ᑐᓴᕋᑦᓴᓕᕆᔩᑦ

ᐃᓄᐃᑦ ᐱᓯᒪᑦᓰᓇᕐᓂᐊᖅᑐᑦ ᐃᓄᒃᑐᑦ ᒪᕉᓂ ᒥᓂᔅᑕᐅᑏᑦ ᑲᑎᒪᔨᖏᑦ ᐃᔨᕋᖅᑐᕐᓱᑎᒃ ᐋᖅᑭᑦᓯᓯᒪᒐᓗᐊᖅᑎᓪᓗᒋᑦ ᐊᑐᐊᕋᑦᓴᓂᒃ ᐊᑐᕈᓐᓇᐃᓪᓕᑎᑦᓯᓯᒪᓂᖓ ᐊᑐᖅᑕᐅᓂᖓᓂᒃ

ᐃᕐᖐᓐᓇᖅ ᓴᖅᑭᖅᑕᐅᒋᐊᓖᑦ

ᐃᓄᐃᑦ ᐱᓯᒪᑦᓰᓇᕐᓂᐊᖅᑐᑦ ᐃᓄᒃᑐᑦ ᒪᕉᓂ ᒥᓂᔅᑕᐅᑏᑦ ᑲᑎᒪᔨᖏᑦ ᐃᔨᕋᖅᑐᕐᓱᑎᒃ ᐋᖅᑭᑦᓯᓯᒪᒐᓗᐊᖅᑎᓪᓗᒋᑦ ᐊᑐᐊᕋᑦᓴᓂᒃ ᐊᑐᕈᓐᓇᐃᓪᓕᑎᑦᓯᓯᒪᓂᖓ ᐊᑐᖅᑕᐅᓂᖓᓂᒃ

(ᑏᓰᒻᕙ 5, 2019) ᑐᓐᖓᕕᒃ ᐅᓪᓗᒥ ᑐᓴᒐᑦᓴᓐᖑᖅᑎᑦᓯᖅᑲᐅᔪᖅ ᑲᑕᓐᓇᖅᑐᒥᒃ 1990 ᑲᓇᑕᐅᑉ ᒐᕙᒪᒃᑯᖏᑕ ᒥᓂᔅᑕᐅᑏᑦ ᑲᑎᒪᔨᖏᓐᓄᑦ ᑎᑎᖅᑲᖁᑎᒋᔭᐅᔪᒥᒃ (ᐃᔨᕋᖅᑑᑎ ᐊᕙᑎᓂᒃ ᐊᕐᕌᒍᓂᒃ; ᑎᒍᓯᓂᕐᒧᑦ ᐊᔪᓐᖏᔾᔪᑎᒃᑯᑦ ᑐᓴᕋᓱᐊᖅᑕᐅᔪᒥᒃ ᐱᖁᔭᒃᑯᑦ) ᖃᐅᔨᔾᔪᑕᐅᔪᖅ ᑲᓇᑕᐅᑉ ᐊᖓᔪᖅᑳᕐᔪᐊᖓ ᒪᕉᓂ ᐊᒻᒪᓗ ᒥᓂᔅᑕᐅᑏᑦ ᑲᑎᒪᔨᖁᑎᖏᑦ ᖃᐅᔨᒻᒫᑦ ᐊᒻᒪᓗ ᐱᔮᖅᑯᒻᒥ ᐊᑐᕈᓐᓇᐃᓪᓕᑎᑦᓯᓯᒪᓚᐅᖅᑐᑦ ᐃᓄᒃᑎᑑᖅᑐᓂᒃ ᒐᕙᒪᒃᑯᑦ ᐱᔨᑦᓯᕋᐅᑎᖏᓐᓂ ᐊᕕᑦᑐᕐᓯᒪᓂᕐᒥ −− ᑕᑉᐲᓯᒪᓪᓗᑎᒃ ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪᓗ ᐃᖅᑲᖅᑐᐃᕕᓐᓂᒃ ᑖᒃᑯᐊ ᒪᕐᕉᒃ ᐱᔨᑦᓯᕋᖅᑏᑦ ᒐᕙᒪᒃᑯᑦ ᓴᖅᑭᔮᖅᑎᑦᓱᓂᒋᑦ ᐃᓱᒪᓕᐅᕈᑎᒋᓚᐅᖅᑕᖏᒃ ᐃᓄᒃᑐᑦ ᐅᖃᐅᓯᕐᒥᒃ ᑐᓂᔭᐅᓯᒪᔾᔮᓐᖏᒋᐊᖏᑦ ᓴᐳᔾᔭᐅᓯᒪᓂᕐᒥᓘᓐᓃᑦ.
ᑭᒡᓕᓂᐊᖅᑕᐅᓯᒪᔪᓂᒃ ᑕᕐᕋᓕᐅᖅᑕᐅᓯᒪᔪᓂ ᐅᓂᒃᑳᑦ ᐃᓄᒃᑐᑦ ᐊᑐᖅᑕᐅᓂᖓ ᓄᓇᕗᒻᒥ ᐃᓄᓐᓄᑦ ᑲᑕᑉᐸᓪᓕᐊᔪᖅ; ᑭᓯᐊᓂ, ᐃᓄᐃᑦ ᐅᖃᐅᓯᖓ ᐆᒪᐃᓐᓇᖅᑐᖅ ᒐᕙᒪᒃᑯᓐᓄᑦ ᑲᑕᑦᑎᑕᐅᖏᓐᓇᕋᓗᐊᖅᑎᓪᓗᒍ.

