ᓄᓇᕗᑦ ᑐᓐᖓᕕᒃᑯᓐᓂ ᑭᖑᕝᕕᐅᑎᓯᒪᔪᖅ ᐊᖓᔪᖅᑳᒧᑦ ᔭᐃᒥᓯ ᐃᑦᑐᓗᒃ ᐅᓪᓗᒥ ᐅᖃᖅᑲᐅᔪᖅ ᐊᓪᓚᓐᖑᐊᓄᑦ ᑲᑎᓐᖓᔪᑦ ᐃᒪᕐᒥᐅᑕᓂᒃ ᒥᐊᓂᖅᓯᓂᕐᒧᑦ ᐸᕐᓇᐅᑏᑦ ᐊᖏᖅᑕᑦ ᓄᓇᕗᒻᒥ ᐅᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᐃᒻᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓᓄᑦ ᑮᑦ ᐋᔅᕕᐅᑦ.
ᒥᐊᓂᖅᓯᓂᕐᒧᑦ ᐸᕐᓇᐅᑎᓕᐊᖑᓚᐅᖅᑐᑦ ᐃᒪᕐᒥᐅᑕᓕᕆᔨᒃᑯᓐᓂᒃ ᑐᓴᕆᐊᖃᑦᑕᖅᑐᑎᒃ ᑐᓐᖓᕕᒃᑯᓐᓂᒃ, ᐊᕕᑦᑐᕐᓯᒪᓃᑦ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓴᖅᑮᓇᓱᐊᖅᑐᑎᒃ ᑲᑎᓪᓗᒋᑦ ᐊᓪᓚᓐᖑᐊᖅᑕᐅᔪᓐᓇᖅᑐᓂᒃ ᑐᓐᖓᕕᒋᔭᐅᓗᑎᒃ ᐃᓄᐃᑦ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖏᑦ ᐋᖅᑭᐅᒪᑦᓯᒍᑕᐅᓯᓐᓈᑦ ᐊᓪᓚᓐᖑᐊᖃᑦᑕᕈᓐᓇᖁᓪᓗᒋᑦ ᓄᖑᐊᑎᑦᓯᑦᑕᐃᓕᓗᑎᒃ ᐊᒻᒪᓗ ᓂᐅᕐᕈᑎᖃᕈᓐᓇᕐᓗᑎᒃ ᐊᓪᓚᓐᖑᐊᓂᒃ.
ᐃᑦᑐᓗᒃ ᐅᖃᖅᑐᖅ ᑐᓐᖓᕕᒃᑯ ᐱᓇᓱᐊᒻᒪᕆᓚᐅᖅᑐᑦ ᐊᐅᓚᔾᔭᐃᒋᐊᕐᓂᕐᒥᒃ ᐊᒻᒪᓗ ᒥᐊᓂᖅᓯᓂᕐᒧᑦ ᐸᕐᓇᐅᑎᓕᐅᕐᓂᕐᒥᒃ ᐅᑭᐅᓐᓂᒃ ᒪᕐᕉᖅᑲᐅᔫᓐᓂᒃ, ᓴᖅᑭᕈᑕᐅᓚᐅᖅᑐᖅ ᐃᓕᖅᑯᓯᕐᒨᖓᑦᓯᐊᖅᑐᓂᒃ ᒥᐊᓂᖅᓯᓂᕐᒧᑦ ᐸᕐᓇᐅᑎᓕᐅᕐᓂᕐᒥᒃ. “ᐃᓛᓐᓂᒃᑯᑦ, ᐸᕐᓇᐅᑎᓕᐅᕐᐸᓪᓕᐊᓇᓱᐊᖅᑎᓪᓗᒋᑦ ᐱᔭᕐᓂᖅᑑᖃᑦᑕᓚᐅᓐᖏᑦᑐᖅ, ᑭᓯᐊᓂ ᐃᓱᐊᓂ, ᐃᓄᐃᑦ ᒫᓐᓇ ᒥᐊᓂᖅᓯᓂᕐᒧᑦ ᐸᕐᓇᐅᑎᖃᓕᖅᑐᑦ ᑎᑭᐅᑎᓯᒪᑦᓯᐊᖅᑐᓂᒃ ᐱᔭᕆᐊᓕᑦᑎᓐᓄᑦ ᐊᒻᒪᓗ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖃᕈᑎᑦᑎᓐᓅᖓᑦᓯᐊᖅᑐᑦ,” ᐅᖃᖅᑐᖅ ᐃᑦᑐᓗᒃ.
