IQALUIT, Nunavut (Tattiaqnaqtuq 24mi, 2012mi) – Hivulliqtiuyuq Eva Aariak Nunavut Tun’ngavikkutlu Angiyuqaakyuangat Cathy Towtongie ublumik atiqtuivaktun Titiragiikhimayuq Ilihimayukhanik talvani Nunavut Katimaqyuarutmi talvuuna Ilingaiyaingnikkut taima tuhaqtitihimayut pivalliatjutikhaq tapfuminga Nunavut Niqautingnik Munagitjutikhangit Hanaqitjutikhanikkut.

Tamna Titiragiikhimayuq Ilihimayukhaq angirutigiyauyuq talvuuna havaqatigiikniaqtun kavamavut NTI-kutlu aulatitiyaangat Tamna Makimaniq Pangnairutikhaq: Taima Ilaqatigiiknir Upatutikhaq talvuuna Ilingaiyaingnikkut. Tamna aulatititjutikhaq tapfuminga Nunavut Niqautingnik Munagitjutikhangit Hanaqitjutikhaq Katimayiingit taimalu pangnairutikhaq talvuuna nunaqyuaptingni hanaqitjutihaqyuaq talvuuna niqautinik munagitjutikhakkut hivunigiluaqniaqtaat talvani Tamna Makimaniq Pangnairutikhaqni.

“Una Titiragiikhimayuq Ilihimayukhaq ikayuutikhaq Nunavut Kavamangit akhuqhimaaqhutik havaqatigiiknikkut ilagiiqatiginiaqtait ikikliyumiqtitiyaangat ilingaiyaingnikkut, angikliyumiqtitilugulu kiutjutikhangit, ihivriuqtiaqlugit naunaiyagiikhimayut, taimalu aulahimaaqhimayukhaq hivunikharnut kavamangit,” uqallaktuq Hivulliqti Eva Aariak. “Taima ilanga una havagumayaingit, havakhimaaqniaqtugut niqautinik munagitjutikhakkut hanaqitjutikhaq taima nalvaaqhiyaangat ihuaqhaitjutikhaqnik talvuuna amigiyauluaqtukhanik inuuhirinikkut hanaqitjutikhangit.”

“Nunavut Tun’ngavikkut quviahuktun aulatitiyaangat ilagiikhaqnik Nunavut Kavamangit talvuuna ilingaiyaingnikkut ikiklilaarutikhaqnik Nunavunmi. Quviagiyauvaktavaut nunalaani ilaunginaqtunik, taima iniqtigivakamik katimayukhanik tapfuminga Tamna Makimaniq Pangnairutikhaqnik, taima nigiuhimaaqniaqtugut havaqatigiyaangat ilagiikpun aulatitiyaangat Nunavunmi hanattiaqhimayuq ihuaqhaitjutikhaqnik. Nunavut Tun’ngavikkut itqumayumik ihumayut taimalu ihuaqtumik aulahimaaqtukhauyut ihuaqhaitjutikhat taima namaktumik ikayugiangat ayuknautikhaqnik Inungnut. Hanaqitjutikhat aulahimaaqtukhat hadja talvuuna niqautikhaqnik munagitjutikhainik,” uqallaktuq Angiyuqaakyuaq Towtongie.

Tamna Titiragiikhimayuq Ilihimayukhanik naunairutiqaqtuq taima Nunavut Katimaqyuarutmi talvuuna Ilingaiyaingnikkut piqaqniaqtuq malrungnik ihumagiyauyukhaqnik hanaqitjutikhaqnik:
havakhimaaqlutik atuqtauyukhat talvani Naunaitkutim Iluaniitun 32mi talvanga Nunavut Angirutainituni taima pittiaqnikkut ilingaiyaingnikkut ikiklilaaqnikkut, taimalu aulahimaaqlutik havaqatigiiklutik aulatitihimaagiangat Tamna Makimaniq Pangnairutikhaqni: Ilaqatigiiknir Havaaqhaq talvuuna Ilingaiyaingnikkut Ikikliyumirutikhaq.

Pivalliatjutikhaq talvuuna Nunavut Niqautinik Munagitjutikhaq Hanaqitjutikhaq aulavaktuq uvani ukiahaliktiluni taima kaffiunik katimatjutikhaqnik ilautitivakhugitlu Nunavut Niqautinik Munagitjutikhangit Katimaqyuarutikhaanik aulaniaqtuq talvuuna Upluqtuhinirvia 2013mi talvani Iqalungni. Katimaqyuarutikhat ilauniaqtun havaqatigikniaqtun pangnairutikharnik talvuuna niqautinik munagitjutikhaqnik Nunavunmiunut, taima tuhaqtitauniaqtuq talvuuna upin’ngakhaqmi 2013mi.

Tamna hitmanik tatqikhiutinik hanaqitjutikhaq aulatjutikha qaritiniaqtuq ilauyukhanik talvunga Nunavut Niqautikhanik Munagitjutikhat Katimayiihaqnik ilauyukhaniklu tamainin havakvingnin ihumaliukhimayut talvuuna aulatjutingnikkut, tuniqhainikkut nigiyaunginaqtunlu niqqiit nunaqyuaptingni, ilauqaqniaqtun anguyuktunik, nautiinginaqtunik, niuvrutiinaqtunik, Inuit Katitjutiqatigiini, kavamanmi havakviini, nunalaani, nanminiqaqtuniklu havagviit.

Tamna Nunavut Niqautikhanik Munagitjutikhat Katimayiit iniqtigivaktun ilauyukhanik saivanik Nunavut Kavamanmi havakviinin, Nunavut Tun’ngavikkutlu taimalu pingahuuyunik Aviktuqhimayuni Inuit Katitjutiinin. Tamna katimayiiluaq ihivautalik talvanga Nunavut Kavamanin Havakviinin munarhiliqiyikkut Inuuhiriknirmullu Nunavut Tun’ngavikkungitlu Inuuhiriliqiyut Pitquhiliqiyunutlu Pivalliatjutiliqiyitkuni.

Tamna Nunavut Katimaqyuarutmi talvuuna Ilingaiyaingnikkut aulatitihimavaktuq tapkuninga Nunavut Kavamangit Nuanvut Tun’ngavikkutlu; kihiani, ilauyukhat angmaumayut kituminliqaak havakvingni taima aituimayut talvuuna ikiklilaaqnirmut ilingaiyaingnikkut Nunavunmi taima naunaiyagiikhimayuq talvani Tamna Makimaniq Pangnairutikhaqni.