“ᐃᓱᒫᓗᒋᒐᒃᑭᑦ ᐊᑦᑕᓇᖅᑐᒦᓐᓂᖏᓐᓂᒃ ᖃᓄᐃᓐᖏᑦᓯᐊᕆᐊᖃᕐᓂᖏᓐᓂᓪᓗ ᐃᓄᐃᑦ ᐅᓪᓗᒥ, ᖃᐅᑕᒫᑦᓯᐊᖅ ᐊᑦᓱᕈᕐᓇᑐᒃᑰᖃᑦᑕᕐᒪᑕ ᐊᑐᕋᓱᐊᖅᑐᑎᒃ ᐊᑐᖅᑕᐅᒋᐊᓕᓐᓂᒃ ᒐᕙᒪᒃᑯᑦ ᐱᔨᑦᓯᕋᐅᑎᖏᓐᓂᒃ,” ᐅᖃᖅᑐᖅ ᓄᓇᕗᑦ ᑐᓐᖓᕕᒃ (ᑐᓐᖓᕕᒃᑯᑦ) ᐊᖓᔪᖅᑳᖓ ᐊᓗᑭ ᑰᑦᑎᖅ. “ᓄᓇᒋᔭᕗᑦ ᐊᖏᕐᕋᕆᒐᑦᑎᒍ − “ᓄᓇᕗᑦ”, ᑕᒫᓂ ᐅᔾᔨᓇᖅᑐᒥᒃ ᐅᓄᕐᓂᕐᓴᐅᕗᒍᑦ ᐊᐅᓚᑦᓯᒍᓐᓇᕐᕕᒋᔭᑦᑕ ᐃᓄᒋᐊᒃᑎᖏᓂᖏᓐᓂᒃ. ᓄᓇᕗᒻᒥ, ᐃᓄᐃᑦ ᓂᕆᐅᒋᔭᓖᑦ ᐃᑲᔪᖅᑎᑕᐅᓂᐊᕐᓂᕐᒥᒃ ᐊᑐᖅᑕᐅᖃᑦᑕᕆᐊᓕᓐᓂᒃ ᐱᔨᑦᓯᕈᑎᓂᒃ ᐃᓄᒃᑐᑦ.”

