖃᓗᔾᔭᖅ.