ᓴᖅᑭᑕᐅᑲᐅᑎᒋᔭᕆᐊᓕᒃ
(ᒫᔾᔨ 4, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᒻᒥ ᓯᕗᓕᖅᑎ ᐲᔾᔭᐃ ᐊᕿᐊᕈᖅ ᓄᓇᕗᑦ ᑐᙵᕕᒃᑯᓪᓗ (ᓄᓇᕗᑦ ᑐᙵᕕᒃᑯᑦ) ᐊᖓᔪᖅᑳᖅ ᔨᐅᕆᒥ ᑑᕐᙶᓗᒃ ᐅᖃᐅᓯᖃᓚᐅᖅᐳᖅ ᑲᑐᔾᔨᓪᓗᑎᒃ ᓯᕗᓪᓕᐅᑎᔪᒪᔭᒥᓂᒃ ᑲᓇᑕᒥ−ᐱᕈᖅᓴᐃᓂᕐᒧᑦ ᐊᐅᓚᔪᓐᓇᐅᑎᓂᒃ ᓴᖅᑭᔾᔪᑎᒃᓴᓂᒃ ᑲᓇᑕᒥ ᐅᑭᐅᖅᑕᖅᑐᖅ ᓄᓇᖁᑎᖓᓂ ᐊᒻᒪᓗ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐱᔭᕆᐊᓕᖏᓐᓂᑦ ᓄᓇᕗᒻᒥ.
“ᓄᓇᕗᑦ ᓇᖏᖃᑎᖃᖅᐳᖅ ᐊᓯᖏᓐᓂᒃ ᐅᑭᐅᖅᑕᖅᑐᒥ ᑲᓇᑕᒥᓗ ᐊᕕᒃᑐᖅᓯᒪᔪᓂᑦ ᐊᑭᕋᖅᑐᖅᖢᑎᒃ ᑭᓱᑐᐃᓐᓇᓂᒃ ᖁᐊᖅᓵᕐᓇᖅᑐᓂᒃ ᑲᓇᑕᐅᑉ ᓄᓇᖁᑎᖓᓄᑦ ᓴᐳᔾᔭᐅᓯᒪᓂᖓᓄᓪᓗ,” ᑕᐃᒪᓐᓇ ᓯᕗᓕᖅᑎ ᐊᕿᐊᕈᖅ ᐅᖃᖅᖢᓂ. “ᖃᐅᔨᒪᔪᒍᑦ ᑭᓱᑦ ᐱᒋᔭᐅᖕᒪᖔᑕ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᐊᒻᒪ ᐃᓄᐃᑦ ᓄᓇᖓᓄᑦ, ᖃᐅᔨᒪᓪᓗᑕᓗ ᓄᓇᕗᑦ ᐊᑕᐅᓯᐅᖃᑎᒌᒋᐊᖃᕐᒪᑦ ᐊᒻᒪ ᖃᓄᖅᑑᕈᑎᓂᒃ ᑭᐅᔪᓐᓇᕐᓗᑕ ᐊᒃᓱᕈᕐᓇᖅᑐᓄᑦ ᓵᑦᑎᐊᑦᑎᓐᓂ.”
ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐃᓕᑕᖅᓯᐅᒪᖕᒪᑕ ᖁᑦᑎᒃᑐᒦᓐᓂᖏᓐᓂᒃ ᓄᓇᓕᕆᓂᖅ ᓄᓇᕐᔪᐊᕐᒥ ᐱᔾᔪᑕᐅᕐᔪᐊᕐᒪᑦ ᑲᓇᑕᒥ ᐊᒻᒪ ᓄᓇᕐᔪᐊᕐᒥ ᐅᔾᔨᕆᔭᐅᓕᕈᑕᐅᓪᓗᓂ ᐊᑦᑕᕐᓇᖅᑐᒦᑦᑕᐃᓕᒪᓂᕐᒧᑦ ᐊᒻᒪ ᓄᓇᖁᑎᒋᔭᐅᓂᖓᓄᑦ ᐅᑭᐅᖅᑕᖅᑐᒥ. ᑕᒪᕐᒥᒃ ᐱᓕᕆᕘᒃ ᓴᐳᔾᔨᓯᒪᔭᕆᐊᖃᖅᐴᒃ ᐱᔪᓐᓇᐅᑎᖏᓐᓂᒃ ᐊᒻᒪ ᐅᔾᔨᕆᔭᐅᓕᖅᑎᑦᑎᓂᕐᒥᒃ ᐃᓅᓯᕐᒧᑦ ᒪᑭᒪᓇᓱᐊᕐᓂᕐᒧᑦ ᖃᓄᐃᙱᑦᑎᐊᕈᓯᕐᓂᒃ ᓄᓇᕗᒥᐅᓄᑦ ᐊᒻᒪ ᓄᓇᕗᒻᒥ ᐃᓄᖕᓄᑦ. ᑕᒪᓐᓇ ᐃᓚᖃᖅᐳᖅ ᓇᓗᓇᐃᖅᓯᓂᕐᒥᒃ ᑲᓇᑕᐅᑉ ᓄᓇᖁᑎᖓᓂᒃ ᐃᒪᖏᓐᓂᒡᓗ ᐅᑭᐅᖅᑕᖅᑐᒥ ᕿᑭᖅᑕᖏᓐᓂ.