ᑖᓐᓇ ᑎᑎᖅᑲᖅ, ᐅᓪᓗᖃᖅᑐᖅ ᒫᑦᓯ 13 ᐊᒻᒪᓗ ᒫᑦᓯ 20, 1990, ᐊᒻᒪᓗ ᓇᕿᑦᑕᐅᑎᒧᑦ ᓇᕿᑕᐅᓯᒪᓪᓗᓂ ‘ᐃᔨᖅᑕᐅᓯᒪᒋᐊᓕᒃ’, ᓇᓗᓇᐃᕐᓯᓯᒪᔪᖅ ᒥᓂᔅᑕᐅᑏᑦ ᑲᑎᒪᔨᖏᓐᓄᑦ ᐊᑐᐊᕋᑦᓴᓂᒃ ᒐᕙᒪᑐᖃᒃᑯᑦ ᒪᓕᒐᕐᓂᐊᖅᑎᖓᓄᑦ ᐋᔩᕋᖃᑎᖃᓚᐅᖅᑐᒧᑦ ᑕᐃᑦᓱᒪᓂᐅᑎᓪᓗᒍ ᐊᖏᕈᑎᓕᐊᖑᓯᒪᓚᐅᖅᑐᑦ ᐃᓄᓐᓄᑦ, ᑖᒃᑯᐊ ᑎᑎᕋᕐᓯᒪᔪᑦ ᑭᖑᓂᐊᒍᑦ ᓴᖅᑭᓕᓚᐅᖅᑐᑦ ᓄᓇᕗᑦ ᐊᖏᕈᑎᖏᑦ, ᐊᖏᓂᕐᐹᖑᔪᑦ ᓄᓇᑖᕈᑏᑦ ᓄᓇᕐᔪᐊᓕᒫᒥ.

ᐅᖃᓕᒫᕐᕕᖓᓂ 18 ᐊᑐᐊᕋᑦᓴᓕᐊᖑᓯᒪᔪᓂ (ᒪᑉᐱᒐᖅ 31) ᑕᐃᒎᓯᓕᒃ ‘ᒐᕙᒪᓕᕆᓂᕐᒧᑦ ᐱᕙᓪᓕᐊᓂᖅ/ᐅᖃᐅᓯᖅ’: “18. ᑭᖑᓪᓕᐹᕐᓯᐅᑎᓂ ᐊᖏᕈᑎᓂ ᐃᓗᓕᖃᕆᐊᖃᓐᖏᓚᖅ ᓇᓗᓇᐃᕐᓯᒪᔾᔪᑕᐅᒐᔭᖅᑐᓕᒫᓂᒃ ᐱᓐᖑᖅᑎᑕᐅᓂᖓᓂ ᓄᓇᕗᑦ ᑎᕆᑐᐊᕆ ᐅᑉᕙᓘᓐᓃᑦ ᐅᖃᐅᓯᓕᕆᓂᕐᒨᖓᔪᓂᒃ ᓇᓗᓇᐃᕐᓯᒪᔪᖃᔾᔮᖏᓐᓇᖅ ᐊᑐᕐᓂᕐᒥᒃ ᐃᓄᒃᑎᑐᑦ ᒐᕙᒪᒃᑯᓐᓂ ᐊᒻᒪᓗ ᒪᓕᒐᑦ ᐊᒻᒪᓗ ᐃᓕᓐᓂᐊᕐᓂᓕᕆᓂᕐᒧᑦ ᐊᐅᓚᓂᖏᓐᓂ ᓄᓇᑖᕆᔭᐅᓯᒪᔪᒥ.”

