ᑐᓴᕋᑦᓴᓕᕆᔩᑦ

ᓄᓇᕗᑦ ᒐᕙᒪᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᑦ ᓯᕗᒻᒧᑦ ᐃᖏᕐᕋᔪᒪᓂᑦ ᐊᔪᖅᓴᖅᑐᑦ ᐱᔾᔪᑎᒋᓪᓗᒋᑦ

ᐃᖃᓗᐃᑦ, ᓄᓇᕗᑦ (ᐅᑐᐱᕆ 24, 2012) – ᓯᕗᓕᖅᑎ ᐄᕙ ᐋᕆᐊᒃ ᐊᒻᒪ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᑳᑎ ᑕᐅᑐᙱ ᐅᓪᓗᒥ ᐊᑎᓕᐅᖅᑲᐅᕘᒃ ᐊᖏᖃᑎᒌᒍᑎᒥᒃ ᑐᑭᓯᐅᒪᖃᑎᒌᖕᓂᕐᒧᑦ ᓄᓇᕘᒥ ᑲᑎᒪᕐᔪᐊᕈᑕᐅᔪᒧᑦ ᐊᔪᖅᓴᖅᑐᑦ ᐱᔾᔪᑎᒋᓪᓗᒋᑦ ᑐᓴᖅᑕᐅᑎᑦᑎᖅᑲᐅᓪᓗᑎᒡᓗ ᐱᕙᓪᓕᐊᓂᐅᔪᒥᒃ ᓄᓇᕘᒥ ᓂᕿᓂᒃ ᓂᕆᔭᒃᓴᑦᑎᐊᕙᖕᓂᒃ ᖃᓄᖅᑑᕈᑕᐅᔪᓂᒃ.

ᐊᖏᖃᑎᒌᒍᑦ ᑐᑭᓯᐅᒪᖃᑎᒌᖕᓂᕐᒧᑦ ᐊᖏᖃᑎᒌᒍᑕᐅᕗᖅ ᑲᑐᔾᔨᖃᑎᒌᒍᑕᐅᔪᒪᓪᓗᓂ ᒐᕙᒪᒃᑯᓐᓂ ᐊᒻᒪ ᑐᙵᕕᒃᑯᓐᓂ ᐊᑐᓕᖅᑎᑦᑎᔪᒪᓪᓗᑎᑦ ᒪᑭᒪᓂᖅ ᐸᕐᓇᐅᒻᒥᒃ: ᑲᑐᔾᔨᖃᑎᒌᒍᑕᐅᓪᓗᓂ ᐊᔪᖅᓴᖅᑐᑦ ᐃᓄᐃᓴᒃᖠᒋᐊᖅᑕᐅᔪᒪᓪᓗᑎᒃ. ᓴᖅᑭᑕᐅᓂᖓ ᓄᓇᕘᒥ ᓂᕿᓂᒃ ᓂᕆᔭᒃᓴᑦᑎᐊᕙᓕᕆᔨᑦ ᑲᑐᔾᔨᖃᑎᒌᑦ ᐱᕙᒌᔭᖅᑐᓪᓗ ᓄᓇᕘᒥ ᐱᓕᕆᓂᒃᑯᑦ ᐸᕐᓇᐅᑕᐅᔪᒥᒃ ᓂᕿᓂᒃ ᓂᕆᔭᒃᓴᑦᑎᐊᕙᓕᕆᔪᑦ ᑐᕌᒐᒃᓴᕆᔭᐅᓪᓗᐊᑕᕐᒪᑦ ᒪᑭᒪᓂᖅ ᐸᕐᓇᐅᒻᒥᒃ.