“ᐃᓄᐃᑦ ᐱᐅᓯᕆᕙᓚᐅᖅᑕᖏᑦ ᐊᒻᒪ ᐊᑐᖅᑕᐅᖏᓐᓇᖅᑐᑦ ᐊᒻᒪ ᐃᓐᓄᒃᑕᐅᖏᓐᓇᖃᑦᑕᖅᑐᑦ ᐃᑲᔪᖅᓱᐃᑦᑎᐊᖅᓯᒪᔪᑦ ᑲᓇᑕᒥ ᓇᖕᒥᓂᖃᖃᑕᐅᓂᕐᒧᑦ ᐱᓇᔪᒍᑕᐅᔪᓂᒃ ᐅᑭᐅᖅᑕᖅᑐᒥ,” ᐅᖃᓚᐅᖅᐳᖅ ᐊᖓᔪᖅᑳᖅ ᑑᕐᙶᓗᒃ. “ᑮᓇᐅᔭᓕᐅᕋᓱᐊᕐᓂᖅ ᒪᑭᒪᔾᔪᑎᓂᑦ, ᓂᖀᑦ ᐱᒋᔭᐅᓂᖏᓐᓄᑦ, ᐃᓄᒃᑐᑦ ᐊᒻᒪᓗ ᖁᑦᑎᖕᓂᖅᓴᒥᑦ ᐃᓕᓐᓂᐊᕐᓂᕐᒧᑦ ᐋᖅᑭᒃᓱᐃᓂᕐᒥᓪᓗ ᑲᓇᑕᒥ ᐅᓇᑕᖅᑐᒃᓴᓂᑦ, ᐱᕚᓪᓕᖅᑎᑦᑎᓪᓚᕆᖕᓂᐊᖅᑐᖅ ᐊᑦᑕᕐᓇᖅᑐᒦᑎᑦᑕᐃᓕᓂᕐᒥᑦ ᖃᓄᐃᖏᑦᑎᐊᕐᓂᕐᒥᓪᓗ ᐅᑭᐅᖅᑕᖅᑐᒥᑦ. ᐃᓄᐃᑦ ᓄᓇᓕᖏᑦ ᐊᑐᑦᑎᐊᖁᓪᓗᒋᑦ ᐊᒻᒪ ᐃᓄᖃᑦᑎᐊᕐᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ.”
ᓇᓗᓇᖅᑐᒃᑰᖅᑎᓪᓗᑕ, ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᑲᑐᔾᔨᖃᑎᒌᖑᕗᑦ ᐊᑯᓂᐅᔪᒃᑯᑦ ᑮᓇᐅᔭᓕᐅᕈᑕᐅᓇᓱᒃᑐᓄᑦ ᓈᒻᒪᒃᓯᓕᕈᑕᐅᓪᓗᑎᒃ ᐅᑭᐅᖅᑕᖅᑐᒥ ᓄᓇᖁᑎᖓᓄᑦ ᐊᒻᒪ ᓴᐳᔾᔭᐅᓯᒪᔭᕆᐊᖃᖅᑐᓄᑦ. ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᑕᐅᑦᑎᒃᑰᖃᑕᐅᕗᑦ ᑐᓴᖅᑎᑦᑎᑎᓪᓗᒋᑦ ᑲᓇᑕᒥ−ᐱᕈᖅᓴᐃᔪᑦ ᐊᐅᓚᔪᓐᓇᐅᑎᓄᑦ ᐱᓕᕆᐊᑦ ᓄᓇᕗᒻᒥ ᑐᐊᕕᐊᖑᒃᑲᓐᓂᕆᐊᖃᕐᓂᖏᓐᓂᒃ.
ᒫᓐᓇᒧᑦ ᑎᑭᖦᖢᒍ, ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐋᖅᑭᒃᓯᕙᓪᓕᐊᕗᑦ ᐱᓕᕆᖃᑎᒌᓂᒃ ᐋᖅᑭᒃᓯᔾᔪᑎᒃᓴᓂᒃ ᓄᓇᕗᒻᒥ ᓴᓇᐅᒐᕐᒥᒃ ᐅᑭᐅᖅᑕᖅᑐᒥ ᓄᓇᖁᑎᖓᓂᒃ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᖃᓄᐃᓕᐅᕈᑕᐅᔪᒪᔪᓂᒃ.
