ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖓᖅᑳᑉ ᑐᖏᓕᐊ ᔭᐃᒻᔅ ᐃᑦᑐᓗᒃ ᐅᑉᓗᒥ ᐅᖃᖅᑐᖅ ᓴᖅᑭᑎᓂᒃᑯᑦ ᐅᑯᓇ ᒥᐊᓕ ᕗᐃᒪᓐ ᐅᑯᓇᓂ ᐊᔮᔮ ᑐᓴᐅᒪᖃᑦᑕᐅᑎᓕᕆᔨᖏᓐᓂᒃ ᓕᒥᑎᑦ. ᐱᔨᑦᑎᕐᓂᐊᓕᖅᑐᑦ ᐊᖓᔪᖅᑳᖑᓕᕐᓗᓂ ᓂᕈᐊᖅᑐᓕᕆᓂᕐᒧᑦ ᐊᐅᓚᑦᑎᓂᕐᒥᑦ ᑲᒪᔨᐅᓗᓂ ᐅᑯᓄᖓ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᓂᕈᐊᕐᓂᕆᓛᓕᕐᒥᔭᖓᓐᓄᑦ ᐊᖓᔪᖅᑳᒧᑦ ᑎᓴᑉᐸ 12, 2016.

ᓂᕈᐊᒐᒃᓴᓐᖑᖅᑎᑦᑎᓂᖅ ᐅᓪᓗᖏᑦ ᓂᕈᐊᕐᓂᕐᒧᑦ ᐊᐅᓚᑕᐅᓛᖅᑐᑦ ᐱᒋᐊᕐᓗᒍ ᐊᒃᑑᑉᐱᕆ 31 – ᓄᕕᐱᕆ 4, 2016. ᐊᔪᖏᑎᑕᐅᔪᑦ ᓂᕈᐊᒐᒃᓴᐅᓂᕐᒧᑦ ᐊᒻᒪᓗ ᓂᕈᐊᖅᑏᑦ ᑲᓇᑕᒥᐅᑕᓪᓚᕆᐅᔭᕆᐊᓖᑦ ᓄᓇᖃᕐᓗᑎᒃ, ᐊᒻᒪᓗ ᐅᑭᐅᖃᕐᓗᑎᒃ 16-ᓂᒃ, ᐊᒻᒪᓗ ᐊᑎᓕᐅᖃᑕᐅᓯᒪᓗᑎᒃ ᓄᓇᑖᖃᑕᐅᓯᒪᓂᕐᒧᑦ ᒪᓕᒃᓗᒋᑦ ᐅᑯᐊ ᓄᓇᕗᒥ ᐊᖏᕈᑏᑦ. ᓂᕈᐊᒐᒃᓴᓄᑦ ᐃᓗᓪᓕᖅᑐᕆᐊᓖᑦ ᑕᑕᑎᕐᓗᒋᑦ ᐱᔭᐅᔪᓐᓇᖅᑐᑦ ᐅᑯᓇᖓᑦ ᓂᕈᐊᖅᑐᓕᕆᓂᕐᒧᑦ ᐊᐅᓚᑦᑎᓂᕐᒥᑦ ᑲᒪᔨᒥᑦ ᓄᓇᓕᖕᓂ ᑐᓴᐅᒪᑎᑦᑎᑦᔨᐅᔪᓂᒃᓗ, ᐅᕝᕙᓘᓐᓃᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᖃᕆᑕᐅᔭᑎᒍᑦ ᑕᑯᓇᒃᕕᖏᓐᓂ ᓂᕈᐊᒐᒃᓴᖑᖅᑎᑦᑎᓂᕐᒧᑦ ᐅᒃᑯᐃᖅᐸᑦ ᐱᒋᐊᕈᑎᖏᑦ.