ᐅᓪᓗᑦ ᐊᓂᒍᖅᑎᓪᓗᒋᑦ, ᐄᑉᕈ 30, 1990, ᐊᑎᓕᐅᖅᑕᐅᑎᓪᓗᒍ ᓯᕗᓪᓕᐹᕐᓯᐅᑦ ᐊᖏᖃᑎᒌᒍᑦ ᑐᓐᖓᕕᒃ ᑎᒥᖓᓄᑦ ᓄᓇᕗᒻᒥ (TFN) ᐃᒡᓗᓕᒻᒥ, ᒥᓂᔅᑕᐅᑏᑦ ᑲᑎᒪᔨᖏᑦ ᑭᐳᑦᑎᑦᓯᓕᓚᐅᖅᑐᑦ ᖃᓄᐃᓕᖓᓂᕐᒥᓂᒃ ᑕᑉᕗᓐᖓᖓᔪᒥᒃ ᐋᔩᕋᕈᑕᐅᓚᐅᖅᑐᒧᑦ ᐱᓂᐊᕐᓂᕋᐅᑎᓂ, ᐊᖏᖃᑎᒌᒍᑦ ᐱᓐᖑᑎᑕᐅᓂᖓᓂᒃ ᓄᓇᕗᑦ ᑏᕆᑐᐊᕆ ᐊᖅᑯᑕᐅᓪᓗᓂ ᐃᓛᒃᑯᑦ 4 ᓄᓇᕗᑦ ᐊᖏᕈᑎᖏᓐᓂ. ᒥᓂᔅᑕᐅᑏᑦ ᑲᑎᒪᔨᖏᑦ, ᑭᓯᐊᓂ, ᐊᐅᓚᔾᔭᒐᓛᓚᐅᓐᖏᑦᑐᑦ ᐋᖅᑭᑦᑕᒥᓄᑦ ᕿᐱᓗᓐᓂᕐᒧᑦ ᐃᑉᐱᒋᔭᐅᖁᓪᓗᒍ ᐃᑲᔪᕐᓱᖅᑕᐅᓗᓂᓗ ᐃᓄᒃᑐᑦ. ᑕᑉᕙᖔᕐᓯᒪᔪᒥᒃ, ᐃᓄᐃᑦ ᓯᕐᓕᕿᑖᖏᓐᓇᖅᑐᑦ ᐊᑐᐃᓐᓇᐅᑎᑕᐅᑦᓯᐊᓐᖏᓗᐊᕐᓂᖏᓐᓄᑦ ᒐᕙᒪᒃᑯᑦ ᐱᔨᑦᓯᕈᑎᖏᑦ ᓄᓇᒥᓐᓂ ᐊᖏᕐᕋᕆᔭᒥᓂ.

ᐊᑐᖅᑕᐅᑦᑕᐃᓕᑎᑦᓯᒍᑎᓕᐅᕐᓯᒪᒐᓗᐊᖅᑎᓪᓗᒋᑦ ᐅᖃᐅᓯᖅ ᓴᐳᔾᔭᐅᓯᒪᓂᖓᓄᑦ ᓄᓇᑖᕐᓯᒪᓂᒃᑯᑦ, ᑲᓇᑕ ᒐᕙᒪᒃᑯᖏᑦ ᐊᒻᓗᒪ ᐋᔩᕋᖅᑎᖏᑦ ᑭᐱᓯᓯᒪᓚᐅᖅᑐᑦ ᐃᓄᓐᓂᒃ ᑲᓇᑕᐅᑉ ᑐᓐᖓᕕᔾᔪᐊᖓᒍᑦ ᒪᓕᒐᕐᓂᒃ ᐃᓕᓴᕐᓯᒍᑕᐅᓯᒪᔪᓂᒃ ᐃᓄᒃᑐᑦ ᐅᖃᐅᓯᕐᒧᑦ ᐱᔪᓐᓇᐅᑎᓂᒃ. ᑲᓇᑕᒥ ᐃᖅᑲᖅᑐᐃᕕᔾᔪᐊᖅ ᑎᑭᑕᑦᓴᐅᐱᓪᓚᖏᑦᑐᖅ ᐃᓱᒪᓕᐅᕈᑎᒋᓯᒪᔭᖓ ᐅᐃᕖᑦ ᐅᖃᐅᓯᖓᒍᑦ ᐃᓕᓐᓂᐊᓂᕐᒥᒃ −− ᒪᕼᐊᐃ −−−ᑲᔪᓯᑎᑦᓯᒍᑕᐅᔪᖅ ᐅᐃᕖᑎᑐᑦ ᐃᓕᓐᓂᐊᓂᕐᒥᒃ ‘ᐊᒥᓲᓂᖏᑦ ᓈᒻᒪᑉᐸᑕ’, ᓴᖅᑭᖅᑕᐅᓚᐅᖅᑐᖅ ᒫᑦᓯ 15, 1990, ᐊᑯᓐᓂᑦᓯᐊᖓᓂ ᒥᓂᔅᑕᐅᑏᑦ ᑲᑎᒪᔨᖏᑦ ᒪᕐᕉᓐᓂᒃ ᐊᐃᕙᒍᑎᖃᖅᑎᓪᓗᒋᑦ ᓄᓇᕗᒻᒧᑦ. ᑖᓐᓇ ᓴᖅᑭᔮᖅᑎᑦᓯᔪᖅ ᐋᖅᑭᑦᑕᐅᒌᕐᓯᒪᔪᒥᓂᐅᓂᖓᓂᒃ ᓯᕗᕐᖓᒍᑦ ᖃᓄᐃᓕᖓᓂᖓ ᑲᓇᑕᐅᑉ ᓄᖅᑲᑎᑦᓯᓯᒪᒐᓱᐊᕐᓂᕆᓚᐅᖅᑕᖓ ᐃᓄᐃᑦ ᐅᖃᐅᓯᖓᓄᑦ ᐱᔪᓐᓇᐅᑎᓂᒃ −− ᑕᐃᑲᓂ ᐃᓄᐃᑦ ᑕᑯᓐᓇᕋᓱᐊᑐᐃᓐᓇᑎᓪᓗᒋᑦ ᑕᒫᓂ ᓄᓇᕗᑦ ᑭᒡᓕᓕᐊᕆᓯᒪᔭᖓᓂ, ᑕᑉᑲᓂ ᐃᓄᐃᑦ ᓄᑕᖅᑲᖏᑦ 90% ᐃᓕᓐᓂᐊᖅᑎᐅᓚᐅᖅᑐᑦ ᐃᓄᒋᐊᒃᑎᒋᓂᐅᔪᓂᒃ.

