Pivalialigiyit Havakviit

Inuit Katimaqatigiingit Uqaqhimayut $1 milian-taalanik Hanayauyughamut Ilihaqvighaq NS-kunnit

(December 14, 2009 –Iqaluit, Nunavut) Nunavut Tunngavikkut Angayuqaangat Paul Kaludjak uqaqhimayuq uplumi taapkua Katimayiit angiqhimayut $500,000-taalanik ikayuutighat niuvrutighaat nuutaamik ilihaqvighaq Nunavut Sivuniksavunmut. Taapkua pingahut Aviktuqhimayut Inuit Katimaqatigiingit aajjikkuhiqtuqhutik aittuqhimayut.  Hivulliqpaaq akiliqtuqtaghaat $200,000-taalat akiliqnariqtauniaqquq, amiakkualu akiliqtauniaqquq ukiuq tamaat $200,000.-taalanik. Una ikayuut piinnarianiktitauyuq November-mi ikayuqtaugamik katimayinit NTI-kut katimaqyuaqtillugit.

“Una tuhaayaghaq quvianaqtuq, ukiuqaliqhutiklu 25-nik ukiunik NS-kut quviahuutiginahuaqhugu aippaagu. Havakpakkamik havaktiit NS-kut ilihaqvianit ukiut qaangiqtunit iniqtiqhimayuqaliqtuq 330-nik, naajjutik angiklivaalliqniaq nutaamik ilihaqviqaliqqata,” Kaludjak uqaqhimayuq, uqaqtiuyuq kivgaqtuqhugit taapkua hitamat katimaqatigiinut Angayuqqaangit.

Katimayiit Tungavikkut Nunavunmi aullaqtittihimayut hapkuninnga 1985-mi ilihaiyumaplutik inulramminik Inungnik nunataarutinik. Una ilihaqvik atuquyaunnaqtuq tamangnit Inuit inulramminit Nunavunmiunitlu. Parnaiyaivaktuq inulramminik havaaghattianut Nunavunmi ilihaqtittinikkutlu Inuit ilitquhiinik, Inuit katimaqatigiinginit, nunataarutinik ahiillu ihumaalugiyauyut. Una kiinauyanik aittuutauyuq naunaitkutauvuq
NTI-kut ikayuttiarahuaqmata hapkuninnga aghuuqhugillu ilihaqtamingnik inulrammiit.

“NTI-kut RIA-kullu quviahukput aittuqhigamik nutaamik ilihaqvighaanik Nunavut Sivuniksavut. Uvuuna ikayuqhimmaaqtut aittuqnikkut talvunga ilihaqvitqiuyumut inulramminut. Kavamaqyuatkunit Aulapkaiyi Thomas Berger uqattiaqhimayuq naunaitkutainit 2006-mi unipkaariplugit ilihaqtut talvani aniqniuyutut ittut hivunighaatalu Nunavut,” uqaqtuq Kaludjak.