“ᐊᖏᖃᑎᒌᒍᑎ ᑐᑭᓯᐅᒪᖃᑎᒌᖕᓂᕐᒧᑦ ᐃᖏᕐᕋᔾᔪᑕᐅᕗᖅ ᓄᓇᕗᑦ ᒐᕙᒪᒃᑯᑦ ᐱᓕᕆᔪᒪᔭᖓᓐᓄᑦ ᑲᑐᔾᔨᖃᑎᒌᒡᓗᑎᑦ ᐱᓕᕆᔨᐅᖃᑎᒋᔭᒥᓂᒃ ᒥᒃᖠᒋᐊᖅᑎᑦᑎᓇᓱᒡᓗᑎᒃ ᐊᔪᖅᓴᕐᓂᕐᒥᒃ, ᐊᖏᒡᓕᒋᐊᖅᑕᐅᓗᓂ ᑕᑎᖃᕈᓐᓇᕐᓂᖅ, ᖃᐅᔨᓴᕈᑏᑦ ᐱᓕᕆᐊᕆᕙᒡᓗᒋᑦ ᓇᓗᓇᐃᖅᐸᒡᓗᒍᓗ ᓯᕗᓪᓕᐊᔾᔭᐅᖏᓐᓇᕆᐊᖃᕐᓂᖓᓂᒃ ᓯᕗᓂᒃᓴᒥ ᒐᕙᒪᐅᓛᖅᑐᓄᑦ,” ᐅᖃᖅᐳᖅ ᓯᕗᓕᖅᑎ ᐄᕙ ᐋᕆᐊᒃ. “ᐱᓕᕆᐊᕆᔪᒪᔭᑦᑕ ᐃᓚᒋᓗᓂᐅᒃ, ᑐᕌᒐᒃᓴᖃᖅᐳᒍᑦ ᐱᕙᓪᓕᐊᑎᑦᑎᔪᒪᓪᓗᑕ ᓂᕿᓂᒃ ᓂᕆᔭᒃᓴᑦᑎᐊᕙᐅᖁᔨᓪᓗᑕ ᖃᓄᖅᑑᕋᓱᒃᑕᑦᑎᓐᓂ ᖃᐅᔨᔾᔪᑕᐅᔪᓐᓇᕐᓗᓂ ᖃᓄᖅᑑᕈᑎᒃᓴᑦᑎᐊᕙᖕᓂᒃ ᑐᐊᕕᕐᓇᖅᑑᓛᖑᖃᑕᐅᓪᓗᓂ ᐃᓅᖃᑎᒌᑦ ᐃᓱᒪᒋᔭᒃᓴᕆᕙᒃᑕᖏᓐᓂᒃ.”

“ᓄᓇᕗᑦ ᑐᙵᕕᒃᑯᑦ ᐱᔪᒃᓯᑦᑎᐊᖅᐳᑦ ᓴᖅᑭᑦᑎᕙᓪᓕᐊᔪᒪᓪᓗᑎᒃ ᐱᓕᕆᖃᑎᒋᔭᒥᓂᒃ ᓄᓇᕗᑦ ᒐᕙᒪᒃᑯᓐᓂ ᐊᔪᖅᓴᕐᓂᖅ ᐱᔾᔪᑎᒋᓪᓗᒍ ᓄᓇᕘᒥ. ᐅᐱᒍᓱᒃᐳᒍᑦ ᐃᓄᖕᓂᒃ ᐃᓚᐅᑎᑦᑎᔪᓐᓇᕋᑦᑕ, ᑲᑎᑉᐸᓪᓕᐊᔪᓂᒃ ᒪᑭᒪᓂᖅ ᐸᕐᓇᐅᒻᒥᒃ, ᒫᓐᓇᓗ ᓂᕆᐅᒃᐳᒍᑦ ᐱᓕᕆᖃᑎᒋᓂᐊᖅᑕᑦᑎᓐᓂ ᓴᖅᑭᑦᑎᕙᓪᓕᐊᓂᐊᖅᑎᓪᓗᑕ ᓄᓇᕘᒥ-ᓴᓇᐅᒐᕐᓂᒃ ᖃᓄᖅᑑᕈᑎᓂᒃ. ᓄᓇᕗᑦ ᑐᙵᕕᒃᑯᑦ ᐅᒃᐱᕈᓱᖕᒪᑕ ᓂᕆᐅᒃᖢᑎᒡᓗ ᑖᒃᑯᐊ ᖃᓄᖅᑑᕈᑕᐅᔪᑦ ᐱᐅᔪᓂᒃ ᐊᒃᑐᐃᓂᐊᕋᓱᒋᔭᐅᓪᓗᑎᒃ ᐃᓄᖕᓄᑦ. ᒫᓐᓇ ᐱᓕᕆᔪᖃᕆᐊᖃᕐᒪᑦ ᓂᖀᑦ ᓂᕆᔭᒃᓴᑦᑎᐊᕙᐅᑎᓐᓇᓱᒡᓗᒋᑦ,” ᐅᖃᖅᐳᖅ ᐊᖓᔪᖅᑳᖅ ᑕᐅᑐᙱ.