ᒥᐊᓂᖅᓯᓂᕐᒧᑦ ᐸᕐᓇᐅᑏᑦ ᐊᐅᓚᑦᓯᒍᑕᐅᔪᑦ ᐊᓪᓚᓐᖑᐊᕈᓐᓇᓂᕐᒥᒃ ᓄᓇᕗᒻᒥ. ᐊᑐᓕᖅᑎᑕᐅᓂᐊᖅᑐᑦ ᓴᖅᑭᖅᑕᐅᓗᑎᒃ ᐆᒪᔪᖅᑕᐅᒍᓐᓇᖅᑐᑎᒍᑦ ᑲᑎᓪᓗᖏᑦ ᐊᐅᔭᕐᓯᐅᕆᐊᖅᑐᕐᕕᒋᕙᑦᑕᖏᓐᓄᑦ ᐊᓪᓚᓐᖑᐊᓄᑦ. ᐃᓕᓐᓂᐊᕐᓂᖅᑕᖃᕈᒫᕐᓂᐊᖅᑐᖅ ᑐᓂᐅᖅᑲᖅᑕᐅᓂᐊᕐᓂᖏᓐᓄᑦ ᑲᑎᓪᓗᒋᑦ ᐆᒪᔪᖅᑕᐅᔪᓐᓇᖅᑐᓂᒃ ᕕᑉᕗᐊᓕ 12-14, 2013, ᐃᖃᓗᓐᓂ. ᐊᕕᑦᑐᕐᓯᒪᓃᑦ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓴᓐᓂᕈᑎᐅᑉ ᐃᒪᖓᓂᒃ ᐊᓪᓚᓐᖑᐊᓂᒃ ᕿᓇᓗᒐᖃᑦᑕᖅᑐᑦ ᐃᓕᓐᓂᐊᕆᐊᖃᑕᐅᓛᖅᑐᑦ ᐊᒻᒪᓗ ᐊᑐᕐᓂᐊᖅᑐᑦ ᒥᐊᓂᖅᓯᓂᕐᒧᑦ ᐸᕐᓇᐅᑎᓂᒃ ᖃᐅᔨᓇᓱᐊᓕᕈᑎᒃ ᖃᑦᓯᓂᒃ ᐊᓪᓚᓐᖑᐊᓄᑦ ᓂᕕᖓᑖᓂᒃ ᐊᑐᓂᑦ ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᑐᓂᔭᐅᓂᐊᕐᒪᖔᑕ ᐊᕕᑦᑐᕐᓯᒪᓂᕐᒥᒍᑦ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓄᑦ. ᐃᓚᖓ ᑐᓴᕐᓇᓗᐊᕐᓂᕐᐹᖑᔪᖅ ᐸᕐᓇᐅᑎᓂ ᐊᕙᑎᓂᒃ ᐊᓪᓚᓐᖑᐊᓂᒃ ᕿᓇᓗᒐᕈᓐᓇᖅᑎᑕᐅᓚᐅᖅᑐᑦ ᐅᓄᖅᓯᒋᐊᖅᑕᐅᔪᑦ 50-ᓄᑦ ᐊᐅᓱᐃᑦᑐᒥᐅᑦ (Jones Sound) ᐊᐅᓱᐃᑦᑑᑉ ᐃᒪᖓᓂᒃ.
ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓ ᐋᔅᕕᐅᑦ ᓱᓕ ᐋᖅᑮᖏᑦᑐᑦ ᑲᑎᓪᓗᒋᑦ ᐆᒪᔪᖅᑕᐅᒍᓐᓇᖅᑐᓂᒃ ᑕᓯᐅᔭᕐᔪᐊᖅ ᐅᐊᖕᓈᓄᑦ. ᑖᓐᓇ ᐱᐊᓂᒃᐸᑦ, ᐊᐃᑉᐹᓂ ᐃᓕᓐᓂᐊᕐᓂᖃᕈᒫᕐᓂᐊᕐᒥᔪᑦ ᐊᒃᑐᖅᑕᐅᓯᒪᓂᐊᖅᑐᑦ ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ.
