Nunavut Tunngavik Timinga Angayukaangulaktuk James Eetoolook ukaktuk ublumi tugaaliit Ilaukatauyut Ikaluligiyit Munagitjutikhait Paknaiyautikhait angiktauhimaliktut Nunavumi Umaligiyit Katimayiit ovalo Munagiyit Ikaluligiyit ovalo tagiut Ministanga Keith Ashfield.

Munagitjutikhait paknaiyautikhait hanahimayait DFOkut ukakatigivlugit NTIkut, Aviktukhimayut Umayuligiyit Havakviit ovalo Nunait Umayuligiyit (HTO) pinahuakhutik hanatjutikhait tamaat umayukhiulaaktait tugaaliit ikpigilugit Inuit umayukhiukgutikhait inminiigutikhait tuhaktinahualugit tamaktitailigiyiit umayukhiugutainik ovalo niuviktilaagutainik tugaaliit.

Eetoolook ukaktuk NTI ilaukatauhimayut pitkutikhainik ovalo hanatjutainik munagitjutikhait paknaiyautikhait avataani malguuk ukiuni, pipkaihimayait hanatiligiyiit inuuviviniinut ihumakaktut munagitjutikhait paknaiyautikhait. “Ilaani, hanatiligiyiit paknaiyautikhait ayonaktut, kihimi kinguanik, Inuit ublumi munagitjutikhait paknaiyautikaliktut pilaaktainik piyumayainik ovalo ikpigiyait umayuligiyivut inminiigutait,” ukaktuk Eetoolook.

Munagitjutikhait paknaiyautikhait maligaliugutiginiaktait tugaaliit umayukhiugutikhait Nunavumi. Iniktiniaktut hanatiligiyiinut tamaat umayukhiulaaktait ilaukatautjutainik tugaaliit.

Ayoikhainiaktut tunikhaitjutikhainik nutaat tamaat umayukhiulaaktait February 12mit 14mut, 2013, Iqaluni. RWOkut ovalo HTOkut umayukhiukpaktut Qikiqtaaluk Kangikhuani tugaaaliit ilaukatauniaktut ayoikhaititlugit ovalo atugutikhait munagitjutikhait paknaiyautikhait naunaiyagiaganik kafinik tugaaliit naunaiyautikhainik tamamik HTOkut tuniyauniaktut RWOkunit. Atauhik nalunangituk ilangani paknaiyautikhait pinahuaktut amigainahualugit Ausuituqmi tugaaliit umayukhiulaaktait 20mit 50mut tagiungani Jones Sound.

NWMBkut ovalo DFOkut Ministaa Ashfield ublumi iihimaitait tamaat umayukhiulaaktait kananangani Hudson Bay tagiungani. Tahamna inikat, aipaanik ayoikhainiaktut ikpinagiyauyunut HTOkunut.