ᓄᓇᕗᒻᒥ ᐅᑭᐅᖅᑕᖅᑐᒥ ᓄᓇᓖᑦ ᓱᓕ ᑲᓇᑕᐅᑉ ᓄᓇᖁᑎᖓ ᓱᓕ ᐱᔭᐅᔾᔭᐃᖅᓯᕗᑦ ᑲᓇᑕᒥ. ᑭᓯᐊᓂ, ᐱᑕᖃᑦᑎᐊᙱᓐᓂᖓ ᐱᕐᔪᐊᓂᒃ ᐊᐅᓚᔪᓐᓇᐅᑎᓂᒃ ᐃᓄᖕᓂ, ᓄᓇᕗᒻᒥ ᐊᒻᒪ ᑲᓇᑕᒥ ᐊᒃᑐᖅᑕᐅᓴᕋᐃᑎᑦᑎᓲᖑᕗᑦ ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐊᒻᒪ ᓄᓇᕐᔪᐊᕐᒥ ᓯᕘᕋᓇᖅᑐᓄᑦ.
“ᐃᓄᐃᑦ ᐃᓚᒌᑦ ᐊᒃᓱᕈᕐᓇᖅᑐᖅᓯᐅᖃᑦᑕᖅᓯᒪᕗᑦ, ᐃᓚᒋᔭᐅᓪᓗᓂ ᓅᖁᔭᐅᓚᐅᖅᓯᒪᓪᓗᑎᒃ, ᑲᓇᑕᐅᑉ ᓄᓇᖁᑎᖓ ᐱᔾᔪᑎᒋᓪᓗᒍ,” ᐅᖃᓚᐅᖅᐳᖅ ᐊᖓᔪᖅᑳᖅ ᑑᕐᙶᓗᒃ, “ᑖᓐᓇ ᐊᖏᔪᒻᒪᕆᒃ ᖁᔭᓈᖅᓯᒪᖃᑦᑕᓚᐅᕐᓂᖏᑦ ᐳᐃᒍᖅᑕᐅᔭᕆᐊᖃᙱᑦᑐᖅ, ᐊᒻᒪ ᐃᓄᐃᑦ ᐊᑐᖅᑕᐅᒃᑲᓐᓂᓚᐅᖅᓯᒪᔭᕆᐊᖃᙱᑦᑐᑦ ᐱᑦᑎᐊᖅᑕᐅᙱᕕᒡᔪᐊᕐᓗᑎᒃ ᐊᒻᒪ ᓱᖁᑎᒋᔭᐅᙱᓪᓗᑎᒃ.”
ᓄᓇᕐᔪᐊᒥ ᓄᓇᐅᑉ ᑕᐅᑦᑐᖓ ᒪᓕᒃᖢᒍ ᕿᑎᐊᓃᓐᓂᖓᓗ ᐅᑭᐅᖅᑕᖅᑐᒥᐅᓕᒫᓂᑦ ᐱᔾᔪᑎᓖᑦ, ᐊᒃᑐᐊᓂᖃᕐᓂᖅᓴᐅᕗᖅ ᐊᑭᑐᔪᓂᑦ ᑮᓇᐅᔭᓕᐅᕈᑎᖃᕆᐊᒃᓴᖅ ᐅᑭᐅᖅᑕᖅᑐᒥ ᓄᓇᓕᖕᓂ ᐱᔭᐅᔭᕆᐊᓕᖕᓂᒃ ᒪᓕᒃᑐᓂᑦ, ᓯᕗᒻᒧᐊᒃᐸᓪᓕᐊᓗᑎᒃ ᐱᓕᕆᐊᒃᓴᓂᑦ ᐱᕙᓪᓕᐊᔪᓕᕆᓂᕐᒧᑦ, ᑲᒪᒋᓗᒋᑦ ᐋᖅᑭᒋᐊᕈᑎᖃᕐᓂᖅ ᐊᒻᒪᓗ ᑲᓇᑕᒥ ᒐᕙᒪᐅᔪᓂᑦ ᐃᓱᒪᒋᔭᐅᔪᑦ ᐅᑭᐅᖅᑕᖅᑑᑉ ᓄᓇᖁᑎᖓᓂ ᐊᒻᒪᓗ ᓴᐳᒻᒥᔭᐅᓂᖓᓂ.