ᒫᓐᓇ ᓄᓇᕗᒻᒥ ᐃᓕᓐᓂᐊᕐᕕᓕᒫᖏᑦ, ᐅᐃᕖᒃᑯᑦ ᐃᓕᓐᓂᐊᕐᕕᖏᑦ ᐱᓐᖏᑦᑐᑑᓪᓗᑎᒃ, ᐊᐅᓚᓂᓖᑦ K-12 ᖃᓪᓗᓈᑎᑐᑦ 25% ᒪᓂᒪᑎᑕᐅᓪᓗᓂ ᐃᓚᖓ ᐃᓄᒃᑎᑐᑦ ᓯᕗᓪᓕᕐᐹᒥ ᐃᓕᓐᓂᐊᓂᕐᓂ 3. ᑲᓇᑕ ᐱᓇᐊᓱᒐᖓ ᑲᔪᓯᓚᐅᖅᑐᖅ; ᐃᓕᓐᓂᐊᕐᓃᑦ, ᐃᖅᑲᖅᑐᐃᕖᑦ, ᐃᑲᔪᖅᑕᐅᕖᑦ ᐊᒻᒪᓗ ᐸᓖᓰᑦ ᐊᐅᓚᔪᐃᓐᓇᑦᓯᐊᑦ ᖃᓪᓗᓈᑎᑐᑦ ᓄᓇᕗᓕᒫᒥ. ᓄᓇᕗᑦ 75% ᓯᕗᓕᖏᓐᓃᖔᖅᑐᒥᒃ ᐅᖃᐅᓯᕐᒥᒃ ᐊᑐᖃᑦᑕᖅᑐᑦ ᐃᓄᒃᑎᑐᑦ ᐃᓄᒋᐊᒃᑎᒋᓂᖏᓐᓂ ᑖᓐᓇᑐᐊᖅ ᐊᐅᓚᑦᓯᒍᓐᓇᕈᑕᐅᓪᓗᓂ ᑖᒃᓰᔭᖅᑎᓄᑦ ᐅᓄᕐᓂᕐᓴᓄᑦ ᐃᓄᖏᓐᓄᑦ, ᐅᖃᐅᓯᕐᒥᒃ ᑖᑦᓱᒥᖓᑦᓴᐃᓐᓇᖅ ᐊᑐᖃᑦᑕᖅᑐᑦ ᐃᓕᓐᓂᐊᕐᕕᒋᔭᐅᔪᓂ, ᐋᓐᓂᐊᕕᓐᓂ ᐊᒻᒪᓗ ᐊᑐᐊᒐᓕᐅᖅᑕᐅᓯᒪᓪᓗᑎᒃ ᐃᓅᓴᓐᓂᕐᓴᓄᑦ ᐊᑐᖅᑕᐅᖃᑦᑕᖅᑐᒥᒃ ᐅᖃᐅᓯᕐᒥᒃ (ᖃᓪᓗᓈᑎᑐᑦ).