ᓂᕈᐊᒐᒃᓴᐅᔪᑦ ᐱᔭᒃᓴᓕᑦ ᓇᓗᓇᐃᖅᓯᑦᑎᐊᕐᓂᕐᒥᑦ ᑕᒪᒃᑯᐊ ᓂᕈᐊᒐᒃᓴᐅᓂᕐᒧᑦ ᐸᐃᑉᐹᑦ ᐊᐅᓪᓚᖅᑎᑕᐅᓗᑎᒃ ᐅᑯᓄᖓ ᓂᕈᐊᖅᑐᓕᕆᓂᕐᒧᑦ ᐊᐅᓚᑦᑎᓂᕐᒥᑦ ᑲᒪᔨᒧᑦ ᐊᒻᒪᓗ ᖃᐅᔨᒪᓗᓂ ᐱᔭᐅᓐᓂᖅᐸᑦ ᐊᐅᓪᓚᖅᑎᑕᖓ. ᓂᕈᐊᒐᒃᓴᖑᖅᑎᑦᑎᓂᕐᒧᑦ ᐊᐃᑉᐹᑦ ᐱᔭᐅᖏᑉᐸᑕ ᐃᓱᓕᕝᕕᐊ ᐅᓪᓗ ᖄᖏᖅᑎᓪᓗᒍᓄ, ᓂᕈᐊᒐᒃᓴᐅᓇᔭᓚᐅᖅᑐᑦ ᐊᔪᖅᑎᑕᐅᓂᐊᖅᑐᑦ ᐆᒃᑐᕐᓂᕐᒥᑦ ᓂᕈᐊᕐᓂᕐᒧᑦ. ᓂᕈᐊᒐᒃᓴᑦ ᐃᒪᓐᓇᐃᖅᑐᐃᓐᓇᕆᐊᖃᖅᑐᑦ ᓴᑐᐃᓗᑎᒃ ᓇᖕᒥᓂᖅ ᓂᕈᐊᒐᒃᓴᐅᓂᕐᒧᑦ ᐸᐃᑉᐹᖁᑎᖏᓐᓂᒃ ᑎᑭᐅᑎᓗᒍ ᓄᕕᐱᕆ 7, 2016 5-ᒨᖅᐸᑦ ᐅᓐᓄᒃᓴᒃᑯᑦ ᓄᓇᓕᐅᑉ ᖃᐅᔨᓴᐅᑎᖏᑦ ᒪᓕᒃᓗᒋᑦ.

ᓂᕈᐊᖅᑏᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᓂᕈᐊᕐᓂᕆᓂᐊᖅᑕᖓᓐᓂ ᐊᖓᔪᖅᑳᒃᓴᒧᑦ ᓂᕈᐊᕈᓐᓇᖅᑐᑦ ᐊᑐᕐᓗᑎᑦ ᐊᑕᐅᓯᕐᒥᑦ ᐅᑯᓇᖓᑦ ᑕᓪᓕᒪᐅᔪᓂᒃ ᐊᔾᔨᒌᖏᑦᑐᑦ ᐊᑐᖅᑕᐅᔪᓐᓇᖅᑐᑦ ᒪᓕᒃᓗᒋᑦ, ᐃᓚᒋᔭᐅᕗᑦ ᐅᑯᐊ ᓯᕗᓂᐊᓂ ᓂᕈᐊᕐᓂᖅ ᑎᓴᑉᐸ 5, 2016, ᓄᓇᓯᐅᑎᒃᑯᑦ ᐊᐅᓚᔪᒃᑯᑦ ᓂᕈᐊᕐᓂᖅ, ᐊᓯᐊᓄᑦ ᓂᕈᐊᕈᔾᔭᐅᓂᖅ, ᐊᑐᕐᓗᓂ ᑎᑎᒃᖃᑎᒍᑦ-ᓂᕈᐊᕈᑎᓄᑦ ᐅᕝᕙᓘᓐᓃᑦ ᓂᕈᐊᕐᓇᐅᑉ ᐅᓪᓗᐊᓂ ᑎᓴᑉᐸ 12, 2016.

ᑐᑭᓯᒃᑲᓐᓂᕈᒪᒍᕕᑦ :

ᒥᐊᓕ ᕗᐃᒪᓐ
ᐊᖓᔪᖅᑳᖅ ᓂᕈᐊᖅᑐᓕᕆᓂᕐᒧᑦ ᑲᒪᔨ
ᐅᖄᓚᐅᑎᐊ: (867) 979-6554
ᐊᑭᖃᖏᑦᑐᖅ: 1-844-979-6554

www.tunngavik.com