“ᑲᑐᔾᔨᓪᓗᑕ, ᑲᓇᑕᐅᑉ ᒐᕙᒪᒃᑯᖏᓐᓂ ᑎᓕᓯᕗᒍᑦ ᐅᑎᖅᑎᑦᑎᖁᓪᓗᒋᑦ ᐃᓄᐃᑦ−ᐊᐅᓚᑕᐅᔪᓂᒃ ᑲᓇᑕᒥ−ᐱᕈᖅᓴᐃᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂᒃ ᑐᐊᕕᐊᖑᒃᑲᓐᓂᕈᓐᓇᖅᑐᓂᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᓂᒃ ᐊᒻᒪ ᓄᓇᓕᖕᓂ,” ᓯᕗᓕᖅᑎ ᐊᕿᐊᕈᖅ ᐅᖃᖅᑐᖅ. “ᐊᑐᕐᓗᑎᒃ ᐊᑐᐃᓐᓇᐅᔪᓂᒃ ᒪᓕᒐᓕᕆᓂᕐᒧᑦ ᐱᓕᕆᔾᔪᑎᓂᒃ, ᐱᖃᖃᑕᐅᔪᓂᒃ ᐃᑲᔪᖅᓱᐃᓗᑎᒃ, ᑲᓇᑕᒥ ᒐᕙᒪᒃᑯᑦ ᑐᐊᕕᐊᖃᒃᑲᓐᓂᕈᓐᓇᖅᐳᑦ ᓴᓇᔭᐅᓯᒋᐊᖅᐸᑕ ᑖᒃᑯᐊ ᐱᕐᔪᐊᖑᓪᓗᑎᒃ ᐱᓕᕆᐊᒃᓴᑦ.”
ᓄᓇᕗᒻᒥ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐱᑕᖃᑐᐃᓐᓇᕆᐊᖃᖅᑎᓪᓗᒋᑦ ᐅᔭᕋᖕᓂᐊᒐᒃᓴᓂᒃ, ᐆᒻᒪᖅᑯᑎᓕᕆᓂᕐᒥᒃ, ᐃᖃᓗᓕᕆᓂᕐᒥᒃ ᐊᒻᒪ ᐃᓄᐃᑦ ᖃᐅᔨᒪᔭᖏᓐᓂᒃ ᑲᓇᑕᒥ−ᐱᕈᖅᓴᐃᓂᒃᑯᑦ ᐊᐅᓚᔪᓐᓇᐅᑎᓄᑦ ᐱᓕᕆᐊᑎᒍᑦ ᐃᑲᔫᑕᐅᑐᐃᓐᓇᔾᔮᙱᑦᑐᑦ ᓄᓇᕘᑦᑎᓐᓄᑦ, ᑭᓯᐊᓂᑦᑕᐅᖅ
ᑮᓇᐅᔭᓕᐅᕈᑕᐅᒃᑲᓐᓂᕈᓐᓇᕐᓂᐊᖅᑐᖅ ᑲᓇᑕᓕᒫᒥ ᓄᓇᕗᒻᒥ ᑕᑎᖃᕐᒪᑕ ᖃᓪᓗᓈᓂᙶᖅᑐᓂᒃ ᐱᖁᑎᓂᒃ ᕿᔪᖕᓂᒃ ᐊᒻᒪ ᓴᕕᕋᔭᖕᓂᒃ ᐅᖅᓱᐊᓗᖕᒧᑦ.
ᓄᓇᕗᑦ ᑎᑭᐅᑎᓯᒪᓕᕋᓗᐊᖅᑎᓪᓗᒍ ᐊᕐᕌᒍᓂ 25−ᓂ ᐊᓂᒍᖅᑐᓂ, ᓇᓗᓇᕈᓐᓃᖅᑐᖅ ᑐᑭᓯᐅᒪᑦᑎᐊᕆᐊᖃᖅᑐᒍᑦ ᑮᓇᐅᔭᓕᐅᕈᑕᐅᔪᓐᓇᖅᑐᓂᑦ ᓄᓇᕗᒻᒥ ᐱᔪᓐᓇᕐᓂᓕᒫᑦᑎᓐᓄᑦ,” ᓯᕗᓕᖅᑎ ᐊᕿᐊᕈᖅ ᐅᖃᖅᑐᖅ. ᐱᕕᒃᓴᐅᓕᖅᐳᖅ ᑲᓇᑕᒥ ᐱᕈᖅᐸᓪᓕᐊᑎᑦᑎᓂᖅ ᐱᖓᔪᒋᔭᖓᓄᑦ ᑕᑭᓂᖅᐹᒧᓪᓗ ᓯᒡᔭᑦᑎᓐᓄᑦ.