ᐊᖏᖃᑎᒌᒍᑎ ᑐᑭᓯᐅᒪᖃᑎᒌᖕᓂᕐᒧᑦ ᓇᓗᓇᐃᖅᓯᖕᒪᑦ ᓄᓇᕘᒥ ᑲᑎᒪᕐᔪᐊᕈᑎᒃ ᐊᔪᖅᓴᖅᑐᑦ ᐱᔾᔪᑎᒋᓪᓗᒋᑦ ᒪᕐᕉᖕᓂᒃ ᐱᔾᔪᑎᖃᓪᓗᐊᑕᕐᓂᐊᕐᒪᑦ: ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒦᑦᑐᖅ ᐱᓕᕆᐊᖑᔪᓐᓇᖁᓪᓗᒍ ᑎᑎᕋᖅᓯᒪᓂᓕᒃ 32-ᒥ ᐃᒃᐱᒋᔭᐅᑦᑎᐊᖁᓪᓗᒍ ᐊᔪᖅᓴᖅᑐᓂᒃ ᒥᒃᖠᒋᐊᖅᑎᑦᑎᓇᓱᖕᓂᖅ, ᓇᓗᓇᐃᖅᑕᐅᖁᓪᓗᒍᓗ ᑲᑐᔾᔨᖃᑎᒌᒍᑕᐅᖏᓐᓇᖅᑐᖅ ᐊᑐᓕᖅᑎᑕᐅᓂᕆᓂᐊᖅᑕᖓ ᒪᑭᒪᓂᖅ ᐸᕐᓇᐅᑎ: ᑲᑐᔾᔨᖃᑎᒌᒍᑕᐅᓪᓗᓂ ᐱᓕᕆᐊᖑᓇᓱᒃᑐᖅ ᐊᔪᖅᓴᕐᓂᖅ.

ᐱᕙᓪᓕᐊᑎᓪᓗᒍ ᓄᓇᕘᒥ ᓂᕿᓂᒃ ᓂᕆᔭᒃᓴᑦᑎᐊᕙᖕᓂᒃ ᖃᓄᖅᑑᕈᑕᐅᓇᓱᒃᑐᖅ ᐱᒋᐊᖅᑕᐅᓛᖅᑐᖅ ᑕᒪᑐᒪᓂ ᐅᑭᐊᒃᓵᒥ ᖃᔅᓰᖅᓱᑲᓪᓚᒡᓗᑎᑦ ᑲᑎᒪᕐᔪᐊᖅᐸᒡᓗᑎᑦ ᐃᓚᖃᕐᓂᐊᖅᖢᓂᓗ ᓄᓇᕘᒥ ᓂᕿᓂᒃ ᓂᕆᔭᒃᓴᑦᑎᐊᕙᓕᕆᓗᑎᒃ ᑲᑎᒪᕐᔪᐊᓛᖅᑐᓂᒃ ᐋᖅᑭᒃᑕᐅᓯᒪᓪᓗᓂ ᔭᓄᐊᕆ 2013-ᒥ ᐃᖃᓗᖕᓂ. ᑲᑎᒪᕐᔪᐊᕐᓂᐅᓛᖅᑐᒧᑦ ᐃᓚᐅᓛᖅᑐᑦ ᑲᑐᔾᔨᖃᑎᒌᓛᖅᐳᑦ ᐱᕙᒌᔭᕐᓗᑎᑦ ᓂᕿᓂᒃ ᓂᕆᔭᒃᓴᑦᑎᐊᕙᓕᕆᓗᑎᑦ ᓄᓇᕘᒧᑦ, ᓴᖅᑭᑕᐅᔪᒃᓴᐅᑕᐅᓪᓗᓂ 2013 ᐅᐱᕐᖔᒃᑯᑦ.

ᑎᓴᒪᓄᑦ ᑕᖅᑭᓄᑦ ᖃᓄᖅᑑᕈᑕᐅᔪᒪᔪᑦ ᐱᓕᕆᔾᔪᓯᖅ ᑲᑎᑎᔾᔪᑕᐅᖃᑦᑕᓛᖅᐳᖅ ᐃᓚᒋᔭᐅᔪᓂᒃ ᓄᓇᕘᒥ ᓂᕿᓂᒃ ᓂᕆᔭᒃᓴᑦᑎᐊᕙᓕᕆᔪᓂᒃ ᑲᑐᔾᔨᖃᑎᒌᓂᒃ ᑭᒡᒐᖅᑐᖅᑎᓂᒡᓗ ᑕᒪᐃᓐᓂᒃ ᑲᑐᔾᔨᖃᑎᒌᒡᕕᐅᔪᓂᒃ ᐱᓕᕆᐊᖑᔪᒥᒃ ᐱᓕᕆᖃᑕᐅᔪᓂᒃ, ᑐᓂᐅᖅᑲᐅᑕᐅᔪᓂᒃ ᐊᒻᒪ ᓂᕆᔭᐅᕙᒃᑐᓂᒃ ᓂᕿᓂᒃ ᓄᓇᕘᒥ, ᐃᓚᒋᔭᐅᓗᑎᒃ ᐊᖑᓇᓱᒃᑏᑦ, ᓂᕿᓕᕆᔩᑦ, ᓂᐅᕕᖅᑎᑦᑎᔩᑦ, ᐃᓄᐃᑦ ᑲᑐᔾᔨᖃᑎᒌᑦ, ᒐᕙᒪᒃᑯᓐᓂ ᐱᓕᕆᔩᑦ, ᓄᓇᓖᑦ ᐊᒻᒪ ᒐᕙᒪᐅᙱᑦᑐᑦ ᑲᑐᔾᔨᖃᑎᒌᑦ.

