ᓂᕈᐊᖅᑐᓕᕆᔨᒻᒪᕆᒃ ᑐᓴᖅᑎᑦᓯᔪᖅ ᓂᕈᐊᒐᑦᓴᑦ ᐊᑎᖏᓐᓂᒃ
ᓄᓇᕗᑦ ᑐᓐᖓᕕᒃ ᑎᒥᖓᑕ ᓂᕈᐊᖅᑐᓕᕆᔨᒻᒪᕆᖓ ᐋᑕᒥ ᐃᑦᑐᐊᑦᓯᐊᖅ ᐅᓪᓗᒥ ᑐᓴᖅᑎᓯᖅᑲᐅᔪᖅ ᓇᓗᓇᐃᕐᓯᒪᔪᓂᒃ ᓂᕈᐊᒐᑦᓴᐅᓂᐊᖅᑐᑦ ᐊᑎᖏᓐᓂᒃ ᑐᓐᖓᕕᒃᑯᑦ ᐊᖏᔪᖅᑳᖓᓄᑦ ᓂᕈᐊᒐᑦᓴᓂᒃ.
ᒥᑭᔪᒃ ᐋᑲᕙᒃ, ᓛᕆ ᐊᐅᓚᓗᒃ, ᓴᕕᑲᑕᖅ ᕗᐊᑦ, ᐸᑉ ᑲᓗᔭ, ᑲᐃᑲᐃ ᕐᑲᕆᑕᖅ, ᓄᕐᕋᖅ ᑯᒪᒃᓯᐅᑎᒃᓴᖅ, ᑕᐃᕕᑦ ᑯᓄᒃ, ᑲᑉᕆᐊ ᐊᓗᒐᔪ, ᐱᕐᓇᑎ ᒪᒃᐸ-ᓂᕕᐊᑦᓯᐊᖅ, ᑕᒻᓴᓐ ᒪᓃᑐᖅ ᐊᒻᒪᓗ ᑳᑎ ᑦᑳᒪᓚ ᑕᐅᑐᓐᖕᒋ ᑐᓂᓯᓚᐅᖅᑐᑦ ᓂᕈᐊᒐᑦᓴᓐᖑᕈᑎᒥᓂᒃ ᓂᕈᐊᕐᓂᕐᒧᑦ ᐊᖏᔪᖅᑳᑦᓴᒥᒃ.
ᑕᐅᑐᓐᖏ ᒫᓐᓇ ᓄᖅᑲᖓᓚᐅᐱᓪᓚᑦᑐᖅ ᑐᓐᖓᕕᒃᑯᓐᓂᒃ ᒪᓕᓪᓗᒋᑦ ᑐᓐᖓᕕᒃᑯᑦ ᓂᕈᐊᕐᓂᕐᒧᑦ ᒪᓕᒐᑦᓴᖁᑎᖏᑦ. ᑐᓐᖓᕕᒃᑯᓐᓂ ᐊᖏᔪᖅᑳᑉ−ᑐᒡᓕᐊ ᔭᐃᒥᓯ ᐃᑦᑐᓗᒃ ᒫᓐᓇ ᑐᓐᖓᕕᒃᑯᓐᓂ ᐊᖏᔪᖅᑳᒧᑦ ᑭᖑᕝᕕᐅᑎᓯᒪᓂᐊᖅᑐᖅ ᓂᕈᐊᖅᑐᓕᕆᓐᓇᕐᓂᖓᓂ.
ᐃᓄᓪᓚᑦᑖᑦ (ᐃᓄᐃᑦ) ᑲᓇᑕᒥᐅᑕᐅᔭᕆᐊᓖᑦ, 16−ᓂᒃ ᐅᑭᐅᖅᑖᕐᓯᒪᓗᑎᒃ ᐅᖓᑖᓂᓘᓐᓃᑦ, ᐊᒻᒪᓗ ᐊᑎᖃᖃᑕᐅᓗᑎᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ ᓂᕈᐊᕈᓐᓇᖁᓪᓗᒋᑦ ᓂᕈᐊᕐᓂᐅᓂᐊᖅᑐᒥ.
ᓂᕈᐊᕐᓂᐅᓂᐊᖅᑐᖅ ᐊᖏᔪᖅᑳᒥᒃ ᑏᓰᒻᕙ 10, 2012. ᓂᕈᐊᖅᑏᑦ ᓂᕈᐊᕐᐸᒌᕈᓐᓇᓂᐊᕐᒥᔪᑦ ᓂᕈᐊᕐᓇᐅᑉ ᓯᕗᓂᐊᒍᑦ ᑏᓰᒻᕙ 3, 2012, ᐊᒻᒪᓗ ᓂᕈᐊᖅᑎᑕᐅᔪᒪᔪᑦ ᐊᓯᒥᓄᑦ ᓂᕈᐊᖅᑎᑕᐅᔪᓐᓇᓂᐊᕐᒥᔪᑦ (proxy).