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᒃᑎᑦᑎᔨ ᑐᓴᒐᒃᓴᓕᕆᔨᓄᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
ᓰᒪ ᓴHᐋᕐ ᔨᕆHᐃ
ᐊᖓᔪᖅᑳᖅ ᖃᓄᖅᑑᕈᑎᓄᑦ ᐊᐅᓚᔾᔪᑎᓄᑦ
ᑎᑎᕋᕐᕕᐊᓂᑦ ᓯᕗᓕᖅᑎ ᐲᔾᔭᐃ ᐊᕿᐊᕈᖅ
(867) 975-5059
ᑲᓇᑕᒥ−ᓴᓇᓂᖅ ᒪᑭᒪᔾᔪᑎᓄᑦ ᓯᕗᓪᓕᐅᔾᔭᐅᔪᒪᔪᑦ
ᕿᑭᖅᑕᕐᔪᐊᕐᒥ ᑐᓚᒃᑕᕐᕕᒃ − ᐃᑎᔪᒥ ᑐᓚᒃᑕᕐᕕᒃ ᕿᑭᖅᑕᕐᔪᐊᕐᒥ ᐊᑯᓂᐊᓗᒃ ᓯᕗᓪᓕᐅᔾᔭᐅᓯᒪᕗᖅ ᓄᓇᕗᑦ ᒐᕙᒪᒃᑯᓐᓄᑦ ᐱᐅᓯᒋᐊᖅᑕᐅᖁᓪᓗᒍ ᐃᒪᕐᒥᐅᑕᓄᑦ ᐊᐅᓚᔪᓐᓇᐅᑎᑦ, ᒥᒃᖠᒋᐊᖅᑎᓪᓗᒋᑦ ᐱᑖᕐᕕᐅᓲᑦ, ᐃᑲᔪᖅᓱᖅᑕᐅᓗᑎᒡᓗ ᐃᒪᕕᖕᒥ ᐃᖃᓗᓕᕆᓂᕐᒥᒃ. ᐅᑭᐅᖅᑕᖅᑐᒥ ᒪᑭᒪᔾᔪᑎᖃᖅᑎᑦᑎᓗᓂ ᐱᔭᕆᐊᖃᓪᓚᕆᒃᑐᒥᑦ, ᑐᓚᒃᑕᕐᕕᒃ ᐃᑲᔪᖅᑐᐃᓂᐊᖅᐳᖅ ᑲᓇᑕᒥ ᐊᑦᑕᕐᓇᖅᑐᒦᑎᑦᑕᐃᓕᓂᕐᒥᒃ, ᐱᖏᖕᓇᖅᑐᓕᕆᓂᕐᒥᒃ, ᐊᒻᒪᓗ ᐃᒪᕐᒥᐅᑕᓂᒃ ᓴᐳᔾᔨᓂᕐᒥᒃ. ᕿᑭᖅᑕᕐᔪᐊᕐᒥ ᑐᓚᒃᑕᕐᕕᒃ ᒥᒃᖠᒋᐊᕈᑕᐅᔪᓐᓇᖅᐳᖅ ᓄᓇᕗᒻᒥ ᑕᑎᖃᕐᓂᕐᒥᒃ ᑲᓇᑕᐅᑉ ᓯᓚᑖᓂᙶᖅᑐᓂᒃ ᑐᓚᒃᑕᕐᕕᖕᓂᒃ ᓴᙱᒃᑎᒋᐊᕈᑕᐅᓪᓗᓂᓗ ᑲᓇᑕᒥ ᐅᑭᐅᖅᑕᖅᑐᒥ ᐃᒪᕐᒥᐅᑕᑦ ᐱᓕᕆᔾᔪᓯᖏᓐᓂᒃ. ᑐᓚᒃᑕᕐᕕᒃ ᐱᐅᓯᒋᐊᖅᑎᑦᑎᖕᒥᔪᖅ ᑲᓇᑕᐅᑉ ᐃᒪᕐᒥᐅᑕᓂᒃ ᓂᕆᖃᑦᑕᐅᑎᕙᖕᓂᖏᓐᓂᒃ, ᐊᑐᕈᓐᓇᑦᑎᐊᕐᓗᑎᒃ ᓂᕿᒃᓴᖅᓯᐅᖅᑕᐅᖏᓐᓇᕈᓐᓇᖅᑐᓂᑦ ᐅᑭᐅᖅᑕᖅᑐᒥ ᐃᖃᓗᓕᕆᓂᕐᒥᒃ.
