(ᔫᓂ 30, 2021 – ᐃᖃᓗᐃᑦ, ᓄᓇᕗᑦ) ᑕᕝᕙᓂ ᑲᓇᑕᐅᑉ ᐅᓪᓗᖓᓂ, ᔪᓚᐃ 1, ᑲᓇᑕᒥᐅᑦ ᐱᖓᓱᓂ ᐅᑭᐅᖅᑕᖅᑑᑉ ᐊᕕᑦᑐᖅᓯᒪᓂᖏᓐᓂ ᐊᔾᔨᐅᖏᑦᑐᒥᒃ ᐱᕕᒃᓴᖃᖅᑎᑕᐅᓂᐊᖅᑐᑦ ᑕᑯᓐᓇᕐᓗᑎᒃ ‘ᑕᑯᓐᓇᕈᒥᓇᖅᑐᒥᒃ’   ᐃᓅᓯᕆᔭᐅᓚᐅᖅᑐᒥᒃ ᑕᑯᓐᓇᕐᓗᑎᒃ, “ᑲᑉᐱᐊᑕᐃᑦᑐᑦ/Fearless,” ᑐᑭᓯᑎᑦᓯᒍᑏᑦ ᐱᙳᖅᑎᑕᐅᓚᐅᕐᓂᖓᓂᒃ ᓄᓇᕗᑦ ᓂᐱᖏᑎᒍᑦ ᐃᓄᐃᑦ ᐋᔩᕋᖅᑏᑦ, 30−ᓂᒃ ᐊᕐᕌᒍᓂᒃ, ᐊᑐᖅᑕᐅᓚᐅᖅᓯᒪᙱᑦᑐᒥᒃ ᐊᑐᓚᐅᖅᑐᑦ ᐊᒻᒪᓗ ᐊᓯᔾᔩᓪᓗᑎᒃ ᓄᓇᙳᐊᖓᓂᒃ ᑲᓇᑕ.

‘ᑲᑉᐱᐊᑕᐃᑦᑐᑦ/Fearless’ ᑕᑯᓐᓇᕋᑦᓴᓕᐊᕆᓚᐅᖅᑕᖏᑦ 2018-ᒥ ᐃᓄᐃᑦ ᑐᓴᐅᒪᔾᔪᑎᓕᕆᔨᒃᑯᑦ ᓕᒥᑎᑦ (ICSL), ᑎᒥᖁᑎᖓ ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ ᑯᐊᐳᕇᓴᓐ (IBC) ᐊᒻᒪᓗ ᑎᓕᓯᔾᔪᑕᐅᓯᒪᓪᓗᓂ ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᙵᕕᒃ) ᓈᖕᒪᓈᖅᑕᐅᖁᓪᓗᒍ 25-ᖃᓕᕐᓂᖓᓂᒃ ᓇᓪᓕᐅᓂᖅᓯᐅᕈᑕᐅᑎᓪᓗᒍ ᐊᑎᓕᐅᖅᑕᐅᓚᐅᕐᓂᖏᓐᓄᑦ ᓄᓇᕗᑦ ᐊᖏᕈᑎᖏᑦ.