ᓄᓇᕘᒥ ᓂᕿᓂᒃ ᓂᕆᔭᒃᓴᑦᑎᐊᕙᓕᕆᓪᓗᑎᒃ ᑲᑐᔾᔨᖃᑎᒌᑦ ᑭᒡᒐᖅᑐᖅᑎᖃᖅᐳᑦ 7-ᐅᔪᓂᒃ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᙶᖅᑐᓂᒃ, ᓄᓇᕗᑦ ᑐᙵᕕᒃᑯᓐᓂ ᐊᒻᒪ ᑕᒪᐃᓐᓂᒃ ᐱᖓᓱᓂᒃ ᐊᕕᒃᓯᒪᓂᕐᒥ ᐃᓄᐃᑦ ᑲᑐᔾᔨᖃᑎᒌᓂᒃ. ᑲᑐᔾᔨᖃᑎᒌᒍᑕᐅᔪᖅ ᐃᒃᓯᕙᐅᑕᖃᖅᑐᖅ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓄᓕᕆᔨᒃᑯᖏᓐᓂᒡᓗ ᐊᒻᒪ ᓄᓇᕗᑦ ᑐᙵᕕᒃᑯᑦ ᐃᓅᓯᓕᕆᔨᖏᓐᓄᑦ.

ᓄᓇᕘᒥ ᑲᑎᒪᕐᔪᐊᕈᑕᐅᔪᖅ ᐊᔪᖅᓴᖅᑐᑦ ᐱᔾᔪᑕᐅᓪᓗᑎᒃ ᐊᐅᓚᑕᐅᕗᖅ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓄᓇᕗᑦ ᑐᙵᕕᒃᑯᓐᓂ; ᑕᐃᒪᐃᒃᑲᓗᐊᖅᑎᓪᓗᒍ, ᐃᓚᒋᔭᐅᓕᕐᓂᖅ ᒪᒃᐱᖅᓯᒪᑦᑎᐊᖅᐳᖅ ᓇᓕᐊᖕᓄᑐᐃᓐᓇᖅ ᑲᑐᔾᔨᖃᑎᒌᒡᕕᐅᔪᓄᑦ ᐃᑲᔪᕈᒪᓇᔭᖅᑐᓄᑦ ᒥᒃᖠᒋᐊᖅᑎᑦᑎᓂᕐᒥᒃ ᐊᔪᖅᓴᕐᓂᖅ ᐱᔾᔪᑕᐅᓗᓂ ᓄᓇᕘᒥ ᓇᓗᓇᐃᖅᑕᐅᓯᒪᔪᖅ ᒪᑭᒪᓂᖅ ᐸᕐᓇᐅᑎᒥ ᒪᓕᒡᓗᒍ.

ᑐᑭᓯᒋᐊᒃᑲᓐᓂᕈᒪᒍᔅᓯ ᐅᑯᐊ ᖃᐅᔨᒋᐊᕐᕕᐅᔪᓐᓇᖅᑑᒃ:

ᐃᒪᓕ ᕗᑦᔅ
ᐱᕙᓪᐊᓕᔪᓂᒃ ᑎᑎᕋᖅᑎ
ᓯᕗᓕᖅᑎᐅᑉ ᑎᑎᕋᕐᕕᐊᓂ
ᓄᓇᕗᑦ ᒐᕙᒪᖓ
867-975-5059
ᑭᐅᕆ ᒪᒃᓚᔅᑭ
ᑐᓴᐅᒪᔪᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ
ᐊᐅᓚᑦᑎᕕᖕᒥ
ᓄᓇᕗᑦ ᑐᙵᕕᒃ
ᐅᖃᓘᑖ: 867-975-4914
ᑕᒫᓂᕐᕆᔪᒃᑯᑦ: 867-222-2893
ᐊᑭᖃᙱᑦᑐᒃᑯᑦ: 1-888-646-0006