ᐅᑭᐅᖅᑕᖅᑐᒥ ᐊᑦᑕᕐᓇᖅᑐᒦᑎᑦᑎᑦᑕᐃᓕᓂᕐᒧᑦ ᓱᓪᓗᑯᑖᑦ/ᖁᕐᓗᖅᑐᐊᕐᔪᒻᒥᑦ ᐊᖅᑯᑎ ᐊᒻᒪ ᑐᓚᑦᑕᕐᕕᒃ ᐱᓕᕆᐊᖅ − ᖁᕐᓗᖅᑐᐊᕐᔪᖕᒥᑦ ᐊᖅᑯᑎᐊ ᑐᓚᒃᑕᕐᕕᐊᓗ 230 ᑭᓛᒥᑕᒥᑦ ᐊᖅᑯᑎᐅᕗᖅ ᐊᒻᒪ ᑐᓚᒃᑕᕐᕕᐅᓪᓗᓂ ᓄᓇᕗᒻᒥᑦ ᓄᓇᑦᑎᐊᒧᑦ, ᐊᑐᕈᓐᓇᖅᓯᑎᑦᑎᓪᓗᑎᒃ ᐅᔭᕋᖕᓂᐊᕐᕕᖃᑦᑎᐊᖅᑐᓂᑦ ᐊᕕᒃᑐᖅᓯᒪᔪᓂᑦ. ᑖᓐᓇ ᐱᓕᕆᐊᖑᔪᖅ ᓴᙱᑦᑎᒋᐊᖅᑎᑦᑎᓂᐊᖅᑐᖅ ᓄᓇᐅᑉ ᑲᑎᙵᓂᖓᓂ ᐅᑭᐅᖅᑕᖅᑑᑉ ᑕᕆᐅᖓᓄᑦ, ᐱᓕᕆᐊᒃᓴᖃᓕᖅᑎᑦᑎᓗᑎᒃ ᐅᔭᕋᖕᓂᐊᕐᓂᕐᒧᑦ ᐱᔭᕆᐊᖃᒻᒪᕆᒃᑐᓂᒃ ᐊᖑᒻᒪᑎᖁᓪᓗᒋᑦ ᑲᓇᑕᒥ ᐱᕈᖅᐸᓪᓕᐊᓂᖓᓄᑦ ᐱᔭᕆᐊᓕᖕᓂᑦ ᑲᒪᑦᑎᐊᕐᓗᑎᒃ ᐱᔭᐅᔪᓐᓇᖅᑐᓂᒃ ᐱᑕᖃᑦᑎᐊᙱᑦᑐᓂᑦ ᓄᓇᒦᑦᑐᓂᒃ ᐊᒻᒪᓗ ᐹᑕᓖᑦ ᓴᕕᕋᔭᐃᑦ, ᐊᑐᕆᐊᖃᒻᒪᕆᒃᑐᑦ ᓴᓗᒪᔪᒥᒃ ᐆᒻᒪᖅᑯᑎᖃᖅᑎᑦᑎᓂᕐᒥᒃ ᐊᒻᒪᓗ ᓴᐳᔾᔭᐅᔾᔪᑎᓄᑦ ᐊᑐᖅᑕᐅᔪᓂᑦ. ᑖᓐᓇᑐᐊᑦᑎᐊᖅᑕᐅᖅ ᐃᑎᔪᒥ ᑐᓚᒃᑕᕐᕕᐅᓂᐊᖅᐳᖅ ᐱᖓᓐᓇᖓᓂ ᕿᑭᖅᑕᖏᓐᓂ ᐅᕝᕙᓘᓐᓃᑦ ᓱᓪᓗᐊᓗᒃ ᐅᐊᓕᓂᕐᒥ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᑕ ᖃᓂᒋᔮᓂ, ᐅᔾᔨᕐᓇᖅᓯᕙᓪᓕᐊᓂᐊᖅᑐᖅ ᐅᑭᐅᖅᑕᖅᑐᒥ ᑕᕆᐅᖓᓂ ᓯᑯᖃᙱᓐᓂᖅᓴᐅᖃᑦᑕᓕᖅᐸᑦ ᐊᒻᒪ ᐅᒥᐊᕐᔪᐊᑦ ᐅᓄᖅᓯᕙᓪᓕᐊᑎᓪᓗᒋᑦ.