ᔪᐊᒃ ᐃᓕᓐᓂᐊᕕᔾᔪᐊᖓᓂ ᐃᓕᓴᐃᔨᕐᔪᐊᖅ, ᐃᐊᓐ ᒫᑎᓐ, ᐋᖅᑭᑦᓱᐃᔪᖅ ᑲᒪᒋᔭᐅᓂᐊᖅᑐᒥᒃ ᑲᓇᑕᒥ ᑲᑎᒪᓂᕐᔪᐊᖅ ᑲᓇᑕᒥ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓐᓄᑦ ᐊᑐᐊᒐᕐᒥᒃ ᑐᐹᖅᑕᐅᓚᐅᖅᑎᓪᓗᒍ ᐱᖁᔭᑦᓴᖅ C-91, ᐅᖃᕐᓯᒪᔪᖅ, “ᑖᓐᓇ ᒥᓂᔅᑕᐅᑎᑦ ᑲᑎᒪᔩᑦ ᑎᑎᖅᑲᖁᑎᖓ ᓴᖅᑮᓯᒪᒃᑲᓂᖅᑐᖅ ᐃᓄᐃᑦ ᓇᓗᓇᐃᕈᑎᖏᑦ ᑲᓇᑕ ᐃᕐᖐᓐᓈᖅ ᑲᓇᑕᒥ ᑐᓐᖓᕕᔾᔪᐊᒃᑯᑦ−ᓴᐳᔾᔭᐅᓯᒪᔪᒥᒃ ᐅᖃᐅᓯᕐᒧᑦ ᐱᔪᓐᓇᐅᑎᑖᖅᑎᑦᓯᒋᐊᓕᒃ, ᐊᒻᒪᓗ ᓇᓕᒧᖏᓐᓂᒃ ᑮᓇᐅᔭᓖᓗᓂ ᐊᑭᓕᐅᑎᒃᓴᓂᒃ ᐃᔨᕋᖅᑑᑕᐅᓯᒪᓂᖓᓄᑦ ᕿᐱᓘᑕᐅᓯᒪᔪᑦ ᐱᔪᓐᓇᐅᑎᓄᑦ ᐃᓄᓐᓄᑦ ᓄᓇᕗᒻᒥ.”

“2019-ᒥ, ᓄᓇᕐᔪᐊᒥ ᐊᕐᕌᒍᕆᔭᐅᓂᖓ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓄᑦ, ᐃᓱᓕᑦᑎᓪᓗᒍ, ᐊᔭᐅᖅᑐᐃᕗᖓ ᒐᕙᒪᑐᖃᒃᑯᑦ ᐱᓕᕆᐊᖃᖁᓪᓗᒋᑦ ᓱᓕᓗᑎᒃ ᑲᒪᒋᔭᕆᐊᓕᒻᒥᓂᒃ ᐊᒻᒪᓗ ᒪᑭᒪᑎᑦᓯᓗᑎᒃ ᐃᑲᔪᕐᓱᐃᓗᑎᓪᓗ ᐃᓄᒃᑐᑦ ᐅᖃᐅᓯᕐᒧᑦ ᐱᔪᓐᓇᐅᑎᓂᒃ ᐃᓄᒃᑐᑦ ᒪᑭᒪᐃᓐᓇᕈᓐᓇᕐᓂᐊᕐᒪᑦ,” ᐅᖃᓚᐅᖅᑐᖅ ᐊᖓᔪᖅᑳᖅ ᑰᑦᑎᖅ.

