ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᕆᑲᐃᓐᓇᖅᑕᖓ ᔭᐃᒥᓯ ᐃᑦᑐᓗᒃ ᐅᖃᖅᑲᐅᔪᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᑐᓗᐊᕈᑎᒋᓯᒪᔭᖏᑦ ᓈᒻᒪᖏᓪᓚᕆᒋᐊᖏᑕ.

“ᓈᒻᒪᖏᓪᓚᕆᑦᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑮᓇᐅᔭᖅᑐᓗᐊᖅᓯᒪᓂᖏᑦ $110 ᒥᓕᐊᓐᓂᒃᑲᓐᓂᕐᓂᒃ ᑖᒃᓱᒪ $300 ᒥᓕᐊᓐ ᓴᓂᕐᕙᖅᑕᐅᓚᐅᖅᓯᒪᔪᑦ ᓄᓇᕗᒻᒥ ᐃᒡᓗᓕᐅᖅᑕᐅᔪᑎᒃᓴᐃᑦ. ᒪᒥᐊᓇᖅᑑᒐᓗᐊᖅ, ᑭᓯᐊᓂ ᑖᓐᓇ ᐆᒃᑑᑕᐅᔪᓐᓇᖅᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑎᑭᐅᑎᖃᑦᑕᖏᓐᓂᒃ ᐃᓄᖕᓄᑦ ᐱᔭᐅᔭᕆᐊᓕᖕᓂᒃ.” ᐅᖃᖅᑐᖅ ᐃᑦᑐᓗᒃ.

ᑭᖑᓂᑦᑕᐅᑎᒋᐊᓂ ᑖᒃᑯᐊ $200 ᒥᓕᐊᓐᓂ ᐃᒡᓗᓕᐅᕈᑎᒃᓴᐃᑦ 2006-ᒥ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᕿᒪᐃᓚᐅᖅᑐᑦ ᐃᒡᓗᓕᕆᓂᕐᒧᑦ ᑲᑐᔾᔨᖃᑎᖃᕐᓂᕐᒥᓂᒃ ᑐᙵᕕᒃᑯᓐᓂ, ᓇᓗᓇᐃᖅᓯᒪᔪᖅ 2004 ᓄᓇᕗᑦ ᒐᕙᒪᒃᑯᑦ/ᓄᓇᕗᑦ ᑐᙵᕕᒃ ᑎᒥᖓ 10-ᓄᑦ ᐊᕐᕌᒍᓄᑦ ᐃᓄᖕᓄᑦ ᐃᒡᓗᓕᕆᓂᕐᒧᑦ ᐸᕐᓇᐅᑎᓂ. ᒐᕙᒪᒃᑯᑦ ᓂᕈᐊᖔᓚᐅᕐᒪᑕ, ᒪᓕᙱᑦᑐᑎᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᐅᑉ ᐃᓗᐊᓂ ᐃᓛᒃᑰᖓ 32-ᒥᒃ, ᐱᕙᓪᓕᐊᑎᑦᓯᓂᖅ ᐊᒻᒪ ᐊᑐᓕᖅᑎᑦᑎᕙᓪᓕᐊᓂᖅ ᓄᓇᕗᑦ ᐃᒡᓗᓕᕆᓂᕐᒧᑦ ᐸᐸᑦᓯᔩᑦ ᐱᒋᐊᕈᑎᖓᓐᓂᒃ ᐃᓚᐅᑎᑦᓯᒐᑎᒃ ᐃᓄᖕᓂᒃ. ᓱᕋᐅᑎᓯᒪᓪᓚᕆᑦᑐᖅ ᐊᒻᒪ ᐊᒃᑐᐃᓯᒪᓂᒻᒪᕆᖓ ᑮᓇᐅᔭᐃᑦ ᐊᓯᐅᔭᐅᓯᒪᔪᑦ. .

“ᐃᓚᐅᖃᑕᐅᓂᑦᑎᒍᑦ ᐊᐅᓚᑦᓯᖃᑕᐅᔭᕆᐊᖃᕐᓂᕗᑦ ᒐᕙᒪᑐᖃᒃᑯᓃᖔᖅᑐᓂᒃ ᑮᓇᐅᔭᓂᒃ ᓯᖁᒥᑕᐅᓯᒪᖕᒪᑦ. ᒐᕙᒪᒃᑯᑦ ᓱᓕᓂᕋᓚᐅᖅᓯᒪᔪᑦ ᐱᒋᐊᖅᑎᑦᓯᕙᓪᓕᐊᓕᕐᒪᑕ ᐃᓕᓐᓂᐊᑎᑦᓯᓂᕐᒥᒃ ᐊᒻᒪ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓯᓐᓈᒃ ᐃᓕᓐᓂᐊᑎᑦᓯᓂᐊᕐᓗᑎᒃ ᐃᒡᓗᓕᐅᕐᓂᕐᒥ. ᑕᐃᒪᐃᓯᒪᙱᑦᑐᑦ ᐊᒥᓱᓂᒃ ᓂᕆᐅᒋᔭᐅᔪᓂᒃ ᓯᖁᒥᒃᑎᓯᒪᔪᑦ. ᐊᒻᒪᓗ, ᐃᓛᒃᑯᑦ ᐃᒡᓗ ᐊᑭᖃᓪᓗᐊᕐᓂᖓ $525,000-ᓂᒃ ᐅᖓᑖᓅᓗᐊᖅᓯᒪᔪᖅ ᓂᕆᐅᒋᔭᐅᒋᐊᓐᖓᒪᐅᖅᑐᒥᒃ, ᐊᒻᒪᓗ ᐱᓇᓱᐊᕐᓂᖅ ᓴᐳᔾᔭᐅᓯᒪᒋᐊᖃᓚᐅᕋᓗᐊᕐᒪᑦ ᐊᑭᑦᑐᐸᓪᓕᐊᓂᐅᔪᓄᑦ,” ᐅᖃᖅᑐᖅ ᐃᑦᑐᓗᒃ.

ᑐᙵᕕᒃᑯᑦ ᐊᐱᕆᔪᑦ ᓄᓇᕗᑦ ᒐᕙᒪᒃᑯᓐᓂ ᐱᔾᔪᑎᖃᑦᑎᐊᖅᑐᒥᒃ ᐃᓚᐅᓕᖅᑎᑕᐅᒃᑲᓂᖁᓪᓗᒋᑦ ᑐᙵᕕᒃᑯᑦ ᐋᖅᑮᖁᓪᓗᒋᑦ ᐊᑲᐅᙱᓕᐅᕈᑕᐅᔪᑦ ᑕᒪᒃᓱᒧᖓ. ᑐᙵᕕᒃ ᐃᓱᒫᓘᑎᖃᕐᒪᑕ ᐱᓕᕆᔪᓐᓇᑦᓯᐊᕐᓂᖏᓐᓂᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ, ᐊᒻᒪ ᕿᒥᕐᕈᔭᐅᑦᓯᐊᖁᔨᓪᓗᑎᒃ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ ᐃᓚᒋᓗᒋᑦ ᖃᓄᖅᑑᕈᑎᒃᓴᐅᔪᓐᓇᖅᑐᑦ ᐃᒡᓗᖃᕆᐊᖃᕐᓂᖏᓐᓄᑦ ᓄᓇᕗᑦ ᐃᓄᖏᑦ.