ᑭᕙᓪᓕᕐᒥ ᐃᒐᓚᐅᔭᙳᐊᖅ − ᑖᓐᓇ 1,200 ᑭᓚᒦᑕᓂᒃ ᓱᑲᓐᓇᖅᑐᒥᒃ ᐅᐊᔭᖃᖅᑐᖅ ᒫᓂᑑᐸᐅᑉ ᐃᒪᕐᒨᖅᑐᓄᑦ ᐅᐊᔭᖏᓐᓄᑦ ᐊᒻᒪ ᓱᒃᑲᔪᒥᒃ ᐃᑭᐊᖅᑭᕕᒃᑰᕈᓐᓇᐅᑎᒥᒃ ᑕᓪᓕᒪᓄᑦ ᑭᕙᓪᓕᕐᒥ ᓄᓇᓕᖕᓄᑦ: ᐊᕐᕕᐊᑦ, ᑎᑭᕋᕐᔪᐊᖅ, ᑲᖏᖅᖠᓂᖅ, ᐃᒡᓗᓕᒑᕐᔪᒃ ᐊᒻᒪ ᖃᒪᓂ’ᑐᐊᖅ. ᑖᓐᓇ ᐱᓕᕆᐊᖑᔪᖅ ᐃᓚᖃᕐᓂᐊᖅᐳᖅ 370 ᑭᓗᒦᑕ ᐅᖓᑖᓃᑦᑐᓂᒃ ᓴᙱᓂᓕᖕᒥᑦ ‘ᐆᒻᒪᖁᑎᒥᒃ’ ᑐᑭᓕᐊᖅᑐᓂᒃ ᓄᓇᕗᒻᒥᓗ ᓯᕗᓪᓕᖅᐸᐅᓗᓂ ᓇᑉᐸᖅᑎᖅᑕᐅᓯᒪᔪᓄᑦ ᐊᑕᓗᓂ ᖃᓪᓗᓈᓄᑦ ᑲᓇᑕᒥᐅᓄᑦ. ᑕᒪᓐᓇ ᐊᑐᖅᑕᐅᕙᒃᑐᖅ 150 megawatts−ᓂᒃ ᓴᙱᓂᖃᖅᑎᑦᑎᓂᐊᖅᐳᖅ ᐱᔪᓐᓇᕐᓂᕆᔭᖓ ᐊᒻᒪᓗ 1,200−ᐸᓗᖕᓂᒃ gigabits−ᓂᒃ ᐊᑕᐅᓯᕐᒧᑦ ᑎᑦᑕᑯᓗᖕᒧᑦ ᐊᓕᒎᔭᕐᓄᑦ−ᐆᒻᒪᖅᑯᑎᒧᑦ ᐃᑭᐊᖅᑭᕕᒃᑰᕈᓐᓇᐅᑎᒥᒃ, ᑲᔪᓯᔪᒥᒃ ᐆᒻᒪᖅᑯᑎᖃᕈᓐᓇᑦᑎᐊᕐᓗᓂ ᖃᕆᑕᐅᔭᒃᑯᓪᓗ ᐊᑐᕈᓐᓇᕐᓗᑎᒃ ᑭᖑᕚᒃᓴᖏᑦ. ᑭᕙᓪᓕᕐᒥ ᐃᒐᓚᐅᔭᙳᐊᖅ ᐆᒻᒪᖅᑯᑎᒧᑦ ᐊᑦᑕᑕᕐᕕᒃ ᐃᒐᓯᐅᑎᒥᒃ ᐊᑐᙱᓐᓂᖅᓴᐅᑎᑦᑎᓂᐊᖅᐳᖅ ᓄᓇᕗᒻᒥ, ᐃᓯᐊᕿᑎᑦᑎᙱᓐᓂᖅᓴᐅᓪᓗᑎᒃ 380,000 metric tonnes ᐊᕐᕌᒍᑕᒫᑦ—ᐃᑲᔫᑎᕐᔪᐊᖑᓪᓗᓂ ᑲᓇᑕᒥ 2050−ᒧᑦ ᑐᕌᒐᖏᓐᓄᑦ.
ᐃᖃᓗᖕᓂ ᐃᒪᕐᒨᖅᑐᖅ ᐆᒻᒪᖅᑯᑎ − ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᑦ−ᐊᐅᓚᑕᐅᔪᖅ ᐱᓕᕆᐊᒃᓴᖅ 2005−ᒥ ᐱᒋᐊᖅᑕᐅᓚᐅᖅᓯᒪᔪᖅ ᐊᑯᓂᐅᔪᒥᑦ ᐸᕐᓇᒃᑕᐅᓯᒪᕗᖅ ᑲᔪᓰᓐᓇᕈᓐᓇᖅᑐᒥᑦ, ᐊᑭᑐᓗᐊᙱᑦᑐᒥᑦ ᓈᒻᒪᒃᑐᒥᓪᓗ ᐆᒻᒪᖅᑯᑎᖃᖅᑎᑦᑎᓗᑎᒃ ᓄᓇᕘᑉ ᓄᓇᓕᐸᐅᔭᖓᓂᑦ. ᑲᓇᑕᒥ−ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᒃᓴᑦ ᓄᓇᕗᒻᒥ ᓯᓚᒧᑦ ᐃᓯᐊᕿᙱᓐᓂᖅᓴᐅᓕᕋᔭᖅᐳᖅ, ᓄᓇᕗᒻᒥ ᐆᖅᓱᐊᓗᖕᒨᖅᑐᓂᑦ ᐊᑐᙱᓂᖅᓴᐅᓕᕐᓗᓂ, ᐊᒻᒪᓗ ᓄᓇᕗᒻᒥ ᐊᖓᔪᖅᑳᖃᕐᕕᖓ ᑭᖑᕝᕕᖅᑕᕈᓐᓇᖅᑐᒥᑦ ᓄᓇᒥᖔᖓᔪᒥᑦ ᐆᒻᒪᖅᑯᑎᖃᕈᓐᓇᖅᓯᓗᓂ. ᐃᖃᓗᖕᓂ ᐃᒥᕐᒨᖅᑐᖅ ᐆᒻᒪᖅᑯᑎ ᐱᒋᐊᕈᑕᐅᒐᔭᖅᑐᖅ ᓴᓗᒪᓂᖅᓴᒥ ᐊᑐᖅᐸᓪᓕᐊᖔᕐᓂᕐᒧᑦ ᐊᒻᒪᓗ ᓇᖕᒥᓂᖅᓱᕈᓐᓇᖅᓯᓂᕐᒧᑦ ᓄᓇᕗᒻᒥ.