-30-

ᑐᑭᓯᒋᐊᒃᑲᓂᕐᕕᒃᓴᖅ:

ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ: 1-888-646-0006

www.tunngavik.com

ᖃᔮᖅ ᐃᐅᔅᕗᐊᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᒻᒪᕆᒃ
ᐊᖓᔪᖅᑳᖅ ᐊᓗᑭ ᑰᑦᑎᖅ ᐊᓪᓚᑉᕕᖓ

www.president.tunngavik.com

ᐊᒃᑐᐊᔪᑦ ᑲᓲᒪᔾᔪᑎᑦ:
•ᐅᓂᒃᑳᖅ ᑲᑎᒪᔨᕋᓛᑦ ᐃᓱᓕᐅᕈᑎᖓᓄᑦ − ᒥᓂᔅᑕᐅᑏᑦ ᑲᑎᒪᔩᑦ ᑲᑎᒪᔨᕋᓛᖏᑦ ᐃᖅᑲᓇᐃᔭᖅᑐᓕᕆᓂᕐᒧᑦ, ᐃᑲᔫᓯᐊᖅᑐᓕᕆᓂᕐᒧᑦ ᐊᒻᒪᓗ ᐃᓗᓯᕐᒧᑦ: https://president.tunngavik.com/files/2019/12/RCD-03-20-90-TFN-CC-HR-income-support-and-health.pdf
•ᓄᓇᕗᒻᒥ ᐃᓕᓐᓂᐊᕐᓂᖅ ᒪᓕᒐᕐᓂᒃ ᓯᖁᒥᑦᓯᒍᑕᐅᓗᓂ ᐱᕋᔮᖑᓂᕐᒧᑦ ᓈᖕᒪᖏᓪᓚᖅ? ᖃᐅᔨᓴᕈᑎ ᒫᓐᓇ ᐊᑐᐊᒐᕐᓂᒃ ᐃᓄᒃᑐᑦ ᐊᒻᒪᓗ ᖃᓪᓗᓈᑎᑐᑦ ᐃᓕᓐᓂᐊᓂᕐᒥᒃ, ᓄᓇᕐᔪᐊᒥ ᐊᒻᒪᓗ ᑲᓇᑕᒥ ᒪᓕᒐᖅ, ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ ᑐᖁᑦᓯᓂᖅ ᐊᒻᒪᓗ ᐱᕋᔭᑕᐅᓯᒪᓃᑦ ᐃᓄᓕᒫᑦ ᐃᓅᑦᑐᐊᕆᐊᖃᕐᓂᖏᓐᓄᑦ: https://www.tunngavik.com/news/is-nunavut-education-criminally-inadequate/
•C-91, ᐱᖁᔭᖅ ᓄᓇᖃᖅᑳᕐᓯᒪᔪᓄᑦ ᐅᖃᐅᓯᕐᓄᑦ: https://www.parl.ca/legisinfo/BillDetails.aspx?billId=10293463&Language=E
•ᓂᕈᐊᖅᑕᐅᓯᒪᔪᑦ ᐱᕙᓪᓕᐊᔪᓂ ᑐᓴᕐᖓᖅᑕᐅᒋᐊᓖᑦ ᐃᓄᐃᑦ ᐃᓱᒫᓘᑎᖏᓐᓂᒃ ᐱᔾᔪᑖ: C-91:
o https://www.tunngavik.com/2019/04/04/president-aluki-kotierk-addressing-bill-c-91/
o https://www.cbc.ca/news/canada/north/inuit-languages-bill-c91-nunavut-1.5191796
o https://www.theglobeandmail.com/politics/article-proposed-indigenous-language-law-met-by-mixed-views/
o https://nunavutnews.com/nunavut-news/inuktut-absent-from-proposed-federal-languages-legislation/
•ᑲᓇᑕᓕᒫᒥ ᑲᑎᒪᓂᕐᔪᐊᖅ ᑲᓇᑕᒥ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓐᓄᑦ ᐊᑐᐊᒐᕐᓄᑦ ᑐᐹᖅᑕᐅᓂᖓᓂ Bill C-91: https://www.glendon.yorku.ca/crlcc/national-colloquium/
•ᓄᓇᕗᑦ ᑐᓐᖓᕕᒃ ᓈᖕᒪᑦᑐᒥᒃ ᑮᓇᐅᔭᓕᑕᐅᒍᒪᓂᖓ ᐃᓄᐃᑦ ᐅᖃᐅᓯᖏᓐᓄᑦ:
https://www.cbc.ca/news/canada/north/equitable-funding-for-inuit-languages-1.4148129

Download (PDF, 80KB)

Download (PDF, 2.95MB)