1960-ᖏᓐᓂ, ᒪᒃᑯᑐᕐᔪᐊᑦ ᐃᓄᐃᑦ ᓯᕗᓂᕐᒥᓂᒃ ᑕᑯᓚᐅᖅᑐᑦ ᐊᑐᖅᑕᐅᒍᓐᓃᐸᓪᓕᐊᓂᐊᓕᕐᓂᖏᓐᓂᒃ ᐃᓕᖅᑯᓯᕐᒥᓂᒃ ᐊᒻᒪᓗ ᑕᑯᓐᓇᖅᑐᑎᒃ ᐊᖓᔪᖅᑳᒥᓐᓂᒃ ᐊᒻᒪᓗ ᐊᑖᑕᑦᓯᐊᒃᑯᒥᓂᒃ/ᐊᓈᓇᑦᓯᐊᒃᑯᒥᓂᒃ ᐃᓕᕋᓱᐊᖃᑦᑕᖅᑐᓂᒃ. ᐊᒥᓲᖏᑦᑐᑦ ᒪᓂᑐᐃᓐᓇᐅᖏᑦᑐᑦ ᒪᒃᑯᑦᑐᑦ ᐃᓄᐃᑦ ᐸᕐᓇᓕᓚᐅᖅᑐᑦ ᓵᙵᑦᓯᓂᐊᕐᓂᕐᒥᓂᒃ ᓱᕋᑦᓯᕙᓪᓕᐊᔪᓂᒃ ᐃᓕᖅᑯᓯᕐᒥᒃ ᓱᓇᖁᑎᖃᙱᑦᑐᓂᒃ ᖃᓪᓗᓈᕈᖅᑎᑦᓯᓇᓱᐊᕐᓂᒥᓪᓗ. ᑕᑯᓐᓇᒐᕆᓚᐅᖅᑕᖓ − ᓄᓇᑖᕐᓂᕐᒧᑦ ᐊᖏᖃᑎᒌᒍᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᓴᖅᑭᕈᑕᐅᔪᓐᓇᕋᔭᖅᑐᒥᒃ ᓄᑖᒥᒃ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᕐᒥ ᑕᐃᔭᐃᔪᒥᒃ ᓄᓇᕗᑦ. “ᑲᑉᐱᐊᑕᐃᑦᑐᑦ” ᑕᑯᔭᐅᑎᑦᓯᒍᑎ ᐃᒧᔫᒥᔭᕐᓇᓂᒃ, ᑕᐸᐃᕐᓇᖅᑐᓂᒃ, 30−ᓂᒃ ᐊᕐᕌᒍᓂᒃ ᐅᓇᑕᕐᓂᐅᓚᐅᖅᑐᒥᒃ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᐊᓯᔾᔨᕈᑕᐅᓚᐅᖅᑐᒥᒃ ᑲᓇᑕ ᑐᙵᕕᔾᔪᐊᖓᓄᑦ. ᐅᓂᒃᑳᑎᓪᓗᒋᑦ ᓂᐱᖏᑎᒍᑦ ᑕᐃᒃᑯᐊ ᑲᓇᑕᒥ ᐊᑐᖅᑕᐅᓚᐅᖅᓯᒪᙱᑦᑐᒥᒃ ᓴᖅᑮᓚᐅᖅᑐᑦ.

“ᐊᐅᓚᔾᔭᐃᖏᒃᑯᑦᑕ, ᖃᓚᕋᑕᐅᑐᐃᓐᓇᓂᐊᖅᑐᒍᑦ ᓱᓇᐅᑎᑕᐅᙱᓪᓗᑕ. ᔭᒐᐃᓂᐊᖅᑕᕗᑦ ᐃᓕᖅᑯᓯᕗᑦ. ᖃᐅᔨᒪᓕᕋᑦᑕ ᓇᖏᕈᓐᓇᓂᑦᑎᓐᓂᒃ, ᓄᑭᖃᙱᑦᑐᑐᐃᓐᓇᐅᒍᓐᓃᓚᐅᖅᑐᒍᑦ.” ᐊᐅᓚᔫᓕᐅᒐᕐᒥ, ᑕᐃᕕᑦ ᐊᒡᓘᒃᑲᖅ, ᐊᐃᕙᔨ, ᓇᓗᓇᐃᔭᐃᔪᖅ ᐊᑦᓱᕈᕆᐊᖃᕐᓂᖏᓐᓂᒃ ᐃᓄᐃᑦ ᐸᕐᓇᓯᒪᑦᓯᐊᖁᓪᓗᒋᑦ ᐱᒋᐊᓕᓵᖅᑎᓪᓗᒋᑦ 1970−ᖏᑦ.