ᐱᓪᓗᐊᑕᐃᑦ ᓱᓕᔪᑦ:
- ᓄᓇᕗᑦ 2.09 ᒥᓕᐊᓐ km²−ᖑᕗᖅ− ᒪᕐᕈᐃᓪᓗᐊᖅᖢᒍ ᐋᓐᑎᐅᕆᐅ ᐊᖏᓂᕆᔭᖓ
- ᓄᓇᕗᑦ ᑕᑭᓛᒥᒃ ᓯᒡᔭᖃᖅᐳᖅ ᑲᓇᑕᒥ 38,000 ᑭᓚᒦᑕᓂᒃ ᐅᖓᓯᒃᑎᒋᓪᓗᓂ
- ᓄᓇᕗᑦ ᑐᙵᕕᒃᑯᑦ ᑎᒥᖓᑦ (ᓄᓇᕗᑦ ᑐᙵᕕᒃᑯᑦ ᑎᒥᖓᑦ) ᒐᕙᒪᓕᕆᓂᕐᒧᑦ ᑎᒥᐅᕗᖅ ᑕᒫᓂ ᐅᑭᐅᖅᑕᖅᑐᒥ ᑭᒡᒐᖅᑐᐃᓪᓗᑎᒃ ᓄᓇᕗᒻᒥᐅᓂᒃ ᐃᓄᖕᓂᒃ. ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᑲᒪᒋᔭᒃᓴᖃᖅᐳᑦ ᐃᓅᖃᑎᒌᓄᑦ, ᐃᓕᖅᑯᓯᕐᓄᑦ ᐊᒻᒪ ᒪᑭᒪᔾᔪᑎᓄᑦ ᐱᐅᓯᒋᐊᕈᑎᓄᑦ ᐃᓄᖕᓄᑦ ᐊᑕᖏᖅᑕᐅᓪᓗᑎᒃ ᐊᒻᒪ ᓈᒻᒪᒃᑐᒃᑯᑦ ᐊᑐᓕᖅᑎᑕᐅᕙᒡᓗᑎᒃ ᓄᓇᕗᒻᒥ ᐊᖏᖃᑎᒌᒍᑎᒥ
- ᓄᓇᕗᑦ ᓴᖅᑭᑕᐅᓚᐅᖅᓯᒪᔪᖅ ᑲᓇᑕᒥ 1999−ᖑᑎᓪᓗᒍ
- ᓄᓇᕗᒻᒥ ᓄᓇᖁᑎᒋᔭᐅᔪᓄᑦ ᐊᑐᖅᑕᐅᔪᓐᓇᖅᑐᓄᓪᓗ ᓇᖕᒥᓂᖅᓱᕐᓂᕐᒧᑦ ᐊᖏᖃᑎᒌᒍᑎ ᐊᑎᓕᐅᖅᑕᐅᓚᐅᖅᐳᖅ ᓄᓇᕗᑦ ᒐᕙᒪᒃᑯᖏᓐᓂᑦ, ᓄᓇᕗᑦ ᑐᙵᕕᒃᑯᓐᓂᑦ ᑲᓇᑕᒥᓪᓗ ᔮᓄᐊᕆ 18, 2024−ᒥᑦ, ᓅᑦᑎᓪᓗᑎᒃ ᐃᓱᒪᓕᐅᕆᓂᕐᒧᑦ ᐱᔪᓐᓇᐅᑎᓂᑦ ᑲᓇᑕᒥᑦ ᓄᓇᕗᒻᒧᑦ.