“ᖁᕕᐊᓱᑦᑐᖓ ᑖᓐᓇ ᑐᓴᖅᑎᓯᒍᑎ ᓂᐱᓕᐅᖅᑕᐅᓯᒪᒻᒪᑦ ᐱᖕᒪᕆᐊᓘᒻᒪᑦ ᐊᑐᖅᓯᒪᔭᑦᑎᓐᓂ ᐊᒻᒪᓗ ᑖᓐᓇ ᑲᑐᔾᔨᖃᑎᒌᓐᓂᖅ ᑐᑭᓯᒃᑲᓐᓂᕈᑕᐅᓂᐊᖅᑐᖅ ᑲᓇᑕᒥᐅᓄᑦ ᖃᐅᔨᒪᒍᑕᐅᓗᓂ ᐊᑐᖅᑕᐅᓯᒪᓂᖓᓂᒃ ᓄᓇᕗᑦ ᐊᒻᒪᓗ ᐊᑐᖅᑕᐅᓗᓂ ᑖᓐᓇ ᐊᐅᓚᔫᓕᐅᒐᖅ ᐃᓕᓐᓂᐊᕈᑎᒃᓴᐅᓗᓂ”, ᐅᖃᓚᐅᖅᑐᖅ ᒪᓃᑦᑐᖅ ᑖᒻᓴᓐ, ᐊᐅᓚᑦᓯᔨᒻᒪᕆᖓ ᑕᑯᓐᓇᕋᑦᓴᓕᕆᔨᒃᑯᑦ.

“ᑕᑯᓐᓇᓂᐊᖅᑲᑦ ᑲᑉᐱᐊᑕᐃᑦᑐᑦ − ᓱᓕᔪᖅ ᐅᓂᒃᑳᖅ ᖃᓄᖅ ᐃᓄᐃᑦ, ᓴᐃᓕᓂᖃᑦᓯᐊᖅᑐᑎᒃ, ᑲᔪᓯᑎᑦᓯᓯᒪᓂᖏᓐᓂᒃ ᐊᓯᔾᔩᓂᕐᒥᒃ ᓄᓇᙳᐊᒃᑯᑦ ᑲᓇᑕᒥᒃ ᓴᖅᑮᓪᓗᑎᒃ ᐊᐅᓚᑦᓯᕕᒋᔭᐅᔪᓐᓇᓂᐊᖅᑐᒥᒃ ᐅᓄᕐᓂᖅᓴᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖏᑎᒍᑦ ᐅᖃᕈᓐᓇᖅᑐᓂᒃ, ᐃᓄᒃᑑᖏᓐᓇᖃᑦᑕᖅᑐᓂᒃ!”, ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ, ᐊᓗᑭ ᑰᑦᑎᖅ

“ᑲᑉᐱᐊᑕᐃᑦᑐᑦ/Fearless” ᑕᑯᑦᓴᐅᓂᐊᖅᑐᑦ ᐃᓄᒃᑐᑦ ᖃᐅᔨᓴᐅᑦ 6-ᒥ (EST) ᐊᒻᒪᓗ 8-ᒥ ᐅᓐᓄᒃᑯᑦ (EST) ᔪᓚᐃ 1 ᓰᐲᓰ ᐅᑭᐅᖅᑕᖅᑐᒥ.

ᑖᓇ ᑕᕐᕆᔮᑦᓴᖅ “ᑲᑉᐱᐊᑕᐃᑦᑐᑦ/Fearless” ᐊᑐᐃᓐᓇᐅᓛᕐᒥᔪᖅ ᑕᑯᓐᓇᕋᑦᓴᖅ ᐃᓱᒪ ᑏᕖ ᐃᑭᐊᖅᑭᕕᖓᒍᑦ ᔪᓚᐃ 2−ᖑᓕᕐᒃᐸᑦ

ᐱᕙᓪᓕᐊᔪᑎᒍᑦ ᑕᑯᑦᓴᐅᓂᐊᖅᑐᓂᒃ ᑕᑯᒋᐊᕋᑦᓴᖅ ᐊᒻᒪᓗ ᐅᓂᒃᑳᖅᓯᐅᕈᒪᒍᕕᑦ ᑎᒍᒥᐊᖅᑎᓪᓗᐊᑕᕐᓂᒃ, ᖃᐅᔨᒃᑲᕈᓐᓇᖅᑕᑦ:

ᑭᐅᕋᓐ ᕙᓚᐅᕋᑎ

ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ

ᓄᓇᕗᑦ ᑐᙵᕕᒃ ᑎᒥᖓ

ᐅᖄᓚᐅᑖ: (867) 975-4900

www.tunngavik.com

ᑭᐅᕆᓐ ᐳᕆᓐᑎᔅ

ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᑦ

ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ ᑯᐊᐳᕇᓴᓐ

ᐅ: (226) 222-8742